Ulau maʼiki. Lö utötöna wa iʼameʼegö tödö sanandrösa ba agama. Umane khönia, ”Hadia niʼilau sanandrösa ba Zura Niʼamoniʼö?” Hizaʼi lö hede-hedenia. Ba gafuriata, ifatunö khögu wa Samaduhuʼö Yehowa mamania, ba no irai itutunö khönia mamania sanandrösa ba Zura Niʼamoniʼö. Börö me adöni dödögu, oya wanofugu khönia.

Matohugö fahuhuo bongi daʼö. Imane awögu wa moloʼö Sura Niʼamoniʼö, samatörö ulidanö andre Satana. (Yoh. 14:30) Te no aboto ba dödömi daʼa iʼotarai mböröta. Hizaʼi, awena urongo daʼa ba adöni dödögu. Nirongogu ba zi hauga fakhe, samatörö ulidanö yaʼia daʼö Lowalangi si sökhi tödö ba satulö. Hizaʼi moloʼö yaʼo, lö tefaudu daʼö ba gulidanö niʼilagu iadaʼa. Hewaʼae na me luo daʼö awena 26 fakhe ndröfigu, no uʼila ngawalö zi lö sökhi salua ba gulidanö.

Mböröta, bapagu zolohe köfa sihombo ba Angkatan Udara Amerika Serikat. Iʼotarai me iraono, uʼila wa tola manö alua perang nuklir, börö me tola muʼogunaʼö ia gofu hawaʼara. Me kuliah ndraʼo ba Kalifornia, ato ndra saradadu Amerika si fasuwö khö Vietnam. Fao göi ndraʼo khö ndra awö-awögu ba wamalua demo. Lagohi ndraʼaga ira folisi ba so ba dangara mbözi-bözima, laʼogunaʼö gas air mata ba wamofanö yaʼaga irege ambö mbaduma ba arakhagö lö maʼila lalama. Me luo daʼö, fawuka sibai zalua. So ösa zondröniaʼö ba politik nibunu, ba ato zamalua demo ba faʼafawuka. Faböʼö-böʼö mbua gera-era niha sanandrösa ba nifalua ndra samatörö. Me luo daʼö, abu sibai dödögu.

Me döfi 1970, ibörögö mohalöwö ndraʼo ba zinga nasi tanö yöu Alaska, ba ebua usöndra gefe. Aefa daʼö, utörö göfa sihombo weʼamöi ba London, uʼöli hondra ba uʼogunaʼö daʼö weʼamöi miraya. Lö tatu döröwagu. Ba zi hauga waŵa aefa daʼö, urugi ba Afrika. Ba wofanö-fanögu, no ato niha zi falukha khögu somasi teʼefaʼö moroi ba gabula dödö simane yaʼo.

 Andrö, me uʼila oya sibai gabula dödö ba gulidanö, fao dödögu ba niwaʼö Zura Niʼamoniʼö wa samatörö ulidanö andre yaʼia daʼö eheha si lö sökhi. Hizaʼi manofu dödögu, na simanö hadia halöwö Lowalangi?

Hauga waŵa aefa daʼö, usöndra wanema linia. Ba gafuriata, ibörögö aboto ba dödögu ba uʼomasiʼö niha si lö faröi ba wamosumange Lowalangi satulö, gofu hadia ia daha-taha nitaögöra.

Me mangawulido ba London, utelefo mama nawögu ba ibeʼe khögu Zura Niʼamoniʼö. Ba gafuriata me möido ba Amsterdam, Belanda, so samösa Zamaduhuʼö Yehowa sangila yaʼo me ubaso Zura Niʼamoniʼö barö haga wandru ba zinga lala. Aefa daʼö, oya ifatunö khögu sanandrösa ba Zura Niʼamoniʼö. Aefa daʼö, numalö ndraʼo ba Dublin, Irlandia, ba möido ba gödo ndraha Samaduhuʼö Yehowa. Utoko mbawandruhö, ba falukhado khö dalifusöda Arthur Matthews. Yaʼia andrö samösa dalifusöda satua-tua ba sonekhe. Uʼandrö khönia enaʼö ifahaʼö ndraʼo ba Zura Niʼamoniʼö, ba fao dödönia.

Uʼodödögö wamahaʼö yaʼo, ba mohiʼa dödögu ba wombaso ngawalö mbuku hegöi majalah nifazökhi ndra Samaduhuʼö. Tatu manö omasido göi wombaso Sura Niʼamoniʼö. Ba wamaigigu, no si möi fangomuso dödö daʼö. Ba gangowuloa, uʼila ndraono sigide-ide labeʼe wanema li ba wanofu sagabua, ba lö laʼila labeʼe wanema li simane daʼö ira niha sagatua-tua. Duma-dumania: Hana wa oya waʼalösökhi? Haniha Lowalangi? Hadia zalua na no aefa mate niha? Me luo daʼö, ha khö ndra Samaduhuʼö Yehowa fariawö ndraʼo börö me lö si faʼila khögu ba Irlandia. Börö wanolora, ibörögö uʼomasiʼö Yehowa ba omasido wamalua ohitö dödönia.

