1. Hadia manö zindruhu niʼilamö me awena öfahaʼö ndraʼugö ba Zura Niʼamoniʼö?

 HADIA itörö tödömö me awena öfahaʼö ndraʼugö ba Zura Niʼamoniʼö? Te tokea ndraʼugö me öʼila wa so döi Lowalangi. Ösöndra waʼahono dödö me öʼila wa lö ifakao niha Lowalangi ba galitö narako. Tatu omuso dödömö me öʼila wa ba zi so miföna tola ifuli falukha ndraʼugö ba nösi nomou hegöi si fahuwu khöu si no mate ba fao ami ba gulidanö faradaiso.

2. Me no öfahaʼö ndraʼugö ba zindruhu si so ba Zura Niʼamoniʼö, hadia manö nasa zinangea ödouʼö ndraʼugö? (Efeso 5:1, 2)

² Me no oya öfahaʼö ndraʼugö ba zindruhu moroi ba Zura Niʼamoniʼö, itugu tedou waʼomasimö khö Yehowa. Börö me öʼomasiʼö Yehowa, terou dödöu ba wamalua si no öfahaʼö yaʼugö. Tola öhalö gangetula si sökhi ba si tefaudu moloʼö goi-goi Zura Niʼamoniʼö. Börö me omasi ndraʼugö ba wangomusoiʼö tödö Lowalangi, andrö wa öbulöʼö lala wangera-ngeramö hegöi amuatamö enaʼö itugu sökhi. Hulö simane iraono soloʼö satuania sebua faʼomasi, tola göi öʼoʼö Namada si so ba zorugo.—Baso Efeso 5:1, 2. 

3. Hadia manö wanofu-nofu si tola taʼangeragö?

³ Tola taʼangeragö wanofu-nofu andre: ’Hadia itugu tedou waʼomasigu khö Yehowa moroi me awena tebayagö ndraʼo idanö? Hadia itugu fakhili wangera-ngeragu hegöi amuatagu simane Yehowa, mendrua manö ba wangomasiʼö ira talifusö?’ Na tenga simane ba zilalö waʼomasimö khö Yehowa hegöi khö ndra talifusö, böi ide-ide dödömö. No irai alua daʼö ba niha Keriso me abad siföföna, ba omasi Yesu wanolo yaʼira ba ifalua göi  khöda zimane daʼö. (Fam. 2:4, 7) Aboto ba dödönia wa tola ifuli taʼokhögö waʼomasi saro khö Yehowa hegöi khö ndra talifusöda.

4. Hadia nitutunöda ba artikel daʼa?

⁴ Ba artikel daʼa, tatutunö dania hewisa enaʼö böi taböhöli wondrouʼö faʼomasida khö Yehowa hegöi ba niha böʼö. Tatutunö göi hadia mbua nitemada hegöi nitema niha böʼö na tafalua daʼö.

5-6. (a) Hadia manö waʼabasaki nitaögö zinenge sotöi Faulo me ifalua halöwö fanuriaigö? (b) Hadia mbörö wa lö iböhöli wamosumange Yehowa?

⁵ Owua-wua dödö Waulo ba halöwö fanuriaigö, hizaʼi oya göi waʼabasaki nitaögönia. Asese möi Waulo ba danö saröu ba lö aoha wamalua daʼö. Ba wofanönia, itaria ’falukha ia gametaʼuö ba nungo nidanö’ hegöi ”khö ndra sorabu”. Itaria göi laböbözi ia ira niha si fatiu tödö khönia. (2 Ko. 11:23-27) Baero daʼö, so ndra talifusö si lö mangila mangandrö saohagölö ba wamorege si no ifalua Faulo ba wanolo yaʼira.—2 Ko. 10:10; Fil. 4:15.

⁶ Hadia zanolo Faulo irege lö iböhöli wangai halöwö khö Yehowa? Moroi ba Mbuku Niʼamoniʼö hegöi salua khönia samösa, ifahaʼö ia sanandrösa ba gamuata Yehowa. Itugu faduhu dödö Waulo wa iʼomasiʼö ia Yehowa. (Rom. 8:38, 39; Ef. 2:4, 5) Andrö wa itugu iʼomasiʼö göi Yehowa. Iforomaʼö Faulo waʼomasinia khö Yehowa me ’mangai halöwö ia ba niha niʼamoniʼö ba lö iböhöli wamalua yaʼia’.—Heb. 6:10.

