1-2. (a) Hana wa iwaʼö Faulo wa abölö ebua waʼomasi moroi ba wamati hegöi fanötöna? (b) Hadia manö wanofu nitutunöda?

 ME ITUTUNÖ Faulo sanandrösa ba wamati, fanötöna, ba faʼomasi, iwaʼö wa ”sebuara waʼomasi”. (1 Ko. 13:13) Hadia mbörö? Ba zi so miföna, lö saʼae moguna mamati ita mazui tadöna-döna nifabuʼu Lowalangi sanandrösa ba gulidanö si bohou, börö me no ahori alua daʼö. Hizaʼi, lö tebulö taʼomasiʼö Yehowa hegöi awöda niha. Sindruhunia, itugu tedou waʼomasida khöra irugi zi lö aetu.

² Börö me moguna sibai so khöda waʼomasi, datatutunö wanofu andre: Hana wa moguna faoma taʼomasiʼö nawöda? Hewisa wangoromaʼöda faʼomasi? Hewisa enaʼö itugu aro waʼomasida khöra?

3. Hana wa moguna faoma taʼomasiʼö nawöda?

³ Hana wa moguna faoma taʼomasiʼö nawöda niha? Sambua dane-danenia yaʼia daʼö börö me faʼomasi zi tobali tandra niha Keriso sindruhu. Imane Yesu khö ndra nifahaʼönia, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yoh. 13:35) Baero daʼö, na taʼomasiʼö nawöda no tarorogö wahasara dödö. Iwaʼö Faulo wa ”faʼomasi  andrö wamaböbö soʼahonoa”. (Kol. 3:14) Hizaʼi, so dane-dane tanö böʼö wa moguna faoma taʼomasiʼö nawöda. Imane Yohane, ”Sangomasiʼö Lowalangi lö tola löʼö iʼomasiʼö dalifusönia.” (1 Yo. 4:21) Na taʼomasiʼö nawöda niha, no taforomaʼö wa taʼomasiʼö Lowalangi.

4-5. Beʼe duma-duma hadia gamakhaita waʼomasi khö Lowalangi faoma faʼomasi khö ndra talifusöda.

⁴ Hewisa waʼomasida khö Lowalangi moʼamakhaita ia ba waʼomasida khö ndra talifusöda? Duma-dumania, khalaigö hadia gamakhaita dödöda faoma ndroto-ndroto mbotoda tanö böʼö. Na igogohe doto mbagi mbölökhada ba wamareso feʼugu-ugu dödöda, ba daʼö iʼila hadia so wökhö ba dödöda mazui löʼö. Hadia wamahaʼö si tola tahalö moroi ba daʼö sanandrösa ba waʼomasi?

⁵ Simane doto samareso bagi mbölökhada irege iʼila hadia wökhö si so ba dödöda, tola göi taʼila hawaʼaro waʼomasida khö Yehowa na tafareso hawaʼaro waʼomasida khö ndra talifusöda. Na tarasoi wa alö waʼomasida khö ndra talifusöda, ba daʼö taʼila wa no alö waʼomasida khö Lowalangi. Hizaʼi, na lö tebulö taforomaʼö waʼomasida khö ndra talifusö, daʼö dandra wa aro waʼomasida khö Lowalangi.

6. Hana wa no abula dödö sebua na alö waʼomasida khö ndra talifusöda? (1 Yohane 4:7-9, 11)

⁶ No abula dödö sebua na alö waʼomasida khö ndra talifusöda. Hadia mbörö? Börö me daʼö zangoromaʼö wa no ibörögö tekiko wahuwusada khö Yehowa. Itutunö daʼa Yohane me ibeʼe khöda wamasugi ba dödö, ”Si lö mangomasiʼö talifusönia niʼila hörönia, tebai iʼomasiʼö Lowalangi si lö iʼila hörönia.” (1 Yo. 4:20) Hadia wamahaʼönia? Omuso dödö Yehowa khöda ha na taforomaʼö ’waʼomasi ba nawöda niha’.—Baso 1 Yohane 4:7-9, 11.

7-8. Hadia manö lala si tola tafalua ba wangoromaʼö faʼomasi?

