1. Hana wa tola mufagölösi niha Keriso simane töla geu? (Faigi göi gambara.)

 HADIA no irai öʼila döla geu nibözi nangi? Tola aöndrö ia, hizaʼi lö afatö. No famahaʼö si sökhi khöda daʼa wa moguna sibai simane töla geu ita, lö fatandro. Simanö göi, enaʼö lö tebulö aro ita ba wamati moguna taʼokhögö gamuata faʼalöfatandro. Hewisa lalania? Lö fatandro ita na tafaudugö waʼaurida ba ginötö so waʼatebulö ba taʼameʼegö tödö lala wangera-ngera hegöi angetula niha böʼö.

2. Hadia manö gamuata si tola manolo yaʼita na alua khöda waʼatebulö, ba hadia manö nitutunöda ba artikel daʼa?

² Börö me ono mbanua Yehowa ita, lö omasi ita fatandro. Omasi göi ita ba wangokhögö amuata fangide-ngideʼö hegöi faʼahakhö dödö. Ba artikel daʼa, tatutunö hewisa gamuata andrö möi fanolo khö ndra talifusöda ba wanaögö faʼatebulö. Tatutunö göi hewisa wa tola möi fanoloda daʼö ba ginötö so waʼatebulö ba waʼaurida. Hizaʼi si oföna, datafahaʼö ita khö Yehowa hegöi Yesu si tobali duma-duma soʼahonoa ba wangoromaʼö amuata faʼalöfatandro.

3. Hadia zangoromaʼö wa lö fatandro Yehowa?

³ Yehowa andrö lafotöi ia ”Gowe Saro” börö me aro ia ba lö mangiwa. (5 Mo. 32:4) Hizaʼi, lö fatandro ia. Hewaʼae oya waʼatebulö salua ba gulidanö, so göi wombulöʼö nifalua Lowalangi enaʼö alua gohitö dödönia. Ifazökhi niha Yehowa si fakhili-khili khönia. Daʼö mbörö wa so khöda waʼabölö ba wamaudugö faʼaurida na so waʼatebulö. Ibeʼe khöda goi-goi ba Zura Niʼamoniʼö si tola manolo yaʼita ba wangai angetula si sökhi gofu hadia  ia waʼabasaki nitaögöda. Duma-duma Yehowa hegöi goi-goi nibeʼenia, daʼö zangoromaʼö wa lö fatandro ia hewaʼae na yaʼia andrö ”Gowe Saro”.

4. Beʼe duma-duma sangoromaʼö wa lö fatandro Yehowa. (3 Moze 5:7, 11)

⁴ Lö fatandro Yehowa ba moʼahonoa lala wangera-ngerania. Lö ifaso niha Yehowa. Duma-dumania, nehegö hadia niʼandrönia ba ndraono Gizaraʼeli. Lö iʼandrö ba niha Yehowa enaʼö labeʼe zumange si fagölö he si kayo hegöi si numana. Baero daʼö, itehegö ba niha wameʼe sumange moloʼö faʼabölöra.—Baso 3 Moze 5:7, 11.

5. Beʼe duma-duma sangoromaʼö wa so khö Yehowa wangide-ngideʼö hegöi faʼahakhö dödö.

⁵ Lö fatandro Yehowa börö me so khönia wangide-ngideʼö ba faʼahakhö dödö. Duma-dumania, oroma wangide-ngideʼö Yehowa me arakhagö ihori niha si lö sökhi ba Zodoma. Iʼogunaʼö malaʼikania Yehowa ba wamarou Loti weʼamöi ba hili, hizaʼi ataʼu ia weʼamöi ba daʼö. Börö daʼö, iʼandrö enaʼö latehegö khönia hegöi ösi nomonia weʼamöi ba Zoara, banua side-ide. Sindruhunia, no mutatugöi wa muhori mbanua andrö. Tola manö ifaso Loti Yehowa ba wamalua si no iwaʼö, hizaʼi ifondrondrongo niwaʼö Loti irege lö aʼozu ihori mbanua daʼö. (1 Mo. 19:18-22) Ba zi hauga abad aefa daʼö, ifatenge Yona Yehowa weʼamöi ba Niniwe ba wangombakha ba niha si lö sökhi wa tehori ira awö mbanuara. Ahakhö dödö Yehowa khöra ba lö aʼozu ihori mbanua andrö.—Yon. 3:1, 10; 4:10, 11.

