Lala Enaʼö Lö Tebulö Ötatugöi Ginötö ba Wamalua Famahaʼö Samösa
HADIA abua khöu wotatugöi inötö ba wamalua famahaʼö samösa ba Zura Niʼamoniʼö? Hadia itaria aföli ndraʼugö wamalua famahaʼö samösa ba Zura Niʼamoniʼö? Fefu ita itaria tarasoi zimane daʼö. Hizaʼi angeragö danö böʼö sasese tafalua, simane duma-dumania femondri. Sindruhu wa moguna ginötö hegöi famorege ba weʼamöi mondri, hizaʼi na tafalua daʼö, awena okafu dödöda. Hulö zimane daʼö göi na tafahaʼö ita ba Zura Niʼamoniʼö, tola tarasoi waʼokafu dödö. (Ef. 5:26) Nehegö wanuturu lala andre:
Tatugöi ginötö. Famahaʼö samösa ba Zura Niʼamoniʼö tefarahu ia ba gotalua ”zabölö moguna” sinangea tafalua. (Fil. 1:10) Enaʼö lö aetu wamaluamö daʼö, tandraigö sura ginötö wamahaʼöu samösa ba beʼe daʼö ba zasese öʼila. Mazui öbeʼe alarm ba HP-mö.
Tatugöi hawaʼoya ginötö niʼogunaʼömö. Hadia tola öʼosambuaʼö dödöu na öfahaʼö ndraʼugö ba zi sakali, hizaʼi ara sibai ginötö niʼogunaʼömö? Mazui hadia omasi ndraʼugö wamalua famahaʼö samösa mato hauga kali, hizaʼi lö arara? Fili lala sabölö omasiʼö. Na no irugi inötö wamahaʼöu samösa hizaʼi areu ndraʼugö wamalua daʼö, tandraigö falua mato fulu menit manö. Abölö sökhi daʼö moroi na lö öfahaʼö ndraʼugö. Na no öbörögö wamahaʼö yaʼugö, tola manö örasoi waʼomuso dödö ba omasiʼö na ara öfahaʼö ndraʼugö nasa.—Fil. 2:13.
Tatugöi sakali hadia duho nifahaʼöu yaʼugö. Na awena öʼangeragö hadia duho nifahaʼöu yaʼugö ba ginötö öfalua wamahaʼö, lua-luania lö öʼila ’öhaogö wangogunaʼö inötö’. (Ef. 5:16) Börö daʼö, tandraigö sura artikel mazui tuho somasiʼö öfahaʼö yaʼugö. Sura ero so wanofu si tumbu ba dödömö. Ero awai öfahaʼö ndraʼugö, sura hadia nasa duho tanö böʼö somasiʼö öʼila.
Tola öbulöʼö ginötö na moguna. Böi olifu ndraʼugö wa tola öfaudugö wamahaʼöu samösa, duma-dumania faʼara ginötö mazui tuho somasiʼö. Gofu hawaʼara öfahaʼö ndraʼugö, hawaʼoya ginötö niʼogunaʼömö, ba hadia nifahaʼöu yaʼugö, sabölö moguna yaʼia daʼö asese öfalua ia moloʼö si no ötatugöi.
Oya mbua nitemada na lö taböhöli wamahaʼö yaʼita ba Zura Niʼamoniʼö ero samigu. Itugu ahatö ita khö Yehowa, atua-tua ita wangai angetula, ba tasöndra waʼokafu dödö.—Yos. 1:8.
