1-2. Hadia manö walöʼatulö si tola alua khöda?

 ITUTUNÖ Yesu sambua gamaedola sanandrösa khö lakha mbanua si lö aetu-aetu mangandrö faʼatulö khö zi samösa sanguhuku. Ato zoloʼö khö Yesu sadöni tödö ba gamaedola daʼö börö me asese mufalua walöʼatulö ba niha mbanua me luo daʼö. (Luk. 18:​1-5) Tatu manö, aboto göi ba dödöda nirasoi lakha mbanua andrö börö me fefu ita no irai lafalua khöda walöʼatulö.

² Fanahö-nahö tödö, falöʼatulö, hegöi famakao, alua daʼö ba zi fasuida. Börö daʼö, lö tokea ita na lafalua khöda zi lö atulö ba gulidanö andre. (Sango. 5:8) Hizaʼi, tola manö afatö sibai dödöda na talifusöda si sara lala wamati zamalua daʼö. Sindruhu sa, lafalua daʼö börö me niha si lö moʼahonoa ira, tenga laʼodödögö wamalua khöda si lö sökhi simane si faʼudu khöda. Na alua khöda walöʼatulö, tola tafahaʼö ita moroi ba duma-duma Yesu me lafalua khönia zi lö atulö ira si faʼudu khönia. Na tola tabologö dödöda ba walöʼatulö nifalua niha si faʼudu khöda, tatu abölö ebolo dödöda khö ndra talifusöda si sara lala wamati. Na simanö, hewisa dödö Yehowa na lafalua khöda zi lö atulö ira talifusöda ba mbanua niha Keriso  hegöi niha baero? Hadia iʼameʼegö tödö daʼö?

3. Hadia zangoromaʼö wa omasi Yehowa na lafalua khöda zatulö?

³ Omasi Yehowa na lafalua khöda zatulö, ba iʼila göi na lafalua khöda zi lö atulö. ”Iʼomasiʼö waʼatulö Yehowa.” (Si. 37:28) Ifaduhuʼö khöda Yesu wa ”iʼasogö waʼatulö [Yehowa] . . . ba waʼalio” ba ginötö si tefaudu. (Luk. 18:​7, 8) Ba zi lö ara tö, ihori fefu wamakao hegöi falöʼatulö.—Si. 72:​1, 2.

4. Hadia wanolo nibeʼe Yehowa khöda?

⁴ Moguna nasa tabaloi Yehowa ba wangasiwai fefu abula dödöda. Hizaʼi iadaʼa manö, oya wanolo nibeʼe Yehowa khöda ba wanaögö falöʼatulö. (2 Fe. 3:13) Duma-dumania, itolo ita ba wanaha tödöda enaʼö lö itugu fawuka zalua. Hewisa wamaluania daʼö? Itatugöi enaʼö tesura ba Zura Niʼamoniʼö duma-duma Nononia enaʼö tola taʼoʼö. Ifatunö göi khöda Yehowa hadia manö zinangea tafalua na lafalua khöda walöʼatulö.

TAHA DÖDÖU

5. Ba ginötö alua khöda walöʼatulö, hana wa moguna tataha dödöda?

⁵ Ba ginötö alua khöda walöʼatulö, tola manö afökhö sibai bakha dödöda ba abu dödöda. (Sango. 7:7) No irai larasoi göi zimane daʼö ira enoni Lowalangi si lö faröi, simane Yobi hegöi Habakuki. (Yob. 6:​2, 3; Hab. 1:​1-3) Sindruhu wa no sinangea na tarasoi zimane daʼö. Hizaʼi, moguna tataha dödöda hegöi nifaluada enaʼö böi tafalua zala.

