Tumbu ndraʼo me 1948 ba mbanua side-ide tanö raya gaekhula Nigeria. Me luo daʼö, akhi bapagu sotöi Moustapha, hegöi gaʼagu siaʼa sotöi Wahabi, tebayagö ira idanö tobali Samaduhuʼö Yehowa. Mate bapagu me awena siwa fakhe ndraʼo. Afatö sibai dödögu. Imane khögu gaʼagu Wahabi wa tola dania ifuli falukha ndraʼaga bapama na alua wanusugi. Fondrara dödö daʼa zamarou yaʼo enaʼö ufahaʼö ndraʼo ba Zura Niʼamoniʼö. Tebayagö idanö ndraʼo me 1963. Ba lö ara aefa daʼö, tebayagö göi idanö dalifusögu si datölu tanö böʼö.

Me 1965, toröi ndraʼo khö gaʼagu Wilson ba Lagos, ba urasoi waʼomuso dödö me tola fahuwu ndraʼo khö ndra perintis biasa ba mbanua niha Keriso Igbobi. Faʼomuso dödö ba faʼowölö-ölöra zamarou tödögu irege me baŵa si Sara 1968, uhalö gangetula tobali perintis.

So samösa dalifusöda sohalöwö ba Mbetieli sotöi Albert Olugbebi, ifalua rafe khö ndra si bohou ebua, ba ifatunö khöra wa moguna sibai mufataro perintis istimewa ba Nigeria tanö yöu. Itörö tödögu hewisa waʼaterou dödö dalifusöda Olugbebi me ifaʼema wehede daʼa, ”Awuyu-wuyu nasa ami, ba tola miʼogunaʼö ginötö hegöi faʼabölömi khö Yehowa. No teboka khömi mbawandruhö ba wamalua halöwö ba mbanua andrö!” Omasido uʼoʼö waʼaterou  dödö Yesaya samaʼeleʼö, andrö wa ufoʼösi formulir perintis istimewa.—Yes. 6:8.

Me baŵa si Lima 1968, lafatenge ndraʼo tobali perintis istimewa ba mbanua Kano, banua tanö yöu Nigeria. Me luo daʼö, alua Wasuwöta Biafran (1967-1970) sangaʼasogö abula dödö soya sibai ba ato göi zi mate irugi mbanua Nigeria tanö raya. So samösa dalifusöda sanaha yaʼo enaʼö böi möi ndraʼo ba daʼö, börö me lö omasi ia na teʼala waʼaurigu. Umane khönia, ”Saohagölö waʼasökhi dödömö. Hizaʼi, na daʼö zomasi Yehowa enaʼö mangai halöwö ndraʼo ba daʼö, faduhu dödögu wa hasambalö fao ia khögu.”

Ahakhö sibai dödöda wamaigi salua ba Kano. Oya zi tekiko ba mbanua sebua andrö börö wasuwöta. Na möiga manuriaigö, itaria maʼila mboto zi mate nibunu sagötö wasuwöta andrö. Hewaʼae so mbanua niha Keriso ba Kano, hizaʼi ato ndra talifusöda si no moloi. Ambö 15 niha tö ndra talifusöda si toröi, ataʼu ira ba aetu wanötönara. Omuso sibai dödö ndra talifusöda andre me tohare daönö perintis istimewa ba daʼö. Mafarou dödöra irege larasoi waʼahono dödö. Matolo göi ira enaʼö tola ifuli mufalua gangowuloa hegöi halöwö fanuriaigö, ba ibörögö mafaʼoheʼö laporan dinas ba gödo ndraha ba maʼandrö enaʼö lafaʼoheʼö khöma publikasida.

