1-2. Hadia nitutunö Zura Niʼamoniʼö sanandrösa khö ndra razo samatörö iraono Gizaraʼeli?

 ITUTUNÖ khöda Sura Niʼamoniʼö wa töra 40 ndra matua samatörö tobali razo ba Gizaraʼeli. a So ösa ba gotaluara, no ihaogö wozara-zara Sura Niʼamoniʼö ba wanutunö waö-waö waʼaurira. Itutunö göi khöda wa so ösa razo si sökhi si no irai mamalua sala. Duma-dumania Razo Dawido. Imane Yehowa, ”Enonigu Dawido . . . soloʼö lala andrö khögu soroi ba dödö, ba samalua satulö fönagu.” (1 Ra. 14:8) Hizaʼi, no irai ifalua horö Dawido, ihoröni zi samösa ira alawe si no mangowalu ba iʼalui lala enaʼö mate woʼomo ndra alawe daʼö ba wasuwöta.—2 Sa. 11:​4, 14, 15.

² Itutunö göi khöda Sura Niʼamoniʼö wa ato razo si lö sökhi samalua satulö. Duma-dumania Rehabeamo. Ba wamaigi Yehowa, yaʼia andrö razo si ”lö sökhi”. (2 Ng. 12:14) Hizaʼi, so zatulö nifalua Rehabeamo. Duma-dumania, iʼoʼö niwaʼö Yehowa me iwaʼö khönia Yehowa enaʼö lö möi isuwö zi fulu mado ba itehegö khöra ba wamataro razora samösa. Iʼaʼaroʼö göi mbanua si so barö wamatörönia.—1 Ra. 12:​21-24; 2 Ng. 11:​5-12.

3. Hadia wanofu si tola tumbu ba dödöda, ba hadia nitutunöda ba wamahaʼö daʼa?

³ Börö me lafalua zatulö hegöi si lö atulö ira razo samatörö  iraono Gizaraʼeli, hadia dane-dane khö Yehowa ba wotatugöi wa lö faröi zi samösa razo? Fanema li ba wanofu daʼa zanolo yaʼita enaʼö taʼila hadia niʼandrö Yehowa khöda. Tatutunö dania tölu ngawalö niʼangeragö Yehowa ba ginötö itatugöi hadia sökhi zi samösa razo andrö mazui löʼö: tödöra, famalalini era-era ba faʼalöfaröira ba wamosumange Yehowa.

LAʼOMASIʼÖ YEHOWA SOROI BA DÖDÖRA MAʼASAMBUA

4. Hadia gamaehuta razo si lö faröi faoma razo si faröi?

⁴ Razo si lö faröi, lafosumange Yehowa soroi ba dödöra. b Ifatunö khöda Sura Niʼamoniʼö wa Razo Yozafati ’iʼalui Yehowa soroi ba dödö’. (2 Ng. 22:9) Imane göi sanandrösa khö Yosia, ”Ba zilalö hegöi ba zi so miföna, lö hadöi razo simane Yosia, samuli yaʼia khö Yehowa soroi ba dödö.” (2 Ra. 23:25) Hewisa göi sanandrösa khö Zelomo, samalua si lö sökhi ba gafuriata? Imane Sura Niʼamoniʼö, ”Tenga soroi ba dödö wamosumangenia Lowalangi.” (1 Ra. 11:4) Imane göi sanandrösa khö razo si lö sökhi sotöi Abiyamo, ”Tenga soroi ba dödönia wamosumange Lowalangi Yehowa.”—1 Ra. 15:3.

5. Hadia geluahania mamosumange Yehowa soroi ba dödö? Tutunö.

⁵ Hadia geluahania mamosumange Yehowa soroi ba dödö? Niha samosumange Yehowa soroi ba dödö, lö ifosumange Lowalangi ha börö me no sinangea ifalua daʼö. Hizaʼi, ifalua daʼö börö me iʼomasiʼö ba ilulu waʼaurinia khö Yehowa. Sandrohu faʼaurinia, iforege ba wondrorogö faʼomasi hegöi famosumangenia Yehowa.

6. Hewisa enaʼö lö tebulö tafosumange Yehowa soroi ba dödö? (Amaedola 4:23; Mataiʼo 5:​29, 30)

⁶ Hewisa woloʼöda ndra razo si lö faröi ba sangomasiʼö Yehowa soroi ba dödö? Yaʼia na tatimbagö fefu zi tola mowuwu faʼomasida khö Yehowa. Duma-dumania, hiburan si lö baga, fariawösa si lö sökhi mazui fangomasiʼö kefe hegöi harato. Na taʼila ibörögö so zamakiko faʼomasida khö Yehowa, moguna iʼanemaiʼö tatimbagö daʼö.—Baso Gamaedola 4:23; Mataiʼo 5:​29, 30.