6. Hadia wamahaʼö si tola tahalö moroi khö Gabisalomi? (Faigi goi gambara.)

⁶ Na lafalua khöda mazui ba nösi nomoda zi lö atulö, sasesenia omasi ita iʼanemaiʼö tasulöni. Hizaʼi, na tafalua daʼö, tola itugu fawuka zalua. Nehegö duma-duma salua khö zi samösa ono Razo Dawido sotöi Abisalomi. Akhinia Tamara, no ihoröni ia talifusönia tiri sotöi Amoni. Me irongo daʼö Abisalomi, mofönu sibai ia. Moloʼö Oroisa Moze, no horö sebua nifalua Gamoni andrö ba sinangea na mate ia. (3 Mo. 20:17) Daʼö mbörö wa no göi sinangea mofönu Gabisalomi. Hizaʼi, satulönia menaʼö tebai ihalö samösa gangetula Abisalomi ba ibunu Gamoni.—2 Sa. 13:​20-23, 28, 29.

7. Hadia nifalua zanura sinunö me iʼila walöʼatulö salua ba zi fasuinia?

⁷ Ba ginötö taʼila wa lö göna fanguhuku  niha samalua khöda si lö atulö, tola manö ibörögö tawaʼö tödöda wa lö eluaha wamalua satulö. No irai inehegö sanura sinunö wa itugu ohahau dödö niha samalua si lö sökhi ba nawönia. Imane, ”Simane daʼö waʼauri niha si lö sökhi si lö irai manörö faʼatosasa.” (Si. 73:12) Afatö göi dödönia me iʼila walöʼatulö salua ba zi fasuinia, imane, ”Alangu dödögu, me utandraigö woʼangeragö.” (Si. 73:​14, 16) Daʼö mbörö wa tumbu ba dödönia wa lö eluaha wamosumange Yehowa. Ifaduhuʼö wangumaʼö, ”Arakhagö ahole ndraʼo moroi ba lala satulö; hatö maʼifutö ba ahele gahegu.” (Si. 73:2) Daʼö zi no irai alua khö dalifusöda sotöi Alberto.

8. Hadia lua-luania khö zi samösa talifusöda ira matua me lafalua khönia zi lö atulö?

⁸ So ösa ndra talifusöda samöbögö si lö duhu khö Alberto wa no itagö gefe ba mbanua niha Keriso. Lua-luania, aheta ia tobali satua sokubaloi, ba ato ndra talifusö sangila daʼö si lö saʼae mamosumange yaʼia. Imane Alberto, ”Me luo daʼö, mofönu sibai ndraʼo ba afatö dödögu.” Molua-lua daʼö ba wahuwusania khö Yehowa, ba ibato wamalua halöwö ba wamati sagötö zi lima fakhe. Salua andre zangoromaʼö hadia lua-luania na lö tataha dödöda hegöi nifaluada ba ginötö lafalua khöda zi lö atulö.

 OʼÖ DUMA-DUMA YESU

9. Hadia walöʼatulö salua khö Yesu? (Faigi göi gambara.)

⁹ No ibeʼe khöda duma-duma soʼahonoa Yesu hewisa lala ba wanaögö falöʼatulö. Asese lafalua khönia zi lö atulö niha sato, simanö göi nösi nomonia. So ösa moroi ba nösi nomonia zangumaʼö wa no owöhö ia. Laböbögö khönia zi lö atulö ira sondröniaʼö ba agama wa moroi khö malaʼika si lö sökhi iʼotarai waʼabölönia. Laʼoʼaya ia ira saradadu Romawi, laböbözi ba labunu. (Mrk. 3:​21, 22; 14:55; 15:​16-20, 35-37) Hewaʼae alua khönia fefu daʼö, lö irai isulöni khöra Yesu. Hadia wamahaʼönia khöda?

10. Hewisa wa tola anau gölö Yesu hewaʼae lafalua khönia zi lö atulö? (1 Fetero 2:​21-23)

¹⁰ Baso 1 Fetero 2:​21-23. a Tola taʼoʼö duma-duma Yesu na lafalua khöda zi lö atulö. Iʼila hawaʼara ginötö mohede ia, ba hawaʼara ilau zi lö hede-hede. (Mat. 26:​62-64) Hewaʼae oya niböbögö khönia, sasesenia ilau zi lö hede-hede. (Mat. 11:19) Ba ginötö ihalö gangetula wamaʼema fehede, lö irai iʼoʼaya, iʼailasi mazui ifetaʼu zi faʼudu khönia. Ihöna khönia wanaha tödö ba ”itouʼö fefu ba danga Zanguhuku satulö”. Aboto ba dödö Yesu wa iʼila Yehowa fefu walöʼatulö salua khönia, ba faduhu dödönia wa hasambalö iʼasiwai fefu daʼö Yehowa ba ginötö si tefaudu.