6. Beʼe duma-duma hewisa Yesu ba woloʼö amuata Yehowa si lö fatandro.

⁶ Iʼoʼö gamuata Yehowa Yesu si lö fatandro. Tefatenge Yesu ba gulidanö weʼamöi manuriaigö ba ”ndraono Gizaraʼeli si hulö mbiri-biri si taya”. Hizaʼi, me so samösa ndra alawe si tenga iraono Gizaraʼeli, iʼandrö khö Yesu ba wamadöhö ononia enaʼö ifofanö ”malaʼika si lö sökhi” si fatewu ba mboto nononia. Ifalua daʼö Yesu si fao faʼahakhö dödö. (Mat. 15:21-28) Nehegö duma-duma tanö böʼö. Me ibörögö wanuriaigö Yesu imane, ”Dozi sangosilöʼögö yaʼo . . . ba uʼosilöʼögö göi ia.” (Mat. 10:33) Hizaʼi, me tölu kali iʼosilöʼögö Yesu Fetero, hadia itimbagö ia Yesu? Löʼö. Aboto ba dödö Yesu wa tola ifalalini gera-erania Fetero ba so khönia wamati. Me no aefa tesusugi Yesu, möi ia ifalukhaisi Wetero. Ba ginötö daʼö, ifaduhuʼö khönia Yesu wa no iʼefaʼö zala nifalua Wetero ba iʼomasiʼö ia.—Luk. 24:33, 34.

7. Moloʼö Filifi 4:5, hewisa zomasi ita wamaigi niha yaʼita?

⁷ No tatutunö wa lö fatandro Lowalangi Yehowa hegöi Yesu Keriso. Hewisa göi ita? Omasi Yehowa enaʼö lö fatandro ita. (Baso Wilifi 4:5.) Ba wamoʼeluaha tanö böʼö imane ayati daʼö, ”Foromaʼö moroi ba gamuatamö wa lö fatandro ndraʼugö.” Tandraigö angeragö: ’Hadia ba wamaigi niha yaʼodo andre niha si lö fatandro, sebolo tödö hegöi soʼameʼegö tödö fehede niha böʼö, mazui ba wamaigira yaʼodo andre niha si fatandro, samuʼi  hegöi sabeʼe högö? Hadia ufaso niha böʼö ba wamalua hadia ia simane somasi dödögu? Mazui, hadia ufondrondrongo niha böʼö ba ufalua zomasi ira na tola mufalua daʼö?’ Törö tödöu, na lö fatandro ita, no taʼoʼö gamuata Yehowa hegöi Yesu. Datatutunö dombua zalua si tola taʼasiwai na so khöda gamuata faʼalöfatandro: (1) ba ginötö alua waʼatebulö ba waʼaurida, (2) ba ginötö faböʼö mbua gera-erada hegöi angetulada moroi ba niha böʼö.

8. Hadia zinangea tafalua na so waʼatebulö? (Faigi nisura ba gahe zura.)

⁸ Na lö fatandro ita, tola tafaudugö waʼaurida na so waʼatebulö. Faʼatebulö andrö tola manö iʼasogö waʼabasaki si lö mudöna-döna. Duma-dumania, ba zi lö tadöna-döna göna ita fökhö sabölö-bölö. Mazui so waʼatebulö ba ekonomi hegöi ba politik irege tosasa waʼaurida. (Sango. 9:11; 1 Ko. 7:31) Faʼatebulö halöwö bakha ba organisasi, tola göi möi fanandraigöda daʼö. Hizaʼi, gofu hadia ia waʼabasaki nitaögöda tola mofozu ita ba wamaudugö faʼaurida na tafalua zi öfa ngawalö andre: (1) tema zalua, (2) osambuaʼö dödöu ba zi so miföna, (3) okhögö lala wangera-ngera si sökhi, ba (4) tolo niha böʼö. b Nehegö hadia mbua nitema ndra talifusöda börö me no lafalua daʼö.

