Hizaʼi, so gabula dödö tanö böʼö salua khö Nicolas hegöi Céline. Latema halöwö si bohou moroi ba gödo ndraha Prancis enaʼö findra ira ba mbanua niha Keriso si bohou. Lamane, ”Ba wamobörö omuso sibai dödöma, hizaʼi lö ara aefa daʼö ifuli omasiga falukha khö ndra awö-awöma. Lö iʼanemaiʼö aro wahuwusama khö ndra talifusöda ba mbanua niha Keriso si bohou.” a Börö daʼö, hewisa enaʼö ösöndra waʼomuso dödö ba mofozu ndraʼugö na findra ba mbanua niha Keriso si bohou? Hadia zi tola lafalua ira talifusöda tanö böʼö ba wameʼe fanolo? Ba hadia zinangea tafalua enaʼö tola tafarou dödö niha böʼö ba lafarou göi dödöda ira talifusö ba mbanua niha Keriso si bohou?

ÖFA GOI-GOI SANOLO YAʼITA

1. Odaligö Yehowa. (Si. 37:5) Börö me findra nahia wohalöwö woʼomonia, findra göi Kazumi si toröi ba Jepang moroi ba mbanua niha Keriso si no farahu ia ba zi 20 fakhe faʼara. Hewisa ’wameʼenia balazi Yehowa lala nitörönia’? Imane, ”Ututunö khö Yehowa fefu zi so ba dödögu. Ufaʼema khönia ngawalö niʼaombösigu tödö, falöʼawö-awö hegöi faʼafawuka gera-eragu. Ero na ufalua daʼö, ibeʼe khögu waʼabölö.”

Hewisa göi enaʼö abölö öʼodaligö Yehowa? Tola tumbu zinanö na muwuwui ia idanö ba sökhi dambu nitanö yaʼia. Simanö göi wamatida, moguna muwuwui ia faoma idanö wamati ba mutanö ia  ba danö si sökhi enaʼö tola tumbu. Nicolas, nitötöi moroi yawa, aro waʼafaduhu dödönia wa hasambalö itolo ia Yehowa börö me iʼangerönusi duma-duma niha sanehegö faʼaurira ba wamosumange Yehowa, yaʼia daʼö Aberahamo, Yesu hegöi Faulo. Na asese göi öfalua wamahaʼö samösa ba Zura Niʼamoniʼö, tola ötaögö ngawalö waʼatebulö salua khöu ba tola göi öʼogunaʼö zi no öfahaʼö yaʼugö andrö ba wamarou tödö ndra talifusöda ba mbanua niha Keriso si bohou si farahu yaʼugö.

2. Böi faedo-faedogö. (Sango. 7:10) Findra Jules moroi ba mbanua Benin, isawa Amerika Serikat. Hizaʼi, abua sibai khönia wamaudugö faʼaurinia ba zi toʼölö lafalua niha ba daʼö. Imane me ifuli itörö tödönia, ”Na so niha sawena falukha khögu, hulö nifaso ndraʼo ba wanutunö khöra sanandrösa ba waʼaurigu.” Börö zalua andrö, ibörögö ifandröndröu ia moroi khö ndra talifusöda ba mbanua niha Keriso. Hizaʼi, me no sindruhu-ndruhu aboto ba dödönia sanandrösa khö ndra talifusöda si so ba daʼö, ibörögö tebulö lala wangera-ngerania. Imane, ”Iadaʼa uʼila wa fagölö fefu niha gofu hezo toröi ira. Ha lala wahuhuosara hegöi nifaluara zi faböʼö-böʼö. Andrö wa moguna sibai tatemaʼö niha böʼö.” Tobali, böi faedo-faedogö mbanua niha Keriso si farahu yaʼugö mböröta ba zi farahu yaʼugö iadaʼa. Imane si samösa perintis sotöi Anne-Lise, ”Findra ndraʼo börö me omasido ufahaʼö ndraʼo ba ngawalö zi bohou, tenga börö me utötöna wa fagölö nahia nirugigu ba nahia niröigu ba zilalö.”

