1-2. Hana wa tola mufagölösi niha Keriso simane tomosa salawa? (1 Korindro 15:58)

 BA GANGOHORITA ndröfi 1970-an, so sambua domosa salawa, faʼalawania 60 tingkat nifazökhi ba Tokyo, Jepang. Asese alua ndruru danö ba mbanua andrö. Hizaʼi, hana wa lö adudu domosa andrö? Börö me sökhi ba aro wamazökhi yaʼia, irege lö adudu na ilau ndruru danö. Moguna simane tomosa andrö niha Keriso. Hadia geluahania?

² Moguna aro ba lö fatandro niha Keriso. Aro ba lö mangiwa ita ba woloʼö oroisa Yehowa hegöi goi-goinia. (Baso 1 Korindro 15:58.) Moguna göi lö tebulö moloʼö ita. Baero daʼö, na tola ”lö fatandro” ita ba ginötö moguna. (Yak. 3:17) Na taʼokhögö lala wangera-ngera si tefaudu, lö talafo fatandro ita mazui tawaʼö tola-tola manö gofu hadia ia. Ba artikel daʼa, tatutunö dania hewisa enaʼö lö tebulö aro ita. Tatutunö göi lima lala niʼogunaʼö Zatana ba wowuwu angetulada ba hewisa ita wolawa daʼö.

3. Hadia manö goroisa nibeʼe Yehowa ba Halöwö Zinenge 15:28, 29?

³ Börö me Yehowa Zamazökhi Oroisa Fondrege Zalawa, lö tebulö ihaogö wamaʼema oroisania ba nono mbanuania. (Yes. 33:22) Duma-dumania, iʼogunaʼö ndra mboto solohe me abad siföföna, ba wangombakha ba niha Keriso wa moguna aro ira ba zi tölu ngawalö andre: (1) ba wanimbagö famosumange adu, ba ha Yehowa zinangea mufosumange, (2) ba woloʼö  oroisa Yehowa ba wangamoniʼö do, ba (3) ba woloʼö goi-goi Yehowa salawa sanandrösa ba gamuata si teʼodane-dane ba Zura Niʼamoniʼö. (Baso Halöwö Zinenge 15:28, 29.) Hewisa ita iadaʼa enaʼö lö tebulö aro ba woloʼö si tölu ngawalö andre?

4. Hewisa wangoromaʼöda wa ha Yehowa nifosumangeda? (Famaʼeleʼö 4:11)

⁴ Tatimbagö wamosumange adu, ha Yehowa nifosumangeda. Ibeʼe fareta ba ndraono Gizaraʼeli Yehowa enaʼö ha yaʼia nifosumange. (5 Mo. 5:6-10) Me itandraigö Yesu Afökha, ifatunö Yesu wa Yehowa zinangea mufosumange. (Mat. 4:8-10) Daʼö mbörö wa lö tafosumange nadu. Lö göi tahöni-höni niha gulidanö. Duma-dumania, lö tasuno-suno ndra sondröniaʼö ba agama, sondröniaʼö ba politik, atlet, hegöi ira artis. Hizaʼi, ha Yehowa nifosumangeda, ”samazökhi fefu hadia ia” ba lö faröi ita khönia.—Baso Wamaʼeleʼö 4:11.

5. Hana wa taʼoʼö goroisa Yehowa sanandrösa ba wangamoniʼö do hegöi faʼauri?

⁵ Taʼoʼö goroisa Yehowa sanandrösa ba wangamoniʼö do hegöi faʼauri. Hadia mbörö? Börö me imane Yehowa wa do andrö muʼamaedolagö ia faʼauri, ba faʼauri no buala sebua böli nibeʼenia. (3 Mo. 17:14) Me awena itehegö Yehowa ba niha gulidanö wemanga nagole gurifö, lö itehegö khöra wemanga do. (1 Mo. 9:4) Ifuli zui iwaʼö daʼö me ibeʼe Goroisa Moze ba ndraono Gizaraʼeli. (3 Mo. 17:10) Ba gafuriata, iʼogunaʼö ndra boto solohe me abad siföföna ba wameʼe fanuturu lala andrö ba niha Keriso enaʼö ’laʼaröuʼö ira moroi ba ndro’. (Hal. 15:28, 29) Moguna taʼoʼö fareta daʼa ba ginötö tahalö gangetula sanandrösa ba wamadöhö fökhöda. b