Yaʼaga perintis istimewa, mabörögö wamahaʼö yaʼaga ba li Hausa. Ato niha ba daʼö somasi mamondrongo turia somuso dödö ba li sasese laʼogunaʼö. Hizaʼi, lö omasi ndra sondröniaʼö agama ba halöwö fanuriaigö nifaluama, andrö wa mangelama sibai ndraʼaga. Samuza inötö, so samösa ndra matua solohi yaʼaga faoma rosö. Hizaʼi, abölöga fagohi moroi khönia ba tebai ikhamö ndraʼaga! Hewaʼae arakhagö teʼala waʼaurima, hizaʼi ibeʼe khöma ’waʼahono dödö’ Yehowa ba itugu tedou waʼato zanuriaigö ba mbanua andrö. (Si. 4:8) Iadaʼa, töra 500 zanuriaigö ba zi 11 mbanua niha Keriso ba Kano.

Aefa daʼö, me baŵa si Walu 1968, me no hauga waŵa marugi Kano, lafatenga ndraʼo ba Niamey, ibu kota Republik Niger, ba so darua nawögu  perintis istimewa. Lö ara me no marugi Niger, Afrika Barat, maʼila wa sambua daʼa mbanua saukhu sibai ba gulidanö. Maʼalui lala hewisa enaʼö tola möiga manuriaigö hewaʼae aukhu sibai zino, ba mafahaʼö ndraʼaga ba li niʼogunaʼö ba daʼö yaʼia li Prancis. Hewaʼae so gabula dödö salua, lö tebulö mafaduhusi tödö Yehowa ba ibörögö fao ndraʼaga khö ndra talifusö si toröi ba daʼö weʼamöi manuriaigö. Ha ba zi lö arara, arakhagö fefu niha Niamey sangila mombaso no latema mbuku Kebenaran yang Membimbing kepada Kehidupan Kekal. Ato niha sangondrasi yaʼaga ba wangandrö buku andrö!

Lö ara, maʼila wa lö omasi ndra samatörö ba mbanua andrö khö ndra Samaduhuʼö Yehowa. Me baŵa si Fitu 1969, owulo ndraʼaga ba wamalua angowuloa ba zi sambua wilayah si oföna sibai ba soi daʼö, ba so mato 20 niha zangondrasi. So darua nibalo-baloima sedöna tebayagö idanö. Hizaʼi, me awena mubörögö ba ngaluo siföföna, tohare ndra folisi ba labatogö gangowuloa andrö. Laʼohe ndraʼaga hegöi satua samasui ba gödo wolisi. Me no aefa manofu-nofu ira, laʼandrö khöma enaʼö ifuli möiga khöra mahemolunia. Börö me maʼila wa lagohi ndraʼaga ira samatörö, andrö wa matatugöi enaʼö ba nomo muhalö huhuo wamayagö idanö, ba lö mafatunö-tunö misa me mafalua wamayagö idanö ba zi sambua ungo nidanö.

Ba zi hauga migu aefa daʼö, lawaʼö khöma ira samatörö enaʼö maröi mbanua Niger, yaʼo hegöi si dalima perintis istimewa tanö böʼö. Labeʼe khöma ginötö 48 za ba wondröi soi daʼö, ba maʼalui samösa lalama. Maʼoʼö niwaʼöra ba iʼanemaiʼö möiga ba gödo ndraha Nigeria, ba daʼö matema halöwö si bohou.

Lafatenge ndraʼo ba mbanua Orisunbare si so ba Nigeria, ba daʼö urasoi waʼomuso dödö wamalua halöwö fanuriaigö wefao khö ndra talifusöda si lö atoto si toröi ba daʼö. Hizaʼi, önö waŵa aefa daʼö, laʼandrö khögu ira talifusö ba gödo ndraha enaʼö mangawulido ba Niger, ha yaʼo samösa. Ba wamobörö, tokeado ba moʼugu-ugu bakha dödögu, hizaʼi omasido sibai ifuli falukha khö ndra talifusö si so ba Niger!

