1-2. (a) Hadia zi fagölö salua khöda iadaʼa faoma ira niha Yahudi sangawuli ba Yeruzalema? (b) Tutunö hadia manö gabula dödö nitaögö ndra niha Yahudi. (Faigi kotak ” Ba Götö Hagaʼi, Zakharia hegöi Esera”.)

 HADIA no irai aombö dödöu zalua ba zi so miföna? Tola manö no aheta ndraʼugö ba halöwöu irege aombö dödömö ba wombönökhi soguna ba nösi nomou. Tola manö göi aombö dödöu waʼauri nösi nomou börö me tebulö zalua ba politik, alua wamakao mazui fanandraigö ba wamalua halöwö fanuriaigö. Hadia so gabula dödö simane daʼö nitaögömö iadaʼa? Na daʼö zalua khömö, tola tobali fondrara dödöu na öʼangeragö hewisa Yehowa wameʼe fanolo ba ndraono Gizaraʼeli mböröta me alua khöra gabula dödö simane daʼö.

² Ira niha Yahudi si no ara toröi ba Mbabilona, moguna laforomaʼö wamati saro ba wondröi okhötara hegöi faʼahono dödö nirasoira sagötö feʼasora ba Mbabilona. Moguna laröi daʼö fefu ba numalö ira ba mbanua si lö anehe ira. Lö ara me awena larugi, alua khöra gabula dödö ba wombönökhi soguna ba nösi nomora inönö nasa waʼafawuka salua ba mbanua nirugira börö wolohi moroi ba nudu. Börö daʼö, so ösa zi lö mangila mangosambuaʼö tödöra ba wamazökhi mangawuli osali Yehowa. Te me 520 SM, ifatenge darua zamaʼeleʼö khönia Yehowa sotöi Hagaʼi ba Zakharia enaʼö ifuli tefarou dödö niha sato me luo daʼö. (Hag. 1:1; Zak. 1:1) Simane niʼilada dania, mofozu sibai wamarou dödö nifaʼema ndra samaʼeleʼö si darua andre. Hewaʼae simanö, arakhagö 50 fakhe aefa daʼö, moguna zui wamarou dödö khö ndra niha Yahudi si no mangawuli moroi ba Mbabilona. Börö daʼö, Esera samösa sonekhe ba wanura Oroisa Moze, mofanö ia moroi ba Mbabilona numalö ba Yeruzalema ba ibeʼe wamarou dödö ba nono mbanua Lowalangi enaʼö laʼofönaiʼö wamosumange satulö.—Esr. 7:1, 6.

3. Hadia manö wanofu-nofu nitutunöda? (Amaedola 22:19)

 ³ Famaʼeleʼö nifaʼema Hagaʼi hegöi Zakharia, daʼö zanolo ono mbanua Lowalangi ba götö föna enaʼö lö tebulö lafaduhusi tödö Yehowa sagötö alua khöra gabula dödö. Famaʼeleʼö daʼö göi zi tobali fanolo khöda iadaʼa enaʼö lö tebulö tafaduhusi tödö Yehowa na alua khöda gabula dödö. (Baso Gamaedola 22:19.) Ba artikel daʼa, tatutunö dania hadia goroisa Lowalangi nifaʼema Hagaʼi hegöi Zakharia ba tatutunö nasa duma-duma Gesera. Tabeʼe göi wanema li moroi ba wanofu-nofu andre: Hadia manö gabula dödö salua khö ndra niha Yahudi sangawuli ba Yeruzalema? Hana wa moguna taʼosambuaʼö dödöda ba wamalua ohitö dödö Lowalangi sagötö alua gabula dödö? Ba hewisa ita wangotomosi faʼafaduhu dödöda khö Yehowa sagötö mbaŵa waʼatosasa?

4-5. Hadia mbörö wa ambö terou dödö ndra niha Yahudi wamazökhi osali?

