1. Hewisa dödö Waulo khö ndra enoni sohalöwö?

 MOGUNA sibai halöwö nifalua ndra enoni sohalöwö ba mbanua niha Keriso. Iʼameʼegö tödö sibai Faulo ndra talifusö si lö faröi andre. Duma-dumania, ba zurania khö ndra niha Keriso ba Wilifi, ifatunö khöra wa ifanandrösa zura daʼö tenga ha khö ndra satua sokubaloi, hizaʼi khö ndra enoni göi.—Fil. 1:1.

2. Hewisa dödö Luis ba halöwö nitemania tobali enoni sohalöwö?

² Ato ndra talifusöda si no tebayagö idanö, sawuyu-wuyu mazui si no alawa döfi, omuso sibai dödöra wangai halöwö tobali enoni sohalöwö. Duma-dumania, mufataro Devan tobali enoni me 18 fakhe ndröfinia, ba Luis me no töra 50 fakhe ndröfinia. Imane Luis, ”Uʼandrö sibai saohagölö me tola mangai halöwö ndraʼo salahi ndra talifusö tobali enoni sohalöwö, töra-töra börö me no oya laforomaʼö waʼomasi sebua khögu.” Ato ndra enoni sohalöwö zorasoi simane daʼö.

3. Hadia wanofu-nofu nitutunöda?

³ Yaʼami ira talifusöma ira matua si no tebayagö idanö, na lö nasa si tobali enoni ami, hadia tola mibaliʼö ohitö dödömi daʼö? Hadia zamarou tödömi ba wangai halöwö tobali enoni? Hadia manö niʼandrö Zura Niʼamoniʼö enaʼö sinangea ami wamalua halöwö daʼö? Tatutunö wanema linia ba artikel daʼa. Hizaʼi si oföna, datatutunö hadia manö halöwö nifalua ndra enoni sohalöwö.

 HADIA MANÖ HALÖWÖ NIFALUA NDRA ENONI SOHALÖWÖ?

4. Hadia manö halöwö nifalua ndra enoni sohalöwö? (Faigi göi gambara.)

⁴ Enoni sohalöwö yaʼia daʼö talifusö ira matua si no tebayagö idanö nifataro geheha niʼamoniʼö ba wanolo ira satua sokubaloi ba wamalua ngawalö halöwö si tohude ba mbanua niha Keriso. So zombagi daerah dinas hegöi publikasi niʼogunaʼö ba wanuriaigö. So zanolo ba wangehaogö hegöi ba wondrorogö Nahia Gangowuloa. So zi tobali tata tertib mazui operator audio/video. Hizaʼi, sabölö tohude, yaʼira andrö niha saro ba wamati. Laʼomasiʼö Yehowa ba lafaudugö waʼaurira moloʼö goi-goinia satulö. Laʼomasiʼö sibai göi ndra talifusöra si sara lala wamati. (Mat. 22:​37-39) Börö daʼö, hewisa enaʼö tola tobali enoni sohalöwö zi samösa talifusöda ira matua si no tebayagö idanö?

5. Hadia zinangea ifalua talifusöda ira matua enaʼö tobali ia enoni sohalöwö?

⁵ Ifatunö khöda Sura Niʼamoniʼö hadia manö niʼandrö khö zi samösa talifusöda somasi tobali enoni sohalöwö. (1 Ti. 3:​8-10, 12, 13) Fahaʼö ndraʼugö ba niʼandrö Zura Niʼamoniʼö andrö, ba forege wamalua daʼö fefu. Hizaʼi fatua lö daʼö, moguna ötatugöi wa atulö gohitö dödöu ba wogamö ohitö dödö andrö.

HANA WA OMASI NDRAʼUGÖ TOBALI ENONI?

