1. Hadia ’waʼohahau dödö andrö khö Lowalangi’, ba hadia mbuania khöda na taʼokhögö ia? (Filifi 4:6, 7)

 ATO niha ba gulidanö andre lö khöra faʼaboto ba dödö sanandrösa ba ’waʼohahau dödö andrö khö Lowalangi’. Daʼö waʼohahau dödö nirasoida börö me fahuwu ita khö Namada si so ba zorugo. Na taʼokhögö waʼohahau dödö moroi khö Lowalangi, tola tarasoi waʼahono dödö. (Baso Wilifi 4:6, 7.) Tola göi fahuwu ita ba niha sangomasiʼö yaʼia, ba taʼokhögö wahuwusa saro khö ”Lowalangi waʼatulö” mazui Lowalangi waʼohahau dödö. (1 Te. 5:23) Na aboto ba dödöda, tafaduhusi tödö, ba taʼoʼö niwaʼö Namada andrö, faʼohahau dödö moroi khönia zameʼe khöda faʼahono dödö ba wanaögö faʼabasaki.

2. Hadia tola taʼokhögö ’waʼohahau dödö andrö khö Lowalangi’? Tutunö.

² Hadia tarasoi waʼohahau dödö na alua khöda waʼabasaki simane fökhö waba, bencana alam, faʼafawuka, mazui folohi? Sindruhu sa, na alua daʼö, tola manö ataʼu ita. Hizaʼi, iʼamenesi ndra soloʼö khönia Yesu, ”Böi mibusi tödö mazui ataʼu ami.” (Yoh. 14:27) Ato ndra talifusöda soloʼö niwaʼö Yesu andrö. Börö wanolo moroi khö Yehowa, lö tebulö larasoi waʼohahau dödö hewaʼae na abölö-bölö waʼabasaki nitaögöra.

3. Hadia lua-luania khöda epidemi mazui pandemi?

³ Tola tebulö waʼaurida na alua epidemi mazui pandemi. Duma-dumania, me musofu-sofu ba zi hadauga niha, matonga moroi ba gotaluara zi lö mangila mörö sagötö alua pandemi COVID-19. Lö sökhi-sökhi dödöra, fawuka gera-erara, laduhugö wamadu tuo, laʼogunaʼö dalu-dalu ba lala si fasala, laböbözi nösi nomora, ba so göi zamunu yaʼira samösa. Na  alua wökhö waba ba mbanua si toröi yaʼugö, hewisa enaʼö lö talafo aombö dödömö ba tola örasoi waʼohahau dödö moroi khö Lowalangi?

4. Hana wa tarasoi waʼohahau dödö me taʼila wamaʼeleʼö Yesu sanandrösa ba ngaluo safuria?

⁴ No ifaʼeleʼö Yesu wa alua ”ngawalö wökhö” ba ngaluo safuria, gofu hezo so. (Luk. 21:11) Daʼö mbörö wa lö tokea ita na alua wökhö waba. Lö tebulö tarasoi waʼohahau dödö. Tola göi taʼoʼö mene-mene niwaʼö Yesu ba niha sauri ba ngaluo safuria andre me imane, ”Böi miʼataʼufi.”—Mat. 24:6.

5. (a) Simane nisura ba Wilifi 4:8, 9, hadia zinangea taʼangandröi na alua wökhö waba? (b) Hadia mbuania na tafondrondrongo rekaman fombaso Sura Niʼamoniʼö?

⁵ Tola ataʼu ita ba lö taʼila hadia nifaluada na alua wökhö waba. Daʼö zalua khö dalifusöda ira alawe sotöi Desi. b Mate namania sakhi, ono namania saʼa, hegöi dotonia börö COVID-19. Ibörögö so khönia waʼataʼu alai na göna khönia virus andrö ba göna göi khö ninania si no alawa döfi. Baero daʼö, börö pandemi andrö, tola manö laheta ia ba halöwönia, ba aombö dödönia alai na tebai iʼöli zoguna khöra ba ibuʼa okosi nomora. Lua-luania, lö iʼila mörö ero bongi. Hewaʼae simanö, tola ifuli irasoi waʼohahau dödö. Hadia nifalua Desi? Ilau mangandrö enaʼö itolo ia Yehowa ba wangokhögö faʼahono dödö hegöi fangera-ngera si sökhi. (Baso Wilifi 4:8, 9.) Irongo li Yehowa ba rekaman fombaso Sura Niʼamoniʼö. Imane, ”Me ufondrondrongo li sohau-hau moroi khö ndra sombaso Sura Niʼamoniʼö, alö waʼaombö dödögu, ba itörö tödögu wa iʼameʼegö tödö ndraʼo Yehowa.”—Si. 94:19.

