1-2. (a) Hadia wamangelama nibeʼe Yesu khö ndra nifahaʼönia? (b) Hana wa laröi Yesu ira nifahaʼönia? (Faigi göi gambara.)

 ”AOHA sa gölö dödö, ba no ambö faʼabölö nösi.” a (Mat. 26:41b) Moroi ba wehede daʼö, iforomaʼö Yesu wa aboto ba dödönia wa lö moʼahonoa ita ba itaria tafalua zala. Hizaʼi, fehedenia göi andrö zamasugi ba dödöda enaʼö böi talafo abeʼe dödöda khöda samösa. Fatua lö iwaʼö wehede daʼö Yesu, si fao faʼafaduhu dödö lafaduhuʼö ira nifahaʼönia wa lö irai laröi ia. (Mat. 26:35) Sökhi sibai gangetula nihalöra. Hizaʼi, lö aboto ba dödöra wa tola manö alio awuwu wamatira na göna ira fanandraigö. Daʼö mbörö wa ifangelama ira Yesu, ”Böi miförö ba böi miböhöli wangandrö, enaʼö böi aekhu ami ba wamalua horö.”—Mat. 26:41a.

² Alimagö sibai, lö lafalua niwaʼö Yesu khöra. Me laraʼu Yesu, hadia nifalua ndra nifahaʼönia? Börö me lö mangelama ira, laröi Yesu ba lö lafalua zi no lawaʼö.—Mat. 26:56.

3. (a) Enaʼö lö faröi ita khö Yehowa, hana wa tebai abeʼe dödöda khöda samösa? (b) Hadia nitutunöda ba wamahaʼö daʼa?

³ Böi abeʼe dödöda khöda samösa. Sindruhu sa, moguna tahalö gangetula enaʼö lö tatehegö so zi möi famandröndröuda khö Yehowa. Hewaʼae simanö, yaʼita niha si lö moʼahonoa ba alio sibai aolo dödöda ba wamalua sala. (Rom. 5:12; 7:​21-23) Na lö mangelama ita, tola manö aekhu ita ba lala si lö atulö ba  tafalua zala. Enaʼö lö faröi ita khö Yehowa hegöi khö Nononia, moguna taʼoʼö mene-mene Yesu enaʼö tafaʼanö ita wolawa fanandraigö. Famahaʼö daʼa, tobali fanoloda ba wamalua daʼö. Si oföna, datatutunö hezo manö moguna mangelama ita. Aefa daʼö, tatutunö göi hewisa lalada ba wamaʼanö yaʼita ba wolawa fanandraigö. Ba safuria, hewisa lala enaʼö lö tebulö mangelama ita.

HEZO MANÖ MANGELAMA ITA?

4-5. Hana wa moguna mangelama ita hewaʼae ha horö side-ide daʼö?

⁴ Tola tekiko wahuwusada khö Yehowa hewaʼae ha horö side-ide nifaluada andrö börö me tola idönisi dödöda ba wamalua horö sebua.

⁵ Fefu ita tataögö wondrönisi dödö ba wamalua horö. Hizaʼi, no faböʼö-böʼö horö salio tedönisi dödöda. Duma-dumania, so zalio tedönisi tödö ba wamalua amuata fohorö. So göi zalio tedönisi tödö ba wamalua masturbasi mazui pornografi. So göi zamorege ba wolawa faʼataʼu ba niha, faʼasiliyawa mazui faʼagalio aukhu, ba oya nasa danö böʼönia. Simane niwaʼö Yakobo, ”Dozi niha tetandraigö na tedönisi ba teböbö ia ba gisö-isö dödönia samösa.”—Yak. 1:14.

6. Hadia zinangea tafaduhuʼö?

⁶ Hadia öʼila hezo alio tedönisi dödömö? Böi limo ndraʼugö samösa ba böi so ba wangera-ngeramö wa no aro ndraʼugö ba wamati mazui lö si tola mondrönisi tödömö. (1 Yo. 1:8) Törö tödöu wa no irai iwaʼö Faulo wa niha ”saro famati” tola tedönisi dödöra ba wamalua horö na lö mangelama ira. (Gal. 6:1) Böi talimo ita samösa ba datafaduhuʼö hezo manö alio tedönisi dödöda.—2 Ko. 13:5.

7. Hezo abölö taʼosambuaʼö dödöda? Beʼe duma-duma.

⁷ Na no taʼila hezo alio tedönisi dödöda, hadia zinangea tafalua? Taforege ba wolawa fondrönisi dödö andrö! Duma-dumania, ba götö Zura Niʼamoniʼö, salio ladudugö udu yaʼia daʼö bawa göli. Daʼö mbörö wa ato ndra saradadu nifataro ba wanaro bawa göli. Simane daʼö göi ita, moguna taʼosambuaʼö dödöda ba zi möi fondrönisi dödö enaʼö no tafaʼanö ita na alua wanandraigö.—1 Ko. 9:27.

