Fandrita bapagu ba gereja United Church ba Kanada. Daʼö mbörö wa ifarou ndraʼo hegöi akhigu ono alawe weʼamöi ba sekola Migu. Aefa daʼö bözi 11 ba zi laluo, faoga khönia weʼamöi ba gereja. Ba na no aefa daʼö, möiga khö mamagu ba Nahia Gangowuloa. Tola maʼila gamaehuta ba zi dombua agama andrö.

Itutunö mamagu zi no ifaduhusi tödö khö zi fahuwu khönia sotöi Bob hegöi Marion Hutcheson, ba latema göi zindruhu. Me döfi 1958, iʼohe ndraʼo Bob hegöi Marion ba simanö göi ndraonora si datölu ono matua ba wangondrasi Kebaktian Internasional Kehendak Ilahi ba New York City nifalua ba zi walu hari faʼara. Na ifuli itörö tödögu, tenga saoha khöra ba wolohe yaʼo. Hizaʼi, tebai uʼolifugö gangowuloa andrö sandrohu faʼaurigu.

Me awuyu-wuyu ndraʼo, toröi ndraʼaga ba naha wanguri urifö. Omasido sibai wondrorogö urifö. No irai tumbu ba wangera-ngeragu enaʼö ufahaʼö ndraʼo tobali dokter hewan. Ifatunö göi mamagu daʼö khö zi samösa satua sokubaloi ba mbanua niha Keriso si farahu yaʼaga. Si fao faʼasökhi dödö, ifasugi ba dödögu satua sokubaloi andrö wa no auri ita ba ”ngaluo safuria”, ba omasi ia itolo ndraʼo enaʼö aboto ba dödögu wa kuliah ba zi hauga fakhe tola molua-lua ia ba gamakhaitagu khö Yehowa. (2 Ti. 3:1) Ba gafuriata, uhalö gangetula lö omasido kuliah.

Me no tama ndraʼo sekola, lö uʼila hadia zinangea ufalua. Hewaʼae manuriaigö ndraʼo ero ngaluo satu mazui migu, hizaʼi lö khögu faʼowua-wua dödö ba halöwö fanuriaigö, ba urasoi wa tebai merintis ndraʼo. Bapagu hegöi sibayagu si tenga Samaduhuʼö, lafarou ndraʼo enaʼö uhorigö ginötögu wohalöwö ba zi sambua perusahaan asuransi sebua si so ba Toronto. Iʼokhögö dadaoma si sökhi sibayagu ba perusahaan daʼö, andrö wa mohalöwödo ba daʼö.

 Ba Toronto, asese mohalöwödo ofeta ba zi bongi ba fariawö ndraʼo ba zi tenga Samaduhuʼö. Lua-luania, lö asese möido ba gangowuloa hegöi ba wanuriaigö. Ba wamobörö, toröi ndraʼo khö kakegu si tenga si sara lala wamati. Hizaʼi, me no aefa mate ia findra ndraʼo.

Bob hegöi Marion si no irai molohe yaʼo ba gangowuloa sebua me döfi 1958, hulö zimane satuagu ira. Lakaoni ndraʼo enaʼö toröido ba nomora ba latolodo enaʼö tedou ba wamati. Me döfi 1960, yaʼo hegöi onora John tebayagö idanö. Me ibörögö merintis Jhon, tefarou göi dödögu ba halöwö fanuriaigö. Laʼila göi ira talifusöda waʼatedougu ba wamati. Ba gafuriata, tobali ndraʼo hamba Sekolah Pelayanan Teokratis. a

Me döfi 1966, mangowaludo khö Randi Berge samösa perintis sowölö-ölö. Omasi sibai ia findra ba mbanua si lö ato sanuriaigö. Iʼameʼegö tödö ndraʼaga satua samasui. Ifarou ndraʼaga ba wanolo si sambua banua niha Keriso si so ba Orillia, Ontario. Börö daʼö, iʼanemaiʼö mafaʼanö gama-gamama ba findra ndraʼaga.

Me no ofeta ndraʼaga ba Orillia, uʼanemaiʼö merintis faoga Randi. No möi khögu waʼowölö-ölönia! Uforege sibai enaʼö tobali ndraʼo perintis si sökhi, ba ibörögö urasoi waʼowua-wua dödö me uʼogunaʼö Zura Niʼamoniʼö ba wanolo niha enaʼö aboto ba dödöra zindruhu. Omuso sibai dödögu me tola utolo zi sambua fongambatö ba Orillia me labulöʼö waʼaurira ba tobali ira samosumange Yehowa.

