Löʼö. Fehede Dawido andrö sindruhunia tefaudu sibai.

Nehegö hadia nisurania ba ayati daʼö hegöi ba ayati tanö böʼö: ”Uʼanunöisi zinunö ba wanuno töimö sagötö faʼara, ba ufalua mbuʼusa ligu ero maʼökhö.” ”He Yehowa Lowalangigu, usuno ndraʼugö soroi ba dödögu, ba ufolakhömi döimö irugi zi lö aetu.” ”Usuno döimö götö-götö waʼara.”—Si. 61:8; 86:12; 145:1, 2.

Me isura wehede daʼö Dawido, tenga daʼö zi so ba wangera-ngerania wa lö hadöi mate ia. Aboto ba dödönia wa no iwaʼö Yehowa wa hasambalö mate niha börö me no aekhu ba horö, ba ifaduhuʼö samösa daʼö Dawido wa yaʼia andrö göi niha sebua horö. (1 Mo. 3:3, 17-19; Si. 51:4, 5) Baero daʼö, aboto ba dödönia wa enoni Lowalangi simane Aberahamo, Izaʼaki ba Yakobo, mate göi ira. Ba iʼila samösa wa samuza inötö göi dania ba mate ia. (Si. 37:25; 39:4) Fehedenia ba Zinunö 61:8 zangoromaʼö faʼamohiʼa dödönia hegöi angetulania ba wanuno Yehowa sandrohu faʼaurinia.—2 Sa. 7:12.

Itaria, isura zi no irai alua khönia Dawido simane niʼilada ba superskripsi ba Zinunö 18, 51, ba 52. Ba Zinunö 23, iʼamaedolagö Yehowa andrö Dawido simane Kubalo sanuturu lala, sangokafui tödö, ba solumöʼö biri-birinia. Ba kubalo simane daʼö göi Dawido. Omasi ia ifosumange Lowalangi ’sandrohu faʼaurinia’.—Si. 23:6.

Moguna itörö tödöda wa Yehowa zameʼe fanuturu lala khö Dawido ba wanura ngawua wehede si so ba mbuku Zinunö. So ösa ba gotaluania wamaʼeleʼö sanandrösa ba zalua ba zi so miföna. Duma-dumania ba Zinunö 110, isura Dawido wa ’modadao Mesia ba gambölö Lowalangi’ si so ba zorugo ba itema kuaso sabölö ebua. Mesia dania zokalaisi udu Lowalangi ba ”ihuku fefu soi” si so ba gulidanö. Dawido andrö tua moroi khö Mesia samatörö moroi ba zorugo, ba ”tobali ia ere irugi zi lö aetu”. (Si. 110:1-6) Imane Yesu wa yaʼia andrö Mesia si no mufaʼeleʼö ba Zinunö 110, ba iforomaʼö wa alua wamaʼeleʼö andrö ba zi so miföna.—Mat. 22:41-45.

Börö daʼö, Yehowa zameʼe fanuturu lala khö Dawido ba wanura salua ba götönia hegöi salua ba zi so miföna, ya’ia daʼö na tesusugi ia dania ba tola isuno Yehowa sagötö faʼara. Börö daʼö, ayati nisura ba Zinunö 37:10, 11, 29 tola muʼamaedolagö ia simane salua ba ndraono Gizaraʼeli me föna hegöi salua dania ba zi so miföna, yaʼia daʼö ba ginötö ifalua mbuʼusa linia Lowalangi.—Faigi ngenoli si 8 ba artikel ”Awögu Ndraʼugö ba Waradaiso” si so ba majalah daʼa.

Sindruhu wa nisura ba Zinunö 61:8 hegöi ayati tanö böʼönia zangoromaʼö faʼomasi Dawido ba wamolakhömi Yehowa sandrohu faʼaurinia. Ba omasi göi ia ifolakhömi Yehowa sagötö faʼara na no aefa tesusugi ia dania ba zi so miföna.