6. Hewisa woloʼöda goi-goi salawa khö Yehowa sanandrösa ba gamuata?

⁶ Taʼodödögö woloʼö goi-goi salawa khö Yehowa sanandrösa ba gamuata. (Heb. 13:4) Iʼamenesi ita sinenge sotöi Faulo enaʼö ’tabunu’ gisö-isö dödö ba gulidanö andre. Eluahania, moguna taforege ba wangeheta fefu gisö-isö dödö si fasala. Lö tafaigi mazui tafalua gofu hadia ia zi tola mondrönisi tödöda ba wamalua amuata fohorö. (Kol. 3:5; Yob. 31:1) Ba ginötö so wondrönisi dödö ba woʼangeragö mazui ba wamalua sala, moguna taʼanemaiʼö tatimbagö daʼö börö me tola ifakiko wahuwusada khö Lowalangi.

7. Hadia gangetula sinangea tahalö, ba hadia mbörö?

⁷ Omasi Yehowa na taʼoʼö goroisania soroi ba dödö. (Rom. 6:17) Fefu wanuturu lala hegöi oroisania, oi si sökhi khöda daʼö ba tebai tafili-fili hezo zomasi ita taʼoʼö. (Yes. 48:17, 18; 1 Ko. 6:9, 10) Taforege sibai ba wangomusoiʼö tödö Yehowa, ba fagölö nirasoida simane nirasoi zanura sinunö me imane, ”No uhalö gangetula ba woloʼö amakhoitamö si lö mamalö-malö, irugi gamozua.” (Si. 119:112) Hizaʼi, iforege sibai Satana ba wowuwu angetulada. Hewisa wamaluania daʼö?

8. Hewisa wangogunaʼö Zatana famakao ba wowuwu angetulada?

⁸ Famakao. Iʼogunaʼö Afökha ngawalö wolohi hegöi faʼabasaki ba wowuwu angetulada. Omasi ia ’iʼa’ ita mazui ifakiko wahuwusada khö Yehowa. (1 Fe. 5:8) Niha Keriso me abad siföföna, lafetaʼu, laböbözi, ba labunu ira, börö me lahalö gangetula enaʼö lö faröi ira. (Hal. 5:27, 28, 40; 7:54-60) Irugi iadaʼa, lö iböhöli Satana ba wamakao ono mbanua Lowalangi. Ba Rusia hegöi ba soi tanö böʼö, abölö-bölö sibai wamakao nifalua ndra samadaö khö ndra Samaduhuʼö  Yehowa mazui laʼogunaʼö lala böʼö ba wosuwö ira talifusöda.

9. Beʼe duma-duma hewisa Zatana wangogunaʼö fanandraigö si lö oroma.

⁹ Fanandraigö si lö oroma. Baero wamakao, iʼogunaʼö ’waʼonekhe’ göi Satana. (Ef. 6:11) Nehegö zi no irai alua khö dalifusöda sotöi Bob. Me edöna laʼoperasi ia ba rumah sakit, ifatunö khö ndra doto wa gofu hadia ia zalua lö itema ndro. Iʼameʼegö tödö gangetulania andrö doto. Hizaʼi, ba mbongi fatua lö laʼoperasi ia, möi doto anestesi ba mbateʼe Bob me no aefa mofanö nösi nomonia. Ifatunö khö Bob wa lö labeʼe khönia ndro, hewaʼae simanö moguna lahenaigö manö. Te so ba wangera-ngera doto andrö wa tola tebulö gangetula Bob na no mofanö nösi nomonia. Hizaʼi, lö tebulö gangetula Bob. Iwaʼö wa lö itemaʼö ndro gofu hadia ia zalua.

