1. Hana wa taʼandrö saohagölö ba Zura Niʼamoniʼö?

 TAʼANDRÖ saohagölö khö Yehowa börö me no ibeʼe khöda Zura Niʼamoniʼö. Iʼogunaʼö Zura Niʼamoniʼö Yehowa ba wameʼe khöda mene-mene sanolo yaʼita ba wanaögö abula dödö. Ibeʼe göi khöda dötönafö si sökhi ba zi so miföna. Ba sabölö moguna, iʼogunaʼö Zura Niʼamoniʼö ba wamatunö khöda sanandrösa ba gamuatania. Ba ginötö taʼangerönusi gamuata Yehowa si sökhi, terara dödöda. Ba tola tefarou ita enaʼö itugu fahuwu khönia.—Si. 25:14.

2. Hewisa wangoromaʼö Yehowa yaʼia ba niha?

² Omasi Yehowa na aboto ba dödö niha haniha ia. Mböröta, iʼogunaʼö wangifi, angilata, hegöi ira malaʼika ba wangoromaʼö haniha ia sindruhunia. (4 Mo. 12:6; Hal. 10:3, 4) Hizaʼi, na lö musura wangifi andrö, angilata, mazui nifaʼema ndra malaʼika, tatu tebai tafahaʼö ita iadaʼa. Andrö wa iʼogunaʼö ndra matua Yehowa ba wanura fehedenia ”ba zi sambua buku”. (Yer. 30:2) Börö me ”lala Lowalangi sindruhu andrö moʼahonoa”, daʼö mbörö wa faduhu dödöda wa lalania fahuhuo khöda tefaudu ba moguna khöda.—Si. 18:30.

3. Hewisa wotatugöi Yehowa enaʼö lö tebulö so Zura Niʼamoniʼö iadaʼa? (Yesaya 40:8)

³ Baso Yesaya 40:8. Ba zi hauga ribu fakhe silalö, no ibeʼe wanuturu lala ba niha Taromali Lowalangi. Hewisa enaʼö lö tebulö so Daromali Lowalangi ofeta iadaʼa? Sindruhu sa, Sura Niʼamoniʼö nisura ba götö föna tefazökhi ia moroi ba gama-gama salio tekiko, ba lö hadöi iadaʼa naskah aslinia. Hizaʼi, itatugöi Yehowa enaʼö mufuli musali Daromalinia andrö. Hewaʼae na lö moʼahonoa niha sanali yaʼia, hizaʼi lahaogö laʼosisiʼö wamalua halöwö andrö. Duma-dumania, samösa niha satua-tua  isura sanandrösa ba Mbuku Niʼamoniʼö Heberaiʼo, ”Tola mumane wa lö hadöi tanö böʼö nifazökhi iʼotarai me föna irugi iadaʼa nihaogö ba wangosisiʼö.” Börö daʼö, hewaʼae na Taromali Lowalangi andrö mufaʼema ia ba götö föna, musura ba gama-gama salio tekiko, ba lö moʼahonoa niha sanali yaʼia, tola faduhu dödöda wa fehede nibasoda iadaʼa ba Zura Niʼamoniʼö tefaudu ia ba zomasi ifaʼema khöda Yehowa.

4. Hadia nitutunöda ba artikel daʼa?

⁴ ”Fefu mbuala si sökhi ba soʼahonoa” tohare daʼö moroi khö Yehowa. (Yak. 1:17) Taromali Lowalangi no buala sabölö sökhi nibeʼe Yehowa khöda. Na mamuala khöda niha böʼö, tola taʼila hawaʼasökhi niha daʼö ba wangiʼilania yaʼita hegöi soguna khöda. Simanö göi ita, oya taʼila sanandrösa khö Yehowa moroi ba Zura Niʼamoniʼö, buala nibeʼenia khöda. Tola taʼila hawaʼasökhi ia ba wangiʼilania yaʼita hegöi soguna khöda. Ba artikel daʼa, tatutunö hewisa Zura Niʼamoniʼö wangoromaʼönia tölu gamuata Yehowa, yaʼia daʼö faʼatua-tua, faʼatulö ba faʼomasi. Si oföna, datatutunö hewisa Zura Niʼamoniʼö wangoromaʼönia faʼatua-tua Lowalangi.