Tebayagö idanö ndraʼo me döfi 1972. Döfi aefa daʼö, ubörögö merintis ba faodo ba mbanua niha Keriso side-ide ba Newry, Irlandia Utara. Usewa sambua nomo nifazökhi moroi ba gara ba mbanua side-ide sahatö ba gahe hili. Ba kabu sahatö ba nomogu, so ösa zawi ba daʼö, asese ufahaʼö ndraʼo ba wamaʼema huhuo fönara. Na ufaigi, lö tebulö lafondrondrongo ndraʼo ba lagaga göra. Sindruhu sa, lö laʼila labeʼe mene-mene. Hewaʼae simanö, möi fanologu daʼö ba wamahaʼö yaʼo ba wamalua kontak mata ba niha sangondrasi. Me döfi 1974, mufataro ndraʼo tobali perintis istimewa, ba fao ndraʼaga Nigel Pitt. Tobali si fahuwu khögu ia irugi iadaʼa.

Me luo daʼö alua ”Wasuwöta Irlandia Utara”. So ösa niha sangumaʼö wa soi andrö ”soi safönu  bom hegöi ono wana”. Oya sibai wasuwöta ba lala, si fafana-fana, ba labom moto. Ebua sibai gabula dödö börö me fao politik hegöi agama. Niha Protestan hegöi Katolik, laʼila wa ira Samaduhuʼö Yehowa lö faʼawö ba politik, andrö wa tola möiga manuriaigö. Si toʼölönia, laʼila ira sokhö omo hawaʼara ba hezo so alua waʼudusa. Andrö wa lafangelama ndraʼaga enaʼö lö teʼala waʼaurima.

Hewaʼae simanö, no irai so zalua si möi famaʼalama. Me luo daʼö, yaʼo hegöi awögu perintis tanö böʼö sotöi Denis Carrigan manuriaigö ndraʼaga ba zi sambua banua. Lö hadöi Samaduhuʼö Yehowa ba mbanua andrö. Daʼa zi mendrua kalinia möido ba daʼö. Ba zi sambua kafe, so samösa ndra alawe samobahulu yaʼaga, iwaʼö wa yaʼaga andre saradadu moroi ba Inggris samauze banuara, börö me lö maʼila maʼogunaʼö note wehede Irlandia. Ataʼu sibai ndraʼaga. Me luo daʼö, hewaʼae na fahuwu ita khö ndra saradadu, hizaʼi tola manö labunu ita mazui lafana mbalö duhida. Möiga baero mabaloi motoma. Okafu sibai baero ba lö hadöi niha-niha ba daʼö. Hizaʼi, ba zi lö madöna-döna so moto solombase föna kafe andrö. Aefa daʼö, möi baero ndra alawe samobahulu yaʼaga no mege, ba fahuhuo ia khö zi darua ira matua si so ba moto andrö ba ituturu ndraʼaga. Laʼohe motora ba gamaudu si so yaʼaga, ba manofu ira khöma hawaʼara ginötö waʼatohare moto. Ba me no tohare moto nibalo-baloima, fahuhuo ira khö zolohe moto andrö. Lö marongo huhuora, ba lö hadöi göi niha böʼö si fao ba moto andrö. Faduhu dödöma wa no laʼera-era ba wamaʼala yaʼaga na no maröi mbanua daʼö. Hizaʼi sagötö fofanöma, lö hadöi salua khöma. Me möiga tou, manofu ndraʼo khö zolohe moto andrö, ”Hadia lasofu-sofu ndraʼaga ira niha si darua no mege?” Imane wangumaʼö, ”Mihonogö manö ami, lö salania. No uʼila haniha ami, ba no ufatunö khöra.”

Me döfi 1976 ba kebaktian distrik a nifalua ba Dublin, falukhaga Pauline Lomax, samösa perintis istimewa moroi ba Inggris. Fahuwu sibai ia, aro göi ia ba wamati, ba so khönia wangide-ngideʼö. Yaʼia hegöi akhinia sotöi Ray, teʼebuaʼö ira ba zindruhu. Döfi aefa daʼö, mangowalu ndraʼaga Pauline, ba mangai halöwö ndraʼaga tobali perintis istimewa ba Ballymena, Irlandia Utara.

