1. Fatua lö mate Yesu, hadia niwaʼönia ba niha si lö sökhi si so ba zingania? (Luka 23:39-43)

 YESU hegöi niha si lö sökhi si darua si so ba zingania lataögö waʼafökhö börö me lahuku mate ira ba döla geu famakao. (Luk. 23:32, 33) Laʼoʼaya Yesu börö me tenga nifahaʼönia ira. (Mat. 27:44; Mrk. 15:32) Hizaʼi, samösa moroi ba gotaluara ibulöʼö nifaluania. Imane, ”He Yesu, törö tödöu ndraʼo na möiʼö ba Wamatöröu.” Itema linia Yesu, ”Sindruhu niwaʼögu khöu maʼökhö andre, awögu ndraʼugö ba Waradaiso.” (Baso Luka 23:39-43.) Tola manö no irai irongo niha si lö sökhi andrö wa no ahatö ’Wamatöro Lowalangi ba zorugo’ sagötö fanuriaigö Yesu, hewaʼae na lö si tobali ia nifahaʼö. Lö göi irai iwaʼö khönia Yesu wa möi ia dania ba Wamatörö Lowalangi ba zorugo. (Mat. 4:17) Eluaha Waradaiso niwaʼö Yesu yaʼia daʼö Faradaiso ba gulidanö si so ba zi so miföna. Hezo taʼila daʼö?

2. Hadia zangoromaʼö wa niha Yahudi niha si lö sökhi andrö?

² Niha si lö sökhi andrö te niha Yahudi. Imane khö nawönia si samösa, ”Hadia sindruhu lö ataʼu ndraʼugö khö Lowalangi?” (Luk. 23:40) Ha samösa Lowalangi nifosumange niha Yahudi. Hizaʼi, na soi tanö böʼö, oya lowalangi nifosumangera. (2 Mo. 20:2, 3; 1 Ko. 8:5, 6) Na tenga niha Yahudi niha si lö sökhi andrö, tola manö imane wanofu, ’Hadia sindruhu lö ataʼu ndraʼugö khö lowalangida soya?’ Baero daʼö, mufatenge Yesu ba ”ndraono Gizaraʼeli si hulö mbiri-biri si taya”, tenga ba niha  moroi ba soi böʼö. (Mat. 15:24) No göi ifatunö Lowalangi ba ndraono Gizaraʼeli wa hasambalö isusugi dania niha si no mate. Te no iʼila daʼö niha si lö sökhi andrö. Fehedenia zangoromaʼö wa faduhu dödönia khö Yehowa ba wanusugi Yesu si tobali Razo ba Wamatörö Lowalangi. Te göi manötöna ia wa isusugi dania ia Lowalangi.

3. Me itutunö Yesu sanandrösa ba Waradaiso, hadia zi tola manö so ba wangera-ngera niha si lö sökhi andrö? Tutunö. (1 Moze 2:15)

³ Na niha Yahudi niha si lö sökhi andrö, tatu aboto ba dödönia sanandrösa khö Gadamo, Khawa hegöi Faradaiso nifazökhi Yehowa me mböröta. Börö daʼö, aboto ba dödönia wa Faradaiso niwaʼö Yesu andrö eluahania kabu si sökhi si so ba gulidanö.—Baso 1 Moze 2:15.

4. Hadia zi tola taʼangeragö moroi ba wehede Yesu ba niha si lö sökhi andrö?

⁴ Fehede Yesu ba niha si lö sökhi andrö zamarou tödöda ba woʼangeragö hewisa dania waʼaurida ba Waradaiso. Tola taʼokhögö khala-khala si tefaudu sanandrösa ba Waradaiso na tafahaʼö ita ba zalua safönu faʼatulö me mamatörö Razo Selomo. Faduhu dödöda khö Yesu si no tobali Selomo sabölö ebua, wa falulu fohalöwö ia khö zi 144.000 ba wombulöʼö ulidanö andre tobali Faradaiso si sökhi. (Mat. 12:42) Baero daʼö, omasi göi ”mbiri-biri tanö böʼö” ba wangiʼila hadia zinangea lafalua enaʼö tola auri ira sagötö faʼara ba Waradaiso.—Yoh. 10:16.

