Hadia Tefaʼanö Ndraʼugö ba ’Wangokhögö Ulidanö’?
FEFU ita, tadöna-döna zi no ifabuʼu Yesu me imane, ”Yaʼahowu niha sangide-ngideʼö yaʼia me yaʼira zangokhögö ulidanö dania.” (Mat. 5:5) Laʼokhögö gulidanö ira niha nibayoini dania ba ginötö fao ira khö Yesu mamatörö ba zorugo. (Fam. 5:10; 20:6) Hizaʼi, ato niha Keriso iadaʼa sangokhögö tötönafö faʼauri si lö aetu ba gulidanö, moʼahonoa ira dania, ba larasoi waʼohahau dödö ba faʼomuso dödö. Enaʼö mofozu daʼö, so halöwö sinangea lafalua dania. Tölu ba gotaluania yaʼia daʼö labaliʼö Faradaiso gulidanö andre, lahenaigö zoguna ba niha nisusugi, ba lafahaʼö niha nisusugi. Faigi hadia zi tola öfalua iadaʼa sangoromaʼö wa no tefaʼanö ndraʼugö wamalua halöwö andrö ba zi so miföna.
TEFAʼANÖ NDRAʼUGÖ BA WOMBALIʼÖ ULIDANÖ ANDRE TOBALI FARADAISO
Mböröta, iʼoroisi ba niha Yehowa enaʼö ’lafoʼösi gulidanö ba lafatörö’. Mazui tola tawaʼö wa omasi ia na tobali Faradaiso gulidanö andre. (1 Mo. 1:28) Moguna göi goroisa andrö ba niha sangokhögö ulidanö dania. Hizaʼi, lö hadöi saʼae Kabu Edena nifazökhi Lowalangi me föna. Börö daʼö, labörötaigö wangehaogö yaʼia iʼotarai ba wamobörö. Na no aefa Hamagedo, oya sibai halöwö sinangea lafalua ba wangehaogö ulidanö. Tatu no halöwö sebua daʼa!
Arakhagö fagölö halöwö andrö simane nifalua ndraono Gizaraʼeli me mangawuli ira moroi ba Mbabilona. No muröi soi daʼö ba zi 70 fakhe faʼara. Hizaʼi, ifaʼeleʼö Yesaya wa börö howu-howu Yehowa, tola ifuli laʼehaogö daʼö mangawuli. Imane Yehowa, ”Tanö si mate andrö khönia ubaliʼö Kabu Edena ba tanö si lö niha-niha ubaliʼö kabu Yehowa.” (Yes. 51:3) Sindruhu wa mofozu ndraono Gizaraʼeli ba wangehaogö mangawuli soira. Simane daʼö göi dania, börö howu-howu Yehowa, niha sangokhögö ulidanö tola mofozu ira ba wombaliʼö ulidanö andre tobali Faradaiso. Iʼotarai iadaʼa, foromaʼö wa omasi ndraʼugö wamalua halöwö andrö ba zi so miföna.
Sambua zi tola tafalua yaʼia daʼö na tarorogö nomoda enaʼö toföfö ba lö taʼunö. Tola öfalua ia hewaʼae na lö lafalua daʼö niha böʼö. Tola göi örorogö nahia gangowuloa hegöi nahia gangowuloa sebua. Ba na tola, fasuraʼö döimö tobali relawan penanggulangan bencana. Na öfalua daʼö, no öforomaʼö wa no öfaʼanö ndraʼugö ba wanolo niha ba ginötö moguna. Angeragö atö: ’Hadia no ufahaʼö ndraʼo ba nekhe-nekhe danga si tola uʼogunaʼö dania ba gulidanö si bohou?’
FAʼANÖ NDRAʼUGÖ BA WANGAʼASOGÖ SOGUNA BA NIHA NISUSUGI
Mböröta, me no aefa isusugi nono alawe khö Yaʼiro, iwaʼö khöra Yesu enaʼö labeʼe gö nono andrö. (Mrk. 5:42, 43) Tatu lö abua khöra ba wangaʼasogö soguna khö nono alawe si 12 fakhe andrö. Hizaʼi, khalaigö hadia manö zi tola tafalua na iʼoʼozui mbuʼusa linia Yesu. Imane, ”Larongo linia dozi si so ba lewatö, ba möi ira yawa.” (Yoh. 5:28, 29) Ba Zura Niʼamoniʼö, lö oya nizara-zarania wanutunö sanandrösa ba wanusugi. Hizaʼi, niha nisusugi dania moguna khöra gö, nukha hegöi nahia waʼatoröi. Börö daʼö, hadia zi tola öfalua iadaʼa ba wangoromaʼö wa öfaʼanö ndraʼugö ba wanolo yaʼira dania? Angeragö wanofu daʼa.
