1-2. Hana wa itaria tawaʼö tödöda wa lö ibeʼe wanema li ba wangandröda Yehowa?

 ”BALIʼÖ umbu waʼomuso dödö sebua khöu Yehowa, ba ibeʼe dania zomasi dödöu.” (Si. 37:4) Sindruhu-ndruhu wa buʼusa li sahöli-höli dödö daʼa! Hizaʼi, hadia manötöna ita wa iʼanemaiʼö ibeʼe wanema li ero-ero mangandrö ita? Hadia mbörö wa manofu ita simane daʼö? Angeragö duma-duma andre. So samösa dalifusöda ono alawe sangandrö enaʼö tola möi ia ba Sekolah bagi Penginjil Kerajaan. Hizaʼi, no hauga fakhe saʼae ba lö manö nasa mukaoni ia. So göi samösa dalifusöda si bohou ebua, iʼandrö khö Yehowa enaʼö döhö wökhönia irege oya zi tola ifalua ba mbanua niha Keriso. Hizaʼi, lö iʼila döhö wökhönia. So göi zatua sangandrö enaʼö lö laröi zindruhu iraonora. Hewaʼae simanö, so ba gotalua ndraonora zangai angetula ba wamöhöli wamosumange Yehowa.

² Te no irai göi mangandrö ndraʼugö khö Yehowa, hizaʼi lö manö nasa nitemau fanema li. Lua-luania, te öwaʼö tödöu wa lö ibeʼe wanema li Yehowa ba wangandrömö, ha fangandrö niha böʼö nibeʼenia fanema li. Mazui öwaʼö tödöu te so zala nifaluamö. Daʼö nirasoi dalifusöda sotöi Janice. b Yaʼia hegöi foʼomonia, latutunö ba wangandrö wa omasi ira mangai halöwö ba Mbetieli. Imane Janice, ”Faduhu dödögu wa lö ara tö lakaoni ndraʼaga ba Mbetieli.” Hizaʼi, no hauga fakhe saʼae numalö ginötö ba lö manö iʼila lakaoni ira. Imane Janice, ”Abu dödögu ba fawuka gera-eragu. Umane tödögu wa so zala nifaluagu sangafökhöiʼö tödö Yehowa. Asese sibai mangandrö ndraʼo enaʼö tola mohalöwö ndraʼaga ba Mbetieli. Hizaʼi, hadia mbörö wa lö nasa ibeʼe Yehowa wanema li ba wangandrögu?”

3. Hadia dania nitutunöda ba artikel daʼa?

 ³ Te manofu-nofu ita hadia ifondrondrongo wangandröda Yehowa mazui löʼö. So göi ndra matua samati ba götö föna zorasoi simane daʼö. (Yob. 30:20; Si. 22:2; Hab. 1:2) Hadia zameʼe khöu faʼafaduhu dödö wa ifondrondrongo wangandröu Yehowa? (Si. 65:2) Ba wameʼe fanema linia, datatutunö wanofu-nofu daʼa: (1) Hadia nitötönada enaʼö ifalua Yehowa? (2) Hadia nitötöna Yehowa khöda enaʼö tafalua? (3) Hadia mbörö wa moguna itaria tabulöʼö wangandröda?

4. Moloʼö Yeremia 29:12, hadia nifabuʼu Yehowa khöda?

⁴ Ifabuʼu Yehowa wa ifondrondrongo wangandröda. (Baso Yeremia 29:12.) Lowalangida, iʼomasiʼö fefu zamosumange yaʼia si lö faröi ba lö iʼaohasi ba dödö wangandröra. (Si. 10:17; 37:28) Hizaʼi, tenga daʼö geluahania wa hasambalö ibeʼe wanema li ero-ero mangandrö ita khönia. Te moguna tabaloi irege tohare gulidanö si bohou awena tatema niʼandröda andrö.

