1. Hewisa dödöu sanandrösa ba zindruhu?

 YAʼITA ono mbanua Yehowa, taʼomasiʼö zindruhu si so ba Daromali Lowalangi. Daʼö zi tobali dane-dane wamatida. (Rom. 10:17) Faduhu dödöda wa ifasindro Yehowa mbanua niha Keriso ”si tobali ehomo, ba sotuhini sindruhu”. (1 Ti. 3:15) Si fao faʼaoha gölö taʼoʼö göi niwaʼö ndra ’sondröniaʼö yaʼita’, sanutunö khöda sindruhu moroi ba Zura Niʼamoniʼö ba sameʼe fanuturu lala ba wamalua somasi Lowalangi.—Heb. 13:17.

2. Moloʼö Yakobo 5:​19, hadia zi tola alua khöda hewaʼae no tafahaʼö ita ba zindruhu?

² Hizaʼi, hewaʼae no tatema zindruhu ba aboto ba dödöda wa moguna taʼoʼö wanuturu lala nibeʼe organisasi Yehowa, tola manö nasa elungu ita. (Baso Yakobo 5:19.) Omasi sibai Zatana na lö saʼae tafaduhusi tödö Zura Niʼamoniʼö mazui fanuturu lala moroi ba organisasi Yehowa.—Ef. 4:14.

3. Hana wa moguna tarorogö waʼalöfaröida ba zindruhu? (Efeso 6:​13, 14)

³ Baso Efeso 6:​13, 14. Ba zi lö ara tö, iʼogunaʼö walimosa Satana ba wamaelungu ngawalö soi enaʼö lalawa Yehowa. (Fam. 16:​13, 14) Iforege göi ba wamaelungu ono mbanua Yehowa. (Fam. 12:9) Börö daʼö, moguna sibai tafahaʼö ita ba wamaehusi sindruhu hegöi falimosa, ba dataforege ba woloʼö sindruhu. (Rom. 6:17; 1 Fe. 1:22) Daʼö zotatugöi hadia tola teʼorifi ita na alua wamakao sabölö-bölö!

4. Hadia nitutunöda ba artikel daʼa?

 ⁴ Ba artikel daʼa, tatutunö dombua gamuata sinangea taʼokhögö enaʼö taʼila zindruhu moroi ba Zura Niʼamoniʼö ba taʼoʼö wanuturu lala moroi ba organisasi Yehowa. Tatutunö göi tölu lala sinangea tafalua enaʼö lö faröi ita ba zindruhu.

AMUATA SINANGEA TAʼOKHÖGÖ

5. Hewisa wangataʼufi Yehowa, tola möi fanoloda enaʼö taʼila hezo zindruhu?

⁵ Fangataʼufi Yehowa. Fangataʼufi Yehowa eluahania sindruhu-ndruhu taʼomasiʼö ia irege lö tafalua ngawalö zangafökhöiʼö tödönia. Omasi ita enaʼö omuso dödönia ba nifaluada. Daʼö mbörö wa moguna tafahaʼö ita ba wamaehusi hezo zatulö hegöi si fasala, hezo zindruhu hegöi falimosa. (Amd. 2:​3-6; Heb. 5:14) Lö tatehegö abölö ebua wangataʼufida niha gulidanö moroi ba waʼomasida khö Yehowa, börö me sasesenia lö möi fangomuso dödö Yehowa hadia zomasi niha gulidanö.

6. Hadia nifalua zi dafulu samauze börö me so khöra waʼataʼu ba niha?

⁶ Na abölö ataʼu ita ba niha moroi ba waʼataʼuda khö Lowalangi, tola manö ibörögö taʼerogö zindruhu. Nehegö duma-duma ndra sondröniaʼö si 12 mado si möi mamauze Tanö Amabuʼula. Samauze si dafulu, abölö laʼataʼufi niha Ganaʼana moroi ba waʼomasira khö Yehowa. Lamane ba ndraono Gizaraʼeli sato, ”Tebai talawa ira börö me agabölö sibai ira moroi khöda.” (4 Mo. 13:​27-31) Sindruhu sa, na ba waʼaniha agabölö niha Ganaʼana moroi ba ndraono Gizaraʼeli. Hizaʼi, olifu ira wa tola itolo ira Yehowa. Sindruhunia, na laʼosambuaʼö dödöra ba niʼandrö Yehowa ba ndraono Gizaraʼeli ba laʼangerönusi hadia zi no ifalua khöra Yehowa ba zilalö, tola laʼila wa lö eluaha waʼabölö niha Ganaʼana na mufaedogö  ia ba waʼabölö Yehowa. Hizaʼi, tenga simane samauze si dafulu andrö, omasi Yosua hegöi Kalebi ba wangomusoiʼö tödö Yehowa. Lamane ba ndraono Gizaraʼeli, ”Na omuso dödö Yehowa ba nifaluada, hasambalö wa ibeʼe khöda danö andrö.”—4 Mo. 14:​6-9.

