1. Hadia goroisa somasi ifaʼema Yesaya ba ndraono Gizaraʼeli?

 SAMAʼELEʼÖ sotöi Yesaya, ifotöi Yehowa andrö ”Lowalangi sindruhu”. Ngawua wehede ”sindruhu” si toʼölönia mufoʼeluaha ia ”yaduhu”. (Yes. 65:16, nis.) Eluaha ngawua wehede ”yaduhu”, yaʼia daʼö ”yaʼitörö” mazui ”hasambalö alua”. Ba Zura Niʼamoniʼö, ngawua wehede ”yaduhu” asese muʼogunaʼö ia ba wangoromaʼö wa sindruhu niwaʼö mazui nifalua Yehowa hegöi Yesu. Börö daʼö, oroisa nifaʼema Yesaya ba ndraono Gizaraʼeli yaʼia daʼö: Fefu zi no ifaʼeleʼö Yehowa hasambalö alua. No iforomaʼö daʼö Yehowa me ifalua zi no ifabuʼu.

2. Hana wa tola tafaduhusi tödö mbuʼusa li Yehowa sanandrösa ba waʼauri ba zi so miföna, ba hadia manö wanofu-nofu nitutunöda?

² Hadia tola göi tafaduhusi tödö mbuʼusa li Yehowa sanandrösa ba waʼaurida ba zi so miföna? Arakhagö 800 fakhe me no aefa götö Yesaya, imane Faulo, ”Tebai falimo Lowalangi.” (Heb. 6:18) Simane umbu nidanö sohau-hau, tebai iʼasogö nidanö sasi-asi. Simane daʼö göi Yehowa umbu zindruhu andrö, tebai falimo ia. Börö daʼö, tola tafaduhusi tödö fefu niwaʼö Yehowa.  Farahu ba daʼö mbuʼusa linia sanandrösa ba waʼaurida ba zi so miföna. Ba artikel daʼa, tatutunö dania dombua wanofu. Hewisa waʼauri nifabuʼu Yehowa khöda ba zi so miföna? Ba hewisa wamaduhuʼönia khöda wa hasambalö ifalua daʼö?

3. (a) Hadia mbuʼusa li sebua böli ba nono mbanua Lowalangi? (Famaʼeleʼö 21:3, 4) (b) Hewisa dödö niha me larongo mbuʼusa li daʼö?

³ Buʼusa li nitutunöda ebua sibai mbölinia ba nono mbanua Lowalangi ba zi sagörö ulidanö. (Baso Wamaʼeleʼö 21:3, 4.) No ifabuʼu Yehowa wa samuza inötö dania, ”Lö hadöi saʼae faʼamate, faʼabu dödö, fege-ege, mazui fökhö.” Ba ginötö manuriaigö, asese sibai taʼogunaʼö ayati si möi fondrara dödö andre ba wangoromaʼö hewisa sibai dania waʼaurida ba gulidanö Faradaiso. Hewisa dödö niha me larongo mbuʼusa li daʼa? Te so zangumaʼö, ”Sökhi sibai mbuʼusa li daʼa. Hizaʼi, hewisa wa tola alua daʼö?”

4. (a) Hadia zaboto ba dödö Yehowa me ibeʼe mbuʼusa li sanandrösa ba Waradaiso? (b) Baero ba wamaʼema buʼusa li, hadia danö böʼö nifalua Yehowa?

⁴ Me ibeʼe gehehania Yehowa khö Yohane ba wanura buʼusa linia sanandrösa ba gulidanö Faradaiso, aboto ba dödö Yehowa wa tadunö-dunö dötönafö andre ba niha böʼö ba ginötö taturiaigö Wamatörönia. Aboto göi ba dödö Yehowa wa ato niha si lö faduhu tödö ba mbuʼusa li daʼö. (Yes. 42:9; 60:2; 2 Ko. 4:3, 4) Börö daʼö, hewisa lalada enaʼö tola faduhu dödö niha böʼö hegöi yaʼita samösa wa hasambalö alua ngawalö nisura ba Wamaʼeleʼö 21:3, 4? Me no ibeʼe khöda mbuʼusa li si möi fondrara dödö andrö, ibeʼe göi khöda dane-dane saro Yehowa hadia mbörö wa tola tafaduhusi tödö mbuʼusa linia andrö. Hadia manö dane-danenia?