6. Hadia mbuania na tafalua wamahaʼö samösa ba taʼondrasi gangowuloa?

⁶ Börö wökhö waba, lö taʼila tafalua halöwöda simane si toʼölö. Hizaʼi, böi tehegö tobali taha-tahau daʼö ba wamalua famahaʼö samösa mazui ba weʼamöi ba gangowuloa. Tola öfahaʼö ndraʼugö khö ndra talifusöda si lö faröi hewaʼae na lataögö gabula dödö si fagölö. Tola öʼila zalua khöra andrö ba publikasi mazui video nihenaigö organisasi. (1 Fe. 5:9) Na öʼondrasi gangowuloa, tola öfoʼösi wangera-ngeramö ba ngawalö zi sökhi si so ba Zura Niʼamoniʼö. Baero daʼö, tola öʼabölöʼö niha böʼö ba tola göi teʼabölöʼö ndraʼugö samösa. (Rom. 1:11, 12) Na öʼangeragö hewisa wanolo Yehowa ono mbanuania si göna fökhö, sorasoi faʼataʼu, mazui si lö awö-awö, tola itugu aro wamatimö ba itugu faduhu dödömö wa hasambalö ituhini göi ndraʼugö Yehowa.

7. Hadia wamahaʼö nihalömö khö zinenge sotöi Yohane?

⁷ Aseseʼö fahuhuo khö ndra talifusöda ba wamati. Ba ginötö so wökhö waba, te tafandröndröu ita ba niha böʼö hegöi khö ndra talifusöda ba wamati. Na daʼö zalua, te fagölö nirasoimö simane nirasoi zinenge sotöi Yohane. Omasi sibai ia falukha khö nawönia  sotöi Gayo. (3 Yo. 13, 14) Hizaʼi, aboto ba dödö Yohane wa tebai falukha ira ua gasa-gasa. Börö daʼö, ifalua hadia zi tola ifalua. Ifaʼoheʼö zurania khö Gayo. Na tebai falukha boto ndraʼugö khö ndra talifusöda, tandraigö telefo ira, lau video call, ba faʼoheʼö khöra SMS mazui chat. Na öfalua daʼö, lö talafo örasoi wa lö awö-awöu ba tola örasoi waʼahono dödö. Fahuhuo khö ndra satua sokubaloi na örasoi waʼaombö dödö ba tema wanolo safönu faʼomasi nibeʼera.—Yes. 32:1, 2.

8. Hadia nirasoimö na alua bencana?

⁸ Na no irai tefakao ndraʼugö börö me alua molö, duru danö, mazui akhozi nomou, tola manö örasoi waʼaombö-aombö dödö ba zi hauga fakhe faʼara. Na mate niha niʼomasiʼöu mazui tekiko gama-gama niʼokhögömö, tola manö abu dödömö, aetu wanötönamö, ba mofönuʼö. Hizaʼi, tenga daʼö geluahania wa yaʼugö andrö niha sangomasiʼö kefe mazui ambö wamatimö. Sindruhu sa, abua zalua khömö ba sinangea na so ba wangera-ngeramö zambö tefaudu. Lö göi ahöli-höli dödö niha samaigi-maigi yaʼugö. (Yob. 1:11) Hewaʼae simanö, tola örasoi waʼohahau dödö. Hewisa lalania?

