1. Hadia mbuania na taʼangerönusi mbuʼusa li Yehowa andrö?

 IFABUʼU Yehowa wa niha soloʼö niwaʼönia hasambalö lasöndra ’waʼauri si lö aetu’. (Rom. 6:23) Na taʼangerönusi zi no ifabuʼu Yehowa andrö, tatu itugu taʼomasiʼö ia. Angeragö atö: Iʼomasiʼö sibai ita Amada si so ba zorugo, daʼö mbörö wa omasi ia ibeʼe khöda waʼauri si lö aetu enaʼö lö fabali ita khönia.

2. Hadia zi tola tafalua börö mbuʼusa li Lowalangi andrö?

² Buʼusa li Lowalangi zanolo yaʼita enaʼö anau gölöda wanaögö fanandraigö. Hewaʼae lafetaʼu ita ududa ba wamunu yaʼita, lö taböhöli wamosumange Yehowa. Hadia mbörö? Börö me aboto ba dödöda wa tola isusugi ita Yehowa ba ibeʼe khöda waʼauri si lö aetu na lö faröi ita khönia. (Yoh. 5:28, 29; 1 Ko. 15:55-58; Heb. 2:15) Hizaʼi, hadia mbörö wa faduhu dödöda wa hasambalö tola auri ita sagötö faʼara? Datatutunö.

3. Hana wa faduhu dödöda wa tola ibeʼe khöda waʼauri si lö aetu Yehowa? (Sinunö 102:12, 24, 27)

³ Faduhu dödöda wa tola ibeʼe khöda waʼauri si lö aetu Yehowa börö me yaʼia andrö Umbu waʼauri ba lö tebulö so ia sagötö faʼara. (Si. 36:9) So ayati Zura Niʼamoniʼö sangoromaʼö wa lö tebulö so Yehowa. Imane Sinunö 90:2 wa Yehowa andrö ”Lowalangi götö-götö waʼara”. Simanö göi nisura ba  Zinunö 102. (Baso Zinunö 102:12, 24, 27.) Samaʼeleʼö sotöi Habakuki isura göi sanandrösa khö Namada si so ba zorugo imane, ”He Yehowa, hadia tenga iʼotarai mböröta no so ndraʼugö? He Lowalangigu, he Lowalangigu Niʼamoniʼö, lö irai mate ndraʼugö.”—Hab. 1:12.

4. Hadia aombö dödöda na lö taʼila sibai wa lö tebulö so Yehowa? Tutunö.

⁴ Yehowa andrö ”Lowalangi irugi zi lö aetu”, eluahania lö tebulö so ia. (Yes. 40:28) Hadia abua khöu wangokhögö faʼaboto ba dödö sanandrösa ba daʼö? Ato niha zorasoi simane daʼö. Imane Elihu sanandrösa khö Lowalangi, ”Tebai muʼerai ndröfinia.” (Yob. 36:26) Na lö aboto ba dödöda zi sambua ngawalö, tenga daʼö geluahania wa lö atulö daʼö. Duma-dumania, lö aboto sibai ba dödöda hewisa wa tola so listrik, hizaʼi tenga daʼö geluahania wa lö hadöi listrik. Simane daʼö göi, yaʼita niha gulidanö, lö aboto sibai ba dödöda hewisa wa lö tebulö so Yehowa. Hizaʼi, tenga daʼö geluahania wa Yehowa andrö tenga Lowalangi irugi zi lö aetu. Lö tebulö so Zomböi yaʼita, hewaʼae aboto ba dödöda daʼö mazui löʼö. (Rom. 11:33-36) Faduhu dödöda wa Yehowa andrö ”Samazökhi ulidanö ba waʼabölönia” ba yaʼia ’zamologö banua si yawa’. Börö daʼö, no so ia fatua lö mufazökhi luo hegöi banua si yawa awö danö. (Yer. 51:15; Hal. 17:24) Hadia nasa zangaʼasogö faʼafaduhu dödöda wa tola auri ita sagötö faʼara?