5. Hewisa wokhalaigömö faʼaurimö ba Waradaiso dania?

⁵ Ba ginötö ökhalaigö Waradaiso, hadia manö zi so ba wangera-ngeramö? Tola manö ökhalaigö sambua kabu si sökhi simane Kabu Edena. (1 Mo. 2:7-9) Tola manö göi itörö tödömö wamaʼeleʼö Mikha sangumaʼö, ”Dozi niha modadao ira ba lumö nagu khöra zamösana hegöi ba lumö geu ara.” (Mi. 4:3, 4) Te göi itörö tödömö ayati Zura Niʼamoniʼö sangumaʼö wa hasambalö fahöna gö. (Si. 72:16; Yes. 65:21, 22) Khalaigö atö: So ndraʼugö ba kabu si sökhi, öhofo nangi si lö taʼunö, ba öʼago hua mbunga somuhua hegöi sinanö tanö böʼö. Aefa daʼö, modadao ndraʼugö föna meza ba no teʼoli ba daʼö gö sami. Te so ba daʼö nösi nomomö hegöi ira si fahuwu khömö, farahu ba daʼö niha si no mususugi. Omuso sibai dödömö börö me tola fariawö ba fao ndraʼugö khöra waʼiki. Fefu daʼa tenga ha anga-anga, hizaʼi sindruhu-ndruhu alua dania. Baero daʼö, tola göi öfalua halöwö sameʼe khöu faʼowua-wua dödö ba Waradaiso. Hadia manö halöwö daʼö?

6. Simane niʼilada ba gambara, hadia manö dania nifaluada ba Waradaiso?

⁶ Iʼotarai ba wamobörö, omasi Yehowa enaʼö owua-wua dödö niha ba wamalua halöwöra.  (Sango. 2:24) Sagötö Famatörö Yesus si Saribu Fakhe, oya sibai halöwö nifaluada. Tatu moguna gö, nukha, awö nahia waʼatoröi ba niha niʼefaʼö moroi ba wamakao sabölö-bölö hegöi zuta niha nisusugi. Taforege sibai ba wombönökhi soguna khöra, ba hasambalö owua-wua dödöda wamalua halöwöda. Baero daʼö, tabaliʼö Faradaiso gulidanö andre simane niwaʼö Yehowa khö Gadamo hegöi Khawa me mböröta. Tafahaʼö göi niha si zuta faʼato si no mususugi. Ato moroi ba gotaluara si lö mangokhögö faʼaboto ba dödö sanandrösa khö Yehowa hegöi ohitö dödönia. So ösa ba daʼö nono mbanua Yehowa, sauri fatua lö si möi Yesu ba gulidanö. Tatu omuso sibai dödöda ba wamahaʼö yaʼira fefu.

7. Hadia zi tola faduhu dödöda ba hadia mbörö?

⁷ Ba Waradaiso dania, tarasoi waʼauri safönu faʼatulö ba oi toföfö fefu hadia ia. Tebönökhi göi zoguna khöda. Hana wa tola faduhu dödöda ba daʼö? Börö me no ibeʼe khöda Yehowa khala-khala hewisa dania waʼauri niha si so barö wamatörö Nononia. Tola taʼila khala-khala andrö ba wamatörö Razo Selomo.

