1-2. Hadia ”halöwö si sökhi” nifalua ndra satua sokubaloi?

 NA NO mangai halöwö ndraʼugö tobali enoni, te no öforege wamalua hadia manö niʼandrö Zura Niʼamoniʼö khö ndra satua sokubaloi. Hadia omasiʼö wangai ”halöwö si sökhi” andrö?—1 Ti. 3:1.

² Hadia manö halöwö nifalua zatua sokubaloi? Idöniaʼö halöwö fanuriaigö, iforege wamalua halöwö fokubaloi hegöi famahaʼö, ba iʼaroʼö mbanua niha Keriso moroi ba wehede hegöi nifaluania. Börö waʼerege dödö si no lafalua, andrö wa ifotöi ira Sura Niʼamoniʼö ”buala ba niha”.—Ef. 4:8.

3. Hewisa enaʼö tobali satua sokubaloi zi samösa talifusöda ira matua? (1 Timoteo 3:​1-7; Tito 1:​5-9)

³ Hewisa enaʼö tobali ndraʼugö satua sokubaloi? Niʼandrö khö zi samösa satua sokubaloi faböʼö moroi ba niʼandrö khö zi samösa sangalui halöwö. Sasesenia, enaʼö ösöndra halöwö, moguna öʼokhögö nekhe-nekhe danga somasi kafalomö wohalöwö. Hizaʼi, tenga simane daʼö na tobali satua sokubaloi. Tenga ha faʼonekhe ba wanuriaigö mazui mamahaʼö zinangea öforege. Moguna göi öforege wamalua fefu niʼandrö khö zatua sokubaloi nisura ba 1 Timoteo 3:​1-7 hegöi Tito 1:​5-9. (Baso.) Ba artikel daʼa, tatutunö tölu ngawalö niʼandrö khö ndra satua sokubaloi: Mangokhögö töi si sökhi bakha hegöi baero mbanua niha Keriso, tobali ira duma-duma si sökhi ba wondröniaʼö ösi nomora, ba aoha gölöra wangai halöwö ba mbanua niha Keriso.

 MANGOKHÖGÖ TÖI SI SÖKHI

4. Hadia geluahania ”lö mosinegu”?

⁴ Enaʼö tola tobali satua sokubaloi, forege enaʼö ”lö mosinegu” ndraʼugö. Eluahania, öʼokhögö döi si sökhi ba mbanua niha Keriso börö gamuatamö si sökhi. Baero daʼö, moguna göi ’sökhi duriamö baero mbanua niha Keriso’. Tatu manö, so niha si lö mamosumange Yehowa sanandrawaisi nifaduhusimö tödö, hizaʼi lö si tobali dane-dane khöra ba wanandrawaisi amuatamö si sökhi ba si lö falimosa. (Dan. 6:​4, 5) Börö daʼö, sofu khöu samösa, ’Hadia uʼokhögö döi si sökhi bakha hegöi baero mbanua niha Keriso?’

5. Hewisa wangoromaʼömö wa yaʼugö niha ”sangomasiʼö si sökhi”?

⁵ Na yaʼugö niha ”sangomasiʼö si sökhi”, tatu öʼalui gamuata si sökhi niʼokhögö niha böʼö ba ösuno ira. Omasiʼö göi wamalua si sökhi ba niha böʼö, töra moroi ba nitötönara. (1 Te. 2:8) Hana wa moguna sibai laʼokhögö gamuata daʼa ira satua sokubaloi? Börö me daʼö zanolo yaʼira ba wangogunaʼö inötöra ba wokubaloi hegöi ba wamalua halöwö tanö böʼö. (1 Fe. 5:​1-3) Faʼomuso dödö nirasoira ba wangai halöwö salahi niha böʼö, abölö ebua moroi ba ngawalö zi no latehegö.—Hal. 20:35.

6. Hadia lala si tola ifalua si samösa niha ba wangoromaʼö wa ’lö abua gölönia wanemaʼö tome’? (Heberaiʼo 13:​2, 16; faigi göi gambara.)

⁶ No öforomaʼö wa ’lö abua gölöu wanemaʼö tome’ na öfalua zi sökhi ba niha böʼö, farahu ba daʼö niha si lö ahatö khömö. (1 Fe. 4:9) So sambua kamus Zura Niʼamoniʼö sanutunö wa ira matua si lö abua gölö wanemaʼö tome yaʼia daʼö ”niha samokai bawandruhö nomonia hegöi tödönia ba wanemaʼö niha si lö faʼila khönia”. Sofu khöu samösa, ’Hadia laʼila wa yaʼodo andre niha somasi manema tome?’ (Baso Heberaiʼo 13:​2, 16, hegöi nisura ba gahe zura.) Niha simane daʼö omasi ia mamuala, duma-dumania khö ndra talifusöda si lö ebua okhöta ba samorege fohalöwö, simane ira satua samasui mazui samaʼema huhuo moroi ba mbanua niha Keriso tanö böʼö.—1 Mo. 18:​2-8; Amd. 3:27; Luk. 14:​13, 14; Hal. 16:15; Rom. 12:13.