Me möido ba Toronto, falukha ndraʼo Arnold MacNamara, samösa dalifusöda ira matua si so noro dödö ba Mbetieli. Isofu khöma hadia omasi ami tobali perintis istimewa. Iʼanemaiʼö umane, ”Tatu manö! Gofu hezo so manö asala tenga ba Quebec!” Me luo daʼö, tedönisi lala wangera-ngeragu ba niha sangogunaʼö li Inggris si so ba Kanada. Laʼokhögö lala wangera-ngera si fasala sanandrösa  ba provinsi Quebec, sangogunaʼö li Prancis. Me luo daʼö, niha si so ba Quebec lafalua wamadaö börö me omasi ira na teʼefaʼö provinsi daʼö moroi ba Kanada.

Imane Arnold, ”Iadaʼa, lahalö gangetula gödo ndraha wa ha ba Quebec lafataro perintis istimewa.” Iʼanemaiʼö ufaʼanö ndraʼo weʼamöi ba daʼö. Aboto ba dödögu wa adöni dödö Randi wangai halöwö ba daʼö. Ba gafuriata, uʼila wa no angetula si sökhi daʼö ba waʼaurima!

Me no lima migu mafahaʼö ndraʼaga ba li Prancis, yaʼo hegöi Randi faoga khö zi sambua fongambatö weʼamöi ba Rimouski. Te mato 540 kilometer tanö ba gatumbukha nasi Montreal. Lö onekhe ndraʼaga ba li Prancis. Oroma daʼö me ubaso zi sambua angombakhata. Umane wangumaʼö ba gangowuloa sebua ba zi so miföna, ato sibai ”delegasi moroi ba wofo gondra”, sindruhunia sa ”delegasi moroi ba Austria”.

Yaʼaga si daöfa ba so daöfa tö ndra talifusöda ira alawe si lö sangowalu, toröiga ba Rimouski. Simanö göi dalifusöda Huberdeaus hegöi foʼomonia ba darua nonora alawe. Talifusöda Huberdeaus ba foʼomonia, lasewa sambua nomo sebua ba so fitu ngawua mbateʼe. Fefu perintis si toröi ba daʼö, lalului wamuʼa okosi nomo. Mafotöi nomo daʼö White House (Rumah Putih), börö me no mu-cat safusi nomo daʼö simanö göi gehomonia. Börö me perintis istimewa ndraʼaga, yaʼo hegöi Randi manuriaigö ndraʼaga ba zihulö wongi, ba zi laluo hegöi ba zi bongi. Omuso sibai dödöma börö me lö tebulö so nawöma weʼamöi manuriaigö hewaʼae na ba zi bongi ba mbaŵa waʼokafu-kafu.

Itugu fahuwu ndraʼaga khö ndra perintis si lö faröi andrö ba no amaedola zi sambua ösi nomo ndraʼaga. Itaria modadao ndraʼaga ba no mafasui hola-hola galitö. So göi khöma ”ngaluo pierogi”. Ba ngaluo daʼö, mafazökhi pierogi yaʼia daʼö pangsit ba oya ngawalö nösinia. So samösa dalifusöda ira matua sangila famai musik. Börö daʼö ba zi bongi ngaluo Satu, asese manunö ndraʼaga ba manari.

Ba Rimouski, ato niha somasi mamahaʼö yaʼira ba Zura Niʼamoniʼö. Omuso sibai dödöma börö me ha ba zi lima fakhe, so ösa nifahaʼöma ba Zura Niʼamoniʼö si tedou ba wamati irege tebayagö ira idanö. Itugu ebua mbanua niha Keriso si so yaʼaga ba so mato 35 zanuriaigö.

Ba Quebec, matema wamomaha si sökhi enaʼö itugu atua-tua ndraʼaga ba wamalua halöwö fanuriaigö. Maʼila samösa hewisa wanolo Yehowa yaʼaga ba wamalua halöwöma hegöi ba wombönökhi soguna khöma. Baero daʼö, ibörögö maʼomasiʼö niha sangogunaʼö li Prancis. Maʼomasiʼö li niʼogunaʼöra hegöi budayara. Ba gafuriata, maʼomasiʼö göi budaya tanö böʼö.—2 Ko. 6:13.

Ba zi lö mudöna-döna, laʼandrö khöma gödo ndraha enaʼö findra ba mbanua Tracadie, si so ba zinga nasi gatumbukha New Brunswick. Hizaʼi, so zi tobali abula dödöma. Awena sibai uteka kontrak ba wosewa sambua apartemen, ba no uteka kontrak tobali guru ba zi sambua sekola. Ba daʼö mohalöwö ndraʼo mato hauga hari ba zi samigu. Baero daʼö, so ösa göi niha nifahaʼöma sawena tobali sanuriaigö, ba fao göi ndraʼaga ba wamazökhi Nahia Gangowuloa.