5. Hewisa Zura Niʼamoniʼö wangoromaʼönia faʼatua-tua Lowalangi?

⁵ Aboto ba dödö Yehowa wa moguna khöda waʼatua-tua mazui mene-mene si sökhi moroi khönia. Börö daʼö, ibeʼe khöda Zura Niʼamoniʼö safönu mene-mene si sökhi. Moguna sibai mene-mene andrö ba niha soloʼö yaʼia. Sura Niʼamoniʼö tola ibulöʼö waʼauri zi samösa niha. Ba ginötö isura Moze ngawalö mbuku siföföna ba Zura Niʼamoniʼö, ifatunö ba nono mbanua Lowalangi yaʼia daʼö iraono Gizaraʼeli, ”Fefu daʼa tenga ha fehede, hizaʼi faʼaurimi.” (5 Mo. 32:47) Niha soloʼö mene-mene Zura Niʼamoniʼö, tola iʼokhögö waʼauri si sökhi ba mofozu. (Si. 1:2, 3) Hewaʼae na Taromali Lowalangi andrö musura ia me götö föna, lö mamalö moguna nösinia ba tola ibulöʼö waʼauri niha tobali sökhi. Tola öʼila duma-dumania ba jw.org, ba seri ”Alkitab Mengubah Kehidupan”. Ba daʼö, so töra 50 zi no irai alua sangoromaʼö wa Sura Niʼamoniʼö ’zondrönisi tödö [soloʼö khö Keriso]”.—1 Te. 2:13.

6. Hana wa lö hadöi buku si fagölö ba Zura Niʼamoniʼö?

⁶ Lö hadöi buku si fagölö ba Zura Niʼamoniʼö. Hadia mbörö? Borö me buku daʼa moroi khö Lowalangi Yehowa. Yaʼia andrö sebua kuaso, ba lö tebulö so ia iʼotarai mböröta irugi iadaʼa, ba abölö atua-tua ia moroi ba danö böʼö. Oya mbuku si no mufazökhi, hizaʼi no mate zamazökhi yaʼia ba lö tefaudu mene-menenia ba götöda andre. Na Sura Niʼamoniʼö, lö tebulö moguna mene-menenia satua-tua gofu hawaʼara manö. Ba ginötö tabaso ba taʼangerönusi Zura Niʼamoniʼö, iʼogunaʼö gehehania Lowalangi Yehowa ba wanolo yaʼita enaʼö aboto ba dödöda hewisa wamaluada mene-mene andrö. (Si. 119:27; Mal. 3:16; Heb. 4:12) Sindruhu sa, ibeʼe khöda Zura Niʼamoniʼö Yehowa börö me omasi ia wanolo yaʼita. Tatu daʼa zamarou yaʼita ba wombaso Sura Niʼamoniʼö ero maʼökhö.

7. Hewisa Zura Niʼamoniʼö wangosambuaʼönia ono mbanua Lowalangi ba götö föna?

⁷ So nasa danö böʼö si tobali dane-dane wa Sura Niʼamoniʼö zangoromaʼö faʼatua-tua Lowalangi: Sura Niʼamoniʼö zangosambuaʼö ono mbanua Lowalangi. Me no ofeta ndraono Gizaraʼeli ba Danö Amabuʼula, toröi ira ba mbanua si faböʼö-böʼö. So zohalöwö ba nasi, sanguri urifö, ba tanö böʼönia sohalöwö ba danö. Börö me faböʼö-böʼö nahia waʼatoröira, tola manö lö laʼameʼegö tödö nawöra zamösana. Börö daʼö, ifaretakö ira Yehowa  enaʼö owulo ira ba ginötö lafalua gowasa, ba daʼö tola lafondrondrongo me mubaso ba mututunö Daromalinia. (5 Mo. 31:10-13; Neh. 8:2, 8, 18) Khalaigö hewisa dödö ndraono Gizaraʼeli me no larugi Yeruzalema ba lafakhölö ira. Ato sibai ndra talifusöra ba wamati moroi ba mbanua tanö böʼö. Börö wamalua owasa andrö, itolo nono mbanuania Yehowa enaʼö lö tebulö teʼosambuaʼö. Ba gafuriata, me no mufasindro mbanua niha Keriso, teʼowuloi nono mbanua Yehowa moroi ba ngawalö soi. No faböʼö-böʼö li niʼogunaʼöra, dadaomara, hegöi faʼebua gokhötara. Börö me laʼomasiʼö Daromali Lowalangi, tola teʼosambuaʼö ira wamosumange Lowalangi sindruhu. Niha sawena farahu ba mbanua niha Keriso, tola aboto ba dödöra Daromali Lowalangi na latema wanolo moroi khö ndra talifusöra ba wamati, ba fao ira wangondrasi angowuloa.—Hal. 2:42; 8:30, 31.