5. Hadia manö ayati sangoromaʼö wa tola mufaduhusi tödö mbuʼusa li Lowalangi, ba hadia nösi ayati andrö?

⁵ Ba dohu-tohu ayati moroi ba Wamaʼeleʼö faza 21, taʼila dania hana wa tafaduhusi tödö mbuʼusa li Yehowa sanandrösa ba Waradaiso. Imane ayati daʼö, ”Imane si dadao ba dadaoma andrö, ’Hiza! Ubohouni fefu hadia ia.’ Imane nasa, ’Sura daʼa börö me atulö ba tola mufaduhusi tödö wehede andre.’ Aefa daʼö imane khögu, ’No numalö fefu daʼö! Alafa ndraʼo ba Omega, böröta ba amozua.’”—Fam. 21:5, 6a.

6. Hana wa möi fangaro waʼafaduhu dödöda ngawua wehede nisura ba Wamaʼeleʼö 21:5, 6 sanandrösa ba mbuʼusa li Lowalangi?

⁶ Hewisa ayati andrö möi fanoloda enaʼö itugu tafaduhusi tödö mbuʼusa li Lowalangi? Fehede Yehowa ba ayati daʼö amaedola no iteka zura wamaduhuʼö, tandra wa hasambalö ifalua mbuʼusa linia. Hadia geluahania? Ifaʼema mbuʼusa linia Yehowa ba ayati 3 ba 4. Aefa daʼö ba ayati 5 ba 6, amaedola no ibeʼe tandra tangania ba wamaduhuʼö wa hasambalö alua mbuʼusa linia andrö. Datanehegö ngawua wehede niʼogunaʼö Yehowa ba wamaduhuʼö daʼö.

7. Haniha zi fahuhuo ba ayati 5, ba hana wa tohude sibai daʼö?

⁷ Tohude sibai wamaduhuʼö si so ba ayati 5, börö me ba mbuku Wamaʼeleʼö ha 3 kali fahuhuo Yehowa, ba sambua daʼa ba gotaluania. Nehegö ngawua wehede ba wamobörö ayati daʼö, ”Imane si dadao ba dadaoma andrö.” (Fam. 21:5a) Tobali, famaduhuʼö daʼö tenga moroi khö zi samösa malaʼika sabölö, tenga göi moroi khö Yesu si no mususugi. Hizaʼi, fehede Yehowa samösa. Ba böi olifu ita wa Yehowa andrö ”tebai falimo”. (Tit. 1:2) Börö  daʼö, tohu-tohu wehedenia ba Wamaʼeleʼö 21:5, 6 hasambalö tola mufaduhusi tödö.

8. Hewisa Yehowa ba wangoromaʼö wa hasambalö alua mbuʼusa linia? (Yesaya 46:10)

⁸ Aefa daʼö, imane Yehowa ”Hiza!” (Fam. 21:5) Ba li Yunani, ngawua wehede ”Hiza!”, asese mutötöi ia ba mbuku Wamaʼeleʼö. Moloʼö sambua referensi, muʼogunaʼö ngawua wehede daʼö enaʼö ”laʼosambua dödöra sombaso ba ngawua wehede aefa daʼö”. Na simanö, hadia niwaʼö Lowalangi aefa daʼö? Imane, ”Ubohouni fefu hadia ia.” Sindruhu sa, famohouni nifabuʼu Yehowa andrö alua ia dania ba zi so miföna. Hizaʼi, börö me hasambalö alua mbuʼusa linia, andrö wa hulö zi no alua mbuʼusa li daʼö me fahuhuo ia.—Baso Yesaya 46:10.