6. Hadia zatulönia gohitö dödöda ba wangai halöwö salahi ndra talifusöda? (Mataiʼo 20:28; faigi göi gambara.)

⁶ Duma-duma fondrege zebua khöda yaʼia daʼö Yesu Keriso, ifalua fefu hadia ia börö waʼomasinia khö Namania hegöi ba niha böʼö. Faʼomasi andrö zamarou yaʼia enaʼö iforege wohalöwö ba ifalua halöwö si lö eluaha ba wamaigi niha sato. (Baso Mataiʼo 20:28; Yoh. 13:​5, 14, 15) Hasambalö ifahowuʼö ndraʼugö Yehowa ba itoloʼö wogamö ohitö dödö tobali enoni sohalöwö na teʼodane-dane daʼö börö waʼomasi.—1 Ko. 16:14; 1 Fe. 5:5.

7. Hana wa tebai tobali enoni niha somasi nizuno-zuno?

⁷ Ba gulidanö daʼa, lahöni-höni sibai niha samorege enaʼö tohude ia moroi ba danö böʼö. Hizaʼi, tenga simane daʼö organisasi Yehowa. Simane Yesu, ira talifusöda ira matua sangai halöwö börö waʼomasi, lö lagohi döi mazui kuaso ba lö omasi ira lafatörö niha böʼö.  Na lafataro niha simane daʼö ba mbanua niha Keriso, tola manö lö ibabaya halöwö si gide-ide sinangea mufalua salahi mbiri-biri Yehowa sebua böli. Ba wamaiginia, tenga sinangea ibabaya halöwö daʼö. (Yoh. 10:12) Lö ifahowuʼö Yehowa fefu wamorege nifalua niha sasiliyawa mazui somasi molohi töi.—1 Ko. 10:​24, 33; 13:​4, 5.

8. Hadia mene-mene nibeʼe Yesu khö ndra sinengenia?

⁸ Itaria, laforege göi ira si fahuwu khö Yesu ba wangokhögö halöwö si tohude, hizaʼi fasala gohitö dödöra. Duma-dumania, darua zinengenia sotöi Yakobo hegöi Yohane, no irai laʼandrö khö Yesu enaʼö ibeʼe khöra dadaoma si tohude ba Wamatörönia. Lö omasi Yesu gangandröwara andrö. Imane khö ndra sinengenia si 12, ”Haniha zomasi ebua ba gotaluami, yatobali ia enonimi ba haniha zomasi tobali siföföna, yatobali ia sawuyumi.” (Mrk. 10:​35-37, 43, 44) Yaʼami ira talifusöma ira matua, hasambalö tobali ami howu-howu ba mbanua niha Keriso na atulö gohitö dödömi, yaʼia daʼö ba wangai halöwö salahi niha böʼö.—1 Te. 2:8.

HEWISA ENAʼÖ ÖʼOKHÖGÖ GOHITÖ DÖDÖ BA WANGAI HALÖWÖ?

9. Hewisa na lö khöu faʼedöna tobali enoni sohalöwö?

⁹ Tatu manö öʼomasiʼö Yehowa ba omasiʼö mangai halöwö salahi niha böʼö. Hizaʼi, te lö khöu faʼedöna ba wamalua halöwö ndra enoni sohalöwö. Hadia zi tola manolo yaʼugö? Angeragö waʼomuso dödö nirasoimö na mangai halöwö ndraʼugö salahi ndra talifusöda. Imane Yesu, ”Ohahau dödö ba wameʼe moroi ba wanema.” (Hal. 20:35) No irasoi waʼomuso dödö sebua Yesu me mangai halöwö ia salahi niha böʼö. Tola göi örasoi zimane daʼö.