9. Hadia niwaʼö Yesu enaʼö tola tefaʼanö ita na alua bencana?

⁹ Törö tödöu zi no ifaʼeleʼö Yesu. Hewaʼae na ato niha sangumaʼö wa lö irai göna ira bencana, hizaʼi aboto ba dödöda wa hasambalö itugu oya bencana ba tola manö so ösa zi göna ita. Ifatunö Yesu khö ndra soloʼö khönia wa ”alua ndruru danö sabölö-bölö” hegöi ngawalö bencana tanö böʼö fatua lö irugi gamozua andrö. (Luk. 21:11) Ifaʼeleʼö nasa Yesu wa itugu ”tedou waʼalösökhi”. Ba sindruhu, ato niha iadaʼa zamalua si lö sökhi, faʼudusa, ba ato göi zi tobali teroris. (Mat. 24:12) Lö irai iwaʼö Yesu wa ha niha si fatuwu khö Yehowa zi göna bencana andrö. Göna göi nono mbanua Yehowa si lö faröi. (Yes. 57:1; 2 Ko. 11:25) Tola manö lö ifalua dandra sahöli-höli dödö Yehowa ba wolumöʼö yaʼita na alua bencana. Hizaʼi, hasambalö ibeʼe zoguna khöda enaʼö lö tebulö taʼokhögö waʼahono dödö hegöi faʼohahau dödö.

10. Hana wa oroma wamatida na tafaʼanö ita fatua lö alua bencana? (Amaedola 22:3)

¹⁰ Na no tafaʼanö ita fatua lö alua bencana, lö talafo fawuka gera-erada na so zalua si lö mudöna-döna. Hizaʼi na tafaʼanö ita, hadia daʼö geluahania wa lö mamati ita khö Yehowa? Tenga simane daʼö. Na no tafaʼanö ita fatua lö alua bencana, daʼö zangoromaʼö wa faduhu dödöda wa hasambalö irorogö ita Yehowa. Angeragö atö, iʼamenesi ita Taromali Lowalangi enaʼö tafaʼanö ita ba wanaögö bencana si tola manö alua. (Baso Gamaedola 22:3.) Lö göi tebulö ibeʼe khöda wamasugi ba dödö organisasi Lowalangi, he ba majalah, ba gangowuloa, hegöi ba gangombakhata ba ginötö si tefaudu, enaʼö tola tafaʼanö ita na so zalua si lö mudöna-döna. c Na faduhu dödöda khö Yehowa, hasambalö taʼoʼö mene-menenia andrö iʼotarai iadaʼa, fatua lö alua bencana.

11. Hadia wamahaʼö nihalöda moroi ba duma-duma Margaret?

¹¹ Nehegö zi no irai alua khö dalifusöda ira alawe sotöi Margaret. Börö waʼakhozi gatua, lafangelama niha ba mbanua andrö ira samatörö enaʼö laröi nomora. Ato sibai niha si fendronga ba wondröi banua andrö irege tetaha wofanö moto. Börö waʼoya zimbo, lö möi baero Margaret moroi ba motonia. Hizaʼi, tola teʼorifi ia börö me no ifaʼanö ia ba zilalö. Bakha ba tasinia, so peta si tola iʼogunaʼö ba  wangalui lala tanö böʼö enaʼö tola iröi mbanua andrö. No irai itörö lala daʼö ba zilalö enaʼö iʼila hezo möi ia na so zalua si lö mudöna-döna. Börö me no ihaogö wamaʼanö yaʼia, tola teʼorifi ia.