7. Hewisa enaʼö aro wangataʼufida Yehowa? (Faigi göi gambara.)

⁷ Enaʼö aro wangataʼufida Yehowa, moguna taʼosambuaʼö dödöda ba wangomusoiʼö tödönia ba ngawalö gangetula nihalöda. (Si. 16:8) Ba ginötö öbaso Zura Niʼamoniʼö, sofu khöu samösa, ’Na alua khögu zimane daʼa, hadia gangetula nihalögu?’ Duma-dumania, khalaigö atö so ndraʼugö ba gotalua ndraono Gizaraʼeli samondrongo fehede ndra samauze zi dafulu andrö. Hadia faduhu dödöu ba duria andrö ba ibörögö ataʼu ndraʼugö ba niha, mazui hadia ifarou ndraʼugö faʼomasimö khö Yehowa ba wangomusoiʼö tödönia? Hewaʼae atulö nifaʼema Yosua hegöi Kalebi, hizaʼi lö faduhu dödö ndraono Gizaraʼeli maʼafefu. Lua-luania, lö itehegö khöra Yehowa weʼamöi ba Danö Amabuʼula.—4 Mo. 14:​10, 22, 23.

8. Hadia gamuata sinangea tadouʼö, ba hadia mbörö?

⁸ Fangide-ngideʼö. Ifatunö zindruhu Yehowa ha ba niha sangide-ngideʼö yaʼia. (Mat. 11:25) Si fao fangide-ngideʼö no tatemaʼö wanolo ba wamahaʼö yaʼita ba zindruhu. (Hal. 8:​30, 31) Hizaʼi, moguna lö tebulö mangelama ita faböi asiliyawa. Na ibörögö so khöda waʼasiliyawa, tola manö tumbu ba dödöda wa abölö sökhi mbua gera-erada moroi ba goi-goi Zura Niʼamoniʼö hegöi fanuturu lala nibeʼe organisasi Yehowa.

9. Hewisa enaʼö lö tebulö so khöda wangide-ngideʼö?

⁹ Enaʼö lö tebulö so khöda wangide-ngideʼö, moguna tatörö tödöda wa abölö ebua Yehowa moroi khöda. (Si. 8:​3, 4) Tola göi taʼandrö khö Yehowa enaʼö itugu so khöda wangide-ngideʼö hegöi faʼomasi ba wanema famomaha. Hasambalö itolo ita Yehowa enaʼö tola tatanögö ba dödöda wa abölö tohude ba alawa lala wangera-ngerania si no ihenaigö ba Daromalinia hegöi organisasinia moroi ba lala wangera-ngerada. Ba ginötö öbaso Zura Niʼamoniʼö, nehegö hewisa wangomasiʼö Yehowa niha sangide-ngideʼö ba fatuwu ia ba niha sasiliyawa hegöi sangosebua. Forege wangoromaʼö fangide-ngideʼö, mendrua manö na ötema halöwö mazui noro dödö si tohude ba organisasi Yehowa.

