1. Sasesenia, hewisa wameʼe Yehowa fanema li ba wangandrö nono mbanuania?

 NA IBEʼE wanema li Yehowa ba wangandrö niha böʼö, tola manö iʼogunaʼö ita fefu simane ira satua sokubaloi, enoni, perintis mazui sanuriaigö ba mbanua niha Keriso. Tola göi iʼogunaʼö ndra talifusöda ira matua mazui talifusöda ira alawe, si bohou ebua mazui si no alawa döfi. Na so niha sangomasiʼö Yehowa sangandrö fanolo khönia, asese iʼogunaʼö ndra satua sokubaloi hegöi ono mbanuania tanö böʼö enaʼö tobali ira ’umbu wondrara dödö’ ba niha daʼö. (Kol. 4:11) Tatu omuso sibai dödöda ba wangai halöwö khö Yehowa hegöi ba wanolo ira talifusöda. Tola manö tabeʼe wanolo mazui fondrara dödö na alua wökhö waba, bencana, mazui folohi.

2. Na alua wökhö waba, hana wa tola manö abua khöda wanolo niha böʼö?

² Sagötö alua wökhö waba, tola manö abua khöda wanolo niha böʼö. Duma-dumania, te omasi ita tafalukhaisi ndra awöda mazui takaoni ndra talifusöda soʼamböta enaʼö falulu manga ba nomoda. Hizaʼi, tebai tafalua daʼö börö me tola manö teʼala waʼaurida hegöi faʼaurira. Te abua göi khöda wanolo niha böʼö na so nösi nomoda si göna fökhö mazui moʼamböta göi ita ba wangalui soguna. Hewaʼae simanö, omasi ita taforege ba wanolo ira talifusöda ba omuso dödö Yehowa na tafalua daʼö. (Amd. 3:27; 19:17) Hadia manö zi tola tafalua?

3. Hadia wamahaʼö si tola tahalö moroi ba duma-duma ndra satua sokubaloi ba mbanua niha Keriso si farahu Desi? (Yeremia 23:4)

³ Si tola lafalua ira satua sokubaloi. Na satua sokubaloi ndraʼugö, forege enaʼö aboto ba dödöu nono mbiri-biriu. (Baso Yeremia 23:4.) Imane Desi si no mututunö ba artikel si no tataluʼi, ”Ira satua sokubaloi ba kelompok dinas si farahu  yaʼo, asese fao ira khögu hegöi khö ndra talifusöda tanö böʼö ba wanuriaigö, ba fariawö ira khöma.” b Hadia mbuania? Itugu aoha khö ndra satua sokubaloi ba wanolo Desi me so ösa nösi nomonia si mate börö COVID-19.

4. Hana wa itugu aoha khö ndra satua sokubaloi ba wanolo Desi, ba hadia wamahaʼönia?

⁴ Imane Desi, ”Börö me no fahuwu ndraʼo khö ndra satua sokubaloi, itugu aoha khögu wanutunö khöra ösi dödögu hegöi faʼaombö-aombö dödö nirasoigu.” Hadia wamahaʼönia? Yaʼami ira satua sokubaloi, mikubaloi ndra talifusö fatua lö alua mbaŵa waʼabasaki. Miforege enaʼö tobali ami si fahuwu khöra. Na tebai öfalukhaisi ira börö me so wökhö waba, alui lala tanö böʼö ba wahuhuosa khöra. Imane Desi, ”Itaria ba ngaluo si fagölö, so ösa ndra satua sokubaloi sotelefo yaʼo ba lafaʼoheʼö khögu SMS mazui chat. Fagöna sibai ba dödögu ayati nibeʼera, hewaʼae na sindruhunia no asese ubaso ayati daʼö.”