Ufulido ba Niamey. Sahari me no urugi, so samösa pengusaha ba Nigeria sangila wa yaʼodo samösa Samaduhuʼö, ba oya wanofu-nofunia sanandrösa ba Zura Niʼamoniʼö. Mafalua wamahaʼö ba Zura Niʼamoniʼö, aefa daʼö iböhöli woroko hegöi famadu tuo, ba tebayagö ia idanö. Omuso dödögu wefao khö ndra talifusöda ba wanuriaigö ba mbanua si faböʼö-böʼö si so ba Niger, ba uʼila samösa barö zi hauga fakhe hewisa me latema zindruhu niha si toröi ba daʼö. Me awena urugi, ha 31 niha ndra Samaduhuʼö ba soi daʼö, hizaʼi me mofanödo so 69 niha waʼatora.

Me baŵa si Felendrua 1977, ufulido zui ba Nigeria ba wanema famomaha. Ba gangohorita zi tölu  migu wamomaha andre, talifusöda Malcolm Vigo, koordinator Panitia Cabang, iʼandrö khögu ba wombaso sura moroi ba gödo ndraha Sierra Leone. Ira talifusö ba daʼö, labalo-baloi samösa perintis si lö fökhö, si lö sangowalu, ba si tola fahuhuo ba li Inggris hegöi Prancis, ba wangai halöwö tobali satua samasui ba Guinea. Ifatunö talifusöda Vigo wa famomaha nitemagu moguna ia ba wamalua halöwö daʼa. Ihaogö wangombakha khögu wa lö aoha wamalua halöwö daʼö. Ibeʼe khögu mene-mene imane, ”Haogö angeragö fatua lö ötema halöwö daʼa.” Iʼanemaiʼö utema linia, ”Na Yehowa zamatenge yaʼo, hasambalö möido.”

Mofanödo ba Sierra Leone ba falukhado khö ndra talifusö si so ba gödo ndraha. Samösa Panitia Ndraha sangumaʼö khögu, ”Lö taʼila sibai hewisa waʼatedou halöwö fanuriaigö ba Guinea.” Hewaʼae gödo ndraha Sierra Leone zamaigi-maigi halöwö fanuriaigö ba Guinea, hizaʼi lö laʼila fahuhuo khö ndra sanuriaigö ba daʼö börö waʼafawuka salua ba politik. No göi hauga kali lafatenge ndra talifusöda weʼamöi ba mbanua daʼö, hizaʼi lö latehegö khöra. Börö daʼö, usofu khöra hadia tola möido ba Conakry, ibu kota Guinea, ba uʼandrö khö ndra samatörö enaʼö tola toröi ndraʼo ba daʼö.

Me urugi Conakry, möido ba kedutaan Nigeria ba ufalukhaisi duta besar. Ufatunö khönia wa omasido manuriaigö ba Guinea. Ifarou ndraʼo enaʼö lö toröido ba daʼö börö me tola manö laraʼu ba teʼala waʼaurigu. Imane khögu, ”Angawuli ba Nigeria, ba daʼö manö lau manuriaigö.” Hizaʼi umane khönia, ”No uhalö gangetula wa toröido ba Guinea.” Börö daʼö, ifaʼoheʼö zura khö Menteri Dalam Negeri Guinea ba wanolo yaʼo, ba ifalua daʼö menteri andrö.

Lö ara aefa daʼö, mangawulido ba gödo ndraha Sierra Leone, ba ufatunö khö ndra talifusö gangetula menteri andrö. Omuso sibai dödöra me larongo hewisa wamahowuʼö Yehowa lala halöwögu. Latehegö khögu ira samatörö toröi ba Guinea!

Iʼotarai me döfi 1978 ofeta 1989, mangai halöwö ndraʼo tobali satua samasui ba Guinea, Sierra Leone, ba tobali PW pengganti ba Liberia. Ba wamobörö, asese mofökhödo. No hauga kali alua daʼö me so ndraʼodo ba mbanua si fandröndröu. Hizaʼi, laforege ira talifusö ba wolohe yaʼo ba rumah sakit.

