Ba ndröfi daʼö, so waʼatebulö nifazökhi organisasi sanandrösa ba lala wamosumange Lowalangi, sangosambuaʼö Iraono Zekola Zura Niʼamoniʼö. Ibörögö mufaʼanö ba The Watch Tower geluaha ayati nitutunö ba Gangowuloa Wangandrö, Fanuno hegöi Famaduhuʼö nifalua ero migu. Baero daʼö, lafazökhi kalender sangoromaʼö ayati ero migu hegöi sinunö si tola muʼanunöisi ba ginötö lafalua wamahaʼö samösa hegöi famahaʼö ba zi sambua omo.

Ba gangowuloa, labeʼe ”wamaduhuʼö” Iraono Zekola Zura Niʼamoniʼö ba latutunö zalua khöra ba wanuriaigö, lafatunö hana wa laʼandrö sibai saohagölö khö Yehowa, laʼanunöisi zinunö mazui mangandrö. Imane Eva Barney, nibayagö idanö ba ndröfi 1923 me 15 fakhe ndröfinia, ”Na omasi ita tabeʼe wamaduhuʼö, moguna mozizio ita ba tabörögö faoma fehede, ’Omasido uʼandrö saohagölö khö Lowalangi börö zi sökhi nifaluania khögu.’” So ösa ndra talifusö somasi mameʼe ”famaduhuʼö”. Itohugö wangumaʼö talifusöda Barney, ”Hewaʼae no alawa ndröfi dalifusöda Godwin, oya sibai nidunö-dunönia sinangea iʼandrö saohagölö. Hizaʼi, ba ginötö iʼila foʼomonia wa ibörögö abu dödö dalifusöda sondröniaʼö, si toʼölönia isöbi gahe jaket woʼomonia, ba awena iböhöli fahuhuo talifusöda Godwin ba ilau modadao.”

Sakali sara waŵa, ero sambua banua niha Keriso lafalua Gangowuloa Wangandrö, Fanuno ba Famaduhuʼö si faböʼö moroi ba zilalö. Itutunö The Watch Tower 1 Mbaŵa si Öfa 1923, ”Matonga ba waö-waö halöwö andrö, mutandrösaigö ia ba wameʼe famaduhuʼö sanandrösa ba halöwö fanuriaigö ba si möi famarou dödö ndra sohalöwö. . . . Faduhu dödöma wa halöwö andre zanolo ira talifusöda enaʼö itugu fahuwu ira.”

Samösa dalifusöda sanuriaigö si 19 fakhe sotöi Charles Martin, si toröi ba Vancouver, Kanada, oya mbua nitemania moroi ba gangowuloa andrö. Imane, ”Ba daʼö zi oföna sibai ufahaʼö ndraʼo hadia niwaʼögu na no urugi föna mbawandruhö nomo niha. Ato ndra talifusöda sanutunö zi no irai larasoi me möi ira manuriaigö ba nomo-omo. Börö daʼö, awena uʼila hadia zinangea uwaʼö ba hadia ubeʼe fanema li na so wanofu zokhö omo.”

Itugu teʼosambuaʼö ndra talifusöda börö me so gamakhoita ”ngaluo wanuriaigö”. Ibeʼe gangombakhata The Watch Tower 1 Mbaŵa si Öfa 1923, ”Enaʼö  teʼosambuaʼö ita ba halöwö si fagölö . . . , hari Salasa, 1 mbaŵa si Lima 1923 muhonogöi ia tobali ngaluo wanuriaigö. Mufalua nasa ia hari Salasa ba migu si oföna ero waŵa . . . Fefu zanuriaigö ba mbanua niha Keriso, lö tola löʼö fao ira ba halöwö daʼa.”

Ono Zekola Zura Niʼamoniʼö si bohou ebua, fao göi ira ba halöwö fanuriaigö. Samösa ba gotaluara yaʼia daʼö talifusöda ira alawe sotöi Hazel Burford, si 16 fakhe me luo daʼö. Imane, ”So duma-duma wahuhuosa nifaʼanö ba Bulletin si tola tatanö ba dödöda. a Yaʼodo hegöi kakegu fao ndraʼaga ba halöwö fanuriaigö andre si fao faʼamohiʼa dödö.” Hizaʼi, ba zi lö mudöna-döna, so wanaisi salua khö dalifusöda Burford. Imane, ”So samösa dalifusöda ira matua si no alawa döfi si lö omasi na möido manuriaigö. Me luo daʼö, so ösa ndra talifusöda si lö mangila wa fefu Nono Zekola Zura Niʼamoniʼö, he ’iraono matua hegöi iraono alawe’ si bohou ebua, lö tola löʼö lafosumange Zomböi yaʼira Solakhömi.” (Si. 148:​12, 13) Hewaʼae simanö, lö iböhöli wanuriaigö talifusöda Burford. Ba gafuriata, fao ia ba Zekola Gilead kelas si 2, ba mangai halöwö ia tobali utusan injil ba Panama. Ira talifusöda si lö fao tödö ba wamobörö, labulöʼö göi lala wangera-ngerara sanandrösa ba ndraono si bohou ebua si möi manuriaigö.

