1. Hana wa moguna tafaʼanö ita fatua lö alua bencana?

 TOLA möi folumöʼöda na no tafaʼanö ita. Duma-dumania, na alua bencana alam, tola teʼorifi niha si no mamaʼanö yaʼira ba tola göi labeʼe wanolo ba niha böʼö. Imane sambua organisasi kemanusiaan ba Eropa, ”Famaʼanö yaʼita zotatugöi hadia teʼorifi ita mazui löʼö.”

2. Hana wa moguna tafaʼanö ita ba wanaögö famakao sabölö-bölö? (Mataiʼo 24:44)

² Lö ara tö tohare ”wamakao sabölö-bölö”. (Mat. 24:21) Hizaʼi, famakao sabölö-bölö andrö faböʼö ia moroi ba bencana tanö böʼö, börö me taʼila wa hasambalö alua ia. Mato 2.000 fakhe silalö, no ifangelama ndra nifahaʼönia Yesu enaʼö lafaʼanö ira ba wanaögö daʼö. (Baso Mataiʼo 24:44.) Na no tafaʼanö ita, itugu aoha khöda ba wanaögö inötö si basaki andrö hegöi ba wanolo niha böʼö enaʼö tola lataögö göi zimanö.—Luk. 21:36.

3. Hana wa moguna waʼanau gölö, faʼahakhö dödö, hegöi faʼomasi sagötö wamakao sabölö-bölö?

³ Nehegö so tölu ngawua gamuata si möi fanoloda ba wamaʼanö yaʼita ba wanaögö famakao sabölö-bölö. Hewisa ita na laʼandrö khöda wamaʼema turia fanguhuku sabeʼe? Ba hewisa na lasaisi ita ba wamaʼema turia andrö? (Fam. 16:21) Moguna anau gölöda ba woloʼö niwaʼö Yehowa ba faduhu dödöda wa hasambalö ilumöʼö ita. Hadia zinangea tafalua na so ndra talifusöda si taya okhöta? (Hab. 3:17, 18) Faʼahakhö dödö zamarou yaʼita ba wanolo yaʼira. Ba ginötö lasuwö ita ngawalö soi, hadia nifaluada na laʼandrö khöda enaʼö toröi ita khö ndra talifusöda ba zi sabata?  (Hez. 38:10-12) Moguna taforomaʼö waʼomasi saro khö ndra talifusöda enaʼö tola tataögö mbaŵa waʼabasaki.

4. Hewisa Zura Niʼamoniʼö ba woʼamenesi yaʼita ba wondrouʼö faʼanau gölö, faʼahakhö dödö, hegöi faʼomasi?

⁴ Iʼamenesi ita Taromali Lowalangi ba wondrouʼö faʼanau gölö, faʼahakhö dödö, hegöi faʼomasi. Imane ba Luka 21:19, ”Na anau gölömi, ba teʼorifi ami.” Ba Kolose 3:12, ’Mifalua waʼahakhö dödö.’ Imane göi ba 1 Tesalonika 4:9, 10, ”No ifahaʼö ami Lowalangi ba wangomasiʼö. . . . Ba maʼandrö khömi ira talifusö böi miböhöli wamalua daʼö soroi ba dödö.” Musura fefu ayati daʼa khö ndra nifahaʼö Yesu si no mangoromaʼö faʼanau gölö, faʼahakhö dödö, hegöi faʼomasi. Hewaʼae simanö, moguna ladouʼö mbua-bua daʼa. Moguna göi taʼoʼö duma-dumara andrö. Enaʼö tola tafalua daʼö, datatutunö hewisa niha Keriso me abad siföföna si no mangoromaʼö bua-bua andrö. Baero daʼö, tatutunö nasa hewisa woloʼöda duma-dumara enaʼö tola tefaʼanö ita ba wanaögö famakao sabölö-bölö.