10. Hana wa möi famaʼalada lala wangera-ngera niha? (1 Korindro 3:19, 20)

¹⁰ Lala wangera-ngera niha. Na taʼogunaʼö lala wangera-ngera niha, tola taʼosiwawöi Yehowa hegöi goi-goinia. (Baso 1 Korindro 3:19, 20.) ”Faʼatua-tua niha gulidanö andre” asese idönisi ita ba wamalua sala. Me föna, so ösa niha ba mbanua niha Keriso Feregamo hegöi Tiatira, tedönisi dödöra ba niha si so ba zi fasuira samalua amuata wohorö hegöi fanömba adu. Ibeʼe mene-mene sabeʼe Yesu ba zi dombua banua Niha Keriso andrö börö me fatema ba dödöra wamalua amuata wohorö. (Fam. 2:14, 20) Iadaʼa göi, ladönisi dödöda ba woloʼö lala wangera-ngera si fasala. Tola manö lawaʼö khöda ösi nomoda hegöi si fahuwu khöda wa talafo abeʼe goroisa Yehowa ba lö moguna muʼoʼö daʼö. Duma-dumania, te lamane wangumaʼö, ’Na daʼö zomasiʼö, falua manö’, mazui lawaʼö ’Lö moguna taʼoʼö goi-goi Zura Niʼamoniʼö si no atua andrö’.

11. Hadia zinangea taʼangelamaisi?

¹¹ Te itaria so ba wangera-ngerada wa ambö aboto ba dödöda wanuturu lala nibeʼe Yehowa. Te aolo dödöda ba ’wosawö si no tesura’. (1 Ko. 4:6) Daʼö horö nifalua ndra sondröniaʼö agama ba götö Yesu. Lanönö goi-goira samösa si lö musura ba Goroisa Moze. Me lafalua daʼö, ato niha si tefakao. (Mat. 23:4) Iadaʼa, no ihaogö ibeʼe wanuturu lala Yehowa, iʼogunaʼö Daromalinia hegöi organisasinia. Lö hadöi dane-dane khöda ba wonönö zi no mufakhoi. (Amd. 3:5-7) Börö daʼö, lö tasawö zi no tesura ba Zura Niʼamoniʼö mazui tafazökhi goi-goi khö ndra talifusöda sanandrösa ba waʼaurira samösa.

12. Hewisa Zatana ba wamazawili ”waya-faya si lö boto”?

¹² Faya-faya. Iʼogunaʼö ”waya-faya si lö boto” Satana hegöi ’fangera-ngera niha gulidanö’ ba wamaelungu niha hegöi ba wamoto fahasara dödö. (Kol. 2:8) Me abad siföföna, oya wamahaʼö si teʼodane-dane ba lala wangera-ngera niha, famahaʼö niha Yahudi si lö teʼodane-dane ba Zura Niʼamoniʼö, hegöi famahaʼö sanutunö wa moguna laʼoʼö Goroisa Moze ira niha Keriso. Fefu daʼö oi faya-faya börö me tola tefangoloi wangera-ngera niha moroi ba Gumbu waʼatua-tua sindruhu yaʼia daʼö Yehowa. Iadaʼa, iʼogunaʼö berita hegöi media sosial Satana ba wamazawili turia si tebai mufaduhusi tödö hegöi turia famaelungu sotuhini politik. Oya informasi si fasala simane daʼö sagötö pandemi COVID-19. c Lua-luania, ato niha saombö tödö. Hizaʼi, börö me lafondrondrongo wanuturu lala moroi ba organisasi, tola lasöndra waʼahono dödö ira Samaduhuʼö Yehowa.—Mat. 24:45.