7. Hadia geluahania ”tenga sangomasiʼö kefe”?

⁷ ”Tenga sangomasiʼö kefe.” Niha si lö mangomasiʼö kefe yaʼia daʼö niha si lö mangosambuaʼö tödönia ba gokhöta. Hewaʼae na kayo  ndraʼugö mazui numana, moguna öʼofönaiʼö wangalui Famatörö Lowalangi ba waʼaurimö. (Mat. 6:33) Ogunaʼö ginötömö, faʼabölömö hegöi okhötamö ba wamosumange Yehowa, ba wondrorogö ösi nomomö hegöi ba wangai halöwö ba mbanua niha Keriso. (Mat. 6:24; 1 Yo. 2:​15-17) Sofu khöu samösa, ’Hewisa dödögu sanandrösa ba gefe? Hadia ahono dödögu ba zi no so? Mazui hadia uʼosambuaʼö dödögu ba wangalui kefe hegöi okhöta sebua?’—1 Ti. 6:​6, 17-19.

8. Hewisa wangoromaʼömö wa ’öʼila öfatörö waʼaurimö’ ba ’so khöu wanaha tödö’?

⁸ Na ’öʼila öfatörö waʼaurimö’ ba ’so khöu wanaha tödö’, tola öʼokhögö wangera-ngera satulö ba ngawalö nifaluamö ba waʼauri. Duma-dumania sanandrösa ba wemanga-manga, famadu-madu, fonukha, fangehao mboto hegöi rekreasi. Lö göi öʼoʼö lala waʼauri niha si lö mamosumange Yehowa. (Luk. 21:34; Yak. 4:4) Lö ösulöni hewaʼae lafalua khöu zi lö sökhi. Tenga göi ”samadu-madu tuo” ndraʼugö, mazui tehöngö wa yaʼugö niha soya mamadu tuo. Sofu khöu samösa, ’Hadia oroma moroi ba lala waʼaurigu wa yaʼodo andre niha sangila mamatörö faʼaurigu ba so khögu wanaha tödö?’

9. Hadia geluahania mangokhögö ’fangera-ngera si sökhi’ hegöi ’faʼahono’?

⁹ Na öʼokhögö ’wangera-ngera si sökhi’, tatu manö öhaogö woʼangeragö goi-goi Zura Niʼamoniʼö ba ngawalö hadia ia, irege atulö lala wangera-ngeramö ba öʼila hadia zinangea öfalua. Fatua lö öhalö gangetula, moguna öʼila fefu hadia zindruhunia zalua. (Amd. 18:13) Na öfalua daʼö, tola öhalö gangetula si tefaudu ba lala wangera-ngera Yehowa. Na so khöu ’waʼahono’, tobali ndraʼugö niha si toföfö ba si tefaudu inötö. Laʼila ira talifusöda wa yaʼugö niha si tola muʼodaligö ba soloʼö fanuturu lala. Na öforege wamalua fefu zi no tatutunö andre, daʼö zanolo yaʼugö ba wangokhögö töi si sökhi. Iadaʼa, datatutunö hadia nasa niʼandrö Zura Niʼamoniʼö, yaʼia daʼö enaʼö tobali duma-duma si sökhi ba wondröniaʼö ösi nomo.

TOBALI DUMA-DUMA SI SÖKHI BA WONDRÖNIAʼÖ ÖSI NOMO

10. Hewisa zi samösa ira matua ba ’wondröniaʼö ösi nomonia ba zi sökhi’?

¹⁰ Na samösa foʼomo ira matua ndraʼugö ba omasiʼö tobali satua sokubaloi, moguna göi sökhi duria nösi nomomö. Baero daʼö, haogö ’wondröniaʼö ösi nomomö ba zi sökhi’. Eluahania, moguna tobali ndraʼugö högö yomo ba nomo safönu faʼomasi ba sangai angetula si sökhi. Ödöniaʼö ira wamalua fefu halöwö ba wamati. Hana wa moguna sibai daʼa? Imane sinenge sotöi Faulo, ”Na so ndra matua si lö mangila mondröniaʼö ösi nomonia samösa, hewisa wa tola irorogö nono mbanua Lowalangi?”—1 Ti. 3:5.