⁴ Me no mangawuli ndra niha Yahudi ba Yeruzalema, oya sibai halöwö sinangea lafalua. Moguna lafazökhi mangawuli naha wanunu sumange khö Yehowa aefa daʼö lafazökhi wondrasi gosali. (Esr. 3:1-3, 10) Hizaʼi, oya sibai gabula dödö nitaögöra irege awuwu ira. Hadia mbörö? Baero wamazökhi osali, mohalöwö ira göi ba wamazökhi omora samösa, latanö zinanö ba labönökhi zoguna ba nösi nomora. (Esr. 2:68, 70) Baero daʼö, alua nasa khöra wolohi börö me so nudu somasi manaisi enaʼö lö aʼozu lafazökhi gosali andrö.—Esr. 4:1-5.

⁵ Ira niha Yahudi sangawuli, abu dödöra börö waʼafawuka salua ba faʼatosasa ba wombönökhi soguna ba nösi nomora. Banua si toröi yaʼira iadaʼa notobali amatöröwa mbanua Weresia. Me no mate razo Weresia sotöi Kiro me 530 SM, ibörögö mamatörö Kambises fogatinia ba idöniaʼö ndra saradadu ba wokalaisi Miserai. Me mofanö ndra saradadunia numalö ba Miserai, latörö mbanua ndraono Gizaraʼeli ba te lafaso enaʼö lahenaigö gö, idanö hegöi nahia waʼatoröira. Daʼö mbörö wa itugu tosasa waʼauri ndraono Gizaraʼeli. Me awena mamatörö Dario I fogati Kambises, oya sibai gabula dödö salua, duma-dumania ato niha samadaö ba samawukaisi banua Weresia. Daʼa mbörö wa itugu abu dödö ndra niha Yahudi sangawuli andrö ba waʼauri nösi nomora. Börö waʼafawuka salua ba inönö nasa gabula dödö tanö böʼö, andrö wa so ndra niha Yahudi sangumaʼö wa tenga inötönia iadaʼa ba wamazökhi osali Yehowa.—Hag. 1:2.

6. Moloʼö Zakharia 4: 6, 7, hadia nasa gabula dödö salua khö ndra niha Yahudi ba hewisa Zakharia wameʼe khöra faʼafaduhu dödö?

⁶ Baso Zakharia 4:6, 7. Baero gabula dödö ba wombönökhi soguna ba nösi nomora hegöi faʼafawuka ba politik, so gabula dödö tanö böʼö yaʼia daʼö folohi. Me döfi 522 SM, no mofozu nudu ba wanaisi famazökhi osali Yehowa. Hizaʼi, ifaduhuʼö ba dödö ndra niha Yahudi Zakharia wa ha sambalö itolo ira Yehowa, iʼogunaʼö gehehania ba wanimbagö fanaisi andrö. Me döfi 520 SM, itehegö Razo Dario enaʼö latohugö ira niha Yahudi wamazökhi osali, ibeʼe gefe, aefa daʼö ifarou ndra gubernur enaʼö latuhini wamazökhi osali andrö.—Esr. 6:1, 6-10.

7. Hadia mbuania me laʼosambuaʼö dödöra ira niha Yahudi ba wamalua ohitö dödö Lowalangi?

 ⁷ Iʼogunaʼö Hagaʼi hegöi Zakharia Lowalangi Yehowa ba wamaʼema buʼusa linia ba nono mbanuania wa hasambalö itolo ira na laʼofönaiʼö halöwöra ba wamazökhi osali. (Hag. 1:8, 13, 14; Zak. 1:3, 16) Börö wamarou dödö moroi khö ndra samaʼeleʼö, lafuli zui latohugö halöwöra ira niha Yahudi ba wamazökhi osali andrö me döfi 520 SM, ba awai lafazökhi barö zi lima fakhe. Börö me laʼofönaiʼö wamalua  somasi Lowalangi hewaʼae na oya gabula dödö salua khöra, andrö latema howu-howu moroi khö Yehowa, tenga ha tebönökhi zoguna ba mboto hizaʼi iʼasogö göi zoguna khöra ba wamati. Buania, omuso-muso dödöra ba wamosumange Yehowa.—Esr. 6:14-16, 22.

8. Hewisa wehede nisura ba Hagaʼi 2:4 möi fanoloda ba wangosambuaʼö tödöda ba wamosumange Lowalangi? (Faigi nisura ba gahe zura.)