13. Hana wa moguna mangelama ita ba ngawalö hadia ia zi tola mameʼe khöda famangoloi dödö?

 ¹³ Ngawalö zi tola mameʼe khöda famangoloi dödö. Moguna taʼosambuaʼö dödöda ba ngawalö ”hadia zabölö moguna”. (Fil. 1:9, 10) Oya ngawalö zi tola mangohorigö inötö hegöi faʼabölöda. Duma-dumania, tola mangoloi dödöda na talafo taʼosambuaʼö wangera-ngerada ba nifaluada sero maʼökhö, simane femanga, famadu idanö, fanörö-nörö hegöi fohalöwö. (Luk. 21:34, 35) Baero daʼö, asese tarongo duria sanandrösa ba sosial hegöi politik. Böi tatehegö mangoloi dödöda ba daʼö, mazui ibörögö tumbu ba dödöda hegöi fangera-ngerada ba wotuhini fazamösa ba gotaluara. Daʼö lala niʼogunaʼö Zatana ba wowuwu angetulada ba wamalua satulö. Iadaʼa, datatutunö hewisa ita ba wolawa famorege nifaluania andrö enaʼö lö tebulö aro ita.

14. Hadia lala si tola manolo yaʼita enaʼö lö tebulö faʼawö ita khö Yehowa?

¹⁴ Angerönusi hadia mbörö wa ölulu waʼaurimö ba öfabayagöʼö ndraʼugö idanö. Öhalö gangetula daʼö börö me omasi ndraʼugö faʼawö khö Yehowa. Tandraigö törö-törö tödöu hadia zamaduhuʼö ba dödöu wa no ösöndra zindruhu. Öfahaʼö ndraʼugö sanandrösa khö Yehowa ba öbörögö ökaoni ia tobali Ama nifosumange ba niʼomasiʼöu. Ibörögö tumbu wamatiu ba tefarou dödöu ba wamalalini era-erau. Öböhöli wamalua ngawalö zi fatuwu khö Yehowa, ba öbörögö öfalua ngawalö zomasi ia. Ösöndra waʼahono dödö börö me öʼila wa no iʼefaʼö zalamö Yehowa. (Si. 32:1, 2) Öʼondrasi gangowuloa ba öbörögö öfatunö ba niha böʼö sanandrösa ba ngawalö zahöli-höli dödö si no öfahaʼö yaʼugö. Iadaʼa, me no ölulu waʼaurimö ba öbayagö ndraʼugö idanö, no so ndraʼugö ba lala saekhu ba waʼauri ba öhalö gangetula enaʼö lö tebulö so ndraʼugö ba lala andrö.—Mat. 7:13, 14.

15. Hadia mbuania na öfahaʼö ndraʼugö ba öʼangerönusi Daromali Lowalangi?

¹⁵ Fahaʼö ndraʼugö ba angerönusi Daromali  Lowalangi. Simane eu, tola aro ia na abakha waʼania. Simanö göi ita, tola aro na taʼokhögö wamati saro ba Daromali Lowalangi. Itugu abakha waʼa geu ba itugu manana misa waʼania. Simanö göi ita, na tafahaʼö ba taʼangerönusi Daromali Lowalangi tola itugu mamati ita ba faduhu dödöda wa no si sökhi nifahaʼö Yehowa. (Kol. 2:6, 7) Angeragö hewisa wanuturu lala, mene-mene, hegöi folumöʼö moroi khö Yehowa moguna ba nono mbanuania me götö föna. Duma-dumania, ba zi sambua angilata niʼila Hezekieli, inehegö samösa malaʼika sanuʼa osali. Angilata andrö zangaʼaroʼö Hezekieli ba sanolo yaʼita enaʼö taʼila lala wamalua famosumange satulö moloʼö goi-goi Yehowa. d (Hez. 40:1-4; 43:10-12) Tola tatema mbua na tabeʼe ginötöda ba wamahaʼö, hegöi ba woʼangerönusi ngawalö gö sabeʼe ba Daromali Lowalangi.