5. Hewisa enaʼö laʼila ira satua sokubaloi hadia zoguna khö ndra talifusö hegöi fanolo si tola labeʼe?

⁵ Enaʼö öʼila hadia zoguna khö ndra talifusö, sofu khöra ba lala si tefaudu faböi aila ira. (Amd. 20:5) Duma-dumania, hadia tobönö göra, dalu-dalu, hegöi soguna khöra tanö böʼö? Hadia arakhagö aheta ira moroi ba halöwöra? Mazui hadia abua khöra wamuʼa okosi nomo? Hadia moguna latolo ira ba wamasuraʼö töira enaʼö tola latema wanolo moroi khö ndra samatörö? Latolo Desi ira talifusöda faoma kefe. Hizaʼi, fanolo sabölö ebua nitemania sagötö pandemi yaʼia daʼö foʼameʼegö tödö hegöi fondrara dödö nibeʼe ndra satua sokubaloi moroi ba Zura Niʼamoniʼö. Imane Desi, ”Fao ndraʼaga ndra satua sokubaloi ba wangandrö. Hewaʼae na lö itörö tödögu nösi wangandröra, hizaʼi lö olifudo hadia nirasoigu me luo daʼö. Hulö na imane khögu Yehowa, ’Fao ndraʼo khöu.’”—Yes. 41:10, 13.

6. Simane niʼilada ba gambara, hadia manö zi tola lafalua ira talifusöda ba mbanua niha Keriso ba wanolo niha böʼö?

⁶ Si tola tafalua. Sindruhu sa, no tebeʼe noro dödö khö ndra satua sokubaloi ba woʼameʼegö tödö ira talifusöda ba mbanua niha Keriso. Hizaʼi, iʼandrö khöda Yehuwa enaʼö faoma tatolo ba taʼabölöʼö ndra talifusöda. (Gal. 6:10) Hewaʼae na lö oya zi tola tafalua, tola tobali daʼö fangabölö dalifusöda sofökhö. Duma-dumania, tola ihaogö kartu mazui gambara si  samösa iraono side-ide ba ibeʼe khö dalifusöda sofökhö andrö. Tola göi itolo ia si samösa si bohou ebua ba wowöli mazui ba wamalua halöwö tanö böʼö. Mazui, te so zi tola mondrino ba iʼohe gö nirinonia ba nomo dalifusöda andrö. Na alua wökhö waba, moguna muʼabölöʼö fefu niha ba mbanua niha Keriso. Tola tafalua daʼö na tabeʼe ginötöda fahuhuo khö ndra talifusöda na no awai gangowuloa, he na falukha bawa ita mazui na taʼogunaʼö konferensi video. Moguna göi muʼabölöʼö ndra satua sokubaloi. So ösa ndra talifusöda samaʼoheʼö khöra kartu ba wangandrö saohagölö ba waʼerege dödöra sagötö alua wökhö waba. Tatu manö omasi ita taforege enaʼö ’lö taböhöli wangaʼaroʼö hegöi ba wamarou tödö’ niha böʼö!—1 Te. 5:11.

7. Hadia manö gabula dödö nitaögö niha si göna bencana?

⁷ Na alua bencana, tola manö tebulö waʼauri zi samösa niha ha mamöʼi hörö. Te taya gokhötara, omora, mazui niha niʼomasiʼöra. Tola alua göi daʼö khö ndra talifusöda. Börö daʼö, hewisa wanoloda yaʼira?

8. Hadia zi tola lafalua ira satua sokubaloi hegöi högö yomo ba nomo fatua lö alua bencana?

⁸ Si tola lafalua ira satua sokubaloi. Yaʼami satua sokubaloi, mitolo ndra talifusö enaʼö lafaʼanö ira fatua lö alua bencana. Mitatugöi enaʼö laʼila ira talifusöda ba mbanua niha Keriso hadia manö zinangea lafalua enaʼö lö teʼala waʼaurira, ba hewisa enaʼö tola latelefo ndra satua sokubaloi. Imane Margaret si no mututunö ba artikel si no tataluʼi, ”Ba faosatö soguna ba gangowuloa, lafangelama ndraʼaga ira satua sokubaloi wa asese akhozi gatua ba mbanuama. Lawaʼö khöma wa moguna iʼanemaiʼö maröi nomoma na lafarou ndraʼaga ira samatörö mazui na itugu abölö-bölö deʼala salua.” Tefaudu sibai wamasugi ba dödö andrö. Lima migu aefa daʼö, ebua sibai waʼakhozi gatua ba mbanua daʼö. Ba wamahaʼö yomo ba nomo, tola latutunö ira högö yomo ba nomo hadia manö zi tola lafalua ira ösi nomora. Na iʼotarai iadaʼa öfaʼanö ndraʼugö hegöi iraonou, lö talafo abu dödömi na alua bencana.