10. Hewisa wangoromaʼö Yesu faʼomuso dödö ba wangai halöwö salahi niha böʼö? (Mrk. 6:​31-34)

¹⁰ Nehegö duma-duma Yesu andre. (Baso Mareko 6:​31-34.) Samuza inötö, marase sibai ia hegöi ira sinengenia. Andrö wa lahalö gangetula weʼamöi ba nahia si lö niha-niha enaʼö molombase ira. Hizaʼi, no oföna larugi nahia daʼö niha sato börö me omasi ira lafondrondrongo wamahaʼö Yesu. Sindruhunia, tola manö ifofanö ira Yesu. Mendrua manö, ba zi maʼökhö daʼö, Yesu hegöi ira sinengenia ”lö saʼae inötöra wemanga”. Mazui tola manö ha sambua mazui dombua ngawalö yaʼi ifahaʼö ira Yesu, ba aefa daʼö ifofanö ira. Hizaʼi, börö waʼomasinia, ”oya ifahaʼö ira” irege ”arakhagö bongi”. (Mrk. 6:35) Ifalua daʼö tenga börö me nifaso, hizaʼi börö me ”ahakhö dödönia” ira. Omasi Yesu wamahaʼö yaʼira börö me iʼomasiʼö ira. Ba daʼa taʼila wa isöndra waʼomuso dödö sebua Yesu me mangai halöwö ia salahi niha böʼö.

11. Hadia nasa lala tanö böʼö nifalua Yesu ba wangai halöwö salahi niha böʼö? (Faigi göi gambara.)

¹¹ Tenga ha ifahaʼö ndra niha sato andrö Yesu, hizaʼi ibönökhi göi zoguna khöra ba mboto. Ifalua dandra sahöli-höli dödö enaʼö so göra, ba iʼandrö khö ndra nifahaʼönia enaʼö labagi daʼö. (Mrk. 6:41) Me ifalua daʼö, ibeʼe wamahaʼö khö ndra nifahaʼönia hewisa lala ba wangai halöwö salahi niha böʼö. Iforomaʼö göi wa tohude sibai halöwö simane daʼö, nifalua ndra enoni iadaʼa. Khalaigö hawaʼomuso dödö ndra sinenge me falulu fohalöwö ira khö Yesu ba wombagi gö ”irege abuso” fefu niha! (Mrk. 6:42) Tatu manö, tenga ha sakali daʼa iʼofönaiʼö zoguna ba niha böʼö Yesu. Sandrohu faʼaurinia me so ia ba gulidanö, lö tebulö mangai halöwö ia salahi niha böʼö. (Mat. 4:23; 8:16) Tobali umbu waʼomuso dödö sebua khö Yesu halöwö nifaluania ba wamahaʼö hegöi ba wombönökhi soguna ba niha böʼö. Tatu göi örasoi zimane daʼö na omasiʼö mangai halöwö salahi niha böʼö tobali enoni.

12. Hana wa lö moguna ide-ide dödöda na tarasoi wa lö hadöi nekhe-nekhe dangada?

 ¹² Böi ide-ide dödömö na örasoi wa lö hadöi nekhe-nekhe dangamö. Tatu manö so mbua-bua mazui amuatamö si sökhi si tola moguna ba mbanua niha Keriso. Baso atö nisura ba 1 Korindro 12:​12-30. Itutunö Faulo wa fefu nono mbanua Yehowa, farahu ndraʼugö ba daʼö, ebua sibai mbölira ba so halöwö si tohude si tola lafalua ba mbanua niha Keriso. Angerönusi wehede daʼö ba angandrö khö Yehowa. Na tebai nasa tobali enoni ndraʼugö iadaʼa, böi afatö dödöu. Falua fefu zi tola öfalua ba wangai halöwö khö Yehowa hegöi salahi ndra talifusöda. Yafaduhu dödöu, lafaigi-faigi zi tola öfalua ira satua sokubaloi ba hasambalö labeʼe khöu halöwö si tefaudu.—Rom. 12:​4-8.