Angowuloa sebua ba zi sambua regional, tobali göi fangosambua ndra talifusöda. Ero na mufalua gangowuloa ba zi sambua regional, so sara ngaluo nihonogöi ba wamalua fanuriaigö. Duma-dumania, ba gangowuloa nifalua ba Winnipeg, Kanada. Fefu zangondrasi mukaoni ira wefao ba ”Halöwö si Tohude ba Winnipeg” ba tanggal 31 mbaŵa si Tölu. Ato sibai niha zamondrongo turia somuso dödö ba ngaluo wanuriaigö andrö, ba oya göi mbua si sökhi nitemara. Ba gangowuloa sebua tanö böʼö nifalua ba Winnipeg me 5 mbaŵa si Walu, so mato 7.000 niha zangondrasi. Daʼö gangowuloa ba zi sambua regional fondrege waʼato me luo daʼö ba Kanada.

Angowuloa ba zi sambua regional sabölö tohude nifalua nono mbanua Yehowa me döfi 1923, mufalua ia iʼotarai 18-26 mbaŵa si Walu ba Los Angeles, Kalifornia. Hauga migu fatua lö mufalua  gangowuloa andrö, oya koran sanutunö waö-waö halöwö nifalua, ba töra 500.000 zura undranga nibeʼe Ndraono Zekola Zura Niʼamoniʼö. So göi poster nifalemba ba moto sewa hegöi ba motora samösa.

Me hari Satu, 25 mbaŵa si Walu, ifaʼema huhuo sebua talifusöda Rutherford tuhonia ”Biri-Biri hegöi Nambi”. Itutunö wa ”biri-biri” yaʼia daʼö niha sangokhögö tödö satulö, sauri dania ba gulidanö faradaiso. Ibaso göi resolusi tuhonia ”Sambua Famangelama”. Resolusi daʼö iʼelifi nifalua gereja ba ifarou niha satulö tödö enaʼö lafabali ira ba ”Mbabilona Sebua”. (Fam. 18:​2, 4) Ba gafuriata, Iraono Zekola Zura Niʼamoniʼö sowölö-ölö ba zi sagörö ulidanö, zuta risalah sanandrösa ba resolusi daʼö nibeʼera ba niha.

Ba ngaluo safuria gangowuloa sebua andrö, töra 30.000 zi möi mamondrondrongo huhuo sebua nifaʼema dalifusöda Rutherford, tuhonia, ”Fefu Soi No Lafaʼanö Ira Numalö ba Hamagedo, Hizaʼi Lö Irai Mate Niha si Hauga Zuta Faʼato si No Auri Iadaʼa”. Börö me laʼila Iraono Zekola Zura Niʼamoniʼö wa ato zangondrasi, andrö wa lasewa stadion Los Angeles Coliseum, sawena mufazökhi. Enaʼö fefu zangondrasi ahori larongo huhuo nifaʼema, laʼogunaʼö wangebua li, teknologi si bohou me luo daʼö. Ato göi zamondrongo huhuonia ba radio.

Me döfi 1923, oya mbua si sökhi ba halöwö fanuriaigö nifalua ba Afrika, Eropa, India, hegöi Amerika Selatan. Ba India, mufazökhi publikasida ba li Hindi, Tamil, Telugu, hegöi Urdu. Talifusöda nibeʼe noro dödö ba wamaigi-maigi halöwö andrö yaʼia daʼö A. J. Joseph. No mongambatö ia ba daönö ndraononia.

Ba Sierra Leone, talifusöda Alfred Joseph hegöi Leonard Blackman lafaʼoheʼö zura ba gödo sebua Brooklyn, New York, ba wangandrö fanolo. Me 14 mbaŵa si Öfa 1923, latema wanema li ba zurara andrö. Imane Alfred, ”Ba zi bongi Satu, ba zi lö udöna-döna so zotelefo yaʼo.” Manofu khönia ndra matua sotelefo yaʼia, ”Hadia yaʼugö zanura sura ba wangandrö niha sanuriaigö ba Lembaga Menara Pengawal?” Imane Alfred, ”Yaʼia.” Aefa daʼö imane ira matua andrö, ”Yaʼodo nifatengera.” Töi dalifusöda andrö William R. Brown. Me luo daʼö, awena sibai tohare ia hegöi foʼomonia Antonia, ba iraonora alawe si gide-ide sotöi Louise ba Lucy moroi ba Kepulauan Karibia. Lö ara aefa daʼö, falukha ira.