16. Hewisa waʼaro dödö tola möi folumöʼö Bob? (Sinunö 112:7)

¹⁶ Aroʼö dödöu. Imane Razo Dawido wa lö irai mangiwa waʼomasinia khö Yehowa. Manunö ia, ”Aro dödögu yaʼugö Lowalangi.” (Si. 57:7) Tola göi taʼokhögö dödö saro ba sindruhu-ndruhu faduhu dödöda khö Yehowa. (Baso Zinunö 112:7.) Nehegö duma-duma dalifusöda Bob si no mutötöi moroi yawa. Tola möi fanolonia dödö saro. Me lafatunö khönia wa lahenaigö khönia ndro, iʼanemaiʼö ibeʼe wanema li wa hasambalö mofanö ia moroi ba rumah sakit na labeʼe khönia ndro. Ba gafuriata imane Bob, ”Maʼifu lö khögu faʼaombö dödö ba faʼabu dödö.”

17. Hadia wamahaʼö nihalöda moroi ba zalua khö Bob? (Faigi göi gambara.)

¹⁷ Tola ihalö gangetula satulö Bob börö me no ihalö gangetula saro fatua lö möi ia ba rumah sakit. Si oföna, omasi ia ba wangomusoiʼö tödö Yehowa. Si dua, ihaogö wamahaʼö yaʼia ba Zura Niʼamoniʼö hegöi ba publikasi sanandrösa ba wangamoniʼö do hegöi faʼauri. Si tölu, faduhu dödönia wa ifahowuʼö ia Yehowa na iʼoʼö wanuturu lala andrö. Tola göi taʼokhögö dödö saro gofu hadia ia wanandraigö nitaögöda.

18. Hewisa duma-duma Baraki möi fanoloda enaʼö tafaduhusi tödö Yehowa? (Faigi gambara ba guli majalah.)

 ¹⁸ Faduhusi tödö Yehowa. Nehegö hewisa Baraki, samösa sondröniaʼö saradadu ba ndraono Gizaraʼeli, isöndra waʼamöna börö me ifaduhusi tödö wanuturu lala nibeʼe Yehowa. Me luo daʼö, lö hadöi baluse hegöi toho niʼokhögö ndraono Gizaraʼeli. Hizaʼi, ifatenge Mbaraki Yehowa ba wanuwö saradadu Ganaʼana sangokhögö fakake wasuwöta nidöniaʼö Zisera. (Sangu. 5:8) Baero daʼö, samaʼeleʼö sotöi Debora, ifatunö khö Mbaraki enaʼö möi ia tou moroi ba hili ba ilau fasuwö ba danö saloʼo. Sindruhunia, fasuwöta ba danö saloʼo no hare daʼö khö Zisera börö me iʼokhögö 900 gureta wasuwöta. Hewaʼae simanö, lö tebulö iʼoʼö wanuturu lala andrö Baraki. Me möi tou zaradadunia moroi ba Hili Dabora, iʼaekhugö deu sabölö-bölö Yehowa irege teʼuʼu ba dambu gureta wasuwöta khö Zisera, ba möna Mbaraki ibeʼe Yehowa. (Sangu. 4:1-7, 10, 13-16) Hadia wamahaʼönia? Tola mofozu ita ibeʼe Yehowa na tafaduhusi tödö ia ba taʼoʼö wanuturu lala nibeʼe organisasinia.—5 Mo. 31:6.

19. Hana wa öhalö gangetula enaʼö lö tebulö aro ndraʼugö?

¹⁹ Moguna taforege enaʼö lö tebulö aro ita ba gulidanö si lö sökhi andre. (1 Ti. 6:11, 12; 2 Fe. 3:17) Yalötebulö tahalö gangetula enaʼö böi mangiwa ita hewaʼae na so wolohi, fanandraigö si lö oroma, lala wangera-ngera niha gulidanö, waya-faya si lö boto, hegöi ngawalö zi tola mameʼe khöda famangoloi dödö. (Ef. 4:14) Yalötebulö aro ita, tafosumange Yehowa, ba taʼoʼö fefu goroisania. Moguna göi lö fatandro ita. Ba artikel aefa daʼa, tatutunö hewisa woloʼöda Yehowa hegöi Yesu si tobali duma-duma soʼahonoa khöda ba wangoromaʼö faʼalöfatandro.