⁷ Asese ifarou ita Taromali Lowalangi, enaʼö ’faoma taʼomasiʼö nawöda’. (Yoh. 15:12, 17; Rom. 13:8; 1 Te. 4:9; 1 Fe. 1:22; 1 Yo. 4:11) Hizaʼi, faʼomasi andrö bakha ba dödöda so ia, lö niha si tola mangila daʼö. Hewisa wangoromaʼöda wa taʼomasiʼö ndra talifusöda? Yaʼia daʼö moroi ba wehede hegöi amuatada.

⁸ Oya lala si tola tafalua ba wangoromaʼö wa taʼomasiʼö ndra talifusöda. Duma-dumania imane Sura Niʼamoniʼö, ”Mitörö zindruhu na fahuhuo ami khö nawömi.” (Zak. 8:16) ”Yafaoma atulö ami khö nawömi.” (Mrk. 9:50) ”Yafahulö ami ba wamosumange awömi.” (Rom. 12:10) ”Faoma mitemaʼö nawömi.” (Rom. 15:7) ”Böi tebulö . . . miʼefaʼö zala nawömi soroi ba dödö.” (Kol. 3:13) ”Faoma miʼonoro noro dödö nawömi zamösana.” (Gal. 6:2) ”Böi miböhöli wondrara tödö nawömi.” (1 Te. 4:18) ”Böi miböhöli . . . wamarou tödö.” (1 Te. 5:11) ”Faoma miʼangandrö salahi nawömi.”—Yak. 5:16.

9. Hana wa moguna faoma tarara dödö nawöda? (Faigi göi gambara.)

⁹ Datatutunö hewisa wangoromaʼöda faʼomasi khö ndra talifusöda simane si no tatutunö ba ngenoli moroi yawa. Taʼila dania hadia geluaha wehede Waulo me iwaʼö, ”Böi miböhöli wondrara tödö nawömi.” Hana wa lafotöi faʼomasi na tabeʼe wondrara dödö ba niha böʼö? Moloʼö sambua karya referensi Zura Niʼamoniʼö, ngawua wehede ”wondrara tödö” eluahania ”mozizio ita ba zinga zi samösa niha ba wangabölöʼö yaʼia na göna ia fanandraigö sabua”. Na tabeʼe wondrara dödö, no tatolo ndra talifusöda si sara lala wamati sanaögö abula dödö enaʼö ifuli abölö ira ba anau gölöra ba wogamö faʼauri. Ero na tabeʼe  wondrara dödö khö ndra talifusöda, no taforomaʼö wa taʼomasiʼö ira.—2 Ko. 7:6, 7, 13.

10. Hadia gamakhaitania waʼahakhö dödö faoma mameʼe fondrara dödö?

¹⁰ So gamakhaitania waʼahakhö dödö faoma mameʼe fondrara dödö. Hana wa tawaʼö zimanö? Na ahakhö dödö zi samösa niha ba niha si göna fanandraigö ba omasi ia wameʼe fondrara dödö, so zinangea ifalua ba wanolo niha daʼö. Na so khöda waʼahakhö dödö ba niha, daʼö zamarou yaʼita ba wameʼe fondrara dödö khöra. Nehegö hewisa Waulo wangoromaʼönia hadia gamakhaita waʼahakhö dödö Yehowa faoma fondrara dödö nibeʼenia ba niha. Iwaʼö Faulo wa Yehowa andrö ”Ama safönu faʼahakhö dödö ba Lowalangi wondrara dödö”. (2 Ko. 1:3) Ifotöi Yehowa andrö Faulo, ”Ama safönu faʼahakhö dödö.” Eluahania afönu waʼahakhö dödö Yehowa ba niha. Faʼahakhö dödö zamarou yaʼia ba ’wondrara tödöda ba ngawalö wamakao nitaögöda’. (2 Ko. 1:4) Simane idanö sohau-hau sangele moroi ba gumbu sangokafui tödö niha sowökhi tödö, simanö göi Yehowa iʼokafui ba ibeʼe wondrara dödö ba niha si göna abula dödö. Hewisa woloʼöda duma-duma waʼahakhö dödö Yehowa ba tabeʼe wondrara dödö ba niha böʼö? Sambua lala si tola tafalua yaʼia daʼö taʼokhögö gamuata si sökhi, sanolo yaʼita ba wangoromaʼö faʼahakhö dödö ba tabeʼe wondrara dödö ba niha böʼö. Hadia manö gamuata si sökhi andrö?