5. Ba ginötö ifondrondrongo wangandröda Yehowa, hadia niʼangeragönia? Tutunö.

⁵ Ba ginötö ifondrondrongo wangandröda Yehowa, iʼangeragö hadia gohitö dödönia ba niha gulidanö. (Yes. 55:8, 9) Sambua gohitö dödönia yaʼia daʼö enaʼö afönu gulidanö andre niha si hasara tödö ba woloʼö niwaʼönia soroi ba dödö, samaduhuʼö wa Yehowa andrö Samatörö yaʼira. Hizaʼi, iwaʼö Satana wa abölö sökhi ba niha na yaʼira samösa zamatörö faʼaurira. (1 Mo. 3:1-5) Enaʼö oroma wa si falimo Gafökha, andrö wa itehegö Yehowa ba niha gulidanö ba wamatörö faʼaurira samösa. Irugi iadaʼa, oya sibai gabula dödö niʼasogö ndra samatörö ba gulidanö. (Sango. 8:9) Aboto ba dödöda wa lö iheta fefu gabula dödö salua iadaʼa Yehowa. Na ifalua daʼö, tola manö so zangumaʼö wa no mofozu niha ba wamatörö faʼaurira samösa ba tola laʼasiwai gabula dödö niha gulidanö.

6. Hana wa faduhu dödöda wa lö ebua dödö zambuana ba safönu faʼomasi wameʼe Yehowa fanema li ba wangandröda?

⁶ Ibeʼe wanema li Yehowa ba wangandröda ba lala si faböʼö-böʼö. Duma-dumania, me göna fökhö sabölö-bölö Razo Hizikia, iʼandrö khö Yehowa enaʼö tola döhö ia. Tefondrondrongo wangandrönia ba ifadöhö ia Yehowa. (2 Ra. 20:1-6) Hizaʼi, me mangandrö zinenge sotöi Faulo enaʼö iheta Yehowa ’ndroi si so ba mbotonia’, te fökhö mboto si göna ia, lö iheta wökhönia andrö Yehowa. (2 Ko. 12:7-9) Nehegö göi duma-duma zinenge sotöi Yakobo hegöi Fetero. Edöna Razo Herode ba wamunu yaʼira. Faoma mangandrö mbanua niha Keriso salahi Yakobo hegöi Fetero. Hizaʼi ba gafuriata labunu Yakobo, ba teʼefaʼö Wetero börö dandra sahöli-höli dödö. (Hal. 12:1-11) Te manofu ita, ’Hana wa iʼefaʼö Yehowa zinenge sotöi Fetero, hizaʼi itehegö mate Yakobo?’ Lö itutunö Sura Niʼamoniʼö. c Sambua zi tola tafaduhusi tödö yaʼia daʼö ’lö irai ebua dödö zambuana’ Yehowa. (5 Mo. 32:4) Taʼila göi wa iʼomasiʼö sibai ira Yehowa, he Fetero hegöi Yakobo. (Fam. 21:14) Itaria, lö tatema wanema li ba wangandröda simane nitötönada. Hewaʼae simanö, börö me faduhu dödöda wa lö ebua dödö zambuana ba safönu faʼomasi wameʼe Yehowa fanema li ba wangandröda, andrö wa lö mokökö-kökö ita gofu hadia lala niʼogunaʼönia ba wanema li fangandröda.—Yob. 33:13.