9. (a) Hadia geluahania me iwaʼö Yehowa ”Ubohouni fefu hadia ia”? (b) Hadia zalua ba ”mbanua hegöi ulidanö siföföna”?

⁹ Hadia geluahania me iwaʼö Yehowa, ”Ubohouni fefu hadia ia”? Ba Wamaʼeleʼö faza 21, eluahania so dombua ngawalö nifalua Yehowa, yaʼia daʼö ifagatini ba ibohouni. Hadia nifagatini Yehowa? Imane ba Wamaʼeleʼö 21:1, ”Noa sa numalö mbanua hegöi ulidanö siföföna.” ’Banua siföföna’ eluahania amatöröwa gulidanö nifatörö Zatana hegöi ira malaʼika si lö sökhi. (Mat. 4:8, 9; 1 Yoh. 5:19) Ba Zura Niʼamoniʼö, ngawua wehede ”ulidanö” tola mufoʼeluaha ia niha gulidanö. (1 Mo. 11:1; Si. 96:1) Börö daʼö, ”ulidanö siföföna” eluahania niha si lö sökhi. Tenga ha asala ihaogö Yehowa mbanua hegöi ulidanö si no so iadaʼa. Hizaʼi, ifagatini daʼö faoma ’banua si bohou hegöi tanö si bohou’ yaʼia daʼö famatörö si bohou hegöi niha gulidanö si bohou.

10. Hadia nifalua Yehowa ba wamohouni fefu hadia ia?

¹⁰ Nehegö niwaʼönia ba Wamaʼeleʼö 21:5. Tenga imane Yehowa, ”Ufazökhi dania ngawalö zi bohou.” Hizaʼi imane, ”Ubohouni fefu hadia ia.” Eluahania ibohouni gulidanö andre hegöi niha si so ba daʼö irege moʼahonoa fefu hulö zi bohou. Simane si no ifaʼeleʼö Yesaya, tebohouni dania fefu gulidanö andre hulö kabu Edena si sökhi. Tebohouni göi ita ero zamösana, tefadöhö dania niha sombuyu-mbuyu töla, sauʼa, ba safiso. Ba töra moroi ba daʼö, tesusugi göi dania niha si no mate.—Yes. 25:8; 35:1-7.

11. Hadia niwaʼö Yehowa khö Yohane ba hadia mbörö?

¹¹ Hadia nasa niwaʼö Lowalangi enaʼö faduhu dödöda? Imane Yehowa khö Yohane, ”Sura daʼa börö me atulö ba tola mufaduhusi tödö wehede andre.” (Fam. 21:5) Tenga ha asala iwaʼö Yehowa khö Yohane ba wanura buʼusa linia. Hizaʼi, ifatunö göi hadia mbörö, yaʼia daʼö ”börö me atulö ba tola mufaduhusi tödö” mbuʼusa linia andrö. Taʼandrö sibai saohagölö börö me iʼoʼö goroisa daʼö Yohane irege tola tabaso mbuʼusa li Lowalangi sanandrösa ba Waradaiso ba tola taʼangerönusi howu-howu si sökhi nidöna-dönada.

12. Hana wa iwaʼö Yehowa, ”No numalö fefu daʼö!”

¹² Nehegö hadia niwaʼö Lowalangi nasa. ”No numalö fefu daʼö!” (Fam. 21:6) Me fahuhuo Yehowa hulö no alua fefu mbuʼusa linia andrö sanandrösa ba Waradaiso. Hadia mbörö? Börö me lö hadöi si tola manaisi yaʼia ba wamalua ohitö dödönia. Hadia nasa niwaʼö Yehowa ba wameʼe khöda faʼafaduhu dödö wa hasambalö ifalua mbuʼusa linia?