11. Moloʼö Kolose 3:12 ba 1 Fetero 3:8, hadia nasa zinangea taforege enaʼö tola taʼomasiʼö ba tabeʼe wondrara dödö ba niha böʼö?

¹¹ Hadia zanolo yaʼita enaʼö lö tebulö taʼokhögö waʼomasi irege ’lö taböhöli ba wondrara tödö nawöda’ ero maʼökhö? Moguna tedou ita ba wangokhögö amuata si sökhi, simane tarasoi zafökhö khö nawöda, taʼomasiʼö ndra talifusöda, ba faʼasökhi dödö. (Baso Kolose 3:12; 1 Fetero 3:8.) Na so khöda waʼahakhö dödö khö ndra talifusöda ba taʼameʼegö tödö zalua khöra, so khöda waʼaterou dödö ba wameʼe fondrara dödö ba ginötö göna ira fanandraigö. Iwaʼö Yesu, ”Hadia zi no fahöna ba dödö, daʼö zalua ba mbewe. Niha si sökhi iwaʼö zi sökhi börö me afönu ba dödönia ngawalö zi sökhi.” (Mat. 12:34, 35) Na tabeʼe wondrara dödö khö ndra talifusöda, daʼö zangoromaʼö wa taʼomasiʼö ira.

12. (a) Hana wa lö aetu mangelama ita? (b) Hadia wanofu nitutunöda?

¹² Omasi ita na ’lö taböhöli wangomasiʼö awöda’. (1 Yo. 4:7) Hizaʼi, moguna tatörö tödöda wamangelama nibeʼe Yesu, ”Ato dania zi taya faʼomasi.” (Mat. 24:12) Tenga daʼö geluaha wehede Yesu wa ato dania ba gotalua ndra nifahaʼönia samöhöli ba wangoromaʼö faʼomasi ba niha böʼö. Moguna mangelama ita enaʼö böi tedönisi dödöda ba woloʼö amuata niha gulidanö si lö mangomasiʼö awöra. Enaʼö böi olifu ita daʼö, datatutunö wanofu sabölö moguna andre: Hezo oroma wa sindruhu-ndruhu aro waʼomasida khö ndra talifusö?

13. Hezo taʼila hawaʼaro waʼomasida khö ndra talifusöda?

¹³ Sambua lala enaʼö taʼila hawaʼaro waʼomasida yaʼia daʼö na tafareso hewisa ita na so zalua ba waʼaurida. (2 Ko. 8:8) Sambua zalua niwaʼö Wetero yaʼia daʼö, ”Sabölö sökhi, faoma miʼomasiʼö nawömi soroi ba dödö, börö me oya ibalugö horö faʼomasi andrö.” (1 Fe. 4:8) Börö daʼö, hadia nifaluada na so ndra talifusöda samalua sala mazui sangafökhöiʼö tödöda? Ba daʼö taʼila hawaʼaro waʼomasida khöra.

14. Hadia waʼomasi sinangea taʼokhögö moloʼö 1 Fetero 4:8? Beʼe duma-dumania.

 ¹⁴ Datahaogö wanutunö ngawua wehede niʼogunaʼö Wetero andrö. Ba wamobörö ayati 8 ifatunö khöda wa moguna taʼokhögö ’waʼomasi soroi ba dödö’. Ba li sindruhunia, ngawua wehede ”soroi ba dödö” niʼogunaʼö Yohane, eluahania ”mamadölö tanga”. Aefa daʼö, ifatunö göi khöda ayati daʼö wa na taʼomasiʼö ndra talifusöda soroi ba dödö, tola tabalugö horö nifaluara. Hadia geluahania? Faʼomasi andrö hulö nukha sebolo. Na so meza si no ahori mukhokhoi, tola tebalu fefu daʼö na mubologö khönia nukha sebolo. Simane daʼö göi, na tabologö waʼomasida ba wombalugö horö ndra talifusöda, tenga ha sambua mazui dombua horö nibalugöda, hizaʼi ”oya ibalugö horö faʼomasi andrö”. Eluahania na taʼomasiʼö ndra talifusöda soroi ba dödö, lö tatanö ba dödöda zala hegöi falömoʼahonoara.

