BA GAKHÖKHÖLA mbanua Mbabilona me föna, oya sibai batu bata nisöndra arkeolog niʼogunaʼö ba wangotomosi banua andrö. Moloʼö samösa arkeolog sotöi Robert Koldewey, mufazökhi batu bata andrö ba naha wanunu si so baero mbanua, ba nahia soya tambu laʼuri si sökhi hegöi soya bahan bakar.

Sejarah Mbabilona si no musura zangoromaʼö wa so ösa zalawa faka sangogunaʼö naha wanunu andrö ba wamalua si lö sökhi. Imane samösa profesor ba University Toronto sonekhe ba bidang sejarah hegöi ba li Asiria, sotöi Paul Alain Beaulieu, ”So ösa zi no musura ba li Mbabilona . . . sanutunö sanandrösa ba niha nitunu börö fareta razo me lafobahulu ira wa no mamadaö mazui no laʼoʼaya lowalangira.” Duma-dumania, so sambua zi no musura iʼotarai ba götö Razo Nebukanesa ösinia: ”Bunu, tunu, ba faga ira . . . ba naha wanunu niʼokhögö niha sonekhe mondrino . . . ba ebuaʼö zimbonia ba etuʼö nosora börö waʼaukhu galitö si hola-hola.”

Te itörö tödö niha sombaso waö-waö salua si no musura ba Danieli faza 3. Ba daʼö, itutunö wa ifazökhi nadu anaʼa sabölö alawa Razo Nebukanesa ba Danö Saloʼo Dura si so baero mbanua Mbabilona. Me lö latuhi danö ono matua Heberaiʼo si datölu sotöi Saderakhi, Mezakhi ba Abedonego, mofönu sibai Nebukanesa ba iwaʼö ba niha ”enaʼö mewitu kali munönö wangebuaʼö alitö moroi ba zi toʼölö”. Ba ibeʼe fareta enaʼö ’lafazaumba ira ba mbaho galitö si hola-hola’. Hizaʼi, lö mate ira börö me no mufatenge malaʼika sabölö ba wolumöʼö yaʼira.—Dan. 3:1-6, 19-28.

Batu bata daʼö zangoromaʼö wa sindruhu waö-waö nisura ba Zura Niʼamoniʼö. Oya wehede fanuno nifaʼema khö razo si no musura ba batu bata andrö. Sambua ba gotaluania imane: ”Nebukanesa, Razo Mbabilona . . . Gödo sebua si no ufazökhi tobali nahiagu samösa, Razo Solakhömi . . . Yalötebulö mamatörö ngaʼötögu ba daʼa.” Nisura andre fakhili ia ba ngawua wehede si no musura ba Danieli 4:30. Ba ayati daʼö, iʼebuaʼö döinia Nebukanesa imane: ”Molakhömi sibai Mbabilona si no ufazökhi andre. Börö kuaso hegöi faʼabölögu wa tola ufazökhi ia tobali nahiagu irege oroma lakhömigu sebua.”