9. Hewisa zi sambua fongambatö utusan injil ba wanaögöra faʼabasaki si lö mudöna-döna?

⁹ Tema zalua. Mufataro Emanuele hegöi Francesca tobali utusan injil ba soi böʼö. Me labörögö lafahaʼö ira ba li si bohou ba ibörögö fahuwu ira khö ndra talifusö ba mbanua niha Keriso si bohou si farahu yaʼira, alua pandemi COVID-19 ba tebai mofanö ira moroi ba nomora. Ba zi lö mudöna-döna, mate mama Francesca. Omasi sibai Francesca owulo khö ndra talifusönia, hizaʼi tebai mangawuli ia börö pandemi. Hewisa wa tola itaögö zalua andrö? Si oföna, mangandrö ira khö Yehowa. Laʼandrö waʼatua-tua enaʼö anau gölöra ero maʼökhö ba wanaögö salua andrö irege lö talafo aombö dödöra. Ifondrondrongo wangandröra Yehowa, yaʼia daʼö me ibeʼe khöra wanolo ba wamati ba ginötö si tefaudu. Duma-dumania, teʼaroʼö ira me lafondrondrongo wawancara zi samösa talifusöda ba zi sambua video. Imane talifusöda andrö, ”Na lö tebulö taʼera-era manö halöwö si tebai tafalua saʼae, itugu tarasoi waʼabu dödö. Hizaʼi, na alio tatemaʼö fefu hadia ia zalua, alio göi tarasoi waʼomuso dödö mangawuli. Ba tola manö tahaogö wangogunaʼö inötö ba zalua khöda andre.” c Si dua, ladouʼö waʼonekhera wangogunaʼö telefo ba wanuriaigö, ba labörögö lafahaʼö niha ba Zura Niʼamoniʼö. Si tölu, latemaʼö wanolo moroi khö ndra talifusö ba laʼandrö saohagölö. So samösa dalifusöda ira alawe si sökhi tödö, ikirim pesan singkat ero maʼökhö, ösinia yaʼia daʼö sambua ayati Zura Niʼamoniʼö ba ifalua daʼö ba zi döfi. Hadia wamahaʼönia khöda? Na tatema zawena alua khöda, tola omuso dödöda ba zi no tafalua.

10. Hewisa zi samösa talifusöda ira alawe ba wanaögönia faʼatebulö salua ba waʼaurinia?

¹⁰ Osambuaʼö dödöu ba zi so miföna, ba okhögö lala wangera-ngera si sökhi. Samösa dalifusöda ira alawe sotöi Christina moroi ba Romania, toröi ia ba Jepang. Afatö dödönia me laduhö mbanua niha Keriso sangogunaʼö li Inggris si farahu yaʼia. Hizaʼi, lö iʼosambuaʼö dödönia ba zi no alua andrö. Farahu  ia ba mbanua niha Keriso sangogunaʼö li Jepang, ba iforege wangogunaʼö li daʼö. Iʼandrö khö zi samösa ira alawe si no irai fao khönia wohalöwö ba wanolo yaʼia ba wamahaʼö ba li Jepang. Fao dödö ndra alawe andrö wangogunaʼö Sura Niʼamoniʼö hegöi brosur Lala ba Wanöndra Faʼohahau Dödö Sagötö Faʼara! ba wamahaʼö Christina ba li Jepang. Buania, tenga ha onekhe Christina ba li Jepang, hizaʼi adöni dödö ndra alawe andrö ba wamahaʼö yaʼia ba zindruhu. Hadia wamahaʼönia khöda? Na taʼosambuaʼö dödöda ba zi so miföna ba taʼokhögö lala wangera-ngera si sökhi, faʼatebulö salua ba zi lö tadöna-döna tola göi iʼasogö howu-howu ba zi lö mudöna-döna.

11. Hewisa zi sambua fongambatö ba wanaögöra faʼabasaki ba wangalui soguna?

¹¹ Tolo niha böʼö. So sambua wongambatö si toröi ba soi si lö manehegö halöwö fanuriaigö nifaluada, laʼefasi ira ba halöwöra börö me so krisis ekonomi. Hewisa wanaögöra daʼö? Si oföna, laʼalösi wangogunaʼö kefe. Aefa daʼö, lö laʼosambuaʼö dödöra ba zalua andrö, hizaʼi laʼosambuaʼö dödöra ba wanolo niha böʼö yaʼia daʼö möi ira manuriaigö. (Hal. 20:35) Imane foʼomonia ira matua, ”Börö me oya ginötöma weʼamöi manuriaigö, lö saʼae inötöma woʼangeragö abula dödö salua. Abölö oya maʼogunaʼö ginötöma ba wamalua somasi Lowalangi.” Hadia wamahaʼönia khöda? Na alua waʼatebulö ba waʼaurida, böi olifu ita ba wanolo niha böʼö mendrua manö weʼamöi manuriaigö.