HEWISA LALADA BA WAMAʼANÖ YAʼITA?

8-9. Hadia menaʼö zi tola ifalua ono matua nitutunö ba Gamaedola faza 7 enaʼö lö ifalua horö sebua? (Amaedola 7:​8, 9, 13, 14, 21)

⁸ Hewisa wolumöʼöda yaʼita enaʼö lö tafalua horö? Nehegö hadia wamahaʼö si tola tahalö  moroi khö nono matua nitutunö ba Gamaedola faza 7. Ifalua waʼorudu khö ndra alawe sohorö-horö. Ifatunö khöda ba ayati 22 wa ”iʼanemaiʼö” iʼoʼö ndra alawe daʼö. Hizaʼi, simane nitutunö ba ayati moroi yawa, so ösa gangetula si lö tefaudu nifalua nono matua andrö irege arara manö tedönisi dödönia wamalua horö.

⁹ Hadia zondrönisi tödönia ba wamalua horö? Si oföna, me no aekhu luo ”itörö lala sahatö ba nomo ndra alawe [sohorö-horö] andrö”. Aefa daʼö, ilau ia ba lala saekhu ba nomo ndra alawe daʼö. (Baso Gamaedola 7:​8, 9.) Me iʼila ndra alawe daʼö, lö iʼanemaiʼö mofanö ia. Lö itimbagö göi me iʼuma ia ira alawe daʼö ba ifondrondrongo me itutunö wa no ibeʼe zumange fangatulö enaʼö iwaʼö tödönia ono matua andrö wa tenga niha si lö sökhi ndra alawe daʼa. (Baso Gamaedola 7:​13, 14, 21.) Na lö menaʼö ifalua fefu daʼö ono matua andrö, tatu manö tola itimbagö wondrönisi dödö ba lö ifalua horö.

10. Hewisa göi wa tola so niha samalua horö simane nifalua nono matua andrö iadaʼa?

¹⁰ Nisura Zelomo andre zangoromaʼö hadia zi tola manö alua ba niha samosumange Yehowa iadaʼa. Te no ifalua horö sebua si samösa niha ba iwaʼö tödönia wa lö idöna-döna waʼalua daʼö. Hizaʼi, na ifuli ihaogö iʼangeragö zalua andrö, tola manö iʼila wa so ösa gangetula si fasala nihalönia sondrönisi tödönia wamalua horö. Te no ifili zi fahuwu khönia si lö mangomasiʼö Yehowa, ifaigi hiburan si lö sökhi, ibokai situs web mazui iʼondrasi nahia sinangea latimbagö ira niha Keriso. Tola manö göi no ibato wangandrö, lö saʼae ibaso Zura Niʼamoniʼö, lö möi ia ba gangowuloa, ba no iböhöli wanuriaigö. Simane ono matua nitutunö ba zura Gamaedola, tebai iwaʼö wa ”iʼanemaiʼö” ifalua horö andrö ba zi lö idöna-döna, börö me sindruhunia oya gangetula si fasala nihalönia fatua lö ifalua horö andrö.

11. Hadia zinangea tafalua enaʼö lö aekhu ita ba horö sebua?

¹¹ Hadia wamahaʼönia khöda? Moguna tatimbagö wamalua horö, ba tatimbagö göi gamuata sondrönisi tödöda ba wamalua horö. Itandrösaigö daʼa Selomo me no aefa isura waö-waö sanandrösa khö nono matua hegöi ira alawe sohorö-horö andrö. Imane sanandrösa khö ndra alawe daʼö, ”Böi elungu ndraʼugö weʼamöi ba lalania.” (Amd. 7:25) Imane nasa, ”Aröuʼö ndraʼugö khönia; böi hatöʼö ndraʼugö ba mbawandruhö nomonia.” (Amd. 5:​3, 8) Tobali, enaʼö lö tafalua horö, moguna taʼaröuʼö ita moroi ba ngawalö hadia ia zi möi fondrönisi dödöda ba wamalua horö. b Hewaʼae sindruhunia lö fasala daʼö ba wamaigi niha Keriso, hizaʼi na möi fondrönisi dödöda daʼö ba wamalua horö, abölö sökhi böi tafalua ia.—Mat. 5:​29, 30.