LALA ENAʼÖ LÖ FARÖI ITA BA ZINDRUHU

10. Haniha niʼogunaʼö Yehowa ba wameʼe fanuturu lala ba nono mbanuania?

¹⁰ Böi tebulö faduhusi tödö wanuturu lala nibeʼe organisasi Yehowa. Ba götö ndraono Gizaraʼeli me föna, Moze hegöi Yosua niʼogunaʼö Yehowa ba wameʼe fanuturu lala ba nono mbanuania. (Yos. 1:​16, 17) Tefahowuʼö ndraono Gizaraʼeli sagötö latemaʼö Moze hegöi Yosua tobali salahi Lowalangi Yehowa. Ngaotu fakhe aefa daʼö, me awena tefasindro mbanua niha Keriso siföföna, iʼogunaʼö zinenge si 12 Yehowa ba wameʼe fanuturu lala. (Hal. 8:​14, 15) Aefa daʼö, itugu monönö zameʼe fanuturu lala, farahu ba daʼö ndra satua sokubaloi si so ba Yeruzalema. Börö me laʼoʼö ira niha Keriso wanuturu lala moroi khö ndra matua si lö faröi andre, ”itugu aro wamati mbanua niha Keriso ba monönö waʼatora ero maʼökhö”. (Hal. 16:​4, 5) Ba götöda iadaʼa, ifahowuʼö göi ita Yehowa na taʼoʼö wanuturu lala moroi ba organisasinia. Hizaʼi, hewisa dödö Yehowa na tatimbagö wanuturu lala nifaʼema niha nifataronia? Datanehegö wanema linia moroi ba  zalua khö ndraono Gizaraʼeli me numalö ira ba Danö Amabuʼula.

11. Hadia zalua ba ndraono Gizaraʼeli me latimbagö Moze, niha nifili Yehowa ba wondröniaʼö yaʼira? (Faigi göi gambara.)

¹¹ Samuza inötö, me ba lala nasa so ndraono Gizaraʼeli numalö ba Danö Amabuʼula, so ösa ndra sondröniaʼö solawa Moze ba lö lafaduhuʼö halöwö nibeʼe Yehowa khönia. Lamane, ”No teʼamoniʼö fefu nono mbanua daʼa [tenga ha Moze], ba fao göi khöra Yehowa.” (4 Mo. 16:​1-3) Sindruhu sa, ba wamaigi Yehowa no teʼamoniʼö fefu nono mbanua andrö, hizaʼi Moze nifilinia tobali sondröniaʼö yaʼira. (4 Mo. 16:28) Tobali, me lalawa Moze, sindruhunia Yehowa nilawara. Lö laʼosambuaʼö dödöra ba zomasi Yehowa. Laʼosambuaʼö dödöra ba gohitö dödöra, yaʼia daʼö ba wangalui dadaoma hegöi faʼatehöngö. Lua-luania, ibunu ira Yehowa hegöi niha sotuhini yaʼira. (4 Mo. 16:​30-35, 41, 49) Faduhu göi dödöda wa lö omasi Yehowa ba niha si lö moʼameʼegö tödö ba si lö moloʼö fanuturu lala nibeʼe organisasinia.

12. Hana wa moguna tarorogö waʼafaduhu dödöda ba organisasi Yehowa?

¹² Hana wa moguna tarorogö waʼafaduhu dödöda ba organisasi Yehowa? Itaria, laʼila ira talifusöda sondröniaʼö mazui ira Boto Solohe wa moguna mubohouni waʼaboto ba dödö niʼokhögöda sanandrösa ba zindruhu mazui ba lala wamosumangeda Yehowa. Börö daʼö, lö lataha-taha wangai angetula ba wamalua fombulöʼö. (Amd. 4:18) Lafalua daʼö börö me sabölö laʼofönaiʼö yaʼia daʼö enaʼö omuso dödö Yehowa. Laforege göi enaʼö angetula nihalöra teʼodane-dane daʼö ba Daromali Lowalangi, goi-goi sinangea taʼoʼö yaʼita ono mbanua Yehowa.

13. Hadia geluahania ”goi-goi wamahaʼö sindruhu”, ba hadia zi lö tebulö tafalua?

¹³ ”Böi böhöli woloʼö goi-goi wamahaʼö sindruhu andrö.” (2 Ti. 1:13) ”Goi-goi wamahaʼö sindruhu” eluahania famahaʼö moroi ba  Zura Niʼamoniʼö nitema niha Keriso. (Yoh. 17:17) Famahaʼö daʼa zi tobali dane-dane waʼafaduhu dödöda. Ifahaʼö ita organisasi Yehowa enaʼö taʼila tatatugöi wa teʼodane-dane fefu nifaduhusida tödö ba zindruhu andrö. Na tafalua daʼö, ifahowuʼö ita Yehowa.