12. Hewisa wa möi fanoloda duma-duma zinenge sotöi Faulo ba wangoromaʼö faʼalöfatandro ba wanuriaigö?

¹² Moguna taʼokhögö gamuata faʼalöfatandro ba wanuriaigö. Niha nifalukhaisida ba halöwö fanuriaigö, oi faböʼö-böʼö nifaduhusira tödö hegöi lala waʼaurira. Tola tafahaʼö ita moroi ba duma-duma zinenge sotöi Faulo sangokhögö amuata faʼalöfatandro. Imane Yesu wa Faulo andrö ”sinenge nifatenge ba soi böʼö”. (Rom. 11:13) Börö daʼö, manuriaigö Waulo ba niha Yahudi, niha Yunani, niha salawa sekola, niha si toʼölö, niha si so faka, hegöi khö ndra razo. Iforege Faulo ba wamalua hadia ia enaʼö tofakha ba dödö niha böʼö duria nifaʼemania. (1 Ko. 9:19-23) Inehegö zi toʼölö lafalua, lala waʼaurira, hegöi nifaduhusira tödö enaʼö tola ifaudugö lalania ba wanuriaigö. Tola göi mofozu ita ba halöwö fanuriaigö na lö fatandro ita ba tafaudugö lalada wanuriaigö si tefaudu ba zoguna khöra.

13. Moloʼö 1 Korindro 8:9, hadia lua-luania na lö taʼameʼegö tödö lala wangera-ngera niha böʼö?

¹³ Na lö fatandro ita, tola taʼameʼegö tödö lala wangera-ngera niha böʼö. Duma-dumania, so ösa ndra talifusöda ira alawe somasi mangogunaʼö gama-gama ba wonönö faʼasökhi mbotora, tanö böʼönia lö omasi ira. So ösa niha Keriso somasi mamadu tuo, ba so göi zi lö omasi. Fefu niha Keriso omasi ira na lö mofökhö, hizaʼi no faböʼö-böʼö lala nifilira ba wondrorogö botora. Na tamane tödöda wa no satulö fefu nifilida, ba taforege enaʼö laʼoʼö daʼö ira talifusöda, tola tobali fangala ita khöra ba lö khöda fahasara dödö. Tatu manö, lö omasi ita wamalua daʼö! (Baso 1 Korindro 8:9; 10:23, 24) Nehegö zi dombua duma-duma sangoromaʼö hewisa goi-goi Zura Niʼamoniʼö möi fanoloda enaʼö taʼokhögö lala wangera-ngera si tefaudu ba tarorogö waʼatulö.

14. Hadia goi-goi Zura Niʼamoniʼö sinangea itörö tödöda ba ginötö tahalö gangetula sanandrösa ba lagu wonukha hegöi gaya mbu?

¹⁴ Lagu wonukha hegöi gaya mbu. Lö nitatugöi Yehowa hewisa lagu wonukhada, hizaʼi ibeʼe khöda goi-goi si tola taʼoʼö. Yaʼita ono  mbanua Lowalangi moguna tafake nukha soadu ba sinangea. Böi fatandro ita ba taʼogunaʼö ’lala wangera-ngera si sökhi’ ba wangai angetula sanandrösa ba wonukha. (1 Ti. 2:9, 10; 1 Fe. 3:3) Lö omasi ita na teʼosambuaʼö wangera-ngera niha ba khöda samösa. Goi-goi Zura Niʼamoniʼö tola möi fanolo khö ndra satua sokubaloi enaʼö lö lafazökhi gamakhoitara samösa sanandrösa ba lagu wonukha hegöi gaya mbu. Duma-dumania, ba zi sambua banua niha Keriso, omasi ndra satua sokubaloi ba woʼamenesi ösa ndra si bohou ebua sanandrösa ba gaya mbu sadogo-dogo hizaʼi no fawuka, simane gaya mbu sasese taʼila iadaʼa. Hewisa ndra satua sokubaloi ba wanolo iraono si bohou ebua andrö ba lö lafazökhi gamakhoitara samösa? Ibeʼe wanuturu lala satua samasui khö ndra satua sokubaloi ba wangombakha khö ndra talifusöda andrö, ”Na mitema halöwö ba gangowuloa, ba laʼosambuaʼö dödöra ira talifusöda ba lagu wonukhami moroi ba nifaʼemami, eluahania so zi fasala ba lagu wonukha hegöi ba gaya mbumi.” Hewaʼae no öna-öna wanuturu lala andrö, hizaʼi tola muʼasiwai zi sambua gabula dödö. Ba lö moguna lafazökhi gamakhoitara samösa ira satua sokubaloi. d