13. Arakhagö fefu niʼandrö Zura Niʼamoniʼö khö ndra talifusöda sangai halöwö, sabölö oyania haʼökhö moguna daʼö?

¹³ Hadia abua khöu wamalua niʼandrö Zura Niʼamoniʼö khö ndra enoni? Na simanö, angeragö daʼa: Sindruhunia, arakhagö fefu niʼandrö Zura Niʼamoniʼö andrö moguna ia ba niha Keriso maʼafefu. Börö daʼö, te no oya zi no öfalua moroi ba gotaluania. Duma-dumania, fefu ita lö tola löʼö fahuwu ita khö Yehowa, mamuala ita si fao faʼomuso dödö ba taʼoʼö goi-goi Yehowa. Na simanö, hadia nasa zinangea öʼodödögö wamalua enaʼö tobali ndraʼugö enoni?

HADIA ZINANGEA ÖFOREGE?

14. Hadia geluahania ira enoni sohalöwö andrö ”sangodödögö fohalöwö”? (1 Timoteo 3:​8-10, 12)

¹⁴ Datatutunö hadia manö niʼandrö Zura Niʼamoniʼö nisura ba 1 Timoteo 3:​8-10, 12. (Baso.) Samösa enoni enaʼö ”sangodödögö fohalöwö”. Tola göi mufoʼeluaha ngawua wehede daʼö ”sinangea mufosumange”, ”solakhömi” mazui ”nifosumange”. Tenga daʼö geluahania wa tebai maʼiki mazui fawude ndraʼugö. (Sango. 3:​1, 4) Hizaʼi, eluahania moguna öfalua fefu noro dödö nibeʼe khömö. Na laʼila ira talifusöda wa tola muʼodaligö ndraʼugö, hasambalö lafosumange ndraʼugö ba mbanua niha Keriso.

15. Hadia geluahania ”böi si dua lela” ba ”lö fakhögusa ba wangalui hare si lö atulö”?

¹⁵ Ngawua wehede ”böi si dua lela”, eluahania manörö sindruhu, lö fawini tödö ba tola mufaduhusi tödö. Öfalua fefu zi no öfabuʼu ba lö ölimo niha böʼö. (Amd. 3:32) Fehede ”lö fakhögusa ba wangalui hare si lö atulö”,  eluahania lö tebulö manörö sindruhu ba halöwö mazui ba gefe. Lö öʼogunaʼö wahuwusau khö ndra talifusö si sara lala wamati ba wangalui hare.

16. Hadia geluahania (a) ”tenga samadu-madu tuo”? (b) ”tödö side-ide si lö sinegu”?

¹⁶ Ngawua wehede ”tenga samadu-madu tuo” eluahania lö talafo oya öbadu duo mazui tehöngö ndraʼugö wa niha samadu-madu tuo. Mangokhögö ”tödö side-ide si lö sinegu” eluahania öfaudugö waʼaurimö ba goi-goi Yehowa. Hewaʼae lö moʼahonoa ndraʼugö, tola örasoi waʼahono dödö börö me öʼokhögö wahuwusa si sökhi khö Lowalangi.

17. Hadia geluahania ”mutandraigö ira ua sakali na sinangea”? (1 Timoteo 3:10; faigi göi gambara.)

¹⁷ Ngawua wehede ”mutandraigö ira ua sakali na sinangea” eluahania tola mufaduhusi tödö mazui muʼodaligö. Börö daʼö, na ötema halöwö moroi khö ndra satua sokubaloi, haogö woloʼö fanuturu lala nibeʼera hegöi goi-goi nibeʼe organisasi. Forege enaʼö aboto ba dödöu hadia niʼohalöwögöigömö ba hawaʼara tola öʼasiwai daʼö. Na owölö-ölö ndraʼugö wamalua fefu halöwömö, laʼila ira talifusöda ba mbanua niha Keriso wa no itugu tedou ndraʼugö ba wamati. Yaʼami ira satua sokubaloi, böi olifu ami wamahaʼö ira talifusöda ira matua si no tebayagö idanö. (Baso 1 Timoteo 3:10.) Hadia so ndra talifusöda ira matua sawuyu-wuyu sawena 10 irugi 14 fakhe si no tebayagö idanö ba mbanua niha Keriso? Hadia lafalua wamahaʼö samösa ba Zura Niʼamoniʼö? Hadia asese labeʼe mbua gera-erara ba gangowuloa ba möi ira manuriaigö? Na simanö, beʼe khöra halöwö si tefaudu moloʼö döfi hegöi faʼabölöra. Na mifalua daʼö, tola ”mutandraigö ira ua sakali na sinangea”. Na no irugi 17 ofeta 19 fakhe ndröfira, te tola saʼae mangai halöwö ira tobali enoni sohalöwö.