7. Hadia zi tebai tafalua, ba hadia mbörö?

⁷ Lö omasi ita tafaedo-faedogö zalua khöda ba niha böʼö. Duma-dumania, te no tatutunö khö Yehowa ba wangandrö enaʼö itolo ita ba lala somasi dödöda. Hizaʼi, lö ifalua daʼö. Ba gafuriata, taʼila so niha böʼö sangandrö simane  daʼö, ba ifondrondrongo wangandrönia Yehowa. Simane daʼö zalua khö dalifusöda ira alawe sotöi Anna. Mangandrö ia enaʼö döhö woʼomonia Matthew moroi ba wökhö kanker. Ba ginötö si fagölö, so darua dalifusöda alawe si no alawa döfi samorege ba wolawa fökhö kanker. Asese mangandrö dalifusöda Anna salahi Matthew hegöi ira talifusöda si darua andrö. Ba gafuriata, döhö dalifusöda si darua andrö, hizaʼi mate Matthew. Ba wamobörö, imane tödönia talifusöda Anna wa tola döhö ndra talifusöda si darua andrö börö me itolo ira Yehowa. Na simanö, hadia mbörö wa lö ifondrondrongo wangandrönia Yehowa enaʼö döhö göi woʼomonia? Tatu lö taʼila hana wa tola döhö ndra talifusöda si darua andrö. Saboto ba dödöda, samuza inötö dania iheta fefu ngawalö gabula dödö Yehowa ba hasambalö isusugi niha si fahuwu khönia si no mate.—Yob. 14:15.

8. (a) Moloʼö Yesaya 43:2, hewisa wanolo Yehowa yaʼita? (b) Hewisa wa möi fanoloda wangandrö ba ginötö göna ita fanandraigö? (Faigi video Fangandrö Zanolo Yaʼaga Enaʼö Anau Gölöma.)

⁸ Hasambalö itolo ita Yehowa. Börö me Ama sebua faʼomasi Yehowa, andrö wa lö omasi ia na göna ita famakao. (Yes. 63:9) Hewaʼae simanö, lö itimbagö fefu ngawalö wamakao salua khöda si no amaedola nungo nidanö mazui hola-hola galitö. (Baso Yesaya 43:2.) Hizaʼi, no ifabuʼu wa hasambalö itolo ita enaʼö tola tataögö zalua andrö. Lö itehegö göna ita fanandraigö si tola mangetuʼö fahuwusada khönia. Ibeʼe khöda gehehania niʼamoniʼö enaʼö tola anau gölöda. (Luk. 11:13; Fil. 4:13) Buania, tola taʼokhögö waʼafaduhu dödö wa ibeʼe khöda wanolo enaʼö lö faröi ita ba anau gölöda wamosumange yaʼia. d

9. Moloʼö Yakobo 1:6, 7, hana wa moguna tafaduhusi tödö wa hasambalö itolo ita Yehowa?

⁹ Itötöna khöda Yehowa enaʼö tafaduhusi tödö ia. (Heb. 11:6) Itaria tawaʼö tödöda wa talafo abua wamakao nitaögöda. Tola manö ibörögö taʼaombösi tödö hadia itolo ita Yehowa mazui löʼö. Hizaʼi, ifaduhuʼö khöda Sura Niʼamoniʼö wa tola ’tasawö göli’ börö waʼabölö si otarai Lowalangi. (Si. 18:29) Börö daʼö, moroi na talafo taʼaombösi tödö zalua, sökhi na talau mangandrö si fao famati saro, faduhu dödöda wa hasambalö ibeʼe Yehowa wanema li ba wangandröda.—Baso Yakobo 1:6, 7.

10. Beʼe duma-duma hewisa wangoromaʼöda wa moguna tafaudugö nifaluada moloʼö fangandröda.

¹⁰ Itötöna khöda Yehowa enaʼö tafaudugö nifaluada moloʼö fangandröda. Duma-dumania, te so samösa dalifusöda sangandrö khö Yehowa enaʼö itehegö khönia kafalonia wohalöwö weʼamöi ba gangowuloa sebua nifalua ba zi sambua regional. Hewisa wameʼe Yehowa fanema li ba wangandrönia andrö? Tola manö ibeʼe waʼabarani khö dalifusöda andrö ba wamatunö khö gafalonia wohalöwö. Hewaʼae simanö, moguna göi möi ia khö gafalonia ba wamatunö hadia niʼandrönia. Te ifalua daʼö mato hauga kali. Tola göi iʼandrö khö nawönia wohalöwö enaʼö lafalali ginötöra. Na moguna, iʼandrö enaʼö lafoto gazinia ba mbaŵa daʼö.