Barö migu daʼö, maʼohe ba wangandrö sanandrösa ba waʼafindrama. Ba möi ndraʼaga ba Tracadie. No faehu sibai mbanua andrö moroi ba Rimouski. Hizaʼi, mahalö gangetula weʼamöi ba daʼö, börö me Yehowa zamatenge yaʼaga. Matandraigö Yehowa ba maʼila samösa hewisa ia ba wangasiwai daha-taha nitaögöma. (Mal. 3:10) Lö abua khöma  waʼafindra börö me so khö Randi wamati saro, faʼaohagölö ba iʼokhögö selera humor si sökhi.

Ha samösa zatua sokubaloi ba mbanua niha Keriso si farahu yaʼaga yaʼia daʼö talifusöda Robert Ross. No irai merintis ia hegöi foʼomonia Linda. Ba me tumbu nonora siaʼa, lahalö gangetula toröi ba mbanua andrö. Hewaʼae so zi tobali noro dödöra ba wondrorogö onora side-ide, latemaʼö ndraʼaga si fao faʼowua-wua dödö ba owölö-ölö ira weʼamöi manuriaigö. Duma-dumara andrö zangabölöʼö yaʼo hegöi Randi.

Me no dua fakhe merintis ndraʼaga ba Tracadie, matema nasa zahöli-höli dödö. Lakaoni ndraʼaga ba wangai halöwö tobali satua samasui. Lakaoni ndraʼo tobali satua samasui ba li Inggris sagötö zi fitu fakhe. Aefa daʼö, tobali ndraʼo satua samasui ba li Prancis ba Quebec. Ero na ufaʼema huhuo sebua, asese isuno ndraʼo Pengawas distrik sotöi Léonce Crépeault ba Quebec. Aefa daʼö, lö iböhöli wanofu khögu, ”Hadia tola nasa öhaogö ötutunö hewisa ba wangoʼaurifagö yaʼia?” b Foʼameʼegö tödö nibeʼenia zamahaʼö yaʼo enaʼö itugu uhaogö wangolohesi huhuo sebua ba salio aboto ba dödö niha.

Me döfi 1978, mufalua Kebaktian Internasional ba Montreal tuhonia, ”Iman yang Berkemenangan”, ba tebeʼe khögu halöwö ba Wamaʼanö Gö. Daʼö sambua halöwö si tebai uʼolifugö ba waʼaurigu. Lafatunö khöma wa so mato 80.000 niha sangondrasi ba so gamakhoita si bohou sanandrösa ba wamaʼanö gö. Oi si bohou fefu, iʼotarai ba gama-gamania, ö nifaʼanö hegöi lala ba wamaʼanö yaʼia. So mato 20 ngawua kulkas segebua, ba itaria tekiko daʼö. Fatua lö mubörögö gangowuloa ba ngaluo si oföna, lö latehegö khöma weʼamöi ba stadion ba wamalua halöwöma. Ba zi talu mbongi, awena latehegö khöma weʼamöi bakha me no aefa pertandingan olahraga nifalua ba daʼö. Enaʼö tola tefaudu ginötö ba wamaʼanö gö sihulö wongi, moguna maʼorifi oven fatua lö si tumbu haga luo. Marase sibai ndraʼaga, hizaʼi oya wamahaʼö nihalögu ba wamorege nifaluara, bua-buara si sökhi, hegöi rasa humor ndra relawan tanö böʼö. Itugu aro gamakhaitama ba fahuwu ndraʼaga irugi iadaʼa. Omuso sibai dödöma ba wangondrasi kebaktian bersejarah ba Quebec, ba provinsi si no irai mamakao yaʼita sagötö me 1940-an irugi 1950-an!

Oya wamahaʼö nihalögu khö ndra satua samasui tanö böʼö sagötö mufalua gangowuloa segebua  ba Montreal. Samuza inötö, David Splane zi tobali pengawas kebaktian, iadaʼa mangai halöwö ia tobali Boto Solohe. Ituhini sibai ndraʼo talifusöda David. Hizaʼi ba gangowuloa aefa daʼö, tebeʼe khögu noro dödö tobali pengawas kebaktian, ba ituhini sibai ndraʼo talifusöda andrö.