⁸ Börö me no itugu ahatö wamakao sabölö-bölö, aboto ba dödöda wa moguna sibai tafalua halöwö fanuriaigö. (Mrk. 13:10) Hizaʼi, te abua khöda wangosambuaʼö fangera-ngerada ba halöwö fanuriaigö na tosasa ita ba gefe mazui alua khöda wolohi. Hadia zanolo yaʼita? Böi tebulö waʼafaduhu dödöda wa fao khöda ”Yehowa samatörö saradadu zorugo”. b Hasambalö itolo ita na taʼofönaiʼö wamatörönia ba waʼaurida moroi ba gohitö dödöda samösa. Börö daʼö, lö moguna ataʼu ita—Baso Hagaʼi 2:4.

9-10. Hadia mbörö wa faduhu dödö Oleg hegöi Irina ba wehede Yesu nisura ba Mataiʼo 6:33?

⁹ Nehegö duma-duma Oleg hegöi Irina c sambua fongambatö si no tobali perintis. Me no findra ira ba mbanua niha Keriso tanö böʼö, taya lala wangaluira börö me itugu tosasa wangalui kefe ba soi si toröi yaʼira. Hewaʼae na lö hadöi halöwöra si no tatu barö zi döfi, lö tebulö larasoi wanolo moroi khö Yehowa ba itaria göi latema wanolo moroi khö ndra talifusöda si sara lala wamati. Hewisa wa tola lataögö fefu zalua andrö? Imane Oleg sanaögö faʼabu dödö ba wamobörö, ”Na lö taböhöli wamalua halöwö fanuriaigö, daʼö zanolo yaʼita ba wangosambuaʼö era-erada ba ngawalö zabölö moguna ba waʼauri.” Gasa-gasa wangaluira halöwöra, lö laʼalösi ginötöra ba wamalua halöwö fanuriaigö.

 ¹⁰ Samuza inötö me mangawuli ira manuriaigö, laʼila samösa zi fahuwu khöra sanörö lala si 160 kilometer ba wamasao soguna khöra dombua karate angi. Imane Oleg, ”Ba zi maʼökhö daʼö, ifuli zui marasoi wa iʼameʼegö tödö ndraʼaga Yehowa hegöi ira talifusöda ba mbanua niha Keriso. Faduhu dödöda wa lö irai iʼolifugö nono mbanuania Yehowa gofu hewisa waʼatosasa salua khöra.”—Mat. 6:33.

11. Hadia mbuania na lö tebulö taʼosambuaʼö dödöda ba wamalua somasi Lowalangi?

¹¹ Omasi Yehowa na taʼosambuaʼö dödöda ba halöwö fombaliʼö nifahaʼö si möi fangorifi. Simane nitutunö ba  ngenoli si 7, ifarou nono mbanua Yehowa Hagaʼi enaʼö ifuli latohugö wamazökhi fondrasi gosali. Na lafalua daʼö, no ifabuʼu Yehowa wa hasambalö ”ibeʼe khöra howu-howu”. (Hag. 2:18, 19) Faduhu göi dödöda wa ifahowuʼö nifaluada Yehowa na taʼofönaiʼö wamalua halöwö nibeʼenia khöda.

12. Hadia mbörö wa moguna wamati saro khö Gesera hegöi ira niha Yahudi si fao khönia?

¹² Me döfi 468 SM, mofanö Gesera fao ia ba ngawawa si dua khö ndra niha Yahudi si otarai Mbabilona si numalö ba Yeruzalema. Ba wofanöra andre, moguna wamati saro khö Gesera hegöi ira niha Yahudi tanö böʼö ba wanörö lala soya ametaʼuö. Börö me oya sibai ganaʼa niʼohera hegöi firö niʼamualagö si tobali tolo-tolo ba wamazökhi osali, daʼö mbörö wa ato sibai zedöna mondrabu yaʼira ba lala. (Esr. 7:12-16; 8:31) Baero daʼö, aboto ba dödöra wa lö iʼanemaiʼö lasöndra waʼahono dödö na no larugi Yeruzalema. Lö atoto niha si toröi ba daʼö ba moguna nasa lafuli lahaogö dowa hegöi bawa göli mbanua andrö. Hadia wamahaʼönia khöda moroi khö Gesera sanandrösa ba waʼafaduhu dödönia ba wamazökhi osali?