13. Hadia mbörö wa iwaʼö Yehowa, ”Alafa ndraʼo ba Omega”?

¹³ Simane si no mutötöi moroi yawa mege, tölu kali fahuhuo Yehowa ba gangilata Yohane. (Fam. 1:8; 21:5, 6; 22:13) Ero na fahuhuo Yehowa imane wangumaʼö, ”Alafa ndraʼo ba Omega.” Alafa ba Omega yaʼia daʼö hurufo siföföna ba safuria ba abjad Yunani. Börö daʼö, me iwaʼö Alafa ndraʼo ba Omega, omasi Yehowa ba wamaduhuʼö wa hadia zi no ibörögö hasambalö iʼasiwai.

14. (a) Hamega no amedola iwaʼö Yehowa ”Alafa” ba ”Omega”? (b) Hadia wamaduhuʼö nisura ba 1 Moze 2:1-3?

¹⁴ Me no aefa iwöwöi Gadamo hegöi Khawa, ifatunö khöra Yehowa hadia gohitö dödönia ba niha hegöi ba gulidanö. Imane Sura Niʼamoniʼö, ”Ifahowuʼö ira Lowalangi ba imane khöra, ’Miʼoʼono ba miʼoyaʼö ami, mifoʼösi gulidanö ba mifatörö ia.’” (1 Mo. 1:28) Me ifatunö gohitö dödönia andrö Yehowa, amaedola no imane ”Alafa”. Ba zi so miföna, ngaʼötö Gadamo si lö faröi ba soʼahonoa, lafönui gulidanö ba labaliʼö ia tobali Faradaiso. Ba luo daʼö, amaedola no imane Yehowa ”Omega”. Me föna, me no awai iwöwöi ’mbanua hegöi tanö awö nösinia maʼafefu’, ifaduhuʼö Yehowa wa hasambalö alua gohitö dödönia. Tesura daʼö ba 1 Moze 2:1-3. (Baso.) Iwaʼö Yehowa wa ngaluo si fitu no ngaluo niʼamoniʼö. Eluahania, no mofozu fefu gohitö dödönia ba niha hegöi ulidanö ba gangohorita ngaluo si fitu.

15. Hana wa iwaʼö tödönia Satana wa no mofozu ia ba wanaisi ohitö dödö Yehowa?

¹⁵ Me no mamadaö Gadamo hegöi Khawa, no lafalua horö ba laröi ba ngaʼötöra horö hegöi faʼamate. (Rom. 5:12) Me luo daʼö, hulö no mofozu Zatana ba wanaisi ohitö dödö  Lowalangi enaʼö afönu gulidanö andre faoma niha soʼahonoa ba si lö faröi. Ohitö dödö Zatana enaʼö tebai iwaʼö Yehowa ”Omega”. Te iwaʼö tödönia Satana wa lö oya lala nifalua Yehowa. Tola manö ibunu Gadamo hegöi Khawa Lowalangi Yehowa, aefa daʼö ifuli iwöwöi niha soʼahonoa ba wangoʼozui ohitö dödönia ba niha gulidanö. Hizaʼi, na ifalua daʼö Yehowa, iböbögö khönia Satana wa yaʼia andrö si falimo. Hadia mbörö? Simane si no tesura ba 1 Moze 1:28, no ifatunö Yehowa khö Gadamo hegöi Khawa wa ngaʼötöra dania zofönui ulidanö.

16. Hana wa iwaʼö Satana tebai ifalua gohitö dödönia Yehowa?

¹⁶ Hadia lala tanö böʼö nifalua Yehowa si so ba wangera-ngera Zatana? Te iwaʼö tödönia wa lala tanö böʼö si tola ifalua Yehowa yaʼia daʼö itehegö mongaʼötö Gadamo hegöi Khawa, hizaʼi lö irai teʼasogö niha soʼahonoa. (Sango. 7:20; Rom. 3:23) Na ifalua daʼö Yehowa, tatu manö iwaʼö Satana wa tebai ifalua gohitö dödönia Yehowa. Hadia mbörö? Börö me lö irai afönu gulidanö andre ngaʼötö Gadamo hegöi Khawa si lö faröi ba soʼahonoa.