14. Hewisa wa so ösa niha Keriso samöhöli woloʼö ”goi-goi wamahaʼö sindruhu”?

¹⁴ Hadia zalua na taböhöli woloʼö ”goi-goi wamahaʼö sindruhu”? Nehegö zalua ba niha Keriso si so ba Desalonika me abad siföföna. Me luo daʼö, so ösa niha Keriso samaʼema misa huhuo si lö atulö wa no tohare ngaluo Yehowa. Te so zura nitemara sangumaʼö daʼö ba lawaʼö wa nifaʼoheʼö Waulo zura andrö. So ösa ba gotaluara zi faduhu tödö ba ladunö-dunö daʼö misa ba niha, hewaʼae lö nifaresora hadia atulö duria andrö. Sindruhunia, lö telimo ira na latörö tödö ngawalö wamahaʼö nifaʼema Waulo me fao ia khöra nasa. (2 Te. 2:​1-5) Andrö wa iʼamenesi ndra talifusönia Faulo enaʼö lö iʼanemaiʼö lafaduhusi tödö fefu hadia nirongora. Enaʼö lö ifuli alua khöra zimane daʼö ba zi so miföna, imane Faulo ba gafuriata zurania si mendrua, ”Yaʼo sotöi Faulo, yaʼe wangowaigu, nisuragu samösa. Daʼa dandra wa moroi khögu zura andre ero ufaʼoheʼö khömi.”—2 Te. 3:17.

15. Hewisa wolumöʼöda yaʼita moroi ba walimosa hewaʼae ba wamaigida atulö daʼö? Beʼe duma-duma. (Faigi göi gambara.)

¹⁵ Hadia wamahaʼö nihalöda moroi ba wehede Waulo ba niha Desalonika? Moguna mangelama ita na tarongo duria si lö tefaudu ba wamahaʼö nitemada ba Zura Niʼamoniʼö mazui huhuo si möi faʼatokea mbörö dalingada. Me mböröta ba Uni Soviet, so zura nifaʼema niha si faʼudu khöda ba lawaʼö wa moroi ba gödo sebua daʼö. Ba zura andrö, so ösa ndra talifusöda ira matua nifarou enaʼö lafasambua ira ba lafazökhi organisasi si bohou. Hewaʼae hulö sindruhu-ndruhu moroi ba gödo sebua zura daʼö, hizaʼi lö telimo ndra talifusöda ira matua si lö faröi andre. Aboto ba dödöra wa lö tefaudu nösi zura daʼö ba  wamahaʼö si no latema. Simanö göi iadaʼa, laʼogunaʼö internet ira niha si faʼudu khöda ba wamaelungu yaʼita hegöi ba wamoto fahasara dödöda. Moroi na alio mangiwa dödöda, dataʼangeragö hadia tefaudu zi no tarongo mazui nibasoda andrö ba zindruhu si no tafahaʼö yaʼita.—2 Te. 2:2; 1 Yo. 4:1.

16. Moloʼö Roma 16:​17, 18, hadia nifaluada na so niha samazaewe turia si lö atulö?

¹⁶ Böi böhöli wefao ba niha si lö faröi khö Yehowa. Omasi Lowalangi na teʼosambuaʼö ita khö ndra talifusöda ba wamosumange yaʼia. Lö tebulö so khöda wahasara dödö na lö taʼerogö zindruhu. Niha samazaewe turia si lö atulö no iʼasogö gabula dödö si möi famoto wahasara dödö ba mbanua niha Keriso. Börö daʼö, ifangelama ita Lowalangi enaʼö ’taʼerogö ira’. Na lö tafalua daʼö, tola manö ibörögö tedönisi dödöda ba wamaduhusi tödö ngawalö zi lö atulö ba faröi ita khö Yehowa.—Baso Roma 16:​17, 18.

17. Hadia mbua nitemada na taʼila hezo zindruhu ba lö faröi ita ba daʼö?

¹⁷ Na taʼila hezo zindruhu ba lö faröi ita ba daʼö, lö tebulö ahatö ita khö Yehowa ba aro wamatida. (Ef. 4:​15, 16) Tola telumöʼö ita moroi ba wamahaʼö sofaya hegöi falimosa nifaʼema Zatana, ba lö tebulö ilumöʼö ita Yehowa sagötö alua dania wamakao sabölö-bölö. Börö daʼö, böi faröi ita ba zindruhu ba faduhu dödöda wa hasambalö ’fao khöda Lowalangi waʼohahau dödö andrö’.—Fil. 4:​8, 9.