13. Hadia mbörö wa itugu faduhu dödö Gesera khö Yehowa? (Faigi nisura ba gahe zura.)

¹³ Anehe Gesera hewisa Yehowa wanolo ono mbanuania me göna ira fanandraigö. Hauga fakhe silalö me döfi 484 SM, te ba Mbabilona toröi Gesera me ibeʼe fareta Razo Ahasiwero enaʼö lahori fefu ndra niha Yahudi ba zi sagörö banua Weresia. (Est. 3:7, 13-15) No so ba mbawa waʼamate waʼauri Gesera! Börö daʼö, fefu ndra niha Yahudi ”misa ba provinsi,” fuasö ira, mangenu-ngenu ira ba wangandrö fanolo moroi khö Yehowa. (Est. 4:3) Khalaigö hewisa waʼomuso dödö Gesera hegöi ira niha Yahudi tanö böʼö me larongo gangetula wa tehori fefu niha sedöna mamunu yaʼira! (Est. 9:1, 2) Salua khö Gesera andrö, daʼö zanolo yaʼia ba wanaögö salua ba zi so miföna ba sameʼe khönia faʼafaduhu dödö wa hasambalö ilumöʼö nono mbanuania Yehowa. d

14. Hadia wamahaʼö si tola ihalö Anastasia me no irasoi wanolo moroi khö Yehowa?

¹⁴ Ba ginötö tarasoi wanolo moroi khö Yehowa sagötö mbaŵa waʼatosasa, itugu tedou waʼafaduhu dödöda khönia. Nehegö duma-duma Anastasia si toröi ba Eropa Timur. Iheta ia ba halöwönia börö me lafaso ia ira awönia enaʼö faʼawö dambai ia ba politik. Imane, ”Awena urasoi ba zi sakali daʼa hewisa rasonia na lö kefe.” Imane nasa, ”Utouʼö khö Yehowa gabula dödögu andre ba uʼila samösa hewisa woʼameʼegö tödönia yaʼo. Hewaʼae samuza maʼökhö dania na ifuli zui lö hadöi halöwögu, lö ataʼudo. Na irorogö ndraʼo Yehowa maʼökhö, ba ha sambalö wa irorogö ndraʼo mahemolu.”

15. Hadia mbörö wa lö tebulö waʼafaduhu dödö Gesera khö Yehowa? (Esera 7:27, 28)

¹⁵ No iʼila samösa Esera waʼabölö danga Yehowa. Na itörö tödönia hewisa wanolo  Yehowa yaʼia ba zilalö, daʼö mbörö wa itugu aro waʼafaduhu dödönia. Nehegö atö niwaʼönia, ”Börö danga Yehowa Lowalangigu si fao khögu.” (Baso Gesera 7:27, 28.) Mato hauga kali iʼogunaʼö ngawua wehede simane daʼö Esera si tesura ba mbukunia.—Esr. 7:6, 9; 8:18, 22, 31.

16. Hezo manö tola taʼila wa fao khöda waʼabölö danga Yehowa? (Faigi gambara ba guli majalah.)

¹⁶ Tola itolo ita Yehowa na alua khöda gabula dödö. Duma-dumania, na taʼandrö cuti khö gafaloda wohalöwö enaʼö tola möi ita ba kebaktian mazui enaʼö itehegö tafaböʼöni ginötöda wohalöwö enaʼö tola taʼondrasi gangowuloa, daʼö ginötönia khöda ba wangiʼila faʼabölö danga Yehowa ba waʼaurida. Tola manö abölö sökhi mbuania moroi ba nitötönada irege tedou waʼafaduhu dödöda khö Yehowa.

17. Hewisa Gesera wangoromaʼö fangide-ngideʼö ba ginötö waʼatosasa? (Faigi gambara ba guli majalah.)

¹⁷ Si fao fangide-ngideʼö mangandrö Gesera khö Yehowa. Ero irasoi waʼaombö dödö ba wamalua halöwönia, si fao fangide-ngideʼö mangandrö Gesera khö Yehowa. (Esr. 8:21-23; 9:3-5) Nifalua Gesera andrö tobali famarou dödö niha böʼö si so ba zi fasuinia ba wanolo yaʼia ba laʼoʼö göi wamatinia. (Esr. 10:1-4) Ero na ihawui ita faʼaombö dödö ba wangalui soguna mazui faʼauri nösi nomoda, sökhi na tatouʼö daʼö ba danga Yehowa si fao faʼafaduhu dödö.