5. Hadia zanolo niha Keriso me abad siföföna enaʼö tola anau gölöra?

⁵ Moguna anau gölö niha Keriso me abad siföföna. (Heb. 10:36) Hadia mbörö? Börö me tenga ha abula dödö simane nitaögö niha sato nitaögöra. Hizaʼi, lataögö göi gabula dödö tanö böʼö börö me tobali ira niha Keriso. Ato ba gotaluara nifakao ndra sondröniaʼö agama niha Yahudi, ira samatörö Romawi, hegöi ösi nomora. (Mat. 10:21) Itaria göi ba mbanua niha Keriso, moguna lalawa wamahaʼö moroi ba niha si no mondröi sindruhu somasi mamoto fahasara dödö. (Hal. 20:29, 30) Hewaʼae simanö, tola laforomaʼö waʼanau gölö. (Fam. 2:3) Hadia zanolo yaʼira? Laʼangerönusi duma-duma si so ba Zura Niʼamoniʼö sangoromaʼö faʼanau gölö, simane Yobi. (Yak. 5:10, 11) Baero daʼö, laʼandrö waʼabölö moroi khö Yehowa. (Hal. 4:29-31) Ba laʼosambuaʼö dödöra ba howu-howu nitemara moroi khö Yehowa na lö tebulö so khöra waʼanau gölö.—Hal. 5:41.

6. Hadia wamahaʼö nihalöu moroi khö dalifusöda ira alawe sotöi Merita?

⁶ Tola göi anau gölöda na lö tebulö tabaso ba taʼangerönusi duma-duma niha si lö faröi ba Zura Niʼamoniʼö hegöi ba publikasida. Daʼö nifalua dalifusöda Merita si so ba Albania. Tola anau gölönia ba wanaögö folohi moroi ba nösi nomonia börö me ifalua daʼö. Imane wangumaʼö, ”Tofakha sibai ba dödögu me ubaso waö-waö Yobi si so ba Zura Niʼamoniʼö. Tefakao sibai ia ba lö iʼila hadia mbörö waʼalua daʼö. Hizaʼi, si fao faʼafaduhu dödö imane, ’Irege aetu nosogu, ba lö uböhöli waʼalöfaröigu!’ (Yob. 27:5) Umane tödögu wa abölö ebua gabula dödö nitaögö Yobi moroi ba gabula dödö nitaögögu. Hizaʼi tenga simane Yobi, uʼila hadia mbörö wa alua gabula dödö andrö.”

7. Hewaʼae na lö hadöi abula dödöda sebua iadaʼa, hadia zinangea tafalua iʼotarai iadaʼa?

⁷ Hadia nasa zanolo yaʼita enaʼö lö tebulö anau gölöda? Moguna asese mangandrö ita khö Yehowa ba tatutunö fefu waʼaombö dödö nirasoida. (Fil. 4:6; 1 Te. 5:17) Te lö hadöi abula dödömö sebua ba ginötö daʼa. Hizaʼi, ba ginötö örasoi waʼabu dödö mazui lö öʼila hadia zinangea öfalua, hadia ölau mangandrö ba wangalui fanuturu lala moroi khö Yehowa? Na iʼotarai iadaʼa no toʼölö ndraʼugö wangandrö khö Yehowa ba wanaögö abula dödö sero maʼökhö, lö saʼae aombö dödöu ba wangandrö khönia na so gabula dödö sebua ba zi so miföna. Ba ginötö daʼö, faduhu dödömö wa iʼila Yehowa hawaʼara ba hewisa wanolonia yaʼugö.—Si. 27:1, 3.

8. Hewisa waʼanau gölö niforomaʼö Mira ba wanaögö famakao, tola möi fanoloda ba wanaögö famakao ba zi so miföna? (Yakobo 1:2-4) (Faigi göi gambara.)

⁸ Tola anau gölöda ba wanaögö famakao sabölö-bölö ba zi so miföna na anau gölöda ba wanaögö famakao iadaʼa. (Rom. 5:3) Hana wa  tola tawaʼö zimanö? Ato ndra talifusöda si no morasoi wa ero mofozu ira ba wangoromaʼö faʼanau gölö ba wanaögö fanandraigö wamati, itugu aoha khöra wangoromaʼö faʼanau gölö na so wanandraigö tanö böʼö. Hadia mbörö? Ero na mofozu ira wangoromaʼö faʼanau gölö, itugu mamati ira wa hasambalö itolo ira Yehowa. (Baso Yakobo 1:2-4.) Samösa perintis moroi ba Albania sotöi Mira, no irasoi samösa wanolo moroi khö Yehowa. Itaria irasoi wa abölö oya gabula dödö nitaögönia moroi ba niha böʼö. Hizaʼi ba gafuriata, iʼangerönusi wanolo nitemania moroi khö Yehowa sagötö zi 20 fakhe silalö. Aefa daʼö, ifasugi ba dödönia samösa, ’Böi faröi ndraʼugö. No itolo ndraʼugö Yehowa ba zi hauga fakhe ba wanaögö faʼabasaki. Na öböhöli wamosumange Yehowa iadaʼa, zaya-zaya gölö fefu wanolo nibeʼenia.’ Tola göi öʼangerönusi hewisa wanolonia yaʼugö enaʼö anau gölöu. Ero mofozu ndraʼugö ba wanaögö fanandraigö, yafaduhu dödöu wa iʼila daʼö Yehowa ba hasambalö ifahowuʼö ndraʼugö. (Mat. 5:10-12) Tola möi fanolou fefu daʼö na ibörögö alua wamakao sabölö-bölö. Ba ginötö daʼö, öhalö gangetula wa lö öböhöli wangoromaʼö faʼanau gölö.