7. Hadia lala si tola tafalua ba wondrouʼö faʼomasida khö Yehowa?

⁷ Tola tadouʼö waʼomasida khö Lowalangi na tafahaʼö ita ba Daromalinia ero maʼökhö. Ba ginötö öbaso Zura Niʼamoniʼö, tandraigö angeragö hadia manö nifahaʼöu yaʼugö sanandrösa khö Yehowa. Tola öʼangerönusi wanofu-nofu daʼa: ’Moroi ba ayati hegöi waö-waö salua andre, hadia zangoromaʼö wa iʼomasiʼö ndraʼo Yehowa? Ba hadia wamahaʼö nihalögu sanandrösa ba gamuata Yehowa si tola manolo yaʼo enaʼö itugu uʼomasiʼö ia?’

8. Hana wa tola tedou waʼomasida khö Lowalangi na mangandrö ita?

⁸ Lala tanö böʼö ba wondrouʼö faʼomasida khö Yehowa yaʼia daʼö na mangandrö ita khönia ero maʼökhö ba tatutunö khönia nösi dödöda. (Si. 25:4, 5) Itema wangandröda Yehowa. (1 Yo. 3:21, 22) Samösa dalifusöda ira alawe moroi ba Asia sotöi Kamila imane wangumaʼö, ”Ba wamobörö, uʼomasiʼö Yehowa börö me no ufahaʼö ndraʼo sanandrösa khönia. Hizaʼi, itugu uʼomasiʼö Yehowa börö me itugu aboto ba dödögu hewisa ia ba wameʼe fanema li ba wangandrögu. Daʼö zamarou yaʼo ba wamalua hadia ia si tola mangomusoiʼö tödönia.” b

9. Moroi ba wehede Waulo, hadia zangoromaʼö wa iforege Timoteo ba wondrouʼö faʼomasinia khö ndra talifusönia?

⁹ Me no hauga fakhe tobali niha Keriso Waulo, falukha ia khö zi bohou ebua sotöi Timoteo sangokhögö amuata si sökhi. Iʼomasiʼö Yehowa Dimoteo ba iʼomasiʼö göi niha böʼö. Ifatunö ba mbanua niha Keriso si so ba Wilifi Faulo wa ”lö hadöi khögu niha böʼö simane [Dimoteo], soʼameʼegö tödö yaʼami soroi ba dödö”. (Fil. 2:20) Tenga ba daʼö isuno Dimoteo Faulo börö me onekhe ia ba wondröniaʼö mazui fahuhuo föna niha sato. Hizaʼi, ahöli-höli dödö Waulo ba waʼomasi niforomaʼö Dimoteo khö ndra talifusönia. Tatu labalo-baloi sibai waʼatohare Dimoteo ira talifusö si so ba mbanua niha Keriso niʼondrasinia.—1 Ko. 4:17.

10. Hewisa Anna hegöi foʼomonia ba wangoromaʼö faʼomasi khö ndra talifusönia?

¹⁰ Omasi göi ita ba wangalui lala ba wanolo ira talifusöda. (Heb. 13:16) Nehegö zi no irai  alua khö Anna nitutunö ba artikel si no tataluʼi. Me no aefa alua nangi sabölö-bölö ba mbanuara, yaʼia hegöi foʼomonia, möi ira laʼondrasi zi sambua ösi nomo ndra talifusöda. No adudu zagö nomo ndra talifusöda andrö, lua-luania ahori taʼunö fefu nukhara. Imane Anna, ”Maʼohe nukhara si no taʼunö andrö, masasai, aefa daʼö matarika ba mafurui. Awena mafuli khöra. No öna-öna sibai wanolo nibeʼema, hizaʼi börö me mafalua daʼö, itugu aro wahuwusama khöra irugi iadaʼa.” Tefarou dödö Anna hegöi foʼomonia ba wameʼe fanolo börö me laʼomasiʼö ndra talifusöra.—1 Yo. 3:17, 18.

11. (a) Na taforege ba wangoromaʼö faʼomasi khö ndra talifusöda, hadia lua-luania khöra? (b) Moloʼö Gamaedola 19:17, hadia nifalua Yehowa khöda na tafalua zi sökhi ba niha böʼö?