11-12. Na omasi tobali satua sokubaloi zi samösa niha, hana wa moguna sökhi gamuata ndraononia? (Faigi göi gambara.)

¹¹ Na yaʼugö samösa ama, ba so nasa ndraonomö si lö ikhamö 18 fakhe, no sinangea öfomaha ira enaʼö tobali ”iraono soloʼö-loʼö ba si sökhi amuata”. Moguna öfahaʼö ira si fao faʼomasi. Tatu manö, omasi ira famai-mai ba lalau maʼiki-iki simane iraono tanö böʼö. Hewaʼae simanö, moguna öfahaʼö ira enaʼö so khöra woloʼö, lafosumange niha böʼö ba sökhi göi gamuatara. Baero daʼö, forege enaʼö itugu aro gamakhaitara khö Yehowa, lafaudugö waʼaurira ba goi-goi Zura Niʼamoniʼö ba lahalö gangetula irege tebayagö ira idanö.

¹² ”Mamati fefu ndraononia, laʼoʼö li zatuara ba lö hadöi si lö sökhi niböbögö khöra.” Hadia lua-luania khö zi samösa ama na so nononia si sara lala wamati samalua horö sebua? Na lö nifahaʼönia ononia andrö ba lö nibeʼenia wotu, tola manö tebai tobali ia satua sokubaloi. —Faigi Menara Pengawal 15 Mbaŵa si Fulu 1996, ngaʼörö 21, ngenoli 6-7.

MANGAI HALÖWÖ BA MBANUA NIHA KERISO

13. Hewisa wangoromaʼö zi samösa niha wa ”lö fatandro” ia ba ”lö ifalua manö zomasi dödönia”?

¹³ Ira talifusöda ira matua sangokhögö bua-bua si sökhi, no okhöta sebua böli daʼö ba mbanua niha Keriso. Ira matua si ”lö fatandro”, iforege wolohi faʼatulö ba niha böʼö. Ifondrondrongo göi niwaʼö niha böʼö ba iforege enaʼö aboto ba dödönia lala wangera-ngerara. Duma-dumania, na mufalua rafe ba so gangetula sambö tefaudu ba dödöu, hadia ötuhini gangetula si no lahalö ira satua sokubaloi tanö böʼö na lö hadöi goi-goi Zura Niʼamoniʼö nisawöra? Ngawua wehede ”lö ifalua manö zomasi dödönia”, eluahania lö fatandro ndraʼugö enaʼö laʼoʼö fefu niwaʼömö. Öʼila wa moguna öʼameʼegö tödö mbua gera-era niha böʼö. (1 Mo. 13:​8, 9; Amd. 15:22) Forege göi enaʼö ”lö alio mofönu” ndraʼugö ba ”tenga si fakara-kara” manö. Eluahania, lö mofönu-fönu mazui fabuʼa-buʼa ndraʼugö, hizaʼi öhaogö-haogö manö wehede ba öʼila ötöfaigö ba dödöu nirasoi niha böʼö. Baero daʼö, odödögö göi wolohi faʼatulö ba niha böʼö hewaʼae itugu lö sökhi zalua. (Yak. 3:​17, 18) Na öhaogö-haogö wehede, tola möi fangalösi wönu daʼö, mendrua manö ba niha sanandrawaisi nifaduhusimö tödö.—Sangu. 8:​1-3; Amd. 20:3; 25:15; Mat. 5:​23, 24.

14. Hadia geluahania ”tenga sawena mubayagö idanö” hegöi ”lö faröi”?

¹⁴ Talifusöda ira matua sedöna tobali satua sokubaloi enaʼö ”tenga sawena mubayagö idanö”. Tenga göi daʼö geluahania wa moguna no ara tebayagö ndraʼugö idanö. Sabölö tohude no tobali ndraʼugö niha Keriso saro ba wamati. Fatua lö lafataro ndraʼugö tobali satua sokubaloi, moguna öʼoʼö duma-duma Yesu, so khöu wangide-ngideʼö ba öbaloi ginötö irege ibeʼe khöu halöwö daʼö Yehowa. (Mat. 20:23; Fil. 2:​5-8) No öforomaʼö wa ”lö faröi” ndraʼugö yaʼia na lö öröi Yehowa hegöi goi-goinia satulö, ba öʼoʼö wanuturu lala nibeʼe organisasinia.—1 Ti. 4:15.