9. Hewisa mbanua niha Keriso ba Gandriokhia Siria ba wangoromaʼö faʼahakhö dödö?

⁹ Me abad siföföna, alua lofo sabölö-bölö ba niha Keriso ba Yudea. Me larongo daʼö banua niha Keriso ba Gandriokhia Siria, tatu larasoi waʼahakhö dödö khö ndra talifusöra si so ba Yudea. Baero daʼö, laforomaʼö waʼahakhö dödöra andrö ba nifaluara. ”Lahalö gangetula ira nifahaʼö ba wamaʼoheʼö fanolo, ndrohu-ndrohu waʼabölöra zamösana soguna khö ndra talifusö ba Yudea.” (Hal. 11:27-30) Hewaʼae na ba mbanua saröu toröi ndra talifusö si göna bencana andrö, omasi niha Keriso ba Gandriokhia ba wanolo yaʼira.—1 Yo. 3:17, 18.

10. Hadia manö zi tola tafalua ba wangoromaʼö faʼahakhö dödö khö ndra talifusöda si göna bencana? (Faigi göi gambara.)

¹⁰ Iadaʼa, tola göi taforomaʼö waʼahakhö dödö khö ndra talifusöda si sara lala wamati si göna bencana. Tatu omasi sibai ita na taʼanemaiʼö tabeʼe wanolo. Te manofu ita khö ndra satua sokubaloi hadia tola fao ita ba wanolo halöwö penanggulangan bencana. Baero daʼö, tola tabeʼe dolo-tolo ba wotuhini halöwö ba zi sagörö ulidanö mazui taʼohe ba wangandrö ndra talifusöda si göna bencana. b (Amd. 17:17) Me döfi 2020, töra 950 Panitia Penanggulangan Bencana nifazökhi ba zi sagörö ulidanö ba wanolo ira talifusöda si göna lua-lua pandemi COVID-19. Taʼandrö sibai saohagölö ba wanolo nibeʼe ndra talifusöda si farahu ba panitia. Börö waʼahakhö dödöra, omasi ira ba wameʼe fanolo soguna ba mboto hegöi ba wamati, ba wangehaogö mazui ba wamasindro omo hegöi nahia gangowuloa.—Fareso göi 2 Korindro 8:1-4.

11. Hana wa tola tefolakhömi Namada si so ba zorugo ba ginötö taforomaʼö waʼahakhö dödö?

¹¹ Na taforomaʼö waʼahakhö dödö na no aefa alua bencana, tola laʼila niha sato waʼaoha gölö niforomaʼöda. Duma-dumania me 2019, adudu Nahia Gangowuloa ba Kepulauan Bahama börö Badai Dorian. Ira talifusöda sangehaogö mangawuli Nahia Gangowuloa andrö, laʼandrö tolo khö zi samösa kontraktor si tenga Samaduhuʼö Yehowa ba wamalua ösa halöwö. Me lasofu hauga biaya niʼogunaʼö, imane kontraktor andrö wa ihenaigö fefu fakake, ira sohalöwö, hegöi bahan bangunan ba lö muʼandrö gefe. Imane nasa, ”Omasido ufalua daʼa ba organisasimi. Omuso sibai dödögu me unehegö waʼomasimi ba niha böʼö.” Ato niha ba  gulidanö andre si lö mangila sanandrösa khö Yehowa. Hizaʼi, ato ba gotaluara zamaigi-maigi hadia nifalua ndra Samaduhuʼö Yehowa. Omuso dödöda börö waʼahakhö dödö niforomaʼöda tola adöni dödö niha ba wangiʼila sanandrösa khö Yehowa, Lowalangida si ”fahöna faʼahakhö dödö”!—Ef. 2:4.