¹¹ Na taforomaʼö waʼomasi hegöi faʼasökhi dödö khö ndra talifusöda, tola laʼila wa yaʼita andre no taforege ba woloʼö Yehowa. Ba tola manö ba zi lö taʼila-ila, adöni dödöra ba nifaluada. Kamila, si no mutötöi moroi yawa, lö tebulö itörö tödönia niha si no irai manolo yaʼia. Imane wangumaʼö, ”Böröta, so ösa ndra talifusöda ira alawe zasese molohe yaʼo weʼamöi manuriaigö. Irugi iadaʼa, uʼameʼegö tödö hadia zi no lafalua khögu andrö. Lafaondragö ndraʼo, laʼohe ndraʼo wemanga, ba lafasao ndraʼo wangawuli. Iadaʼa aboto ba dödögu wa sindruhunia oya sibai wamorege si no lafalua khögu. Lafalua daʼö soroi ba dödö.” Sindruhu sa, lö fefu niha lasulöni waʼasökhi dödö si no tafalua khöra. Imane Kamila, ”Omasido usulöni waʼasökhi dödö si no lafalua khögu ira talifusöda andrö. Hizaʼi, lö uʼila hezo so toröi ira iadaʼa. Hewaʼae simanö, iʼila daʼö Yehowa ba ulau mangandrö khönia enaʼö isulöni waʼasökhi dödö nifaluara andrö.” Hadia zi no iwaʼö Kamila andrö atulö. Inehegö Yehowa fefu zi sökhi si no tafalua ba niha böʼö, hewaʼae no ide-ide daʼö ba wamaigida. Hulö zumange sebua böli daʼö ba wamaiginia ba amaedola no tabeʼe  nifalali khö Yehowa, ba hasambalö isulöni khöda.—Baso Gamaedola 19:17.

12. Hewisa ndra talifusö ira matua ba wangoromaʼö faʼomasi ba mbanua niha Keriso? (Faigi göi gambara.)

¹² Hewisa ndra talifusöda ira matua ba wangoromaʼö faʼomasi hegöi ba wanolo ira talifusöda tanö böʼö? Samösa dalifusöda si bohou ebua sotöi Jordan, manofu ia khö zatua sokubaloi hewisa lala enaʼö oya zi tola ifalua ba mbanua niha Keriso. Isuno Jordan satua sokubaloi andrö börö me no iforomaʼö waʼatedou ba wamati. Aefa daʼö, ifatunö khö Jordan hadia zinangea ifalua. Duma-dumania, ifarou Jordan enaʼö alio ofeta ia ba nahia gangowuloa ba itemaʼö ndra talifusö si tohare. Baero daʼö, moguna ibeʼe mbua gera-erania ba gangowuloa, moguna asese fao ia khö ndra talifusö ba wanuriaigö ba kelompok dinasnia, ba moguna iʼangeragö hewisa lala tanö böʼö ba wanolo ira talifusö. Me iʼoʼö wanuturu lala andrö Jordan, tenga ha ifahaʼö ia ba wamalua fefu daʼö, hizaʼi idouʼö waʼomasinia khö ndra talifusö. Aboto ba dödö Jordan na mufataro zi samösa niha tobali enoni, tenga awena ibörögö ba wanolo niha böʼö, hizaʼi moguna lö tebulö ifalua daʼö simane nifaluania ba zilalö.—1 Ti. 3:8-10, 13.

13. Hewisa dalifusöda ira matua sotöi Christian tola ifuli mangai halöwö ia tobali satua sokubaloi?

¹³ Hewisa na no irai labeʼe khöu halöwö tobali enoni mazui satua sokubaloi? Lö olifu Yehowa wamorege si no öfalua mböröta hegöi faʼomasi si no öforomaʼö ba wamalua yaʼia. (1 Ko. 15:58) Iʼila göi waʼomasi si no öfalua irugi iadaʼa. Samösa dalifusöda ira matua sotöi Christian, afatö dödönia me laheta khönia halöwö tobali satua sokubaloi. Hizaʼi, imane wangumaʼö: ”Börö me uʼomasiʼö Yehowa, uhalö gangetula ba wamalua sabölö sökhi ba wamosumange yaʼia, hewaʼae na labeʼe khögu noro dödö mazui löʼö.” Ba gafuriata ifuli lafataro ia tobali satua sokubaloi. Imane Christian, ”Ba wamobörö, so khögu waʼaombö dödö hadia  tola ufuli ufalua halöwö tobali satua sokubaloi. Hizaʼi, börö me si fao faʼasökhi dödö no itehegö khögu Yehowa tobali satua sokubaloi mangawuli, omasido ufalua halöwö daʼö börö me uʼomasiʼö ia hegöi ira talifusöda.”