15. Hadia mbuania na aro waʼomasida khö ndra talifusöda? (Kolose 3:13)

¹⁵ Moguna aro waʼomasida enaʼö tola taʼefaʼö zala ndra talifusöda si sara lala wamati, hewaʼae itaria abua wamalua daʼö. (Baso  Kolose 3:13.) Na mofozu ita ba wangefaʼö sala niha böʼö, daʼö zangoromaʼö wa aro waʼomasida ba no taʼomusoiʼö dödö Yehowa. Hadia nasa gamuata sinangea taʼokhögö enaʼö lö alio abao dödöda ba niha böʼö ba taʼefaʼö zala nifaluara?

16-17. Hadia zanolo yaʼita enaʼö tola taʼolifugö zala sigide-ide nifalua ndra talifusöda? Beʼe duma-duma. (Faigi göi gambara.)

¹⁶ Osambuaʼö dödöu ba gamuata si sökhi niʼokhögö ndra talifusöda, tenga ba gamuatara si lö baga. Khalaigö duma-duma andre. Samuza inötö fao ndraʼugö khö ndra talifusöda weʼamöi manörö-nörö. Omuso-muso dödömi, aefa daʼö ba gafuriata fakoda ami. Hizaʼi, ifuli fakoda ami dua kali tö börö me ambö baga koda si oföna no mege. Iadaʼa, no tölu ngaʼörö kodami. Hizaʼi me no önehegö, so samösa dalifusöda samakuru röngö-röngönia. Hadia nifaluau ba koda daʼö? Ö-hapus koda daʼö börö me so dua ngaʼörö tö kodami. Fefu zi so ba koda andrö ahori laboho mbawara, farahu ba daʼö dalifusöda no mege.

¹⁷ Hulö simane koda no mege, omasi ita ba wangiröʼö ba dödöda ngawalö zi sökhi sagötö wefaoda khö ndra talifusöda. Hizaʼi samuza inötö, so samösa dalifusöda sangafökhöiʼö tödöda ba wehede mazui ba nifaluania. Hadia zinangea öfalua? Hadia omasiʼö öʼolifugö zala nifaluania simane me ö-hapus koda si lö  baga no mege? (Amd. 19:11; Ef. 4:32) Tola tatayaigö ba dödöda ngawalö zala side-ide nifalua ndra talifusöda börö me oya ngawalö zi sökhi niʼokhögöra sagötö wefaoda khöra. Daʼö zi sökhi ba sebua böli somasi ita taʼiröʼö ba dödöda.

18. Hadia manö zi no tatutunö sanandrösa ba waʼomasi?

¹⁸ Hana wa moguna tadouʼö waʼomasida ba niha böʼö? Simane si no tatutunö, na taʼomasiʼö ndra talifusöda no taʼomasiʼö Yehowa. Hewisa wangoromaʼöda faʼomasi khö ndra talifusöda si sara lala wamati? Sambua lala si tola tafalua yaʼia daʼö na tabeʼe khöra wondrara dödö. ’Lö taböhöli wameʼe fondrara dödö khö ndra talifusöda’ na so khöda waʼahakhö dödö. Hewisa enaʼö lö tebulö taʼomasiʼö ndra talifusöda? Yaʼia daʼö na taforege ba wangefaʼö sala nifaluara.

19. Hana wa moguna taforomaʼö waʼomasi khö ndra talifusö töra-töra ba ginötöda andre?

¹⁹ Hana wa moguna taforomaʼö waʼomasi khö ndra talifusö töra-töra ba ginötöda andre? Datanehegö hadia niwaʼö Wetero, ”No ahatö gamozua fefu hadia ia. Andrö . . . faoma miʼomasiʼö nawömi soroi ba dödö.” (1 Fe. 4:7, 8) Börö me no itugu ahatö gamozua gulidanö si lö sökhi andre, hadia zi tola manö alua khöda? No ifaʼeleʼö Yesu ba imane khö ndra nifahaʼönia, ”Dozi soi fatiu dödöra khömi börö döigu andrö.” (Mat. 24:9) Enaʼö anau gölöda hewaʼae so zi fatiu tödö khöda, moguna tarorogö wahasara dödö. Hewaʼae na iforege Satana enaʼö awuwu ita, hizaʼi teʼosambuaʼö ita ba waʼomasi ”famaböbö soʼahonoa”.—Kol. 3:14; Fil. 2:1, 2.