18. Hadia geluahania ”lö hadöi niböbögö khöra”?

¹⁸ Ngawua wehede ”lö hadöi niböbögö khöra” eluahania lö hadöi si tobali dane-dane ba wamöbögö khöra wa no lafalua zala sebua. Sindruhu sa, tola manö so niböbögö khö ndra niha Keriso. No irai alua daʼö khö Yesu, ba no göi ifaʼeleʼö wa hasambalö alua zimane daʼö khö ndra nifahaʼönia. (Yoh. 15:20) Hizaʼi, na öʼoʼö Yesu ba örorogö enaʼö lö raʼiö ndraʼugö ba gamuata, hasambalö öʼokhögö döi si sökhi ba mbanua niha Keriso.—Mat. 11:19.

19. Hadia geluahania ”böi samodombua donga”?

 ¹⁹ ”Böi samodombua donga.” Na no mangowalu ndraʼugö, moguna öʼoʼö goi-goi Yehowa sanandrösa ba wangowalu si no ihonogöi iʼotarai ba wamobörö, yaʼia daʼö samösa ndra matua ba samösa ndra alawe. (Mat. 19:​3-9) Tebai ifalua gamuata fohorö si samösa talifusöda ira matua. (Heb. 13:4) Hizaʼi, tenga ha daʼö manö. Örorogö göi waʼalöfaröimö khö woʼomomö ba lö öforomaʼö waʼomasi si tenga sinangea khö ndra alawe böʼö.—Yob. 31:1.

20. Hewisa zi samösa ira matua tola ’idöniaʼö nösi nomonia ba zi sökhi’?

²⁰ ”Sondröniaʼö iraononia hegöi ösi nomonia ba zi sökhi.” Na samösa högö yomo ba nomo ndraʼugö, moguna öʼodödögö wamalua noro dödömö andrö. Döniaʼö wamalua famahaʼö ba zi sambua omo, aseseʼö fao manuriaigö ba nösi nomomö ero-ero samösa, ba ötolo ndraonomö enaʼö tobali ira si fahuwu khö Yehowa. (Ef. 6:4) Ira matua sangila mondrorogö ösi nomonia, daʼö dandra wa tola göi irorogö mbanua niha Keriso.—Baso göi 1 Timoteo 3:5.

21. Na lö nasa si tobali ndraʼugö enoni sohalöwö, hadia zinangea öfalua?

²¹ Yaʼami ira talifusöma ira matua, na lö nasa si tobali ami enoni sohalöwö, maʼandrö khömi enaʼö miʼangerönusi nitutunö ba artikel daʼa ba miʼohe daʼö ba wangandrö khö Yehowa. Fahaʼö ndraʼugö ba niʼandrö Zura Niʼamoniʼö andrö, ba forege wamalua. Angeragö hawaʼebua waʼomasimö khö Yehowa hegöi khö ndra talifusö si sara lala wamati. Douʼö waʼomasimö ba wangai halöwö salahira. (1 Fe. 4:​8, 10) Rasoi göi waʼomuso dödö sebua nitemamö ba wangai halöwö salahi nösi nomomö ba wamati. Yafahöna howu-howu nitemamö moroi khö Yehowa ba wamorege si no öfalua tobali enoni sohalöwö!—Fil. 2:13.