5. Hadia zindruhunia zi tola laʼokhögö ira Adamo faoma Khawa ba wamobörö?

⁵ Moroi ba ngawalö nifazökhi Yehowa, ha niha gulidanö zi tola mangokhögö faʼauri si lö aetu. Hizaʼi, ifangelama Gadamo Yehowa imane, ”Tebai öʼa mbua geu famotokhi ba dödö si sökhi ba si lö sökhi. Öʼa siʼaikö daʼö, ba mate ndraʼugö.” (1 Mo. 2:17) Na moloʼö Gadamo faoma Khawa khö Yehowa, lö mate ira. Tola manö ba gafuriata itehegö khöra Yehowa ba wemanga ’bua geu fangorifi’. Daʼö zi tobali weʼe-weʼe dödöra wa tola auri ira ”sagötö faʼara”. b—1 Mo. 3:22.

6-7. (a) Hadia nasa zangoromaʼö wa tewöwöi niha gulidanö enaʼö auri sagötö faʼara? (b) Simane niʼilada ba gambara, hadia zomasiʼö öfalua na no ösöndra waʼauri si lö aetu?

⁶ Moloʼö niha sagatua-tua, utoda andre tola iʼiröʼö duria soya sibai, töra moroi ba  niʼowuloida sandrohu faʼaurida. Imane ba zi sambua jurnal me 2010 (Scientific American Mind) wa utoda andre tola itemaʼö duria mato 2,5 zuta gigabytes. Fagölö ira na murekam video tölu zuta za waʼara (mazui töra 300 fakhe). Daʼö ha sinahö dödö, ba tola manö töra moroi ba daʼö nitemaʼö gutoda andre. Ba daʼö taʼila wa ifazökhi gutoda Yehowa tenga ha enaʼö tola taʼiröʼö duria sagötö zi 70 mazui 80 fakhe waʼara.—Si. 90:10.

⁷ No ibeʼe ba dödöda Yehowa waʼedöna enaʼö lö tebulö auri ita. Iwaʼö Sura Niʼamoniʼö wa ’no ibeʼe ba dödöda zi lö aetu andrö’ Lowalangi. (Sango. 3:11) Daʼö mbörö wa tobali ududa waʼamate. (1 Ko. 15:26) Na göna ita fökhö sabölö-bölö, hadia tahonogö manö ita? Tatu löʼö. Si toʼölönia, möi ita khö ndra doto ba tabadu dalu-dalu enaʼö alio döhö ita. Taforege sibai enaʼö lö mate ita. Ba na mate niha niʼomasiʼöda hewaʼae na awuyu-wuyu mazui no atua ia, tola manö ara taya waʼabu dödöda andrö. (Yoh. 11:32, 33) Angeragö atö: na Somböi yaʼita manö safönu faʼomasi ibeʼe khöda waʼabölö ba wangiröʼö turia soya sibai hegöi faʼedöna enaʼö lö tebulö auri ita, hadia tenga daʼö geluahania wa omasi ia auri ita sagötö faʼara? Oya nasa dane-dane tanö böʼö zamaduhuʼö ba dödöda wa tola auri ita sagötö faʼara. Datatutunö ösa hadia manö nifalua Yehowa me mböröta hegöi iadaʼa, sangoromaʼö wa lö irai tebulö gohitö dödönia ba wamobörö.

8. Hadia niwaʼö Yesaya 55:11 sanandrösa ba gohitö dödö Yehowa?

⁸ Me no aekhu ba horö Gadamo faoma Khawa, laröi horö ondröita hegöi faʼamate  ba ngaʼötöra. Hizaʼi, lö irai tebulö gohitö dödö Yehowa. (Baso Yesaya 55:11.) Omasi ia enaʼö tola auri niha si lö faröi sagötö faʼara. Tola oroma daʼö ba zi no iwaʼö Yehowa hegöi nifaluania ba zilalö.