Samuza inötö, gönado fökhö sabölö-bölö yaʼia daʼö malaria hegöi cacing usus. Me no döhö ndraʼo, awena uʼila wa lafadunö-dunö ira talifusöda hezo dania lakoʼo ndraʼo na matedo! Hewaʼae alua khögu daʼa fefu, lö irai tumbu ba dödögu wondröi halöwö andre. Faduhu dödögu wa ha Yehowa zi tola molumöʼö yaʼo. Hewaʼae mate ndraʼo iadaʼa, hizaʼi hasambalö isusugido dania.

Me 1988, falukhado khö Dorcas, samösa perintis sangomasiʼö Yehowa ba sangokhögö fangide-ngideʼö. Mangowalu ndraʼaga, ba faoga wamalua halöwö famasui. Iforege sibai Dorcas wanolo yaʼo ba wamalua halöwö daʼö, ba oya göi nitehegönia ba wangai halöwö khö Yehowa. Matörö tanö mato  25 kilometer weʼamöi ba mbanua niha Keriso ba maʼonoro tasima. Ba weʼamöi ba mbanua niha Keriso saröu, matörö gofu hadia manö lala si so. Oya sibai lala si tekiko ba safönu tambu.

Barani sibai Dorcas. Duma-dumania, itaria maʼötö nungo nidanö si so buaya. Samuza inötö, me mofanöga sagötö zi lima hari, maʼogunaʼö kano ba wangatö idanö börö me no afatö ndrela eu si so ba daʼö. Me mozizio Dorcas, alabu ia ba nidanö. Samösa lö sangila molangi ba gotaluama, ba so mbuaya ba daʼö. Maʼandrö sibai saohagölö börö me so mato hadauga ndraono matua solangi ba wangai yaʼia. Maʼangifi-ngifigö manö zalua andrö ba zi hauga hari, hewaʼae simanö lö maböhöli wamalua halöwö nibeʼe khöma.

Ba wamobörö ndröfi 1992, tokea sibai ndraʼaga me manabina Dorcas. Hadia afuriata khöma daʼa ba wangai halöwö safönu inötö? Mamane tödöma, ”No mamuala khöda Yehowa!” Daʼö mbörö wa mabeʼe töi nonoma alawe andrö Jahgift (ba li Inggris eluahania ”Buala Moroi khö Yehowa”). Öfa fakhe me no tumbu Jahgift, tumbu nakhinia ono matua sotöi Eric. No tobali howu-howu ba wamati khöma ndraonoma si darua andre. No irai mangai halöwö Jahgift ba RTO Conakry, ba tobali enoni sohalöwö Eric.

Hewaʼae na ibato Dorcas tobali perintis istimewa, hizaʼi lö iböhöli tobali perintis biasa sagötö wangebuaʼö iraonoma. Börö wanolo Yehowa, lö tebulö ndraʼo wangai halöwö safönu inötö. Me no egebua-bua ndraonoma, ifuli tobali perintis istimewa Dorcas. Iadaʼa, mangai halöwö ndraʼaga tobali utusan injil ba Conakry.

Gofu hezo ifatenge ndraʼo Yehowa, hasambalö uʼoʼö. Yaʼo hegöi foʼomogu asese sibai marasoi wolumöʼö hegöi howu-howu moroi khönia. Börö me abölö mafaduhusi tödö Yehowa moroi ba harato, oya gabula dödö hegöi faʼaombö dödö si tola matimbagö. Yaʼo hegöi Dorcas, no marasoi samösa wa Yehowa, ”Lowalangi sangorifi yaʼaga” no Umbu waʼohahau dödö sindruhu. (1 Ng. 16:35) Faduhu dödögu wa fefu niha si faduhu tödö khö Yehowa, hasambalö ’ilumöʼö waʼaurira ba mbola-bola waʼauri khönia’.—1 Sa. 25:29.