8. Hewisa waʼalua wehede ba Zinunö 37:10, 11, 29 ba götö föna? (Faigi ”Fanofu Zombaso” ba majalah andre.)

⁸ Börö wanuturu lala moroi ba geheha niʼamoniʼö, no irai ibeʼe khala-khala Razo Dawido hewisa waʼauri niha si so barö wamatörö razo satua-tua ba samati. (Baso Zinunö 37:10, 11, 29.) Asese göi tabaso Zinunö 37:11 ba ginötö tafatunö ba niha böʼö sanandrösa ba Waradaiso si so ba zi so miföna. Lö fasala daʼö, börö me Yesu samösa zangogunaʼö ayati daʼö ba Huhuonia ba Hili, ba iforomaʼö göi ba ayati daʼö wa hasambalö alua ia ba zi so miföna. (Mat. 5:5) Hizaʼi sindruhunia, fehede Dawido andrö göi zangoromaʼö hadia zalua me mamatörö Razo Selomo. Me mamatörö Zelomo ba Gizaraʼeli, larasoi waʼatulö ono mbanua Lowalangi ba lö moʼamböta zoguna khöra ba soi ”si fahöna susu ba wewani”. Hadia mbörö? Börö me no fawuʼu li Lowalangi, ”Na lö tebulö ami woloʼö amakhoitagu . . . , uʼasogö khömi waʼahono dödö ba soimi, ba miʼila mörö me lö sametaʼu yaʼami.” (3 Mo. 20:24; 26:3, 6) Alua mbuʼusa li andrö sagötö mamatörö Zelomo.  (1 Ng. 22:9; 29:26-28) Fawuʼu li göi Lowalangi wa ”lö hadöi saʼae” niha si lö sökhi samosumange lowalangi tanö böʼö. (Si. 37:10) Tobali, ngawua wehede si so ba Zinunö 37:10, 11, 29 no alua ia me götö föna ba alua göi ia ba zi so miföna.

9. Hadia niwaʼö ratu moroi ba Zeba sanandrösa ba wamatörö Zelomo?

⁹ Irongo ratu moroi ba Zeba duria sanandrösa ba waʼatulö hegöi faʼafahöna mbalazo ba Gizaraʼeli barö wamatörö Zelomo. Daʼö mbörö wa möi ia ba Yeruzalema enaʼö iʼila samösa hadia atulö duria andrö mazui löʼö. (1 Ra. 10:1) Me no inehegö wamatörö Zelomo, imane, ”Ambö matonga niʼombakhaʼöra khögu! . . . Owua-wua sibai dödö nono mbanuamö awö ndra enonimö si fao khöu, börö me lö aetu-aetu lafondrondrongo waʼatua-tuamö!” (1 Ra. 10:6-8) Hizaʼi sindruhunia, salua barö wamatörö Zelomo ha khala-khala side-ide moroi ba nifalua Yehowa ba niha gulidanö ba zi so miföna barö wamatörö Nononia, Yesu.

10. Hana wa abölö tohude Yesu moroi khö Zelomo?

¹⁰ Abölö tohude Yesu moroi khö Zelomo. Selomo andre niha si lö moʼahonoa. No irai ifalua zala irege tefakao nono mbanua Lowalangi ba gafuriata. Hizaʼi, Yesu andrö Samatörö soʼahonoa si lö irai mamalua sala. (Luk. 1:32; Heb. 4:14, 15) Lö faröi ia khö Lowalangi hewaʼae na itaögö wanandraigö sebua moroi khö Zatana. No iforomaʼö Keriso wa lö irai ifalua horö mazui ngawalö hadia ia zi tola mamakao ono mbanuania si lö faröi. Yaʼia andrö Razo fondrege zi sökhi khöda.

11. Hadia wanolo nitema Yesu?

¹¹ Latolo Yesu ira si 144.000 ba wombönökhi soguna ba niha fefu ba laʼoʼozui gohitö dödö Yehowa ba gulidanö. (Fam. 14:1-3) No lataögö wanandraigö hegöi faʼafökhö ira niha si 144.000 andrö me auri ira ba gulidanö. Daʼö mbörö wa aboto ba dödöra hewisa waʼauri niha sauri ba gulidanö dania. Hadia manö nifaluara?