9. Hadia nifabuʼu Yehowa ba genoninia? (Danieli 12:2, 13)

⁹ Iʼotarai mböröta, no ifabuʼu Yehowa wa hasambalö isusugi niha si no mate ba ibeʼe khöra ginötö ba wangokhögö faʼauri si lö aetu. (Hal. 24:15; Tit. 1:1, 2) Enoni Yehowa si lö faröi sotöi Yobi, faduhu dödönia wa omasi sibai Yehowa wanusugi niha si no mate. (Yob. 14:14, 15) Aboto ba dödö zamaʼeleʼö sotöi Danieli wa so wanötöna ba niha gulidanö enaʼö mususugi ira ba auri sagötö faʼara. (Si. 37:29; baso Danieli 12:2, 13.) Niha Yahudi göi ba götö Yesu, aboto ba dödöra wa ibeʼe ”waʼauri si lö aetu” Yehowa ba genoninia si lö faröi. (Luk. 10:25; 18:18) No hauga kali itutunö Yesu mbuʼusa li daʼö, ba yaʼia samösa no isusugi ia Amania.—Mat. 19:29; 22:31, 32; Luk. 18:30; Yoh. 11:25.

10. Simane niʼilada ba gambara, hadia zaboto ba dödöda ba wanusugi si no irai alua?

¹⁰ Tola isusugi niha si no mate Yehowa börö me yaʼia zameʼe khöda faʼauri. Ibeʼe waʼabölö khö zamaʼeleʼö sotöi Elia ba wanusugi ono lakha mbanua ba Zarefa. (1 Ra. 17:21-23) Aefa daʼö, itolo zamaʼeleʼö sotöi Elisa ba wanusugi ono alawe moroi ba Zunema. (2 Ra. 4:18-20, 34-37) Si dombua salua andrö hegöi fanusugi tanö böʼö si no musura ba Zura Niʼamoniʼö, daʼö zangoromaʼö wa tola isusugi niha si no mate Yehowa. Me so Yesu ba gulidanö, iforomaʼö wa no ibeʼe khönia waʼabölö Amania ba wamalua daʼö. (Yoh. 11:23-25, 43, 44) Iadaʼa, no so Yesu ba zorugo ba no tebeʼe khönia ”fefu waʼabölö ba zorugo hegöi ba gulidanö”. Andrö wa tola ifalua mbuʼusa linia wa ”dozi si so ba lewatö” tesusugi ira ba tebeʼe khöra ginötö enaʼö auri ira sagötö faʼara.—Mat. 28:18; Yoh. 5:25-29.

11. Hana wa moguna sibai khöda höli?

¹¹ Hana wa itehegö Yehowa itörö waʼamate safökhö ono niʼomasiʼönia? Itutunö Yesu hadia mbörö. Imane, ”Simanö sa waʼomasi Lowalangi nösi gulidanö, itehegö Nononia si ha sambua, enaʼö lö tekiko dozi samati khönia, ba lasöndra waʼauri si lö aetu.” (Yoh. 3:16) Börö me no itehegö Nononia ba wangöhöli yaʼita, ibeʼe khöda ginötö Lowalangi enaʼö tola tasöndra waʼauri si lö aetu. (Mat. 20:28) Sindruhu-ndruhu wa moguna sibai khöda höli andrö enaʼö aʼozu gohitö dödö Lowalangi. Imane sinenge sotöi Faulo, ”Börö zi samösa niha wa so waʼamate, ba börö zi samösa niha göi wa tola tesusugi zi no mate. Börö Gadamo wa mate fefu niha, ba börö Keriso wa tesusugi.”—1 Ko. 15:21, 22.

12. Hewisa wamalua Yehowa ohitö dödönia?

¹² Ifahaʼö zoloʼö khönia Yesu ba woʼangandröi enaʼö tohare Wamatörö Lowalangi hegöi ohitö dödönia ba gulidanö. (Mat. 6:9, 10) Sambua ba gotaluania yaʼia daʼö omasi ia na auri niha sagötö faʼara ba gulidanö. Ifataro Nononia Yehowa tobali Razo ba Wamatörö Lowalangi ba iʼowuloi zi 144.000 niha ba gulidanö enaʼö falulu fohalöwö ira khö Yesu ba wamalua ohitö dödönia.—Fam. 5:9, 10.