No irai mahalö halöwö tobali satua samasui ba Belfast, Londonderry, hegöi ba mbanua tanö böʼö si tola mamaʼala faʼauri niha. Tefarou sibai dödöma börö wamati ndra talifusöda si so ba daʼö. Enaʼö tola lafosumange Yehowa, laröi nifaduhusira tödö ba zilalö, fanahö-nahö tödö, hegöi fatiusa tödö. Sindruhu wa ifahowuʼö ba ilumöʼö ira Yehowa!

Fulu fakhe toröi ndraʼo ba Irlandia. Aefa daʼö, me döfi 1981 lakaoni ndraʼaga wefao ba Sekolah Gilead kelas si 72. Me no aefa lulus, lafataro ndraʼaga ba Sierra Leone, Afrika Barat.

Yaʼaga hegöi ira talifusöda si 11 niha faʼato, toröi ndraʼaga ba nomo utusan injil. Ba nomo daʼö so sambua naha nawu, tölu ngawua WC, dombua naha wemondri, sambua telefo, sambua mesin cuci, ba sambua mesin pengering. Asese mate wandru ba daʼö. Asese so deʼu ba lote, ba itaria möi gulö daritö barö nomo.

Hewaʼae na tosasa sibai waʼauri ba daʼö, hizaʼi omuso sibai dödöma ba wanuriaigö. Lafondrondrongo ba laʼameʼegö tödö Zura Niʼamoniʼö niha si so ba daʼö. Ba ato niha somasi lafahaʼö  ba latema zindruhu. Niha si so ba daʼö, labeʼe döigu ”Ama Robert” ba Pauline ”Ina Robert”. Hizaʼi ba gafuriata börö me oya halöwögu ba gödo ndraha, lö asese möido manuriaigö simane ba zilalö. Andrö ibörögö lakaoni Pauline ”Ina Pauline”, ba yaʼo ”Ama Pauline”. Omuso sibai dödö Pauline!

Ato ndra talifusöda si tosasa ba daʼö, hizaʼi lö tebulö ibönökhi zoguna khöra Yehowa. Itaria ifalua daʼö Yehowa ba lala si lö ladöna-döna. (Mat. 6:33) Itörö tödögu samösa dalifusöda ira alawe, kefenia ha obönö ba wowöli soguna khöra ba zi maʼökhö daʼö ononia. Hizaʼi, iʼamualagö gefe daʼö fefu khö dalifusöda si no göna fökhö malaria börö me lö sagu khönia wowöli dalu-dalu. Hizaʼi, ba zi lö mudöna-döna ba ngaluo si fagölö, so ndra alawe sangumaʼö khö dalifusöda andre ba wotaba bunia, ba ibeʼe khönia gefe ira alawe andrö. Oya sibai zi no irai alua simane daʼö ba Sierra Leone.

Siwa fakhe toröi ndraʼaga ba Sierra Leone, aefa daʼö mufataro ndraʼaga ba Mbetieli Nigeria. Ebua sibai gödo ndraha si so ba daʼö. Halöwögu fagölö simane ba zilalö, hizaʼi labeʼe halöwö si faböʼö khö Pauline. Ba zilalö, iʼogunaʼö ginötönia 130 za ero waŵa weʼamöi manuriaigö, ba so niha nifahaʼönia ba Zura Niʼamoniʼö si tedou ba wamati. Hizaʼi iadaʼa, labeʼe khönia halöwö ba wanagu nukha. Ero maʼökhö halöwönia yaʼia daʼö ba wangehaogö nukha si no tekiko. Ara ginötö niʼogunaʼö Pauline ba wamaudugö faʼaurinia. Hizaʼi, ba gafuriata aboto ba dödönia wa laʼameʼegö tödö sibai halöwönia andrö. Ba iforege wangogunaʼö inötö ba wangabölöʼö ira awö-awönia ba Mbetieli.

Me luo daʼö, lö oya niʼilagu zi toʼölö mufalua ba Nigeria. Samuza maʼökhö, möi dalifusöda ira matua ba nahagu wohalöwö, ba iʼombakhaʼö khögu samösa dalifusöda ira alawe sawena mutemaʼö ba Mbetieli. Me uʼoroʼö dangagu ba wotabe talifusöda ira alawe andrö, ilau mangalulu ba gahegu. Tokea sibai ndraʼo. Iʼanemaiʼö itörö tödögu zi dombua ayati nisura ba: Halöwö Zinenge 10:25, 26 ba Famaʼeleʼö 19:10. Imane tödögu, ’Hadia moguna uʼamenesi ia?’ Hizaʼi, ba ginötö si fagölö imane zui tödögu, ’Yaʼia andrö no latemaʼö ba Mbetieli, tatu no aboto ba dödönia wamahaʼö ba Zura Niʼamoniʼö.’