12. Hadia gangetula nihalö Yobi, ba hewisa wa möi fanolonia daʼö ba wolawa fanandraigö? (Yobi 31:1)

¹² Enaʼö lö aekhu ita ba wamalua horö, moguna tahalö gangetula saro. Daʼö nifalua Yobi. ’No fawuʼu li ia ba hörönia’ wa lö ilekeʼö ndra alawe böʼö si fao fangisö. (Baso Yobi 31:​1, nis.) Börö me no igogohe waʼaro dödönia, daʼö zanolo yaʼia enaʼö lö ifalua horö. Tola göi tahalö gangetula ba wanimbagö fefu zi tola mondrönisi tödöda ba wamalua horö.

13. Hana wa moguna mangelama ita sanandrösa ba niʼera-erada? (Faigi göi gambara.)

¹³ Moguna mangelama ita sanandrösa ba niʼera-erada. (2 Mo. 20:17) So ösa niha sangumaʼö wa lö fasala na iʼera-era wamalua isö-isö dödö si fasala, fokonia lö ifalua. Hizaʼi, fasala lala wangera-ngera simane daʼö. Na lö iböhöli woʼera-era gisö-isö dödönia si fasala, hasambalö  itugu ebua waʼedönania ba wamalua horö ba abua khönia wanimbagö si lö sökhi. Tatu manö, itaria tumbu ba wangera-ngerada zi lö sökhi. Na alua daʼö, moguna iʼanemaiʼö tatimbagö ia ba taʼasogö ba wangera-ngerada ngawalö zatulö. Na tafalua daʼö, no tatimbagö gisö-isö dödö si fasala enaʼö lö tobali ia fanandraigö sebua si tola mondrönisi tödöda ba wamalua horö sebua.—Fil. 4:8; Kol. 3:2; Yak. 1:​13-15.

14. Hadia nasa zanolo yaʼita ba wolawa fanandraigö?

¹⁴ Hadia nasa zinangea tafalua enaʼö lö tedönisi dödöda wamalua horö? Moguna sindruhu-ndruhu faduhu dödöda wa hasambalö tatema mbua si sökhi na taʼoʼö goroisa Yehowa. Itaria abua khöda ba wamaudugö fangera-ngerada mazui isö-isö dödöda ba zomasi Lowalangi. Hizaʼi, hasambalö tasöndra waʼomuso dödö sebua na taforege wamalua daʼö.

15. Na so khöda waʼedöna ba wamalua satulö, hana wa möi fanoloda daʼö ba wolawa gisö-isö dödö si fasala?

¹⁵ Moguna tadouʼö wangokhögö faʼedöna ba wamalua satulö. Na tafahaʼö ita ’wangogorofi si lö sökhi ba taʼomasiʼö zi sökhi’ tola teʼaroʼö dödöda ba wamalua satulö hegöi ba wanimbagö ngawalö zi tola mondrönisi tödöda ba wamalua horö. (Amo. 5:15) Na so khöda waʼedöna ba wamalua satulö, itugu abölö ita ba wolawa fanandraigö salua ba zi lö tadöna-döna.

16. Hewisa halöwö ba wamati möi fanoloda enaʼö lö tebulö mangelama ita? (Faigi göi gambara.)

¹⁶ Hewisa wondrouʼöda faʼedöna ba wamalua satulö? Tola tafalua daʼö na lö taböhöli wamalua halöwö ba wamati sangaʼaroʼö faʼomasida khö Yehowa. Na taʼondrasi gangowuloa ba tafalua halöwö fanuriaigö, no taʼaroʼö waʼedönada ba wangomusoiʼö tödö Yehowa ba lö alio tedönisi dödöda wamalua sala. (Mat. 28:​19, 20; Heb. 10:​24, 25) Na tabaso ba tafahaʼö ita ba Daromali Lowalangi ba taʼangerönusi daʼö, itugu taʼomasiʼö wamalua satulö hegöi ba wangogorofi si lö sökhi. (Yos. 1:8; Si. 1:​2, 3; 119:​97, 101) Törö tödöu wa no irai imane Yesu khö ndra nifahaʼönia, ”Böi miböhöli wangandrö, enaʼö böi aekhu ami ba wamalua horö.” (Mat. 26:41) Na mangandrö ita  khö Namada si so ba zorugo, no tabeʼe khönia ginötö ba wanolo yaʼita ba itugu teʼaroʼö gangetulada ba wangomusoiʼö tödönia.—Yak. 4:8.