8. Hewisa Zura Niʼamoniʼö wangosambuaʼönia ono mbanua Lowalangi ba götöda iadaʼa?

⁸ Lowalangida si fahöna faʼatua-tua, lö tebulö iʼogunaʼö Zura Niʼamoniʼö ba wamahaʼö hegöi ba wangosambuaʼö ono mbanuania. Fefu gö ba wamati nitemada, teʼodane-dane ia ba Zura Niʼamoniʼö. Asese owulo ita ba gangowuloa, angowuloa ba zi sambua wilayah, hegöi angowuloa ba zi sambua regional ba wamondrondrongo na mubaso ba mututunö Zura Niʼamoniʼö. Sindruhu wa moguna sibai Zura Niʼamoniʼö. Iʼogunaʼö Zura Niʼamoniʼö  Yehowa ba wanolo ono mbanuania enaʼö ’fao ba wamosumange yaʼia’.—Zef. 3:9.

9. Haniha zi tola manöndra faʼaboto ba dödö ösi Zura Niʼamoniʼö? (Luka 10:21)

⁹ Nehegö duma-duma tanö böʼö sangoromaʼö faʼatua-tua Yehowa. Oya faosatö Zura Niʼamoniʼö nihaogö wanura, irege ha niha sangokhögö fangide-ngideʼö zangila eluahania. (Baso Luka 10:21.) Ba zi sagörö ulidanö, ato sibai zombaso Sura Niʼamoniʼö. Imane si samösa niha satua-tua, ”Ha Sura Niʼamoniʼö zabölö oya labaso niha. Ba lahaogö sibai wangosisiʼö ösinia, moroi ba mbuku tanö böʼö.” Hewaʼae simanö, ha niha si so fangide-ngideʼö zi tola mangila eluaha nösi Zura Niʼamoniʼö ba samalua hadia zi no lafahaʼö yaʼira.—2 Ko. 3:15, 16.

10. Hadia nasa dane-dane tanö böʼö wa Sura Niʼamoniʼö zangoromaʼö faʼatua-tua Yehowa?

¹⁰ Hadia nasa danö böʼö zangoromaʼö faʼatua-tua Yehowa? Iʼogunaʼö Zura Niʼamoniʼö Yehowa tenga ha ba wamahaʼö ono mbanuania maʼafefu. Hizaʼi, iʼogunaʼö göi daʼö ba wamahaʼö hegöi ba wondrara tödöda ero zamösana. Ba ginötö tabaso Zura Niʼamoniʼö, tola tarasoi wa iʼameʼegö tödö ita Yehowa ero zamösana. (Yes. 30:21) Ba ginötö so gabula dödömö, hadia no irai öbokai Zura Niʼamoniʼö ba öbaso ayati si tefaudu, hulö na khöu musura daʼö? Moguna Zura Niʼamoniʼö ba niha si zuta faʼato. Hizaʼi, hewisa wa tola tefaudu sibai nösinia andrö ba zoguna khöu? Tola tefaudu ia börö me Sura Niʼamoniʼö andrö moroi khö Yehowa, si tebai musuʼa waʼatua-tuania.—2 Ti. 3:16, 17.