Aila ba alawö-lawö ndraʼo wahuhuosa me luo daʼö. Aefa daʼö ufalua riset. Sindruhunia nifalua dalifusöda ira alawe andrö, ha si toʼölö mufalua  ba zi hauga banua ba Nigeria. Lafalua göi zimane daʼö ira matua ba wangoromaʼö foʼameʼegö tödö. Nifalua dalifusöda andrö tenga fasömbata, so duma-dumania ba Zura Niʼamoniʼö. (1 Sa. 24:8) Ahono dödögu börö me lö iʼanemaiʼö uʼamenesi dalifusöda andrö ba lö niʼailasigu yaʼia.

Ato sibai ndra talifusöda saro ba wamati si falukha khöma ba Nigeria. Samösa ba gotaluania yaʼia daʼö Isaiah Adagbona. b Ifahaʼö ia ba zindruhu me awuyu-wuyu ia, hizaʼi ba gafuriata göna ia bou auri. Lafasambua nahania ba nahia niha si no göna bou auri. Ha yaʼia Zamaduhuʼö Yehowa ba daʼö. Hewaʼae na oya wanandraigö, mofozu ia ba wanolo si töra 30 niha si no göna bou auri ba wanemaʼö sindruhu, ba fao ia ba wamasindro banua niha Keriso ba nahia niha si göna bou auri andrö.

Me döfi 1996, lafindrakö ndraʼaga ba gödo ndraha Kenya. Daʼö zi mendrua kalinia möido ba soi daʼö. Me möido siföföna, yaʼia zi no ufatunö moroi yawa. Ba zi fasui Mbetieli, oya sibai mbaʼe vervet. Itaria larabu mbua zinanö niʼohe ndra talifusöda ira alawe. Samuza maʼökhö, so dalifusöda ira alawe si toröi ba Mbetieli, no olifu ia ba wokusi sandrela mbateʼenia. Me mangawuli ia, iʼila oya sibai mbaʼe ba mbateʼenia ba ahori laʼa gö si so ba daʼö. Ilau muʼao ba moloi ia moroi ba mbateʼenia, muʼao göi mbaʼe daʼö ba moloi ira latörö zandrela.

Yaʼo hegöi Pauline farahu ndraʼaga ba mbanua niha Keriso sangogunaʼö li Swahili. Lö ara aefa daʼö, labeʼe khögu halöwö ba wondröniaʼö Pelajaran Buku Sidang (mufotöi ia iadaʼa Famahaʼö Zura Niʼamoniʼö ba Gangowuloa). Ba ginötö daʼö, lö oya niʼilagu li Swahili. Fatua lö mufalua gangowuloa, ufaʼanö ndraʼo ba waö-waö halöwö ba zi maʼökhö andrö irege tola ubaso zinofunia. Hizaʼi, na so zi faböʼö maifu mbua gera-era nifaʼema ndra talifusöda moroi ba zi no musura, lö aboto ba dödögu. Ambö ami-ami ndraʼo khö ndra talifusöda. Hizaʼi, ahöli dödögu börö me so khöra waʼebolo dödö ba fangide-ngideʼö ba woloʼö si no mufakhoi andrö.

Lö ikhamö döfi ndraʼaga ba Kenya. Me döfi 1997, lakaoni ndraʼaga ba Mbetieli ba Brooklyn, New York. Kayo niha si toröi ba Amerika Serikat, hizaʼi tola iʼasogö gabula dödö tanö böʼö. (Amd. 30:8, 9) Hewaʼae simanö, aro wamati ndra talifusöda ba daʼö. Laʼogunaʼö ginötö hegöi haratora tenga ba wolohi faʼakayo, hizaʼi ba wotuhini halöwö ba organisasi Yehowa.

Ba zi hauga fakhe andre, no maʼila hewisa wamati ndra talifusöda hewaʼae na alua khöra wanandraigö. Ba Irlandia, mamati ira hewaʼae na fawuka ba alua waʼalösökhi ba daʼö. Ba Afrika, mamati ira hewaʼae tosasa ba toröi ira ba mbanua saröu. Ba Amerika Serikat, mamati ira hewaʼae na ato niha solohi faʼakayo ba daʼö. Omuso sibai dödö Yehowa me iʼila nono mbanuania laʼomasiʼö ia hewaʼae na alua khöra wanandraigö si faböʼö-böʼö!

Ero röfi urasoi, ”alio numalö ginötögu moroi ba geu nifagaölö ba wanoso nukha”. (Yob. 7:6) Iadaʼa mohalöwöga ba gödo sebua ba Warwick, New York, ba omuso sibai dödöma börö me lö tebulö falulu fohalöwö ndraʼaga ba niha sangomasiʼö awönia. Omuso dödöma ba ahono dödöma börö me matuhini Keriso Yesu, Razoda, si lö ara tö mameʼe khöda howu-howu sebua ba niha si zuta faʼato samati khönia.—Mat. 25:34.