11. Hewisa enaʼö tola taʼangenanöi wehededa? (Faigi göi gambara.)

¹¹ Na lafalua khöda zi lö atulö, tola taʼoʼö duma-duma Yesu ba woʼangenanöi fehededa. Duma-dumania, böi tafagema-gema na lö abölö-bölö sibai nifaluara andrö. Mazui tola talau zi lö hede-hede, moroi na tafaʼema  wehede si möi fangolotusi. (Sango. 3:7; Yak. 1:​19, 20) Hizaʼi, so ginötönia moguna tawaʼö niwaʼöda, duma-dumania ba ginötö taʼila wa lafalua zi lö atulö ba niha böʼö mazui na tafaduhuʼö zindruhu. (Hal. 6:​1, 2) Na tahalö gangetula ba wamaʼema fehededa, moguna taforege enaʼö sökhi lagu wahuhuosada ba si fao famosumange.—1 Fe. 3:15. b

12. Hewisa wanouʼöda fefu zalua ba danga ”Zanguhuku satulö”?

¹² Tola göi taʼoʼö Yesu na tatouʼö fefu zalua khöda ba danga Yehowa, ’Sanguhuku satulö’. Na lafalua khöda zi lö atulö, faduhu dödöda wa anehe Yehowa fefu daʼö. Aboto göi ba dödöda wa samuza inötö dania iʼasiwai fefu daʼö. Hasambalö anau gölöda ba wanaögö falöʼatulö salua khöda na sindruhu-ndruhu tafaduhusi tödö Yehowa. Lö göi tatanö ba dödöda wönu mazui fahöʼö ita. Fangera-ngera simane daʼö zi tobali börö wa lö khöda fanaha tödö, taya waʼomuso dödöda ba tekiko wahuwusada khö Yehowa.—Si. 37:8.

13. Na alua khömö walöʼatulö, hadia zi tola öfaduhusi tödö?

¹³ Tatu manö, lö moʼahonoa woloʼöda duma-duma Yesu. Itaria, tafalua mazui tawaʼö wehede saniasa ita ba gafuriata. (Yak. 3:2) Ba tola manö abölö-bölö walöʼatulö salua khöda irege tarasoi lua-luania sandrohu faʼaurida, he ba mboto hegöi ba wangera-ngera. Na daʼö zalua khöu, yafaduhu dödöu wa sindruhu-ndruhu aboto ba dödö Yehowa zalua khömö. Iʼila göi Yesu hadia nirasoimö börö me no irai lafalua khönia zi lö atulö. (Heb. 4:​15, 16) Börö daʼö, tenga ha duma-duma Yesu niʼogunaʼö Yehowa ba wanolo yaʼita, hizaʼi ifatunö göi khöda ba Zura Niʼamoniʼö hewisa lala enaʼö anau gölöda ba ginötö lafalua khöda zi lö atulö. Datatutunö zi dombua ayati moroi ba mbuku Roma si tobali fanoloda.

”MIFONAHA WÖNU LOWALANGI”

14. Hewisa woloʼöda mene-mene si so ba Roma 12:19?

¹⁴ Baso Roma 12:19. Iʼamenesi ndra niha Keriso Faulo, ”Mifonaha wönu Lowalangi.” Tola tafalua mene-mene daʼö na tatehegö khö Yehowa ba wotatugöi hewisa ba hawaʼara iʼasiwai fefu zalua andrö. No irai lafalua zi lö atulö khö zi samösa talifusöda sotöi John. Imane, ”Me luo daʼö, uforege wanaha tödögu enaʼö lö mofönudo ba lö ufalua zala. Itolo ndraʼo Roma 12:19 enaʼö ubologö dödögu ba lö tebulö ufaduhusi tödö Yehowa.