9. Hadia zinangea lafalua ira satua sokubaloi fatua lö alua hegöi na no alua bencana?

⁹ Na pengawas kelompok ndraʼugö, tatugöi enaʼö no öʼokhögö numero HP ndra talifusö si farahu ba kelompokmö ba öʼila hezo toröi ira fatua lö salua bencana. Sura döi-töi hegöi numero HP-ra, ba tatugöi ero-ero inötö hadia lö si tebulö numerora andrö. Na öfalua daʼö, tola telefo fefu ndra sanuriaigö na alua bencana enaʼö öʼila hewisa duriara. Aefa daʼö, anemaiʼö ombakhaʼö khö koordinator zatua sokubaloi, yaʼia dania zamatunö khö zatua samasui. Na falulu fohalöwö ndra talifusö andrö, tola labeʼe wanolo ba lala si tefaudu. Me no aefa akhozi gatua ba mbanua si toröi Margaret, lö iʼila mörö zatua samasuira ba zi 36 za faʼara. Arörö ia wameʼe fanuturu lala khö ndra satua sokubaloi samorege ba wotelefo hegöi ba wanolo ira talifusöda si 450 niha waʼato sondröi omora. (2 Ko. 11:27) Buania, tola lasöndra ira talifusöda andrö nahia waʼatoröira gasa-gasa.

10. Hana wa moguna laʼabölöʼö ba larara dödö ndra talifusöda ira satua sokubaloi? (Yohane 21:15)

¹⁰ No tebeʼe noro dödö khö ndra satua sokubaloi ba wangabölöʼö hegöi ba wondrara tödö ndra talifusöda ba wamati. (1 Fe. 5:2) Na alua bencana, si oföna lafalua ira satua sokubaloi yaʼia daʼö ba wotatugöi hadia lö hadia ia khö ndra talifusöda, hadia ibönö göra, nukhara hegöi nahia waʼatoröira. Hizaʼi, hewaʼae na no hauga waŵa me no aefa bencana andrö, tola manö moguna nasa muʼabölöʼö ba murara dödö ndra talifusöda andrö ba wamati. (Baso Yohane 21:15.) Imane Harold, samösa  anggota Panitia Ndraha si no irai mamalukhaisi ira talifusöda si göna bencana, ”Moguna khöra ginötö enaʼö tola alö waʼabu dödöra. Te no simane si toʼölö waʼaurira, hizaʼi tola manö itaria itörö tödöra nösi nomora mazui si fahuwu khöra si no mate. Itörö göi tödöra gama-gamara sebua böli si no taya, mazui faʼabasaki si no latörö. Ba ginötö simane daʼö, no sinangea na ifuli abu dödöra. Tenga daʼö geluahania wa lö hadöi famatira.”

11. Hadia wanolo soguna ba nösi nomo?

¹¹ Moguna laʼoʼö ira satua sokubaloi mene-mene ba ’wege-ege awö zege-ege’. (Rom. 12:15) Te moguna mufaduhuʼö ba dödö ndra talifusöda si göna bencana wa lö tebulö iʼomasiʼö ira Yehowa hegöi ira talifusöda. Tola göi latolo zi sambu-sambua omo ira satua sokubaloi enaʼö lö laböhöli wamalua halöwö ba wamati, simane fangandrö, famahaʼö ba Zura Niʼamoniʼö, feʼamöi ba gangowuloa hegöi fanuriaigö. Baero daʼö, tola lafarou dödö ndra satua enaʼö latolo ndraonora ba wangosambuaʼö tödöra ba ngawalö zi tebai ifakiko bencana, simane fahuwusara khö Yehowa. Yaʼami ira satua, mifaduhuʼö ba dödö ndraonomi wa lö tebulö tobali si fahuwu khöra Yehowa ba hasambalö irorogö ira. Tutunö khöra wa so ndra talifusöda ba zi sagörö ulidanö si tola manolo yaʼira.—1 Fe. 2:17.