12. Hana wa moguna taʼoʼö wanuturu lala si no labeʼe?

¹² Ba wolumöʼö ono mbanua, te laʼandrö khöda ira samatörö enaʼö taʼoʼö gamakhoita nibeʼera. Duma-dumania, hawaʼalawa mbongi tola mangawuli ita, hewisa na lawaʼö khöda ba wondröi omoda, mazui hewisa na so wanuturu lala tanö böʼö. Hizaʼi, so ösa niha si lö omasi moloʼö fanuturu lala andrö börö me abua khöra wondröi haratora. Hewisa göi niha Keriso? Imane Sura Niʼamoniʼö, ”Miʼoʼö nifakhoi ndra samatörö börö Zoʼaya yaʼita, he razo fondrege zalawa hegöi ira gubernur nifataronia.” (1 Fe. 2:13, 14) Ibeʼe göi khöda wanuturu lala organisasi Lowalangi ba wolumöʼö yaʼita. Asese ifasugi ba dödöda enaʼö tabeʼe numero telefoda khö ndra satua sokubaloi ba taʼombakhaʼö hezo toröi ita. Na tafalua daʼö, tola latelefo ita na so zalua si lö mudöna-döna. Hadia no öfalua daʼö? Na so zalua si lö mudöna-döna, tola manö laʼandrö khöda enaʼö tahonogö manö ita ba nomo mazui laʼandrö khöda ba wondröi omoda. Te labeʼe göi khöda wanuturu lala sanandrösa ba wanöndra soguna khöda, mazui hewisa wanoloda niha böʼö ba hawaʼara zi bagania tafalua daʼö. Na lö moloʼö ita, tola manö tafaʼala waʼaurida hegöi faʼauri ndra satua sokubaloi. Törö tödömö, no tebeʼe noro dödö khö ndra talifusöda si lö faröi andre ba wondrorogö yaʼita. (Heb. 13:17) Imane Margaret, ”Sindruhu-ndruhu faduhu dödögu wa tola teʼorifi ndraʼo börö me uʼoʼö wanuturu lala moroi khö ndra satua sokubaloi hegöi organisasi.”

13. Hana wa lö tebulö laʼokhögö waʼomuso dödö hegöi faʼohahau dödö ira niha Keriso sondröi omora?

¹³ Börö waʼalua bencana, fasuwöta, mazui faʼafawuka, ato ndra talifusöda sondröi omora ba laforege wamaudugö faʼaurira ba nahia si bohou. Iʼanemaiʼö lafalua halöwö ba wamati. Lö laböhöli ’wanuriaigö turia somuso dödö moroi ba daromali Lowalangi’, simane nifalua niha Keriso me götö föna si no muzawili börö wolohi. (Hal. 8:4) Börö wanuriaigö, tola laʼosambuaʼö dödöra ba Wamatörö Lowalangi, tenga ba gabula dödöra samösa. Buania, lö tebulö laʼokhögö waʼomuso dödö hegöi faʼohahau dödö.

14. Hana wa tola taya waʼohahau dödöda na göna ita folohi?

¹⁴ Na göna ita folohi, tola manö lö taʼila tafalua hadia zangaʼasogö khöda faʼohahau dödö. Ba zilalö, omuso dödöda börö me tola taʼondrasi gangowuloa ba lö taha-tahada ba wamalua halöwö fanuriaigö. Baero daʼö, tola göi tafalua halöwöda sero maʼökhö börö me lö khöda faʼataʼu alai dania na laraʼu ita. Hizaʼi, ba ginötö tebai tafalua fefu daʼö, tola manö tarasoi waʼataʼu ba faʼaombö dödö na taʼangeragö hadia dania zalua. Lö fasala na tarasoi zimane daʼö. Hewaʼae simanö, moguna mangelama ita. Iwaʼö Yesu wa so ösa zoloʼö khönia si faröi börö wolohi. (Yoh. 16:1, 2) Börö daʼö, hewisa enaʼö lö tebulö tarasoi waʼohahau dödö hewaʼae na göna ita folohi?

15. Hana wa lö moguna ataʼu ita na so wolohi? (Yohane 15:20; 16:33)

¹⁵ Imane Taromali Lowalangi, ”Dozi sedöna moloʼö Keriso ba wamosumange Lowalangi soroi ba dödö, hasambalö göna ira folohi.” (2 Ti. 3:12) Samösa dalifusöda ira matua sotöi Andrei, abua khönia wanemaʼö daʼö. Me lö latehegö halöwö fanuriaigö ba soi si so yaʼia, imane tödönia, ’Ato sibai ndra Samaduhuʼö Yehowa ba daʼa. Lö duhu tola laraʼu ndraʼaga fefu ira samatörö.’ Hizaʼi, lö irasoi waʼohahau dödö Andrei börö me so khönia wangera-ngera simane daʼö. Itugu monönö waʼaombö dödönia. Hewaʼae simanö, lö hadöi fangera-ngera simane daʼö khö ndra talifusöda tanö böʼö. Latouʼö gabula dödöra khö Yehowa, ba aboto ba dödöra wa tola manö laraʼu ira samuza inötö. Daʼö mbörö wa lö talafo aombö sibai dödöra. Ihalö gangetula Andrei ba woloʼö lala wangera-ngera ndra talifusöda andrö ba itouʼö fefu ba danga Yehowa. Buania, ibörögö irasoi waʼohahau dödö ba omuso dödönia hewaʼae na oya waʼabasaki salua. Tola göi tarasoi zimane daʼö. Sindruhu sa, no iwaʼö Yesu wa hasambalö göna ita folohi. Hizaʼi, ibeʼe göi khöda waʼafaduhu dödö wa hasambalö tola tarorogö waʼalöfaröida.—Baso Yohane 15:20; 16:33.