7. Hana wa moguna tatimbagö fefu zi tola mamakiko faʼomasida khö Yehowa?

⁷ Moguna mangelama ita enaʼö lö tebagi dödöda. Na lö mangelama ita, tola manö tumbu ba wangera-ngerada wa lö hadöi si tola mamakiko faʼomasida börö me asese tafalua halöwö ba wamati. Angeragö duma-duma daʼa: Me so ndraʼugö baero ba newali, ibözi ndraʼugö angi sabölö-bölö. Tatu me möiʼö bakha ba nomo, öfake nukha saweʼe-weʼe. Hizaʼi, tenga ha daʼö. Tatu öduhö göi mbawandruhö enaʼö lö möi yomo nangi. Hadia geluahania duma-duma daʼa? Sindruhu sa moguna taʼa gö ba wamati ba tafalua halöwö ba wamati enaʼö aro wahuwusada khö Yehowa. Hizaʼi, tenga ha ndrege daʼö. Moguna amaedola taduhö mbawandruhö mazui tödöda enaʼö lö möi bakha ”nangi” mazui ngawalö gamuata si lö sökhi si no toʼölö manö ba wamaigi niha gulidanö iadaʼa.—Ef. 2:2.

LAFALALINI GERA-ERARA

8-9. Hadia nifalua Razo Dawido hegöi Razo Hizikia me labeʼe khöra mene-mene? (Faigi ba guli majalah.)

⁸ Simane nitutunöda ba wamobörö, ifalua horö sebua Razo Dawido. Hizaʼi, me ifatunö khönia samaʼeleʼö sotöi Natano hewisa dödö Yehowa ba horö nifaluania, si fao fangide-ngideʼö ifalalini gera-erania Dawido. (2 Sa. 12:13) Tenga falimosa wehede famalalini era-era  nifaʼema Dawido khö Natano. Lö ifalua daʼö ha enaʼö faduhu dödö Natano mazui enaʼö lö göna ia fanguhuku. Moroi ba wehedenia nisura ba Zinunö 51, ba daʼö taʼila wa sindruhu-ndruhu maniasa ia ba nifaluania andrö.—Si. 51:​3, 4, 17, superskripsi.

⁹ No göi irai ifalua horö Razo Hizikia. Imane Sura Niʼamoniʼö, ”Mangosebua ia irege mofönu khönia Lowalangi hegöi ba niha Yehuda awö Yeruzalema.” (2 Ng. 32:25) Hana wa tumbu ba dödö Hizikia wangosebua? Te börö me tohude ia ba wamaiginia börö waʼakayo, faʼamönania ba wolawa niha Asiria hegöi me no döhö ia ba dandra sahöli-höli dödö. Tola manö, börö waʼasiliyawa andrö wa ifaʼeleʼö fefu waʼakayo niʼokhögönia ba niha Mbabilonia. Lua-luania, ibeʼe khönia degu-tegu Yesaya samaʼeleʼö. (2 Ra. 20:​12-18) Hizaʼi, simane Dawido, si fao fangide-ngideʼö ifalalini gera-erania Hizikia. (2 Ng. 32:26) Börö daʼö, ba wamaigi Yehowa, Hizikia andre samösa razo si ’lö tebulö mamalua satulö’.—2 Ra. 18:3.

10. Hadia nifalua Razo Amasia me labeʼe khönia mene-mene?

¹⁰ Tenga simane Razo Dawido hegöi Hizikia, ifalua zatulö Razo Amasia ”hizaʼi tenga soroi ba dödönia”. (2 Ng. 25:2) Hana wa tola tawaʼö daʼö? Me no aefa itolo ia Yehowa ba wokalaisi niha Gedomo, ituhi danö Amasia föna lowalangira. c Hizaʼi, me ibeʼe khönia mene-mene samaʼeleʼö khö Yehowa, itimbagö daʼö ba ifofanö zamaʼeleʼö andrö.—2 Ng. 25:​14-16.