13. Hadia nifalua Yehowa iadaʼa ba hadia göi nifaluada?

¹³ Iadaʼa, idöni niha Yehowa moroi ba ngawalö soi hegöi mado enaʼö farahu ira ba ”ngawawa sato” ba ifahaʼö ira tobali ono mbanua ba Wamatörönia. (Fam. 7:9, 10;  Yak. 2:8) Hewaʼae na alua waʼafawuka ba gulidanö, faoma fatuwu ba lasuwö nawöra, hizaʼi laforege ”ngawawa sato” enaʼö lö tebulö teʼosambuaʼö ira. Hulö no labaliʼö faku ziʼölira. (Mi. 4:3) Lö fao ira ba wasuwöta sangaʼasogö faʼamate. Hizaʼi, lafahaʼö niha sanandrösa khö Lowalangi satulö hegöi ohitö dödönia enaʼö tola lasöndra ”waʼauri sindruhu”. (1 Ti. 6:19) Tola manö lasaisi ira ösi nomora mazui abua khöra wangalui soguna börö me latuhini Wamatörö Lowalangi. Hewaʼae simanö, lö aetu ibönökhi zoguna khöra Yehowa. (Mat. 6:25, 30-33; Luk. 18:29, 30) Daʼa zamaduhuʼö ba dödöda wa sindruhu-ndruhu so Wamatörö Lowalangi ba ha daʼö zi tola mangoʼozui ohitö dödö Yehowa.

14-15. Hewisa wangoʼozui Yehowa buʼusa linia ba wangeheta faʼamate?

¹⁴ Iadaʼa, no tobali Razo ba zorugo Yesu ba iʼoʼozui fefu mbuʼusa li Yehowa. (2 Ko. 1:20) Iʼotarai me 1914, no ibörögö ikalaisi nudunia Yesu. (Si. 110:1, 2) Ba zi lö ara tö, yaʼia hegöi si 144.000 si fao khönia, laʼasiwai ba wokalaisi udura ba lahori fefu niha si lö sökhi.—Fam. 6:2.

¹⁵ Sagötö Wamatörö Yesu si Saribu Fakhe, isusugi dania niha si no mate ba itolo niha  soloʼö enaʼö moʼahonoa ira. Na no aefa wanandraigö safuria, niha satulö tödö ba wamaigi Yehowa, daʼö ”dania zokhö tanö, ba mowanua ira ba daʼö sagötö faʼara”. (Si. 37:10, 11, 29) Aefa daʼö, ’muheta’ dania ’nudu safuria’ andrö, yaʼia daʼö faʼamate. —1 Ko. 15:26.

16. Hadia sibai mbörö wa tafosumange Yehowa?

¹⁶ Simane si no tatutunö, tola faduhu dödöda ba dötönafö faʼauri sagötö faʼara börö me teʼodane-dane daʼö ba Daromali Lowalangi. Tötönafö andrö zanolo yaʼita enaʼö lö faröi sagötö ngaluo safuria andre. Hizaʼi, hadia lö faröi ita khö Yehowa hegöi khö Yesu ha börö me omasi ita auri sagötö faʼara? Tatu manö löʼö. Lö omuso dödö Yehowa ba zimanö. Sindruhunia, lö faröi ita khöra börö me taʼomasiʼö ira. (2 Ko. 5:14, 15) Faʼomasi zamarou yaʼita ba woloʼö yaʼira ba tatutunö ba niha böʼö sanandrösa ba dötönaföda. (Rom. 10:13-15) Na lö tebulö tatolo niha böʼö ba tenga ha tana khöda niʼaluida, tola ibaliʼö ita si fahuwu khönia Yehowa sagötö faʼara.—Heb. 13:16.

17. Hadia gangetula nihalöda zamösana? (Mataiʼo 7:13, 14)

¹⁷ No ibeʼe khöu ginötö Yehowa ba wangokhögö faʼauri sagötö faʼara. Hadia omasiʼö öʼogunaʼö ginötö andrö? Yaʼugö samösa zotatugöi daʼö. Na omasiʼö auri sagötö faʼara, böi tebulö so ndraʼugö ba lala saekhu ba waʼauri. (Baso Mataiʼo 7:13, 14.) Hizaʼi, hewisa dania waʼaurida ba Waradaiso? Daʼö nitutunöda ba wamahaʼö aefa daʼa.