11. Hana wa moguna asese taʼohe ba wangandrö hadia gabula dödöda?

¹¹ Itötöna Yehowa enaʼö asese taʼohe ba wangandröda gabula dödö salua khöda. (1 Te. 5:17) No ifaduhuʼö Yesu wa so ösa wangandrö si lö iʼanemaiʼö tatema wanema linia. (Luk. 11:9) Börö daʼö, böi awuwu ita! Böi böhöli wangandrö soroi ba dödö. (Luk. 18:1-7) Na asese taʼohe ba wangandrö gabula dödöda, ba daʼö iʼila Yehowa wa moguna sibai khöda niʼandröda  andrö. No göi taforomaʼö wamati saro wa tola itolo ita Yehowa.

12. (a) Hadia wanofu si oföna sinangea tasofu khöda samösa, ba hadia mbörö? (b) Hewisa wangoromaʼöda wa tafosumange Yehowa ba wangandröda? (Faigi kotak ” Moroi ba Wangandrögu, Hadia Oroma Wa Ufosumange Yehowa?”)

¹² Na lö nitemada fanema li ba wangandröda, datasofu khöda wanofu si tölu ngawalö andre. Si oföna, ’Hadia no tefaudu wangandrögu?’ Sasesenia tawaʼö tödöda wa taʼila hadia zabölö sökhi ba waʼaurida. Hizaʼi, tola manö tenga daʼö zabölö sökhi khöda ba zi so miföna. Na so gabula dödö salua khöda, te tatutunö hadia lala somasi ita ifalua Yehowa. Hizaʼi, tola manö so lala sabölö sökhi moroi ba niʼandröda. Ba tola manö so ösa niʼandröda si lö tefaudu ba gohitö dödö Yehowa. (1 Yo. 5:14) Duma-dumania, nehegö zatua si no mutötöi moroi yawa no mege. No laʼandrö khö Yehowa enaʼö irorogö ndraonora ba lö tebulö ira ba zindruhu. Lö fasala wangandrö simane daʼö. Hizaʼi, lö ifaso niha Yehowa ba wamosumange yaʼia. Omasi ia na fefu ita, simanö göi ndraonoda lafili samösa ba wamosumange yaʼia. (5 Mo. 10:12, 13; 30:19, 20) Börö daʼö, satua si so iraono moguna laʼandrö khö Yehowa ba wanolo yaʼira enaʼö tola latanögö zindruhu andrö ba dödö ndraonora irege tefarou dödöra ba wangomasiʼö Yehowa ba tobali ira si fahuwu khönia.—Amd. 22:6; Ef. 6:4.

13. Moloʼö Heberaiʼo 4:16, hawaʼara itolo ita Yehowa? Tutunö.

¹³ Fanofu si dua yaʼia daʼö, ’Hadia no irugi inötö khö Yehowa ba wameʼe fanema li ba wangandrögu?’ Te tamane tödöda wa moguna iʼanemaiʼö tatema wanema li moroi ba wangandröda. Hizaʼi, ha Yehowa zabölö mangila hawaʼara ginötö si tefaudu ba wanolo yaʼita.  (Baso Heberaiʼo 4:16.) Na lö iʼanemaiʼö tatema wanema li ba wangandröda, te tawaʼö wa fanema li moroi khö Yehowa yaʼia daʼö ’Lö ubeʼe.’ Hizaʼi, fanema li sindruhunia, ’Lö nasa irugi inötönia’. Duma-dumania, fuli angeragö zalua khö dalifusöda ono matua sangandrö khö Yehowa enaʼö tefadöhö wökhönia. Na ifalua dandra sahöli-höli dödö Yehowa ba wamadöhö yaʼia, tola manö iwaʼö Satana wa lö iböhöli wamosumange Yehowa talifusöda andrö ha börö me no tefadöhö wökhönia. (Yob. 1:9-11; 2:4) Baero daʼö, no itatugöi ginötö Yehowa, hawaʼara iheta fefu ngawalö wökhö. (Yes. 33:24; Fam. 21:3, 4) Fatua lö alua daʼö, lö tatötöna ifalua dandra sahöli-höli dödö ba wamadöhö fökhöda. Börö daʼö, tola iʼandrö talifusöda andrö khö Yehowa enaʼö ibeʼe khönia waʼabölö hegöi faʼahono wangera-ngera irege tola itaögö wökhö salua khönia ba lö faröi ia wamosumange Lowalangi.—Si. 29:11.