12. Simane niʼilada ba gambara, hewisa enaʼö tola fao ita ba wameʼe fanolo na alua bencana?

¹² Si tola tafalua. Na alua bencana ba mbanuamö, sofu khö ndra satua sokubaloi hewisa enaʼö tola fao ndraʼugö ba wameʼe fanolo. Te tola öhenaigö nahia waʼatoröi gasa-gasa ba niha si göna bencana mazui khö ndra relawan. Te tola öfasao gö mazui tanö böʼönia soguna khö ndra sanuriaigö sinangea mutolo. Baero daʼö, tola göi öbeʼe wanolo hewaʼae na ba mbanua saröu alua bencana andrö. Hewisa lalania? Tola öʼohe ira ba wangandrö. (2 Ko. 1:8-11) Tola göi ötuhini wamorege nifalua penanggulangan bencana na öbeʼe dolo-tolo ba wotuhini halöwö nifalua ba zi sagörö ulidanö. (2 Ko. 8:2-5) Na tola möiʼö ba mbanua si göna bencana, fatunöisi daʼö khö ndra satua sokubaloi. Na lakaoni ndraʼugö wefao ba wameʼe fanolo, tola manö labeʼe khömö wamomaha irege abölö sökhi nasa lalamö wameʼe fanolo.

13. Hadia manö gabula dödö nitaögö ndra talifusöda ba soi si lö manehegö halöwöda?

¹³ Ba soi si lö manehegö halöwöda, itugu basaki waʼauri ndra talifusöda. Lö tebulö  lataögö gabula dödö ba wangalui soguna, ba wanaögö fökhö hegöi faʼamate niha niʼomasiʼöra. Hizaʼi, börö me so wanaisi, abua khö ndra satua sokubaloi wamalukhaisi mazui ba wotelefo ira talifusöda sinangea muʼabölöʼö. Daʼö nirasoi zi samösa satua sokubaloi sotöi Andrei si no mututunö ba artikel si no tataluʼi. So gabula dödö dalifusöda ira alawe ba kelompok dinas Andrei sanandrösa ba wangalui soguna. Aefa daʼö, fatandru moto dalifusöda ira alawe andrö. Mesokho ia irege moguna mu-operasi dalifusöda andrö mato hauga kali ba lö saʼae iʼila mohalöwö. Hewaʼae na so wanaisi hegöi pandemi, laforege ira talifusöda si so ba daʼö ba wanolo yaʼia, ba anehe Yehowa nifaluara.

14. Hewisa wangoromaʼö ndra satua sokubaloi wa laʼodaligö Yehowa?

¹⁴ Si tola lafalua ira satua sokubaloi. Mangandrö Andrei ba iforege wanolo talifusöda ira alawe andrö. Hadia nifalua Yehowa? Iʼogunaʼö ndra talifusöda tanö böʼö ba wameʼe fanolo. So zamasao talifusöda andrö khö doto, ba so göi zameʼe khönia kefe. Ifarou dödöra Yehowa ba wamalua hadia zi tola lafalua ba ifahowuʼö fefu nifaluara. (Heb. 13:16) Yaʼami ira satua sokubaloi, na lasaisi halöwö nifaluada, miʼandrö wanolo khö ndra talifusöda tanö böʼö. (Yer. 36:5, 6) Ba sabölö moguna, böi miböhöli wangodaligö Yehowa. Tola itolo ami ba wombönökhi soguna khö ndra talifusöda tanö böʼö.

