NA NO irai möiʼö ba Sangir Besar me hauga fakhe silalö, sambua hulo side-ide si so ba Indonesia, te falukha ndraʼugö khö dalifusöda ira alawe si datölu sohalöwö ba zinga nasi. Tehöngö ira ba hulo daʼö börö halöwöra yaʼia daʼö ba wanolo niha böʼö enaʼö aboto ba dödöra Zura Niʼamoniʼö. Hizaʼi, so sambua zi faböʼö nifaluara ba zinga nasi me luo daʼö.

Si oföna, laʼalui gara segebua ba nasi, faʼebuania simane faʼebua bola kaki ba laʼohe daʼö yawa ba dete gawu. Aefa daʼö, modadao ira ba mbaku-baku sadogo-dogo nifazökhi moroi ba geu ba laʼogunaʼö warökha ba wamoto kara daʼö irege igide-ide ia moroi ba gadulo manu. Aefa daʼö, labeʼe bakha ba embe ba laʼohe ba nomo. Börö me ba hili so nomora, latörö nora ba wolohe embe daʼö. Aefa daʼö, lafaʼanö bakha ba goni segebua ba labeʼe yawa ba moto. Muʼogunaʼö dania gara daʼö ba wamazökhi lala.

Samösa dalifusöda ira alawe samalua halöwö daʼö töinia Hulda. Börö me lö taha-tahania, oya ginötönia wamalua daʼö. Si toʼölönia, iʼogunaʼö gefe daʼö ba wombönökhi soguna ba nösi nomonia. Hizaʼi samuza maʼökhö, ibeʼe yawa gefenia börö me so gohitö dödönia tanö böʼö. Omasi ia wowöli tablet enaʼö tola ibokai aplikasi JW Library^®. Aboto ba dödö Hulda wa video hegöi si no tehenaigö ba aplikasi daʼö, moguna khönia ba wamalua halöwö fanuriaigö ba möi fanolonia enaʼö itugu aboto ba dödönia nösi Zura Niʼamoniʼö.

Sagötö zi sara waŵa amatonga, dua za mohalöwö ia ero si hulö wongi. Börö daʼö, tola iʼowuloi gara irege afönu sara moto. Ba gafuriata, tobönö gefenia ba wowöli tablet.

Imane Hulda, ”Sindruhu sa, marasedo ba agafökhö nösigu ba wamoto kara. Hizaʼi, taya waʼagafökhö daʼö börö me tola uʼogunaʼö tablet si bohou ba wanuriaigö. Ba aoha khögu wamaʼanö ngawalö nitutunö ba gangowuloa.” Ifatunö nasa wa moguna sibai khönia tablet daʼö me ibörögö alua pandemi, börö me zoom niʼogunaʼö ba wamalua fefu waö-waö gangowuloa. Fao ita ba waʼomuso dödö börö me no mofozu gohitö dödö Hulda.