18. Hadia zi tola möi fangaʼaroʼö waʼafaduhu dödöda khö Yehowa?

¹⁸ Na taʼalui wanolo moroi khö Yehowa si fao fangide-ngideʼö, itugu aro waʼafaduhu dödöda khönia ba tatema göi wanolo moroi khö ndra talifusöda si sara lala wamati. Erika, samösa ina si tölu ono, lö tebulö waʼafaduhu dödönia khö Yehowa me alua khönia gabula dödö sabölö-bölö. Ha ba zi lö arara, tefakao waʼaurinia börö waʼamate nononia bakha ba dalu ba mate göi woʼomonia niʼomasiʼönia. Imane wangumaʼö, ”Lö aboto ba dödöda hadia lala niʼogunaʼö Yehowa ba wanolo yaʼita. Tola manö ibeʼe khöda wanolo ba zi lö tadöna-döna. Oya wanema li ba wangandrögu si no utema, iʼodela zi fahuwu khögu ba wehede hegöi ba nifaluara. Na ututunö khöra gabula dödögu, aoha khöra wanolo yaʼo.”

19-20. Hadia wamahaʼönia khöda moroi khö ndra niha Yahudi si tebai mangawuli ba Yeruzalema?

¹⁹ So zi tobali famahaʼö khöda moroi khö ndra niha Yahudi si tebai mangawuli ba Yeruzalema. So ösa ba gotalua ndra niha Yahudi si tebai mangawuli börö me no atua ira, göna  ira fökhö sabölö-bölö mazui so zalua ba nösi nomora si tobali taha-taha. Hewaʼae simanö, lö tebulö latuhini ndra talifusöra sangawuli ba Yeruzalema. Duma-dumania oya dolo-tolo saoha ölö nibeʼera soguna ba wamazökhi osali. (Esr. 1:5, 6) Mato 19 fakhe me no mangawuli ngawawa si oföna ba Yeruzalema, niha si toröi ba Mbabilona lö tebulö nasa lafaʼoheʼö dolo-tolora ba Yeruzalema.—Zak. 6:10.

²⁰ Hewaʼae na so zi tebai tafalua ba wamosumange Lowalangi, hizaʼi faduhu dödöda wa iʼameʼegö tödö nifaluada Yehowa soroi ba dödö ba wangomusoiʼö tödönia. Hewisa wa taʼila daʼö? Ba götö Zakharia, iʼandrö khö zamaʼeleʼö khönia andre enaʼö ifazökhi dakula moroi ba ganaʼa hegöi firö nifaʼoheʼö ndra niha nitiboʼö si toröi ba Mbabilona. (Zak. 6:11) ”Takula solakhömi” andre daʼö zi tobali ”fanörö tödö” sanandrösa ba dolo-tolo nifaʼoheʼöra si fao faʼaohagölö. (Zak. 6:14, nis.) Faduhu göi dödöda wa lö iʼolifugö Yehowa wamorege nifaluada soroi ba dödö ba wamosumange yaʼia sagötö alua khöda gabula dödö.—Heb. 6:10.

21. Hadia zameʼe khöda faʼafaduhu dödö khö Yehowa sagötö ngaluo safuria andre?

²¹ Faduhu dödöda wa itugu oya gabula dödö salua khöda iadaʼa ba ginötö safuria andre, ba tola manö itugu monönö nasa daʼö ba zi so miföna. (2 Ti. 3:1, 13) Hewaʼae simanö, böi talafo taʼaombösi tödö. Böi olifu ita daromali Yehowa niwaʼönia khö ndraono mbanuania nifaʼema Hagaʼi imane: ”Fao ndraʼo khömi . . . Böi miʼataʼufi.” (Hag. 2:4, 5) Faduhu dödöda wa fao khöda Yehowa sagötö tabeʼe wondrege zi sökhi ba wamalua ohitö dödönia. Na tafalua wamahaʼö si no tatema moroi ba wamaʼeleʼö Hagaʼi, Zakharia hegöi duma-duma moroi khö Gesera, tola tarorogö waʼafaduhu dödöda khö Yehowa gofu hadia gabula dödö salua khöda ba zi so miföna.