11. Hewisa wa oroma wa lö ebua dödö zambuana Lowalangi moroi ba li niʼogunaʼö ba wanura Sura Niʼamoniʼö?

¹¹ Amuata Yehowa tanö böʼö yaʼia daʼö faʼatulö. (5 Mo. 32:4) Lö ebua dödö zambuana niha si so faʼatulö, ba simane daʼö Yehowa. (Hal. 10:34, 35; Rom. 2:11) Hadia dandrania? Si 39 mbuku siföföna ba Zura Niʼamoniʼö musura ia ba li Heberaiʼo, börö me daʼö li salio aboto ba dödö nono mbanua Yehowa me luo daʼö. Hizaʼi me abad siföföna M, li Yunani zi toʼölö muʼogunaʼö me luo daʼö. Börö daʼö, me musura mbuku si 27 safuria ba Zura Niʼamoniʼö, abölö oya musura ia ba li Yunani. Lö nitatugöi Yehowa wa Taromalinia andrö tehenaigö ia ha ba zi sambua li. Iadaʼa, arakhagö walu miliar niha ba gulidanö andre laʼogunaʼö ngawalö li. Hewaʼae simanö, tola lafahaʼö ira sanandrösa khö Yehowa. Hewisa lalania?

12. Hewisa nisura ba Danieli 12:4 alua ia ba ngaluo safuria andre?

¹² Fawuʼuli Yehowa khö Danieli wa ba götö safuria, ”fahöna” dania ”waʼaboto ba dödö” si so ba Zura Niʼamoniʼö, ba ato niha zangokhögö faʼaboto ba dödö sindruhu andrö. (Baso Danieli 12:4.) Tola fahöna waʼaboto ba dödö sindruhu andrö börö wamoʼeluaha, famazökhi, ba famazaewe Sura Niʼamoniʼö hegöi publikasi si teʼodane-dane ba Zura Niʼamoniʼö. Buku sabölö oya mufoʼeluaha ba mufazaewe ba zi sagörö ulidanö yaʼia daʼö Sura Niʼamoniʼö. Itaria ebua sibai mböli Zura Niʼamoniʼö nifazökhi perusahaan. Hizaʼi, Sura Niʼamoniʼö nifazökhi nono mbanua Yehowa tola taʼokhögö ia ba lö muʼandrö mböli. No mufoʼeluaha ia ba zi töra 240 ngawalö li. Buania, niha moroi ba ngawalö soi tola aboto ba dödöra duria somuso dödö sanandrösa ba Wamatörö Lowalangi fatua lö tohare gamozua götö danö andre. (Mat. 24:14) Omasi Lowalangi na ato niha zanöndra faʼaboto ba dödö sanandrösa khönia, yaʼia daʼö na labaso Daromalinia. Daʼa zangoromaʼö wa so khönia waʼatulö ba iʼomasiʼö ita fefu.

13. Hewisa Zura Niʼamoniʼö wangoromaʼönia faʼomasi Yehowa? (Yohane 21:25)

¹³ Sura Niʼamoniʼö zangoromaʼö amuata Yehowa sabölö tohude, yaʼia daʼö faʼomasi. (1 Yo. 4:8) Tandraigö angeragö hadia manö nibeʼe Yehowa ba Zura Niʼamoniʼö hegöi si lö nibeʼenia. Ba Zura Niʼamoniʼö, ifatunö khöda hadia zinangea tafalua enaʼö tola fahuwu ita khönia, tasöndra waʼohahau dödö iadaʼa, hegöi faʼauri si lö aetu ba zi so miföna. Hizaʼi, börö me iʼomasiʼö ita Yehowa, lö oya sibai nitutunönia khöda enaʼö lö afökhö högöda.—Baso Yohane 21:25.

14. Hewisa wa tola oroma waʼomasi Yehowa ba lalania wahuhuosa khöda ba Zura Niʼamoniʼö?

¹⁴ Oroma waʼomasi Yehowa ba lalania wahuhuosa khöda ba Zura Niʼamoniʼö. Börö me iʼameʼegö tödö ita, lö ibeʼe khöda daftar sanau sibai ba wamatörö lala waʼaurida ofeta ba wondrege zide-ide. Hizaʼi, itolo ita ba wangai angetula si sökhi me ibeʼe waö-waö waʼauri, famaʼeleʼö sadöni dödöda, hegöi mene-mene soguna khöda. Daʼö mbörö wa taʼomasiʼö Lowalangi soroi ba dödö, tenga börö me no ifaso ita.