12. Hadia halöwö nibeʼe Yehowa khö zi 144.000?

¹² Abölö ebua halöwö Yesu hegöi si 144.000 moroi ba halöwö Zelomo. Me föna, si tobali noro dödö Zelomo ha niha Gizaraʼeli si zuta faʼato si toröi ba zi sambua soi. Hizaʼi, si tobali noro dödö Yesu hegöi ira si fao khönia yaʼia daʼö niha si miliaran faʼato si toröi ba zi sagörö ulidanö. Sindruhu-ndruhu latema halöwö sebua moroi khö Yehowa yaʼira si 144.000!

13. Hadia dania noro dödö zi 144.000?

¹³ Simane Yesu, yaʼira si 144.000 tobali razo hegöi ere. (Fam. 5:10) Me muʼogunaʼö nasa Goroisa Moze, tebeʼe noro dödö siföföna khö ndra ere ba wondrorogö ono mbanua Lowalangi enaʼö lö mofökhö ira ba lö awuwu wamatira. Iwaʼö göi Sura Niʼamoniʼö wa Oroisa Moze andrö no ”lumö-lumö si sökhi si lö ara tö tohare”. Tobali, tola tahalö gangetula wa si 144.000 andrö laʼokhögö noro dödö simane ira ere me götö föna. Faoma labönökhi zoguna ba nono mbanua Lowalangi, he soguna ba mboto hegöi ba wamati. (Heb. 10:1) Hewisa wahuhuosa ndra razo hegöi ere andrö dania ba nono mbanua Lowalangi si so ba gulidanö? Lö taʼila nasa. Hizaʼi, gofu hadia ia gamakhoita nifazökhi Yehowa dania, tola faduhu dödöda wa niha sauri ba Waradaiso, hasambalö latema wanuturu lala.—Fam. 21:3, 4.

14. Hadia gamakhaita ”ngawawa si lö atoto” ba ”mbiri-biri tanö böʼö”?

¹⁴ Niha si fao khö Yesu ba wamatörö ifotöi ”ngawawa si lö atoto”. (Luk. 12:32)  Aefa daʼö, so göi ngawawa si dua nifotöi ”mbiri-biri tanö böʼö”. Si dombua ngawawa andre muʼosambuaʼö ia tobali sambua ngawawa. (Yoh.10:16) Lö tebulö falulu fohalöwö ira na mubaliʼö Faradaiso gulidanö andre dania. Ba luo daʼö, auri ”ngawawa si lö atoto” ba zorugo. Hizaʼi, ’biri-biri tanö böʼö’ laʼokhögö dötönafö faʼauri ba gulidanö sagötö faʼara. Hadia zi lö tola löʼö lafalua ira biri-biri tanö böʼö iadaʼa enaʼö tola auri ira ba Waradaiso dania?

15. (a) Hewisa ”mbiri-biri tanö böʼö” wotuhini talifusö Keriso? (b) Simane niʼilada ba gambara, hewisa woloʼöda duma-duma dalifusöda sowöli dalu-dalu?

¹⁵ No mate niha si lö sökhi si so ba zinga Yesu fatua lö iforomaʼö wangandrö saohagölö ba zi no ifalua Yesu khönia. Hizaʼi, yaʼita ’biri-biri tanö böʼö’ oya ginötö niʼokhögöda ba wangoromaʼö fangandrö saohagölö. Duma-dumania, tola taforomaʼö wa taʼomasiʼö Yesu na tatuhini ndra talifusönia nibayoini. Iwaʼö Yesu wa yaʼia dania zanguhuku biri-birinia moloʼö amuatara. (Mat. 25:31-40) Tola tatuhini ndra talifusö Keriso na fao ita ba wanuriaigö hegöi ba wombaliʼö nifahaʼö si fao faʼaterou dödö. (Mat. 28:18-20) Börö daʼö, moguna tahaogö taʼogunaʼö fakake ba wamahaʼö ba Zura Niʼamoniʼö si no muhenaigö. Duma-dumania, buku Lala ba Wanöndra Faʼohahau Dödö Sagötö Faʼara! Hadia no ödöniaʼö wamahaʼö ba Zura Niʼamoniʼö ba zi samösa niha? Na löʼö, tola ötatugöi gohitö dödöu enaʼö abölö ato niha nifahaʼöu ba Zura Niʼamoniʼö.