11. Moloʼö 2 Korindro 7:​9, 11, hadia zinangea tafalua enaʼö iʼefaʼö horöda Yehowa? (Faigi göi gambara.)

¹¹ Hadia wamahaʼö nihalöda moroi ba zalua andrö? Moguna tafalalini gera-erada ba taforege enaʼö lö saʼae tafalua horö andrö. Hizaʼi, hewisa na labeʼe khöda mene-mene ira satua sokubaloi hewaʼae na tarasoi wa tenga horö sebua daʼö? Böi so ba dödöda wa lö iʼomasiʼö ita Yehowa ba omasi ndra satua sokubaloi ba wamakao faʼaurida. Törö tödöu wa razo si sökhi samatörö iraono Gizaraʼeli, moguna göi mubeʼe khöra mene-mene mazui degu-tegu. (Heb. 12:6) Na labeʼe khöda mene-mene, moguna (1) tatemaʼö daʼö si fao fangide-ngideʼö, (2) tafalua wombulöʼö, ba (3) lö tebulö tafosumange Yehowa soroi ba dödö. Na tafalalini gera-erada, hasambalö iʼefaʼö horöda Yehowa.—Baso 2 Korindro 7:​9, 11.

LAFOSUMANGE YEHOWA BA LALA SI TEFAUDU

12. Hadia gamaehuta sebua ba gotalua razo si lö faröi hegöi razo si faröi?

¹² Ba wamaigi Yehowa, lö faröi zi samösa razo andrö na ifosumange ia ba lala satulö. Moguna göi lafarou dödö nono mbanua Yehowa ba wamalua simane daʼö. Sindruhu sa, itaria lafalua zala. Hizaʼi, ha Yehowa nifosumangera ba laforege ba wangohori adu ba mbanuara. d

13. Hana wa tobali razo si faröi Gahabi ba wamaigi Yehowa?

¹³ Hana wa so ösa razo si faröi ba wamaigi Yehowa? Tatu manö lö fefu nifaluara oi fasala. Duma-dumania, hewaʼae razo si lö sökhi Gahabi, hizaʼi iforomaʼö wangide-ngideʼö ba maniasa ia me no fao ia ba wamunu Naboti. (1 Ra. 21:​27-29) Ifasindro göi mbanua ba Gizaraʼeli ba idöniaʼö wasuwöta ba wolawa nudu. (1 Ra. 20:​21, 29; 22:39) Hizaʼi, lö irai ifalalini gera-erania Ahabi ba horö sebua nifaluania.  Börö wondrönisi dödö moroi khö woʼomonia, idöniaʼö wanömba adu ba Gizaraʼeli.—1 Ra. 21:​25, 26.

14. (a) Hana wa tobali razo si faröi Rehabeamo ba wamaigi Yehowa? (b) Hadia waʼafagölö sasese lafalua ira razo si faröi?

¹⁴ Angeragö duma-duma tanö böʼö razo si faröi, yaʼia daʼö Rehabeamo. Simane nitutunö ba wamobörö, oya ngawalö zi sökhi nifalua Rehabeamo sagötö mamatörö ia. Hizaʼi, me no aro dadaomania ba waʼarazo, lö saʼae iʼoʼö Goroisa Yehowa ba ibörögö wanömba adu. (2 Ng. 12:1) Aefa daʼö, ifuli ia ba wamosumange Yehowa, hizaʼi itaria göi ifuli ia ba wamosumange adu. (1 Ra. 14:​21-24) Sindruhunia, Rehabeamo, Ahabi hegöi razo si faröi tanö böʼö, so sambua waʼafagölö sasese lafalua, yaʼia daʼö fao ira ba latuhi wamosumange faya. Ba daʼa taʼila wa lala nifalua zi samösa razo ba wamosumange Yehowa, daʼö zi tobali suʼa-suʼa hadia razo si sökhi ia mazui tenga.

15. Hana wa tohude sibai wamaigi Yehowa sanandrösa ba wamosumange satulö?

¹⁵ Hana wa tohude sibai wamaigi Yehowa wamosumange satulö nifalua zi samösa razo? Si oföna, tebeʼe noro dödö khö zi samösa razo ba wanolo ono mbanuara enaʼö lafosumange Yehowa ba lala satulö. Aefa daʼö, niha samosumange lowalangi faya, hasambalö tedönisi dödöra wamalua horö tanö böʼö hegöi ba wamakao niha böʼö. (Hos. 4:​1, 2) Baero daʼö, razo hegöi iraono Gizaraʼeli no fawuʼu li ira ba wolulu faʼaurira ha khö Yehowa. Tobali, me lafosumange lowalangi faya, iwaʼö Sura Niʼamoniʼö wa no amaedola lafalua wohorö. (Yer. 3:​8, 9) Niha samalua fohorö, no sindruhu-ndruhu iʼafökhöiʼö dödö ngambatönia. Simanö göi, na fao nono mbanua Yehowa ba  wamosumange faya, no sindruhu-ndruhu iʼafökhöiʼö dödö Yehowa. e—5 Mo. 4:​23, 24.