15. (a) Hadia zangoromaʼö wa iʼameʼegö tödö niha sombaso Taromalinia Yehowa? (b) Ba gambara, haniha niʼangerönusi nono alawe andrö, talifusöda si bohou ebua, hegöi talifusöda ira alawe si no alawa döfi? (1 Mo. 39:1, 10-12; 2 Ra. 5:1-3; Luk. 2:25-38)

¹⁵ Sura Niʼamoniʼö zangoromaʼö khöda wa iʼameʼegö tödö ita Yehowa. Hadia dandrania? Ba Daromalinia, oya zi no irai alua ba niha ”simane yaʼita” nitutunö ba Zura Niʼamoniʼö. Börö daʼö, tola tafahaʼö ita ba zi no irai alua khöra. (Yak. 5:17) Ba sabölö moguna, nehegö hewisa wamaigi Yehowa niha na so zalua khöra simane salua khöda irege aboto ba  dödöda ”wa safönu faʼomasi Yehowa ba sahakhö tödö”.—Yak. 5:11.

16. Hadia wamahaʼö si tola tahalö khö Yehowa na tabaso waö-waö niha samalua sala si so ba Zura Niʼamoniʼö? (Yesaya 55:7)

¹⁶ Hadia lala tanö böʼö niforomaʼö Zura Niʼamoniʼö wa iʼomasiʼö ita Yehowa? Ifaduhuʼö ba dödöda Sura Niʼamoniʼö wa lö iröi ita Lowalangi ba ginötö tafalua zala. Mböröta, asese lafalua zala föna Yehowa iraono Gizaraʼeli. Hizaʼi, ba ginötö lafalalini gera-erara soroi ba dödö, iʼefaʼö zalara Lowalangi. (Baso Yesaya 55:7.) Niha Keriso ba abad siföföna aboto ba dödöra wa iʼomasiʼö ira Lowalangi. Börö wanuturu lala geheha niʼamoniʼö, iʼamenesi dalifusönia ba wamati sinenge sotöi Faulo enaʼö ’ebolo dödöra ba larara dödö’ niha si no mamalua sala ba si no mamalalini era-era. (2 Ko. 2:6, 7; 1 Ko. 5:1-5) Lö iʼanemaiʼö itiboʼö nono mbanuania Yehowa ba ginötö lafalua zala. Hizaʼi, itolo ira, iʼamenesi, ba ikaoni enaʼö tola ifuli tobali si fahuwu khönia. Ifabuʼu wa ifalua daʼö ba nono mbanuania samalalini era-era. Sindruhu-ndruhu wa Lowalangi safönu faʼomasi ia.—Yak. 4:8-10.

17. Hana wa no buala sahöli-höli dödö Zura Niʼamoniʼö andrö?

¹⁷ No ibeʼe khöda mbuala sebua böli Yehowa, yaʼia daʼö Taromalinia. Hana wa no sahöli-höli dödö Daromali Lowalangi andrö? Simane si no tatutunö, Sura Niʼamoniʼö zangoromaʼö faʼatua-tua, faʼatulö, hegöi faʼomasi Lowalangi. Buku daʼö zangoromaʼö wa omasi Yehowa na aboto ba dödöda ia. Omasi ia na tobali ita si fahuwu khönia.

18. Hewisa wangoromaʼöda wa taʼameʼegö tödö ’mbuala soʼahonoa’ moroi khö Yehowa?

¹⁸ Böi tebulö itörö tödöda wa Sura Niʼamoniʼö no ’buala soʼahonoa’ moroi khö Yehowa. (Yak. 1:17) Yalötebulö taʼameʼegö tödö mbuala andrö. Tola taforomaʼö wangandrö saohagölö yaʼia daʼö na tabaso ba taʼangerönusi Zura Niʼamoniʼö. Na tafalua daʼö, faduhu dödöda wa ifahowuʼö ita Yehowa ba tasöndra ”waʼaboto ba dödö sanandrösa khö Lowalangi”.—Amd. 2:5.