16. Hadia zinangea tafalua iadaʼa enaʼö tobali ita ono mbanua ba Wamatörö Lowalangi?

¹⁶ Tatu omasi ita tobali ono mbanua nifili Yehowa ba Wamatörönia. Börö daʼö iʼotarai iadaʼa, moguna taforege enaʼö tatörö zindruhu na fahuhuo ita hegöi na so nifaluada, ba tafaudugö lala waʼaurida. Böi göi faröi ita khö Yehowa, khö woʼomoda, hegöi khö ndra talifusöda. Na no taʼoʼö goi-goi Yehowa sagötö auri ita ba gulidanö si lö sökhi andre, itugu aoha khöda ba woloʼö goi-goinia dania ba Waradaiso. Tola göi tafaʼanö ita na tadouʼö nekhe-nekhe danga hegöi bua-buada si sökhi. Börö daʼö, fahaʼö ndraʼugö ba artikel ”Hadia Tefaʼanö Ndraʼugö ba Wangokhögö Ulidanö?” si so ba majalah daʼa.

17. Na no irai tafalua horö sebua, hana wa lö moguna itahi-tahigö manö ita tödöda?

 ¹⁷ Na no irai tafalua horö sebua ba itahi-tahigö manö ita tödöda, moguna taheta khöda wangera-ngera simanö. Tatu manö lö ”taʼodödögö wamazökhi horö” ha börö me tawaʼö tödöda wa no ihenaigö khöda höli Yehowa. (Heb. 10:26-31) Hizaʼi na no tafalua horö, moguna faduhu dödöda wa hasambalö iʼefaʼö zalada Yehowa na sindruhu-ndruhu tafalalini gera-erada, taʼalui wanolo moroi khö Yehowa hegöi khö ndra satua sokubaloi, ba tabulöʼö gamuatada. (Yes. 55:7; Hal. 3:19) Datatörö tödöda wehede Yesu ba niha Warizaiʼo me imane, ”Tenga ba wogaoni niha satulö möi ndraʼo, hizaʼi ba wogaoni niha sebua horö.” (Mat. 9:13) Tola aheta fefu horöda börö höli nibeʼe Yesu!

18. Hadia zomasiʼö ösofu mazui ötutunö ba niha si lö sökhi si so ba zinga Yesu mböröta?

¹⁸ Khalaigö so ndraʼugö ba Waradaiso ba fahuhuo ndraʼugö ba niha si lö sökhi si so ba zinga Yesu mböröta. Tatu faoma miʼandrö saohagölö ba höli nibeʼe Yesu. Te ösofu khönia hewisa waʼauri Yesu me arakhagö mate ia ba gulidanö. Te göi ösofu khönia hadia nirasoinia me itema gangandröwania Yesu. Tola manö göi isofu khöu hewisa waʼauri ba ngaluo safuria ba gulidanö nifatörö Zatana. No sambua töi sebua na tebeʼe khöu ginötö ba wamahaʼö Taromali Lowalangi ba niha simane yaʼia andrö!—Ef. 4:22-24.

19. Hana wa lö irai aföli ita waʼauri ba Waradaiso? (Faigi gambara ba guli majalah.)

¹⁹ Lö irai aföli ita waʼauri ba Waradaiso. Falukha ita ba niha sato ba tafalua ngawalö halöwö sangaʼasogö khöda faʼowua-wua dödö. Ba sabölö tohude, tola itugu ahatö ita khö Namada si so ba zorugo ero maʼökhö ba tarasoi howu-howunia. Tola göi tafahaʼö ita ba ngawalö zi bohou sanandrösa khönia hegöi ngawalö zoʼamakhaita ba niwöwöinia. Itugu ara, itugu ebua göi waʼomasida khö Yehowa. Tatu taʼandrö sibai saohagölö khö Yehowa hegöi Yesu me no ibeʼe khöda dötönafö faʼauri sagötö faʼara ba Waradaiso!