Itohugö wanutunö Alfred, ”Sihulö wongi mahemolunia, me mafalua Leonard wamahaʼö ba Zura Niʼamoniʼö ero migu, tohare samösa ndra matua sebua boto ba mbawandruhö. Yaʼia andrö talifusöda  Brown. Mohiʼa sibai dödönia irege lö itaha-taha wamaʼema huhuo sebua mahemolunia. Lö irugi sara waŵa, no ahori ibeʼe ba niha fefu mbuku niʼohenia. Aefa daʼö, ifuli zui itema mbuku 5.000 ngawua tö, hizaʼi lö ara aefa daʼö oya zui moguna khönia mbuku. Hewaʼae simanö, lö sangumaʼö wa talifusöda Brown andre samawa buku. Sagötö mangai halöwö ia tobali enoni Yehowa sowölö-ölö, lö tebulö ifodane-dane huhuo nifaʼemania ba Zura Niʼamoniʼö irege asese lafotöi khönia Bible Brown.

Ba Jerman, talafo afönu saʼae gödo ndraha si so ba mbanua Barmen, ba so gametaʼuö wa tohare zaradadu Prancis ba wanuwö banua andrö. So sambua domosa nisöndra Ndraono Zekola Zura Niʼamoniʼö ba Magdeburg, si tola laʼogunaʼö tobali nahia wamazökhi buku. Me 19 mbaŵa si Önö, fefu fakake ba wamazökhi buku hegöi gama-gama tanö böʼö, no ahori labukusi ba lafindrakö ba Mbetieli si bohou ba Magdeburg. Sahari me no aefa mufatunö ba gödo sebua wa no awai mufindrakö gama-gama, so gangombakhata ba koran wa Prancis saʼae zamatörö banua Barmen. Aboto ba dödö ndra talifusöda wa faʼafindrara andrö no tandra howu-howu hegöi folumöʼö moroi khö Yehowa.

Ba Brasil, talifusöda George Young, sasese mofanö ba wanuriaigö turia somuso dödö, ifasindro sambua gödo ndraha. Börö daʼö, ibörögö mufazökhi majalah The Watch Tower ba li Portugis. Ha ba zi hauga waŵa, töra 7.000 majalah nibeʼenia ba niha. Faʼatoharenia göi ba Brasil, daʼö zamokai lala khö dalifusöda ira alawe sotöi Sarah Ferguson. Me luo daʼö, talifusöda Ferguson no ibaso The Watch Tower iʼotarai me 1899, hizaʼi lö nasa tebeʼe khönia ginötö ba wangoromaʼö föna niha sato wa no ilulu waʼaurinia ba tebayagö ia idanö. Mato hauga waŵa me no tohare dalifusöda Young, awena tebayagö idanö dalifusöda Ferguson hegöi iraononia si daöfa.

Ba gangohorita ndröfi andrö, itutunö The Watch Tower 15 Mbaŵa si Felendrua 1923 hewisa waʼatebulö ba wamosumange Lowalangi tobali fangosambuaʼö nono mbanua Lowalangi. Imane Majalah andrö, ”Oroma sibai wa banua niha Keriso . . . laʼokhögö wamati saro . . . Dataʼogunaʼö fefu wakake wasuwöta nibeʼe khöda. Si fao faʼamohiʼa dödö ba angetula saro, datafosumange Lowalangi si fao faʼomuso dödö ba faʼowölö-ölö ba ndröfi si so fönada.”

Ba ndröfi aefa daʼö, tobali döfi si tebai laʼolifugö Iraono Zekola Zura Niʼamoniʼö. No hauga waŵa saʼae mohalöwö ndra talifusöda ba Mbetieli ba wamazökhi tomosa ba zi sambua nahia ba Staten Island, lö fandröndröu ia moroi ba gödo sebua Brooklyn. Awai mufazökhi domosa daʼö me böröta ndröfi 1924. Me so domosa andrö, itugu teʼosambuaʼö nono mbanua Lowalangi, itugu ato göi niha samondrongo turia somuso dödö, si lö irai mamondrongo ba zilalö.