14. Hadia wamahaʼö nihalömö moroi ba wehede zi samösa talifusöda ira alawe ba Georgia?

¹⁴ Laforomaʼö göi waʼomasi ono mbanua Yehowa ba niha si so ba zi fasuira. (Mat. 22:37-39) Imane samösa dalifusöda ira alawe sotöi Elena si toröi ba Georgia, ”Ba wamobörö, wa tola ufalua halöwö fanuriaigö ha börö waʼomasigu khö Yehowa. Hizaʼi, börö me itugu tedou waʼomasigu khönia, itugu tedou göi waʼomasigu ba niha böʼö. Uforege sibai woʼangeragö hadia gabula dödö nitaögöra ba hadia duho sinangea ufaʼema si tefaudu ba dödöra. Börö me lö uböhöli woʼangeragö daʼö, itugu omasido ba wanolo yaʼira.”—Rom. 10:13-15.

15-16. Hadia manö howu-howu nitemada na taforomaʼö waʼomasi khö ndra talifusöda? (Faigi göi gambara.)

¹⁵ Na taforomaʼö waʼomasi khö ndra talifusöda, tenga ha yaʼira zanema bua. Me awena so COVID-19, samösa dalifusöda ira matua sotöi Paolo hegöi foʼomonia, latolo ndra talifusöda si no alawa döfi ba wangogunaʼö perangkat elektronik ba wanuriaigö. Ba wamobörö abua khö zi samösa talifusöda ira alawe ba wangogunaʼö perangkat eletronik, hizaʼi ba gafuriata mofozu ia. Ato zi fahatö khönia nikaoninia ba wangondrasi fanörö tödö. So 60 zi fahatö khönia zangondrasi fanörö tödö laʼogunaʼö konferensi  video. Itema mbua talifusöda andrö hegöi si fahatö khönia börö wamorege nifalua Paolo hegöi foʼomonia. Ba gafuriata, talifusöda ira alawe andrö ifaoheʼö pesan khö Paolo: ”Uʼandrö sibai saohagölö me no öfahaʼö ndraʼaga yaʼaga si no alawa döfi. Lö irai uʼolifugö woʼameʼegö tödö Yehowa yaʼaga hegöi famorege si no öfalua khöma.”

¹⁶ Isöndra wamahaʼö si sökhi Paolo. Aboto ba dödönia wa abölö moguna waʼomasi moroi ba nekhe-nekhe danga mazui faʼatua-tua. Imane, ”No irai tobali ndraʼo satua samasui. Aboto ba dödögu iadaʼa, hewaʼae no olifu ndra talifusöda huhuo nifaʼemagu, hizaʼi lö olifu ira hadia nifaluagu ba wanolo yaʼira.”

17. Haniha nasa zanema bua na taforomaʼö waʼomasi?

¹⁷ Na taforomaʼö waʼomasi ba niha böʼö, tola tatema mbua ba zi lö tadöna-döna. Jonathan si toröi ba Selandia Baru, no irasoi samösa daʼö. Samuza maʼökhö ba ngaluo Satu, iʼila samösa perintis sanuriaigö ba waʼaukhu zino. Ihalö gangetula Jonathan enaʼö fao ia khö dalifusöda perintis andrö ero ngaluo Satu ba zi laluo. Itema samösa mbua ba waʼasökhi dödö niforomaʼönia andrö. Itutunö Jonathan, ”Me luo daʼö, ambö omasido manuriaigö. Hizaʼi, me faoga wanuriaigö talifusöda perintis andrö, uhaogö wamondrondrongo lalania ba wamahaʼö ba uʼila göi mbua si sökhi nitemania ba wanuriaigö. Buania, ibörögö uʼomasiʼö halöwö fanuriaigö. Tobali si fahuwu khögu dalifusöda perintis andrö ba itolodo enaʼö tedou ndraʼo ba wamati, owua-wua dödögu ba wanuriaigö ba itugu ahatö ndraʼo khö Yehowa.”

18. Hadia zomasi Yehowa tafalua?

¹⁸ Omasi Yehowa na itugu taʼomasiʼö ia hegöi ira talifusöda. Simane si no tafahaʼö yaʼita ba artikel daʼa, tola itugu tedou waʼomasida khö Yehowa na tabaso Daromalinia, taʼangerönusi, ba lö mamalö mangandrö ita khönia. Tola itugu tedou waʼomasida khö ndra talifusöda na taʼalui lala ba wanolo yaʼira. Na itugu tedou waʼomasida, itugu aro wahuwusada khö Yehowa hegöi khö ndra talifusöda. Fahuwusa simane daʼö lö aetu ia sagötö faʼara!