Ira satua sokubaloi si findra, moguna göi mangelama ira enaʼö lö lafaedo-faedogö mbanua niha Keriso si farahu yaʼira iadaʼa moroi ba zilalö. Na so zi faböʼö nifalua ndra satua sokubaloi ba mbanua niha Keriso si bohou farahu yaʼira, tenga daʼö geluahania wa fasala ira. Tandraigö alui hewisa zindruhunia zalua ba daʼö fatua lö öbeʼe mbua gera-eramö. (Sango. 3:​1, 7b) Moroi na öfaso ndra talifusöda ba wamalua bua gera-eramö, foromaʼö moroi ba gamuata hegöi nifaluamö hewisa sibai lala wamalua yaʼia.—2 Ko. 1:24.

3. Oyaʼö wamalua halöwö ba wamati. (Fil. 1:27) Sindruhu sa, moguna ginötö hegöi famorege na findra ita ba nahia si bohou. Hizaʼi, böi taha-taha weʼamöi ba gangowuloa ba mbanua niha Keriso si bohou. Moguna sibai daʼa enaʼö tola laʼila ba latolo ndraʼugö ira talifusöda. Imane Lucinda si findra ba mbanua sebua ba Afrika Selatan si fao iraononia alawe si darua, ”Lafarou ndraʼo ira awögu enaʼö faodo manuriaigö khö ndra talifusöda ba mbanua niha Keriso si bohou farahu yaʼaga, ubeʼe mbua gera-eragu ba gangowuloa, ba faodo khöra wamalua halöwö ba wamati tanö böʼö. Mafatunö göi khö ndra satua sokubaloi wa tola laʼogunaʼö nomoma tobali nahia gangowuloa wanuriaigö.”

Na fao ita khö ndra talifusöda ba wamalua halöwö ba wamati, tola teʼaroʼö wamatimö hegöi famatira. Itema wamarou dödö Anne-Lise nitötöi moroi yawa moroi khö ndra satua sokubaloi enaʼö ifatutu wefao khö ndra talifusöda ba weʼamöi manuriaigö. Hadia mbuania? Imane, ”Daʼa lala si sökhi enaʼö ahatö ita khö ndra talifusöda.” Baero  daʼö, na owölö-ölö ndraʼugö wefao khö ndra talifusöda, duma-dumania ba wangehao hegöi ba wondrorogö Nahia Gangowuloa, no öforomaʼö wa sindruhu-ndruhu farahu ndraʼugö ba mbanua niha Keriso si bohou. Na öfalua daʼö, alio fahuwu ndra talifusöda khöu ba örasoi wa sindruhu-ndruhu ösi nomomö ba wamati ira.

4. Alui zi fahuwu khöu si bohou. (2 Ko. 6:​11-13) Lala fondrege zi sökhi ba wamörögö fahuwusa yaʼia daʼö na öforomaʼö wa öʼameʼegö tödö niha. Börö daʼö, oyaʼö beʼe ginötöu fatua lö mubörögö mazui na no awai gangowuloa ba wahuhuosa khö ndra talifusöda irege aboto ba dödöu sanandrösa khöra. Töngöni döira. Na öʼila haniha döira ba öforege enaʼö laʼila wa tola fahuhuo ira khömö, hasambalö omasi ira fahuwu khöu.

Böi baliʼö ndraʼugö simane niha böʼö ha enaʼö latemaʼö ndraʼugö ba mbanua niha Keriso. Foromaʼö khöra hewisa zi toʼölönia ndraʼugö. Tandraigö falua zimane nifalua Lucinda. Imane, ”Omuso dödöma ba wogaoni ira talifusöda ba nomo. Buania, itugu aro wahuwusama khöra.”

”FAOMA MITEMAʼÖ NAWÖMI”

Tola manö so khöda waʼataʼu na möi ita ba Nahia Gangowuloa ba lö hadöi niha si faʼila khöda ba daʼö. Te daʼö göi nirasoi ndra talifusöda sawena findra ba mbanua niha Keriso si farahu ita. Tobali, hewisa wanoloda yaʼira? Ifatunö khöda sinenge sotöi Faulo, ”Faoma mitemaʼö nawömi simane fanemaʼö Keriso yaʼami.” (Rom. 15:7) No laʼoʼö duma-duma Keriso ira satua sokubaloi na latolo ndra talifusöda sawena findra ba worasoi wa latemaʼö ira. (Faigi kotak ” Hadia Zinangea Mufalua Na Findra?”) Hizaʼi sindruhunia, fefu niha ba mbanua niha Keriso, farahu ba daʼö ndraono, tola latolo ndra talifusöda sawena findra enaʼö larasoi waʼahono dödö.