15. Hadia goroisa hegöi goi-goi Zura Niʼamoniʼö sanolo yaʼita ba wangai angetula sanandrösa ba wamadöhö fökhö? (Roma 14:5)

¹⁵ Famadöhö fökhö. Dozi niha Keriso moguna lahalö samösa gangetula sanandrösa ba wamadöhö fökhö. (Gal. 6:5) Ba Zura Niʼamoniʼö, lö oya goroisa sanandrösa ba wamadöhö fökhö sinangea laʼoʼö ira niha Keriso, yaʼia daʼö oroisa ba wangaröuʼö yaʼira sanandrösa ba ndro hegöi fakelemusa. (Hal. 15:20; Gal. 5:19, 20) Tanö böʼönia, moguna lahalö samösa gangetula. So ösa niha, ha khö ndra doto hegöi  khö ndra ahli medis faduhu dödöra. Ba so ösa zamili lala tanö böʼö ba wamadöhö fökhöra. Hewaʼae na taʼila wa so gunania mazui möi famaʼala khö ndra talifusöda lala ba wamadöhö wökhö nifilira, moguna taʼameʼegö tödö gangetula nihalöra. Törö tödöu zi öfa ngawalö andre: (1) Ha Famatörö Lowalangi zi tola mamadöhö fefu wökhö sagötö faʼara. (Yes. 33:24) (2) Moguna ”sindruhu-ndruhu faduhu dödö” niha Keriso ba gangetula nihalöra. (Baso Roma 14:5.) (3) Böi öhuku ira mazui tobali ndraʼugö fangala khöra. (Rom. 14:13) (4) Moguna laforomaʼö waʼomasi ba laʼofönaiʼö wahasara dödö ba mbanua niha Keriso moroi ba gangetulara samösa. (Rom. 14:15, 19, 20) Na tatörö tödöda fefu daʼö, lö tebulö fahuwu ita khö ndra talifusöda ba no fao ita ba wondrorogö faʼatulö ba mbanua niha Keriso.

16. Hewisa zi samösa satua sokubaloi ba wangoromaʼö wa lö fatandro ia na so nifatunöisira ira satua sokubaloi tanö böʼö? (Faigi göi gambara.)

¹⁶ Moguna tobali duma-duma ndra satua sokubaloi ba wangoromaʼö amuata faʼalöfatandro. (1 Ti. 3:2, 3) Lö itötöna si samösa satua sokubaloi wa latema mbua gera-erania ha börö me abölö atua ia moroi khö ndra satua sokubaloi tanö böʼö. Aboto ba dödönia wa faʼabölö geheha niʼamoniʼö moroi khö Yehowa zamarou gofu haniha manö. Tola ifarou zatua sokubaloi tanö böʼö ba wamaʼema hadia ia ba wanolo boto zatua sokubaloi ba wangai angetula si sökhi. Na ato ndra satua sokubaloi si fao tödö ba zi sambua angetula, ba lö fatimba daʼö ba goi-goi Zura Niʼamoniʼö, satua sokubaloi si lö fatandro ituhini gangetula andrö hewaʼae na dali zindruhunia abölö omasi ia ba gangetula tanö böʼö.

17. Hadia manö howu-howu nirasoi niha Keriso börö me laʼokhögö gamuata faʼalöfatandro?

¹⁷ Oya howu-howu nitema niha Keriso börö me laʼokhögö gamuata faʼalöfatandro. Tola taʼokhögö gamakhaita si sökhi khö ndra talifusöda ba tarasoi waʼatulö ba mbanua niha Keriso. Hewaʼae na faböʼö-böʼö lagu hegöi si toʼölö mufalua ba gotalua nono mbanua Yehowa, tola tarasoi waʼomuso dödö börö me faoma tafosumange Yehowa. Ba sabölö tohudenia, tarasoi waʼohahau dödö börö me taʼoʼö Lowalangida si lö fatandro yaʼia daʼö Yehowa.