15. Hewisa enaʼö lö tebulö so khöda wahasara dödö ba ginötö so wolohi?

¹⁵ Si tola tafalua. Ba ginötö so wolohi, tola manö ha ba ngawawa side-ide fariawö ita. Börö daʼö, datahaogö sibai tarorogö wahuwusada khö nawöda zamösana. Lawa Zatana, tenga ira talifusöda. Böi tanögö ba dödöu zalara, ba no so watitisa miʼanemaiʼö miʼatulöʼö ami. (Amd. 19:11; Ef. 4:26) Alui lala enaʼö faoma mitolo nawömi. (Tit. 3:14) Fanolo nibeʼe khö dalifusöda ira alawe ba kelompok dinas Andrei, tenga ha khö dalifusöda andrö moguna ia. Moguna göi daʼö khö ndra talifusö fefu si so ba ngawawara, irege itugu aro wahuwusara ba tobali ira si sambua ösi nomo.—Si. 133:1.

16. Moloʼö Kolose 4:3, 18, hewisa lalada wanolo ira talifusöda si göna folohi?

¹⁶ So mato hauga ribu ndra talifusöda si lö mamöhöli wamosumange Yehowa hewaʼae na göna ira folohi moroi khö ndra samatörö. Matonga moroi ba gotaluara nikuru börö wamatira.  Tola mangandrö ita salahira hegöi salahi nösi nomora. Tola göi mangandrö ita salahi niha si lö faʼataʼu ba wotuhini ira talifusöda si so ba gurunga, hewaʼae na tola manö labeʼe ira göi ba gurunga. Duma-dumania, so zameʼe soguna ba mboto khö ndra talifusöda andrö, soguna ba wamati, ba so göi zangoʼawögö yaʼira föna zanguhuku. c (Baso Kolose 4:3, 18.) Yafaduhu dödöu, fangandrö nifaʼemau salahira tola tobali fanolo sebua khöra daʼö!—2 Te. 3:1, 2; 1 Ti. 2:1, 2.

17. Hewisa enaʼö tola öfaʼanö ndraʼugö wanaögö famakao?

¹⁷ Tola öfaʼanö ndraʼugö hegöi osi nomou fatua lö alua wamakao. (Hal. 14:22) Böi khalaigö zi lö sökhi si tola manö alua khöu. Hizaʼi, aroʼö wahuwusau khö Yehowa ba tolo göi ndraonou enaʼö lafalua zimane daʼö. Na so khöu waʼaombö-aombö dödö, tutunö daʼö khö Lowalangi. (Si. 62:7, 8) Mifatunöisi yaʼami si sambua omo hadia manö zangoromaʼö wa tola muʼodaligö Yehowa. d Na no öfaʼanö ndraonou ba öfahaʼö ira wangodaligö Yehowa, lö ataʼu ira ba so khöra waʼahono dödö na alua wamakao hegöi bencana.

18. Hadia nidöna-dönada ba zi so miföna?

¹⁸ Tola tarasoi waʼahono dödö börö waʼohahau dödö moroi khö Lowalangi. (Fil. 4:6, 7) Ibeʼe khöda waʼohahau dödö andrö Yehowa enaʼö lö tebulö taʼokhögö waʼahono dödö hewaʼae na tola manö göna ita fökhö, bencana mazui folohi. Iʼogunaʼö ndra satua sokubaloi ba wokubaloi yaʼita, ba ibeʼe göi khöda ginötö enaʼö faoma tatolo nawöda. Faʼohahau dödö nirasoida iadaʼa, daʼö zamaʼanö yaʼita enaʼö tola tataögö waʼabasaki sabölö ebua ba zi so miföna, mendrua manö na alua ”wamakao sabölö-bölö”. (Mat. 24:21) Ba ginötö daʼö, böi taböhöli wamalua hadia ia zangaʼasogö khöda faʼohahau dödö, ba moguna göi tatolo niha böʼö ba wamalua simane daʼö. Na no aefa wamakao sabölö-bölö, lö hadöi saʼae si lö sökhi niʼaombösida tödö. Ba gafuriata, tola tarasoi hadia nifabuʼu Yehowa yaʼia daʼö faʼohahau dödö soʼahonoa ba si lö tebulö sagötö faʼara.—Yes. 26:3, 4.