12. Hana wa tola itugu tefaʼanö ita ba wanaögö famakao sabölö-bölö, na iʼotarai iadaʼa taforomaʼö waʼahakhö dödö? (Famaʼeleʼö 13:16, 17)

¹² Hana wa moguna taforomaʼö waʼahakhö dödö sagötö alua wamakao sabölö-bölö? Itutunö Sura Niʼamoniʼö wa niha si lö omasi wotuhini famatörö niha gulidanö, hasambalö lataögö waʼabasaki iadaʼa hegöi sagötö wamakao sabölö-bölö. (Baso Wamaʼeleʼö 13:16, 17.) Te moguna wanolo khö ndra talifusöda ba wombönökhi soguna sero maʼökhö. Ba ginötö tohare Razoda Yesu Keriso ba wanguhuku niha gulidanö, tatu omasi ita na iʼila wa yaʼita andre niha sahakhö tödö, ba ikaoni ita ba wanema ’ondröita Wamatörö Lowalangi’.—Mat. 25:34-40.

13. Simane niforomaʼö ba Roma 15:7, hewisa niha Keriso me abad siföföna, lö laböhöli wangoromaʼö faʼomasi ba nawöra zamösana?

¹³ Tehöngö niha Keriso me abad siföföna börö me faoma laʼomasiʼö nawöra. Hizaʼi, hadia aoha khöra wamalua daʼö? Nehegö hewisa zalua ba mbanua niha Keriso ba Roma. Oi faböʼö-böʼö lala waʼauri niha si farahu ba mbanua niha Keriso andrö. So ösa niha Yahudi moroi ba gotaluara si no irai mamahaʼö yaʼira ba woloʼö Oroisa Moze, so göi moroi ba soi böʼö si faböʼö-böʼö lala waʼauri. Baero daʼö, so ösa niha Keriso si tobali sawuyu, tanö böʼönia niha si kayo sangokhögö sawuyu. Hewaʼae no faböʼö-böʼö lala waʼaurira, hewisa niha Keriso ba wangoromaʼö faʼomasi khö nawöra zamösana? Iʼamenesi ira Faulo imane, ”Faoma mitemaʼö nawömi.” (Baso Roma 15:7.) Hadia geluahania? Ngawua wehede nifoʼeluaha tobali ”mitemaʼö” eluahania mutemaʼö zi samösa niha si fao faʼasökhi dödö ba faʼoböwö. Duma-dumania, takaoni ira weʼamöi ba nomoda mazui tobali ita si fahuwu khöra. Me iʼombakhö khö Wilemo Faulo ba wanemaʼö Onesimo, samösa sawuyu soloi, imane Faulo, ”Haogö wanemaʼö yaʼia.” (File. 17) Me edöna Wirisikila hegöi Akila ba wanolo Afolo enaʼö monönö waʼaboto ba dödönia wamahaʼö niha Keriso, ”lakaoni ia ba laʼombakhaʼö khönia zabölö tefaudu sanandrösa ba lala Lowalangi”. (Hal. 18:26) Sindruhu sa, hewaʼae no faböʼö-böʼö lala waʼaurira, tola laʼokhögö wahasara dödö ba faoma latemaʼö nawöra.

14. Hewisa Anna hegöi foʼomonia ba wangoromaʼö faʼomasi khö ndra talifusö?

¹⁴ Tola göi taforomaʼö waʼomasi khö ndra talifusö na fahuwu ba fariawö ita khöra. Na tafalua daʼö, tefarou dödöra ba wangoromaʼö khöda faʼomasi. (2 Ko. 6:11-13) Nehegö zi no irai alua khö Anna hegöi foʼomonia. Latema halöwö tobali utusan injil ba nahia si bohou ba Afrika Barat. Lö ara me no findra ira, alua pandemi COVID-19. Lua-luania tebai falukha ira khö ndra talifusö ba gangowuloa. Hewisa Anna hegöi foʼomonia ba wangoromaʼö faʼomasi? Laʼogunaʼö video call ba wotelefo ira talifusö si so ba daʼö, ba lamane omasi sibai ira na itugu fahuwu ira khö ndra talifusö. Omuso sibai dödö ndra talifusö si so ba daʼö, irege asese latelefo ba lafaʼoheʼö pesan khö Anna hegöi foʼomonia. Hana wa iforege Anna hegöi foʼomonia enaʼö itugu fahuwu ira khö ndra talifusö si so ba daʼö? Imane Anna, ”Ba waʼomuso dödö hegöi ba waʼabu dödö, yaʼo hegöi ösi nomogu asese marasoi waʼomasi niforomaʼö ndra talifusö. Daʼö mbörö wa urasoi waʼomuso dödö ba lö irai uʼolifugö daʼö. Duma-dumara andre zamarou tödögu ba wangoromaʼö faʼomasi khö ndra talifusö.”