15. Hadia moguna onekhe mamaʼema huhuo fefu ndra satua sokubaloi? Tutunö.

 ¹⁵ No ihaogö wamatunö khöda Sura Niʼamoniʼö wa moguna ”onekhe mamahaʼö” niha si tobali sondröniaʼö. Hadia daʼö geluahania wa lö tola löʼö onekhe ndraʼugö wamaʼema huhuo? Tenga. Ato ndra satua sokubaloi, lö onekhe ira wamaʼema huhuo, hizaʼi onekhe ira wanutunö Sura Niʼamoniʼö na manuriaigö hegöi ba wamalua halöwö fokubaloi. (Baso göi 1 Korindro 12:​28, 29 hegöi Efeso 4:11.) Hewaʼae simanö, moguna göi ödouʼö nasa ndraʼugö enaʼö itugu onekhe ba wamahaʼö niha. Hadia zinangea öfalua?

16. Hewisa enaʼö tobali ndraʼugö samahaʼö si sökhi? (Faigi göi gambara.)

¹⁶ ”Lö faröi ia ba daromali si tola mufaduhusi tödö.” Enaʼö tobali ndraʼugö samahaʼö si sökhi, moguna öfodane-dane fefu wamahaʼö hegöi mene-mene nibeʼemö moroi ba Zura Niʼamoniʼö. Enaʼö tola öfalua daʼö, moguna öhaogö wamahaʼö yaʼugö ba Zura Niʼamoniʼö hegöi publikasida. (Amd. 15:28; 16:23; Tit. 1:9.) Sagötö öfahaʼö ndraʼugö, nehegö hewisa wanutunö publikasida sanandrösa ba ayati nibasomö enaʼö öʼila öfalua ia ba lala satulö. Baero daʼö, ba ginötö öfaʼema wamahaʼö, forege enaʼö tofakha daʼö ba dödö niha samondrongo huhuomö. Tola manofu ndraʼugö mazui öʼandrö wanuturu lala khö ndra satua sokubaloi si no ara mangai halöwö. (1 Ti. 5:17) Ira satua sokubaloi, moguna ’lafarou dödö’ ndra talifusöra, ba itaria labeʼe mene-mene hegöi ’degu-tegu’. Hizaʼi, lafalua ia si fao faʼasökhi dödö. Na öhaogö-haogö wamaʼema niwaʼömö si fao faʼomasi, ba öfodane-dane daʼö moroi ba Daromali Lowalangi, no tobali ndraʼugö samahaʼö si sökhi börö me no öʼoʼö Zamahaʼö Sebua sotöi Yesu Keriso.—Mat. 11:​28-30; 2 Ti. 2:24.

BÖI BÖHÖLI WOGAMÖ OHITÖ DÖDÖMÖ

17. (a) Hadia zanolo ndra enoni sohalöwö enaʼö lö laböhöli wogamö ohitö dödöra? (b) Hadia zinangea latörö tödöra ira satua sokubaloi ba ginötö lanehe-nehegö ndra talifusö sedöna tobali satua sokubaloi? (Faigi kotak ” Yaso Khöu Wangide-ngideʼö ba Ginötö Önehe-nehegö Niha Böʼö”.)

¹⁷ Me no aefa tatutunö hadia manö niʼandrö  Zura Niʼamoniʼö ba niha somasi tobali satua sokubaloi, tola manö so ndra enoni sangumaʼö tödönia wa tebai ikhamö wamalua halöwö daʼö. Hizaʼi, törö tödöu wa lö iʼandrö Yehowa hegöi organisasinia enaʼö moʼahonoa wamaluamö fefu daʼö. (1 Fe. 2:21) Hasambalö itolo ndraʼugö eheha Yehowa enaʼö tola öfalua ia. (Fil. 2:13) Hadia so zomasiʼö ödouʼö nasa wamalua? Na simanö, ohe daʼö ba wangandrö khö Yehowa, falua riset, ba andrö wanuturu lala khö zi samösa satua sokubaloi.

18. Hadia zinangea lafalua ira talifusöda si no tobali enoni?

¹⁸ Yaʼami ira talifusö ira matua, farahu ba daʼö ndra satua sokubaloi, midouʼö ami wamalua fefu niʼandrö Zura Niʼamoniʼö si no tatutunö ba artikel daʼa. (Fil. 3:16) Hadia samösa enoni sohalöwö ndraʼugö? Forege enaʼö tedou ndraʼugö ba wamati! Andrö khö Yehowa enaʼö ifahaʼö ndraʼugö irege itugu moguna nasa ndraʼugö ba wangai halöwö khönia hegöi ba mbanua niha Keriso. (Yes. 64:8) Hasambalö ifahowuʼö Yehowa wamorege nifaluamö ba wamalua fefu niʼandrö Zura Niʼamoniʼö enaʼö tola tobali ndraʼugö satua sokubaloi.