16. Hadia wanuturu lala sinangea taʼoʼö ba ginötö so wolohi?

¹⁶ Ba ginötö lö latehegö mazui lasaisi halöwö nifaluada, tola manö tatema wanuturu lala moroi ba gödo ndraha hegöi khö ndra satua sokubaloi. Moguna fefu wanuturu lala  andrö ba wolumöʼö yaʼita, ba wotatugöi enaʼö lö tebulö tatema gö ba wamati, hegöi ba wanolo yaʼita ba wamalua halöwö fanuriaigö na tola. Forege ba woloʼö fefu wanuturu lala andrö, hewaʼae na ambö aboto ba dödöu hadia mbörö wa mubeʼe ia. (Yak. 3:17) Ba böi fatunö ba niha böʼö ngawalö zoʼamakhaita khö ndra talifusöda mazui halöwö nifaluada ba mbanua niha Keriso, na tenga sinangea laʼila daʼö.—Sango. 3:7.

17. Simane ira sinenge me abad siföföna, hadia zi lö mamalö tafalua?

¹⁷ Sambua dane-dane khö Zatana ba wanuwö ono mbanua Lowalangi yaʼia daʼö börö me ’latema halöwö ba wamaduhuʼö Yesu’. (Fam. 12:17) Böi ataʼufi Zatana hegöi ulidanö nifatörönia. Na lö taböhöli wanuriaigö hegöi ba wamahaʼö niha hewaʼae na lasaisi ita, hasambalö tarasoi waʼomuso dödö ba faʼohahau dödö. Me abad siföföna, lafaretakö ndra sinenge ira sangetuʼö huku ba niha Yahudi enaʼö laböhöli wanuriaigö. Hizaʼi, lahalö gangetula ira sinenge si lö faröi andrö ba woloʼö khö Lowalangi. Lö laböhöli wanuriaigö, ba daʼö zangaʼasogö khöra faʼomuso dödö. (Hal. 5:27-29, 41, 42) Sindruhu sa, na lasaisi halöwö nifaluada, moguna mangelama ita ba wanuriaigö. (Mat. 10:16) Hizaʼi, na taforege enaʼö lö tebulö manuriaigö ita, hasambalö tarasoi waʼohahau dödö. Hadia mbörö? Börö me aboto ba dödöda wa no taʼomusoiʼö dödö Yehowa ba fao ita ba wamaʼema turia fangorifi niha.

18. Haniha Gumbu waʼohahau dödöda?

¹⁸ Yafaduhu dödöu, hewaʼae na so ita ba ginötö si basaki, tola tarasoi waʼohahau dödö. Ba ginötö simane daʼö, tatörö tödöda wa moguna sibai khöda waʼohahau dödö moroi khö Lowalangi, yaʼia daʼö faʼohahau dödö si otarai khö Yehowa. Odaligö ia na alua wökhö waba, bencana, mazui folohi. Böi röi organisasinia. Böi böhöli woʼangeragö tötönafö si sökhi sombaloi yaʼugö ba zi so miföna. Na öfalua daʼö, ’fao khöu Lowalangi waʼohahau dödö’. (Fil. 4:9) Ba artikel aefa daʼa, tatutunö dania hewisa enaʼö tola tatolo ndra talifusöda ba wangokhögö faʼohahau dödö moroi khö Lowalangi, hewaʼae na tataögö waʼabasaki.