17. Hadia gamakhoita nibeʼe Yehowa ba wamalua ohitö dödönia, ba hadia mbuania? (Faigi göi gambara.)

¹⁷ Lö irai ikhalaigö Satana wa hasambalö tola ifalua gohitö dödönia Yehowa hewaʼae no mamadaö Zatana, Adamo, hegöi Khawa. (Si. 92:5) Itehegö Yehowa enaʼö mongaʼötö Gadamo hegöi Khawa. Börö zimanö, ifaduhuʼö wa atulö niwaʼönia ba tenga si falimo ia. No iforomaʼö göi Yehowa wa lö hadöi si tola manaisi ohitö dödönia. No ihenaigö ’maʼuwu’ sangöhöli ba sangefaʼö ngaʼötö Gadamo ba Khawa si lö faröi. (1 Mo. 3:15; 22:18) Tatu tokea sibai dödö Zatana me irongo gamakhoita nibeʼe Yehowa andrö. Hadia mbörö? Börö me amakhoita andrö teʼodane-dane ia ba waʼomasi si lö fakhögusa. (Mat. 20:28; Yoh. 3:16) Sindruhu-ndruhu lö hadöi khö Zatana faʼomasi simane daʼö börö me ha tana khönia iʼalui. Na simanö, hadia mbua niʼasogö höli nibeʼe Yehowa? Ba gangohorita Wamatörö Keriso si Saribu Fakhe, ngaʼötö Gadamo hegöi Khawa si lö faröi ba soʼahonoa, toröi ira ba gulidanö faradaiso simane ohitö dödö Yehowa ba wamobörö. Ba luo daʼö, hulö no imane Yehowa ”Omega”.

18. Hadia zi tölu ngawalö zamaduhuʼö ba niha wa hasambalö alua mbuʼusa li Yehowa? (Faigi göi kotak ” Tölu Dane-Dane ba Wamaduhusi Tödö Buʼusa Li Yehowa.”)

¹⁸ Me no tafahaʼö ita sanandrösa ba daʼa, hadia nifaluada ba wanolo niha böʼö enaʼö böi aombö dödöra ba mbuʼusa li Lowalangi sanandrösa ba Waradaiso? So mato hauga ngawalö zi tola tafatunö khöra. Si oföna, Yehowa samösa zangumaʼö buʼusa li daʼö. Imane ba mbuku Wamaʼeleʼö, ”Imane si dadao ba dadaoma andrö, ’Hiza! Ubohouni fefu hadia ia.’” Omasi sibai Yehowa ba wamalua buʼusa linia ba iʼokhögö waʼatua-tua hegöi faʼabölö ba wamalua daʼö. Si dua, hasambalö alua zi no ifabuʼu Yehowa irege imane, ”Atulö ba tola mufaduhusi tödö wehede andre. . . . No numalö fefu daʼö!” Si tölu, imane Yehowa, ”Alafa ndraʼo ba Omega.” Börö daʼö, hadia zi no ibörögö Yehowa, hasambalö wa tola iʼasiwai. Sindruhu, hasambalö ifaduhuʼö dania Yehowa wa Satana andrö si falimo, si tebai manaisi ohitö dödönia.

19. Hadia nifaluamö na so niha si lö faduhu tödö ba mbuʼusa li Lowalangi sanandrösa ba Waradaiso?

¹⁹ No ibeʼe zi tobali weʼe-weʼe dödö wa hasambalö ifalua mbuʼusa linia Yehowa. Ero na ötutunö daʼö ba niha böʼö, itugu faduhu dödömö göi ba nifabuʼu Yehowa. Börö daʼö, na öfabasoʼö khö zi samösa niha mbuʼusa li sanandrösa ba Waradaiso nisura ba Wamaʼeleʼö 21:4, hizaʼi lö faduhu dödönia, hadia nifaluamö? Tola öbaso khönia ayati 5 ba 6, aefa daʼö haogö wanutunö. Foromaʼö hewisa wa no amaedola zi no ibeʼe tandra tangania Yehowa ba wamaduhuʼö wa hasambalö alua mbuʼusa linia.—Yes. 65:16.