Me döfi 2011, me no aefa mangai halöwö ndraʼaga tobali satua samasui ba zi 36 fakhe, lakaoni ndraʼo tobali instruktur Sekolah bagi Penatua Sidang. Sagötö zi dua fakhe, yaʼo hegöi Randi, no 75 kali faböʼö-böʼö naha wemöröma. Hizaʼi, tenga zaya-zaya gölö nifaluama. Laʼandrö sibai saohagölö ira satua sokubaloi börö me larasoi wa laʼameʼegö tödö wamatira ira Boto Solohe.

Ba gafuriata, mamahaʼö ndraʼo ba Sekolah bagi Penginjil Kerajaan. Asese ambö ginötö ndra siswa. Arakhagö fitu za modadao ira ba kelas ero maʼökhö ba tölu za lahalöwögöigö PR ero bongi. Ba lafaʼanö öfa mazui lima ngawua tugas ero migu. Yaʼo hegöi instruktur tanö böʼö, mafatunö khöra wa tebai lafalua fefu daʼö na tenga fanolo moroi khö Yehowa. Lö irai uʼolifugö hewisa dödö ndra siswa me luo daʼö. Tokea ira me aboto ba dödöra wa fangodaligöra Yehowa tola möi faʼamofozura ba wamalua hadia ia töra moroi ba zi no lakhalaigö.

Börö me iforomaʼö woʼameʼegö tödö soroi ba dödö mamagu, ato nifahaʼönia ba Zura Niʼamoniʼö si tedou ba wamati. Ba adöni göi dödö bapagu ba zindruhu. Tölu hari me no aefa mate mamagu, tokea ndraʼaga me möi bapagu ba nahia gangowuloa ba ifondrondrongo huhuo sebua. Iʼotarai daʼö, lö iböhöli ba wangondrasi angowuloa sagötö zi 26 fakhe faʼara. Hewaʼae na lö mubayagö idanö bapagu, hizaʼi lafatunö khögu ira satua sokubaloi wa ero migu yaʼia zi oföna tohare na mufalua gangowuloa.

No toröi-röi ba dödögu duma-duma niforomaʼö mamagu ba simanö göi ndra akhigu si datölu ono alawe. Yaʼira si datölu andre, lö faröi ira ba wangai halöwö khö Yehowa ba fao ira khö woʼomora. Darua ndra akhigu sangai halöwö ba gödo ndraha, samösa ba Portugal ba samösa tö ba Haiti.

Iadaʼa, yaʼo hegöi Randi mangai halöwö ndraʼaga tobali perintis istimewa ba Hamilton, Ontario. Me mangai halöwö ndraʼaga tobali satua samasui, faoga khö ndra talifusöda ba wamalukhaisi mangawuli niha si no irai falukha khöra hegöi ba wamahaʼö niha nifahaʼöra ba Zura Niʼamoniʼö. Hizaʼi, iadaʼa omuso dödöma me maʼila tedou niha nifahaʼöma ba Zura Niʼamoniʼö. Ba börö me itugu fahuwu ndraʼaga khö ndra talifusöda ba mbanua niha Keriso si bohou si farahu yaʼaga, marasoi wa teʼabölöʼö ndraʼaga ba lö tebulö fao khöma Yehowa ba ginötö waʼabasaki hegöi faʼomuso dödö.

Na ifuli itörö tödöma zalua ba waʼaurima, maʼandrö saohagölö börö me so niha soʼameʼegö tödö yaʼaga ba omasiga göi maforomaʼö ’woʼameʼegö tödö’ niha böʼö, ba maforege göi wamarou tödöra ba wangai halöwö khö Yehowa. (2 Ko. 7:6, 7) Duma-dumania ba zi sambua ösi nomo, mangai halöwö safönu inötö woʼomonia ira alawe, ononia ono matua, hegöi ononia ono alawe. Manofudo khö woʼomonia ira matua, hadia no irai so ba wangera-ngerania enaʼö tobali ia perintis. Imane wanema ligu, no utuhini datölu perintis. Daʼö wa ufuli usofu khönia, ”Hadia abölö sökhi wotuhinimö yaʼira moroi khö Yehowa?” Ufarou dödönia enaʼö tola irasoi waʼomuso dödö tobali perintis. Ba önö waŵa aefa daʼö merintis ia.

Yaʼo hegöi Randi, lö aetu matutunö gamuata Yehowa sahöli-höli dödö ba ”ngaʼötö si tohare dania”. Ba matötöna enaʼö tola larasoi waʼomuso dödö ba halöwö fanuriaigö simane nirasoima.—Si. 71:17, 18.