Hadia no ahori öbaso fefu edisi Manuriaigö ba ndröfi daʼa? Na noa, tandraigö beʼe wanema li ba wanofu-nofu andre:

Hadia mbuania na tabeʼe ginötöda fahuhuo khö Yehowa, tafondrondrongo ia, ba taʼangeragö sanandrösa khönia?

Tola tahalö gangetula si sökhi, tobali ita samahaʼö si sökhi, itugu aro wamatida, ba itugu tedou waʼomasida khö Yehowa.—w22.01, ngaʼörö 30-31.

Hana wa moguna tafaduhuhsi tödö Yehowa hegöi organisasinia?

Iʼotarai iadaʼa, moguna faduhu dödöda wa oi atulö fefu wanuturu lala nibeʼe Yehowa. Lö aombö dödöda ba wanuturu lala hegöi angetula nihalö ndra satua sokubaloi. Buania, na tohare dania wamakao sabölö-bölö, aoha khöda ba woloʼö fanuturu lala sambö fatema ba dödöda mazui sabua khöda famalua.—w22.02, ngaʼörö 4-6.

Hadia geluahania me ifatunö malaʼika khö Zakharia wa so ”mbua lot ba danga [Gubernur] Zerubabeli”? (Zak. 4:8-10)

Angilata andrö zamaduhuʼö ba dödö nono mbanua Lowalangi wa hasambalö teʼasiwai gosali andrö ba tefaudu ia ba goi-goi Yehowa, hewaʼae na tenga simane faʼebua gosali ba zilalö ia.—w22.03, ngaʼörö 16-17.

Hewisa enaʼö tobali ita ”duma-duma . . . ba wehede”? (1 Ti. 4:12)

Moguna tahaogö wahuhuosa na manuriaigö ita, manunö ita soroi ba dödö ba taʼaseseʼö wameʼe bua gera-erada ba gangowuloa, tatörö zindruhu na fahuhuo ita, taʼogunaʼö ngawua wehede si möi famarou dödö niha böʼö, ba böi taʼogunaʼö wehede fangoʼaya.—w22.04, ngaʼörö 6-9.

Urifö samuʼi nitutunö ba Wamaʼeleʼö 13:1, 2 iʼokhögö dandra-tandra simane niʼokhögö gurifö samuʼi si öfa ngaʼeu (famatörö) nitutunö ba Danieli faza 7. Hadia rahu-rahu si tola tahalö moroi ba daʼö?

Urifö samuʼi nitutunö ba Wamaʼeleʼö 13 lö manandrösa ia ha ba zi sambua famatörö, simane Roma. Hizaʼi, manandrösa ia ba wamatörö niha gulidanö maʼafefu iʼotarai mböröta irugi iadaʼa.—w22.05, ngaʼörö 9.

Hewisa wangoromaʼöda faʼafaduhu dödö wa hasambalö ifalua zatulö Yehowa?

Na so zangumaʼö fehede mazui samalua hadia ia si möi fangafökhö dödöda, taforege wangeheta khöda faʼabao dödö mazui fönu. Tatouʼö gabula dödöda andrö ba danga Yehowa. Hasambalö iheta dania fefu ngawalö zi lö sökhi niʼasogö horö.—w22.06, ngaʼörö 10-11.

Hadia zinangea latörö tödöra ira talifusöda ira matua na lasalahini niha böʼö ba wangandrö?

Tebai laʼogunaʼö ginötö wangandrö ba woʼamenesi mazui ba wamaʼema angombakhata ba mbanua niha Keriso. Töra-töra na awena mubörögö gangowuloa, tebai ’anau wangandrö’ nifaʼema zangandrö. (Mat. 6:7)—w22.07, ngaʼörö 24-25.

Hadia geluahania ”tesusugi enaʼö tehuku” dozi ”samalua si lö sökhi”? (Yoh. 5:29)

Lö muhuku ira moloʼö lala waʼaurira si lö sökhi fatua lö mate ira. Hizaʼi, na no aefa tesusugi ira dania, munehe-nehegö ba mufaigi-faigi hewisa gamuatara.—w22.09, ngaʼörö 18.

Hadia gangombakhata nifaʼema J.F. Rutherford ba zi sambua angowuloa me baŵa si Siwa 1922? ?

Ba zi sambua angowuloa ba Cedar Point, Ohio, AS, imane, ”No mamatörö Razoda! Tebeʼe khömi halöwö ba wanuriaigö daʼö. Andrö, miʼombakhaʼö, miʼombakhaʼö, miʼombakhaʼö Razo hegöi Famatörönia!”—w22.10, ngaʼörö 3-5.

Ba Yesaya faza 30, hadia zi tölu lala niʼogunaʼö Yehowa ba wanolo yaʼita enaʼö so khöda waʼanau gölö?

Ba faza andrö, itutunö khöda wa (1) ifondrondrongo ba ibeʼe wanema li ba wangandröda, (2) ibeʼe khöda wanuturu lala, ba (3) ibeʼe khöda howu-howu iadaʼa hegöi ba zi so miföna.—w22.11, ngaʼörö 9.

Sanandrösa ba ngawua wehede nitutunö ba Zinunö 37:10, 11, 29, hezo taʼila wa no alua daʼö me mböröta ba hasambalö alua göi dania ba zi so miföna?

Ngawua wehede Dawido zangoromaʼö hadia manö howu-howu nitema ndraono Gizaraʼeli, duma-dumania me mamatörö Razo Selomo. Itötöi Yesu ayati 11 ba iforomaʼö wa alua dania wamaʼeleʼö nitutunö ba ayati andrö ba gulidanö Faradaiso ba zi so miföna. (Mat. 5:5; Luk. 23:43)—w22.12, ngaʼörö 8-10, 14.