16. Ba wamaigi Yehowa, hadia gamaehuta niha si sökhi ba niha si lö sökhi?

¹⁶ Hadia wamahaʼö si tola tahalö? Moguna tatimbagö fefu zoʼamakhaita ba wamosumange faya. Hizaʼi, tenga ha daʼö. Moguna göi tafosumange Yehowa ba lala somasi ia ba lö tebulö tafalua daʼö soroi ba dödö. Itutunö Maleakhi samaʼeleʼö hadia gamaehuta niha si sökhi ba niha si lö sökhi moloʼö famaigi Yehowa. Imane, ”Miʼila dania gamaehuta niha si sökhi ba si lö sökhi, niha samosumange Lowalangi ba si löʼö.” (Mal. 3:18) Börö daʼö, lö omasi ita tatehegö gofu hadia ia, simane falömoʼahonoada mazui sala nifaluada tobali fangawuwuda irege taböhöli wamosumange Yehowa. Sindruhunia, no horö sebua na taböhöli wamosumange Yehowa.

17. Hana wa moguna tahaogö sibai wamili niha si tobali ngambatöda?

¹⁷ Na lö sangowalu nasa ndraʼugö ba omasiʼö öʼalui ngambatömö, tola itolo ndraʼugö fehede Maleakhi andre ba wamili niha si tefaudu. Angeragö atö daʼa: Tola manö iʼokhögö gamuata si sökhi si samösa niha, hizaʼi na lö ifosumange Lowalangi sindruhu, hadia tola mufotöi ia niha satulö ba wamaigi Yehowa? (2 Ko. 6:14) Na mangowalu ndraʼugö ba niha simane daʼö, hadia tola itolo ndraʼugö enaʼö itugu aro wahuwusami Yehowa? Duma-dumania, tola manö so gamuata si sökhi niʼokhögö ndra foʼomo Zelomo. Hizaʼi, börö me lö lafosumange Yehowa, arara manö ladönisi dödö Zelomo ba wamosumange lowalangi faya irege faröi Zelomo khö Yehowa.—1 Ra. 11:​1, 4.

18. Hadia zinangea lafahaʼö ira satua khö ndraonora?

 ¹⁸ Yaʼami satua, miʼogunaʼö duma-duma razo si no mututunö ba Zura Niʼamoniʼö ba wanolo iraonomi enaʼö owölö-ölö ira wamosumange Yehowa. Tolo ira enaʼö laʼila wa razo satulö ba wamaigi Yehowa yaʼia daʼö razo samosumange yaʼia ba samarou ono mbanuania ba wamosumange Yehowa. Moroi ba wehede hegöi nifaluami, miforomaʼö wa abölö miʼofönaiʼö ngawalö zi tola mangahatöʼö yaʼami khö Yehowa, simane fombaso Sura Niʼamoniʼö, feʼamöi ba gangowuloa, hegöi fanuriaigö. (Mat. 6:33) Moguna laʼokhögö wahuwusa saro iraonomi khö Yehowa ba lafosumange ia börö me omasi ira, tenga börö me Samaduhuʼö Yehowa zatuara. Na lö laʼokhögö waʼaboto ba dödö simane daʼö, tola manö lawaʼö tödöra wa lö moguna sibai wamosumange Yehowa mazui laböhöli wamosumange yaʼia.

19. Hadia dötönafö niʼokhögö niha si no mondröi Yehowa? (Faigi göi kotak ” Tola Mifuli Ami khö Yehowa!”)

¹⁹ Na iböhöli si samösa niha wamosumange Yehowa, hadia daʼö geluahania tebai saʼae tobali ia si fahuwu khö Yehowa? Tenga. Tola nasa ifalalini gera-erania ba ifuli ia khö Yehowa. Hizaʼi, moguna so khönia wangide-ngideʼö ba itemaʼö wanolo moroi khö ndra satua sokubaloi. (Yak. 5:14) Tatu manö, abölö ebua mböli wahuwusania khö Yehowa moroi ba wamorege si no ifalua!

20. Hewisa wamaigi Yehowa ita na taʼoʼö duma-duma razo si lö faröi?

²⁰ Hadia wamahaʼö nihalöda moroi khö ndra razo samatörö iraono Gizaraʼeli? Tola tobali ita simane razo si lö faröi andrö na tarorogö dödöda ba tafosumange Yehowa soroi ba dödöda maʼasambua. Na no tafalua zala, datafahaʼö ita ba zala andrö, tafalalini gera-erada ba tafalua wombulöʼö. Datatörö göi tödöda wa moguna sibai tafosumange Yehowa ba lala si tefaudu ba zomasi ia. Na lö faröi ita khö Yehowa, tola tobali ndraʼugö niha samalua satulö ba wamaigi Yehowa.