14. Hadia wamahaʼö nihalömö moroi ba zalua khö Janice?

¹⁴ Fuli törö tödöu zalua khö Janice, sangandrö enaʼö tola mohalöwö ia ba Mbetieli. Me no irugi lima fakhe, awena aboto ba dödönia hewisa wameʼe Yehowa fanema li ba wangandrönia, hewaʼae tenga simane nitötönania. Imane Janice, ”Iʼogunaʼö ginötö daʼö Yehowa ba wamahaʼö yaʼo enaʼö tobalido niha Keriso sabölö sökhi. Itugu tedou waʼafaduhu dödögu khönia ba onekhedo wamalua famahaʼö samösa. Urasoi waʼomuso dödö, gofu hezo mangai halöwö ndraʼo ba wamosumange Yehowa. Lö ara aefa daʼö, Janice hegöi foʼomonia, lakaoni ira tobali satua samasui. Na ifuli itörö tödönia, imane Janice, ”No ibeʼe Yehowa wanema li ba wangandrögu, hewaʼae tenga simane nitötönagu. Awena aboto ba dödögu wa sökhi sibai wanema li nibeʼe Yehowa. Uʼandrö saohagölö börö me tola urasoi waʼomasi hegöi faʼebua dödönia.”

15. Hana wa itaria böi talafo tazara-zara wangandröda? (Faigi göi gambara.)

 ¹⁵ Fanofu si tölu, ’Hadia talafo uzara-zara wangandrögu?’ Abölö sökhi na tazara-zara wanutunö hadia niʼandröda ba wangandrö, hizaʼi itaria göi abölö sökhi na lö talafo tazara-zara wangandröda, irege aboto ba dödöda hadia niʼandrö Yehowa enaʼö tafalua. Nehegö duma-duma dalifusöda ono alawe sangandrö enaʼö tola fao ia Sekolah bagi Penginjil Kerajaan. Omasi möi ia ba zekola daʼö enaʼö tola mangai halöwö ia ba mbanua si lö ato sanuriaigö. Börö daʼö, sagötö iʼohe ba wangandrö gohitö dödönia weʼamöi sekola daʼö, iʼandrö göi wanolo moroi khö Yehowa enaʼö iʼila hadia so nasa lala tanö böʼö si tola ifalua ba wondrouʼö halöwönia ba wamati. (Hal. 16:9, 10) Ifaudugö göi nifaluania moloʼö fangandrönia. Isofu khö zatua samasui hadia so mbanua niha Keriso sahatö ba zi toröi yaʼia sabölö ato moguna perintis. Mazui ifaʼoheʼö zurania ba gödo ndraha ba isofu hezo mbanua sabölö ato moguna sanuriaigö. e

16. Hadia waʼafaduhu dödö niʼokhögöda?

¹⁶ Simane si no tatutunö, tola faduhu dödöda wa hasambalö ibeʼe wanema li Yehowa ba wangandröda si fao faʼomasi ba falöʼebua dödö zambuana. (Si. 4:3; Yes. 30:18) Sindruhu sa, itaria lö tatema wanema li moroi ba wangandröda simane nitötönada. Hewaʼae simanö, lö irai iʼositengagö wangandröda Yehowa. Iʼomasiʼö sibai ita, ba lö irai faröi ia khöda. (Si. 9:10) Börö daʼö, böi böhöli faduhusi tödö ia ero inötö, ba faehagö khönia nösi dödömö ba wangandrö.—Si. 62:8.