15. Hadia wamahaʼö nihalömö moroi khö dalifusöda ira alawe sotöi Vanessa? (Faigi göi gambara.)

 ¹⁵ Ba mbanua niha Keriso si farahu yaʼita, te so ösa ndra talifusöda si faböʼö lala waʼauri hegöi amuata. Tola itugu taʼomasiʼö ira na taʼosambuaʼö dödöda ba gamuata si sökhi niʼokhögöra. Samösa dalifusöda ira alawe sotöi Vanessa sangai halöwö ba Selandia Baru, ba wamobörö abua khönia fariawö khö ndra talifusö börö me so ösa zi faböʼö amuata moroi khönia. Hizaʼi, iforege enaʼö lö fandröndröu ia khö ndra talifusö, ba ihalö gangetula enaʼö asese fariawö ia. Me no ifalua daʼö, awena aboto ba dödönia ngawalö zomasi Yehowa moroi khö ndra talifusö andrö. Imane wangumaʼö, ”Me no tobali satua samasui woʼomogu, itugu asese falukha ndraʼaga khö ndra talifusö sangokhögö amuata si faböʼö-böʼö ba urasoi wa abölö aoha khögu fariawö khöra. Iadaʼa, uʼomasiʼö ira hewaʼae no faböʼö-böʼö lala waʼaurira. Tatu daʼö göi zomasi Yehowa börö me faböʼö-böʼö niha nidöninia tobali samosumange yaʼia.” Na tafaigi ndra talifusöda simane famaigi Yehowa, no taforomaʼö wa taʼomasiʼö ira.—2 Ko. 8:24.

16. Hana wa moguna sibai waʼomasi sagötö alua wamakao sabölö-bölö? (Faigi göi gambara.)

¹⁶ Moguna sibai waʼomasi sagötö alua wamakao sabölö-bölö. Hewisa wolumöʼö Yehowa yaʼita na ibörögö alua wamakao sabölö-bölö? Nehegö hadia niwaʼö Yehowa ba nono mbanuania me musuwö mbanua Mbabilona, ”He yaʼami ono mbanuagu, miʼaeʼe ba mbateʼe tanö bakha, ba miduhö mbawandruhö furimi. Mibiniʼö ami sabata irege alö wönugu.” (Yes. 26:20) Tola manö moguna taʼoʼö wanuturu lala si fagölö sagötö alua wamakao sabölö-bölö. ’Bateʼe tanö bakha’ tola manö daʼö geluahania banua niha Keriso. No ifabuʼu khöda Yehowa wa hasambalö ilumöʼö ita sagötö alua wamakao sabölö-bölö na lö tebulö teʼosambuaʼö ita khö ndra talifusöda. Andrö, iʼotarai iadaʼa moguna taforege ba wangoromaʼö faʼomasi khö ndra talifusö soroi ba dödö. Daʼö zotatugöi hadia teʼorifi ita mazui löʼö!

17. Na tafaʼanö ita iʼotarai iadaʼa, hadia zi tola tafalua sagötö alua wamakao sabölö-bölö?

¹⁷ ”Ba ngaluo sebua andrö khö Yehowa” tefakao dania fefu niha gulidanö. (Zef. 1:14, 15) Tola manö göi lataögö waʼabasaki ono mbanua Yehowa. Hizaʼi, na no tafaʼanö ita iʼotarai iadaʼa, lö tebulö taʼokhögö waʼahono dödö ba tola tatolo niha böʼö. Lö tebulö anau gölöda hewaʼae tataögö ngawalö wolohi. Na so ndra talifusöda si sara lala wamati sinangea mutolo, taforomaʼö khöra waʼahakhö dödö ba taforege ba wameʼe fanolo. Börö me taʼomasiʼö ndra talifusöda, lö tebulö teʼosambuaʼö ita khöra. Buania, ibeʼe khöda waʼauri si lö aetu Yehowa ba gulidanö si lö hadöi bencana hegöi famakao.—Yes. 65:17.