Hadia zinangea öfalua iadaʼa ba wangoromaʼö wa no tefaʼanö ndraʼugö ba wangokhögö ulidanö?
Na so gangombakhata wa so ndra satua samasui sangondrasi banua niha Keriso si farahu yaʼugö, hadia tola ökaoni ira wemanga? Na so ndra talifusöda si lö mangai halöwö saʼae ba Mbetieli ba lafataro ira ba mbanua niha Keriso si farahu yaʼugö, mazui na so dalifusöda si lö mangai halöwö tobali satua samasui, hadia tola ötolo ira ba wangalui nahia waʼatoröira? Na so gangowuloa ba zi sambua regional mazui angowuloa si tohude nifalua ba mbanuamö, hadia tola faoʼö tobali relawan ba wanolo fatua lö mufalua mazui na no awai mufalua gangowuloa andrö? Hadia tola faoʼö ba wanemaʼö ira delegasi?
FAʼANÖ NDRAʼUGÖ BA WAMAHAʼÖ NIHA NISUSUGI
Simane nitutunö ba Halöwö Zinenge 24:15, so miliaran niha nisusugi. Ato ba gotaluara si lö mangokhögö faʼaboto ba dödö sanandrösa khö Yehowa fatua lö mate ira. Na no aefa tesusugi ira, awena tebeʼe khöra ginötö ba wangokhögö faʼaboto ba dödö. Ono mbanua Lowalangi si lö faröi daʼö zamahaʼö yaʼira. a (Yes. 11:9) Imane si samösa talifusöda ira alawe sotöi Charlotte si no irai manuriaigö ba Eropa, Amerika Selatan hegöi ba Afrika, ”Udöna-döna sibai ginötönia hawaʼara tola ufahaʼö niha nisusugi. Itaria, na ubaso waö-waö waʼauri zi samösa niha si no irai auri ba zilalö, so ba wangera-ngeragu, ’Na no manö so khönia waʼaboto ba dödö sanandrösa khö Yehowa, tatu tenga simane daʼö waʼaurinia.’ Afu-afugu no ufatunö ba niha nisusugi wa tola lasöndra waʼowua-wua dödö na no so khöra waʼaboto ba dödö ba lafosumange Yehowa.”
Moguna lafahaʼö nono mbanua Yehowa sauri fatua lö si möi Yesu ba gulidanö na no aefa tesusugi ira dania. Duma-dumania simane Danieli, lö aboto ba dödönia wamaʼeleʼö si no isura. Khalaigö hadia nirasoimö na labeʼe khömö halöwö si sökhi wamatunö khö Danieli hewisa waʼalua wamaʼeleʼö nisurania. (Dan. 12:8) Mazui, khalaigö na öfatunö khö Ruti hegöi Naʼemi wa yaʼira andrö furugö moroi khö Mesia. Tatu omuso dödöda na tola fao ita ba wamahaʼö niha ba zi sagörö ulidanö ba lö hadöi folohi hegöi fondrönisi dödö moroi ba gulidanö andre!
Iadaʼa, hewisa wangoromaʼöu wa no öfaʼanö ndraʼugö ba wanolo niha nisusugi? Tola öforege ba wondrouʼö faʼatua-tuamö ba wamahaʼö hegöi faʼowölö-ölömö ba wanuriaigö. (Mat. 24:14) Hewaʼae na lö asese möiʼö manuriaigö börö me no alawa ndröfiu mazui tanö böʼönia, lö salania daʼö. Na lö tebulö öbeʼe wondrege zi sökhi, no öforomaʼö wa tefaʼanö ndraʼugö ba wamahaʼö niha nisusugi.
Fanofunia iadaʼa: Hadia sindruhu-ndruhu ödöna-döna ba wangokhögö ulidanö? Hadia afu-afumö öbaliʼö Faradaiso gulidanö andre, öʼasogö zoguna ba niha nisusugi ba öfahaʼö ira? Na yaʼia, ogunaʼö ginötö iadaʼa ba wamaʼanö yaʼugö. Na öfalua daʼö, sindruhu-ndruhu tefaʼanö ndraʼugö ba wangokhögö ulidanö!
a Faigi artikel ”Manolo Niha Sato ba Wanöndra Sindruhu” ba majalah Manuriaigö Baŵa si Siwa 2022.