Sambua lala ba wanemaʼö ira talifusöda sawena findra yaʼia na takaoni ira ba nomoda. Tola göi tatolo ira. Duma-dumania, so samösa dalifusöda ira alawe solohe manörö-nörö zi samösa talifusöda ira alawe sawena findra. Lafasui fasa ba iforomaʼö  hewisa lala wanörö moto si so ba mbanua daʼö. Daʼa zanolo talifusöda ira alawe sawena findra andrö irege aoha khönia ba wamaudugö faʼaurinia.

INÖTÖ ENAʼÖ TEDOU BA WAMATI

Na itugu ebua gao, mato hauga kali ifangulu ia. Iheta gulinia si oföna irege ba gafuriata tola iʼogunaʼö gafinia wohombo. Simane daʼö göi, na findra ndraʼugö ba mbanua niha Keriso tanö böʼö, moguna öheta fefu waʼaombö-aombö dödö sanaha yaʼugö ”wohombo”, mazui ba wondrouʼö yaʼugö wamalua halöwö ba wamati. Imane Nicolas hegöi Céline, ”Börö me findra ndraʼaga ba mbanua niha Keriso si bohou, matema wamomaha si sökhi. Moguna mafaudugö waʼaurima ba ngawalö zalua hegöi niha si so ba daʼö. Daʼö zanolo yaʼaga ba wangokhögö bua-bua si lö niʼokhögöma ba zilalö.” Jean-Charles nitötöi moroi yawa, itutunö hadia mbua nitema nösi nomonia imane, ”Ba mbanua niha Keriso sawena farahu yaʼaga, alio sibai tedou ba wamati ndraonoma ba aro wahuwusara khö Yehowa. Ha ba zi hauga waŵa, itema halöwö onoma alawe ba gangowuloa nifalua barö migu, ba tobali sanuriaigö si lö mubayagö idanö nonoma matua.”

Hewisa na tebai findra ndraʼugö, duma-dumania ba mbanua si lö ato sanuriaigö, börö zalua khömö? Falua zi no mututunö ba artikel daʼa enaʼö tola örasoi wa hulö mbanua niha Keriso si bohou ba wamaigimö mbanua niha Keriso si farahu yaʼugö iadaʼa. Böi tebulö odaligö Yehowa, aseseʼö fao khö ndra talifusöda ba wanuriaigö, alui zi fahuwu si bohou ba aroʼö wahuwusamö ba niha si no fahuwu khöu ba zilalö. Alui lala ba wanolo ira talifusöda sawena findra mazui sinangea mutolo. Törö tödöu wa faʼomasi andrö tandra niha Keriso. (Yoh. 13:35) Na taforege ba wangoromaʼö faʼomasi ba tatolo ndra talifusöda, tola itugu ahatö ira khö Yehowa. Yafaduhu dödöu wa ”omasi Lowalangi zumange simane daʼö”.—Heb. 13:16.

Hewaʼae abua, ato ndra talifusöda zorasoi faʼomuso dödö ba sofozu ba mbanua niha Keriso si bohou. Tola göi örasoi zimane daʼö! Imane Anne-Lise, ”Börö me findra ndraʼaga ba mbanua niha Keriso si bohou, ufahaʼö ndraʼo ba wangeboloʼö wamokai tödögu.” Itema göi mbua si sökhi Kazumi me findra ia. Iwaʼö wa oya lala nifalua Yehowa ba wanolo yaʼia, ba lö irai irasoi daʼö ba zilalö. Hewisa göi dalifusöda Jules? Imane, ”Ohahau dödögu ba mbanua niha Keriso si farahu yaʼo iadaʼa börö me fahuwu ndraʼo khö ndra talifusöda ba daʼö. Hasambalö wa abua khögu na ifuli zui findra ndraʼo.”