15. Hana wa moguna tadöna-döna khö Yehowa ba wangasiwai abula dödöda?

¹⁵ Na tabaloi wanolo moroi khö Yehowa, lö taforege ba wangasiwai samösa abula dödöda. Buania, lö fawuka gera-erada ba lö afatö dödöda. No ifabuʼu Yehowa wa omasi ia itolo ita. Imane, ”Yaʼo zanulöni.” Hulö na imane khöda Yehowa, ’Touʼö manö khögu gabula dödömö. Hasambalö uʼasiwai walöʼatulö salua khömö.’ Na tafaduhusi tödö mbuʼusa li Yehowa, lö tatanö ba dödöda wönu mazui fahöʼö ita, börö me taʼila wa hasambalö iʼasiwai gabula dödöda Yehowa ba lala sabölö sökhi. Daʼö zanolo John, nitutunö moroi yawa. Itouʼö khö Yehowa fefu zalua khönia, ba imane, ”Faduhu dödögu, abölö sökhi mbua nitemagu na ufalua daʼö, moroi na uforege samösa ba wangasiwai yaʼia.”

”MIKALAISI ZI LÖ SÖKHI FAOMA SI SÖKHI”

16-17. Hewisa wangandrö möi fanoloda ba ’wokalaisi si lö sökhi faoma si sökhi’? (Roma 12:21)

¹⁶ Baso Roma 12:21. Iʼamenesi ndra niha Keriso Faulo enaʼö ’lakalaisi zi lö sökhi faoma si sökhi’. Ba Huhuonia ba Hili, imane Yesu, ”Böi tebulö miʼomasiʼö zi faʼudu khömi, ba  miʼohe ba wangandrö niha samakao yaʼami.” (Mat. 5:44) Daʼö nifalua Yesu. Laʼailasi ba labunu ia ba lala safökhö, laʼosö ia ira saradadu Romawi ba döla geu. Lö taʼila takhalaigö hewisa waʼafökhö nirasoi Yesu!

¹⁷ Hewaʼae lafalua khönia zimane daʼö, lö tebulö irorogö waʼomasi ba faʼalöfaröinia khö Yehowa. Lö iʼelifi ndra saradadu andrö. Hizaʼi iʼohe ira ba wangandrö ba imane, ”He Ama, efaʼö khöra horöra, börö me lö laʼila hadia nifaluara.” (Luk. 23:34) Na mangandrö ita salahi niha samalua khöda si lö atulö, tola tarasoi waʼahono dödö ba lö fahöʼö ita khöra. Daʼö göi zanolo yaʼita enaʼö ifuli atulö lala wangera-ngerada ba wamaigi niha daʼö.

18. Hewisa wangandrö möi fanolo Alberto hegöi John ba wanaögö falöʼatulö?

¹⁸ Fangandrö möi fanolo dalifusöda si darua nitutunö moroi yawa ba wanaögö falöʼatulö salua khöra. Imane Alberto, ”Mangandrödo salahi ndra talifusö samalua khögu si lö atulö. Asese uʼandrö khö Yehowa enaʼö itolodo ba wangeheta fönu bakha ba dödögu.” Iadaʼa, no ifuli mangai halöwö Alberto ba lö faröi ia ba wamosumange Yehowa. Imane göi John, ”No hauga kali mangandrö ndraʼo salahi ndra talifusö sangafökhöiʼö tödögu. Fangandrö simane daʼö zanolo yaʼo enaʼö lö uhöna khögu mbao dödö, ba lö uhuku dalifusöda daʼö. Buania, urasoi waʼahono dödö.”

19. Hadia zi lö tebulö tafalua irugi gamozua götö daʼa? (1 Fetero 3:​8, 9)

¹⁹ Sagötö auri nasa ita ba gulidanö si lö sökhi andre, tola manö alua khöda walöʼatulö. Hizaʼi, gofu hadia zalua khöda, yalötebulö taʼandrö wanolo moroi khö Yehowa. Datahalö gangetula ba woloʼö duma-duma Yesu ba lö tebulö tafalua goi-goi Zura Niʼamoniʼö. Na tafalua daʼö, hasambalö ifahowuʼö ita Yehowa.—Baso 1 Fetero 3:​8, 9.