BÖI TEBULÖ ANGELAMA

17. Hadia gaoloma dödö Wetero si tobali tandrawa khönia?

¹⁷ Itaria so gaoloma dödöda si no mofozu talawa ba lö saʼae tafalua daʼö. Hizaʼi, te so gaoloma dödöda sinangea talawa irugi iadaʼa. Angeragö duma-duma zinenge sotöi Fetero. Börö waʼataʼunia ba niha, tölu kali iʼosilöʼögö Yesu. (Mat. 26:​69-75) Hizaʼi, me laʼohe ia föna ndra Sangetuʼö Huku, si fao faʼabarani ituriaigö sanandrösa khö Yesu. Tola tamane no mofozu ia ba wolawa faʼataʼu ba niha. (Hal. 5:​27-29) Hewaʼae simanö, hauga fakhe aefa daʼö, lö saʼae fao ia manga khö ndra niha Keriso si tenga niha Yahudi börö ”waʼataʼunia ba niha nisuna”. (Gal. 2:​11, 12) Ifuli mangandrauli gaoloma dödönia si fasala andrö. Tola manö, moguna ilawa daʼö sandrohu faʼaurinia.

18. Hadia zinangea tatörö tödöda sanandrösa ba gaoloma dödöda si fasala?

¹⁸ Simane Fetero, te itaria ifuli talawa gaoloma dödöda si fasala si no mofozu talawa ba zilalö. Duma-dumania, imane si samösa talifusöda ira matua, ”No fulu fakhe mofozu ndraʼo ba wondröi gisö-isö dödö wamaigi pornografi. Hizaʼi, isö-isö dödö daʼö hulö gurifö samuʼi si no maminiʼö yaʼia ba sombalo-baloi inötö ba wemanga yaʼo.” Taʼandrö saohagölö börö me lö awuwu dalifusöda andrö. Aboto ba dödönia wa moguna iforege ero maʼökhö ba wolawa aoloma dödönia si fasala andrö ba te moguna ifalua daʼö sandrohu faʼaurinia ba götö daʼa. Börö wanolo woʼomonia hegöi ira satua sokubaloi, tola mofozu ia ba wolawa gisö-isö dödö wamaigi pornografi.

19. Hadia zinangea tafalua na so gaoloma dödöda si fasala si tebai talawa?

¹⁹ Hadia zinangea tafalua na so gaoloma dödöda si fasala si tebai talawa? Oʼö mene-mene Yesu andre, ”Böi miförö.” Eluahania, tafaʼanö ita ba wolawa fanandraigö. Hewaʼae tawaʼö tödöda wa no aro ita ba wamati, böi tebulö aröuʼö ndraʼugö moroi ba ngawalö hadia ia zi tola mondrönisi tödömö ba wamalua horö. (1 Ko. 10:12) Böi tebulö falua fefu zi möi fanolomö ba wolawa fanandraigö mazui falömoʼahonoamö.  Imane ba Gamaedola 28:​14, ”Lö tebulö waʼomuso dödö niha sangelama.”—2 Fe. 3:14.

HOWU-HOWU NITEMADA NA LÖ TEBULÖ MANGELAMA

20-21. (a) Hadia mbuania khöda na lö tebulö tafaʼanö ita wolawa fanandraigö? (b) Na taforege wolawa fanandraigö, hadia nifalua Yehowa salahida? (2 Korindro 4:7)

²⁰ Datafaduhusi tödö wa hasambalö tatema mbua na lö tebulö tafaʼanö ita ba wolawa fanandraigö. Na tafalua horö, tola manö tarasoi waʼomuso dödö, hizaʼi ha ’faʼomuso dödö si lö arara’ daʼö. (Heb. 11:25) Abölö ebua waʼomuso dödö nirasoida na taʼomusoiʼö dödö Yehowa börö me iwöwöi ita enaʼö tola tafaudugö waʼaurida ba goi-goinia. (1 Mo. 1:27; Si. 19:8) Tola taʼokhögö dödö side-ide si lö sinegu hegöi tötönafö faʼauri si lö aetu ba zi so miföna.—1 Ti. 6:12; 2 Ti. 1:3; Yud. 20, 21.

²¹ Atulö niwaʼö Yesu wa ”no ambö faʼabölö nösi”. Hizaʼi, tenga daʼö geluahania wa lö saʼae si tola tafalua ba wolawa falömoʼahonoada. No ifaʼanö ia Yehowa ba wameʼe khöda faʼabölö. (Baso 2 Korindro 4:7.) Ifabuʼu Yehowa wa hasambalö ibeʼe khöda waʼabölö sahöli-höli dödö. Hizaʼi, moguna taʼofönaiʼö wangogunaʼö faʼabölöda samösa ba wolawa fanandraigö ero maʼökhö. Noro dödöda daʼö. Na no tafalua daʼö, hasambalö ibeʼe wanema li Yehowa ba wangandröda, yaʼia daʼö ibeʼe khöda waʼabölö sahöli-höli dödö ba ginötö moguna ia khöda. (1 Ko. 10:13) Rahu-rahunia, hasambalö mofozu ita ba wolawa fanandraigö na lö tebulö tafaʼanö ita ba mangelama.