1-2. Hewisa lala enaʼö sindruhu-ndruhu aboto ba dödöda nösi Zura Niʼamoniʼö? Beʼe duma-duma.

 KHALAIGÖ na öʼöli sambua nomo. Hadia iʼanemaiʼö öʼöli nomo daʼö ha börö me no öʼila gambara mazui koda nomo andrö gamaudu tanö föna? Tatu manö löʼö. Möi ndraʼugö ba öhaogö wamaigi omo daʼö. Te öfasui sakali ba wamaigi tanö baero, aefa daʼö möiʼö bakha ba öfaigi ero-ero sambua bateʼe. Te göi omasiʼö na öʼila gambara me awena labörögö wamazökhi omo daʼö. Tatu manö, öhaogö wamareso omo daʼö fatua lö öʼöli.

² Simane daʼö göi nifaluada na tabaso ba tafahaʼö ita ba Zura Niʼamoniʼö. So samösa zatua-tua samagölösi Sura Niʼamoniʼö ba zi sambua ”tomosa sebua sabölö alawa ba abakha sibai wondrasinia”. Na ha asala tabaso Zura Niʼamoniʼö, awai zaboto ba dödöda ha ”dane-dane sanandrösa ba wehede niʼamoniʼö khö Lowalangi.” (Heb. 5:12) Börö daʼö, hewisa enaʼö ahori aboto ba dödöda fefu nösi Zura Niʼamoniʼö? Simane omo no mege, moguna möi ita ”bakha” ba tafareso ero-ero sambua faosatö. Tandraigö alui hadia gamakhaitania ero-ero sambua tuho Zura Niʼamoniʼö. Forege enaʼö aboto ba dödöu hadia nifaduhusimö tödö, ba hadia mbörö wa öfaduhusi tödö daʼö.

3. Hadia mene-mene nibeʼe Waulo khö ndra talifusönia si sara lala wamati, ba hadia gohitö dödönia? (Efeso 3:14-19)

³ Enaʼö sindruhu-ndruhu ahori aboto ba dödöda fefu faosatö si so ba Daromali Lowalangi, moguna tahaogö wamahaʼö yaʼita ba zindruhu moroi ba Zura Niʼamoniʼö. Iʼamenesi ndra talifusönia  Faulo enaʼö lafahaʼö ira ba Daromali Lowalangi irege aboto ba dödöra hawaʼebolo, hawaʼanau, hawaʼalawa, ba hawaʼabakha zindruhu andrö. Na lafalua daʼö, awena ’mowaʼa wamatira ba aro’ ira ba dete wondrasi andrö. (Baso Efeso 3:14-19.) Moguna göi tafalua mene-mene daʼö. Datatutunö hewisa wamahaʼöda yaʼita ba Daromali Lowalangi ba tahaogö wamareso enaʼö aboto ba dödöda hadia geluahania.

4. Hadia zi tola tafalua enaʼö itugu ahatö ita khö Yehowa? Beʼe duma-duma.

⁴ Yaʼita niha Keriso, moguna aboto ba dödöda dane-dane wamahaʼö moroi ba Zura Niʼamoniʼö. Hizaʼi lö ibönö na ha daʼö manö. Börö wanolo geheha niʼamoniʼö, omasi ita taʼokhögö waʼaboto ba dödö sanandrösa ba ”wangera-ngera Lowalangi sabölö abakha”. (1 Ko. 2:9, 10) Tandraigö alui hadia manö zi tola mangahatöʼö yaʼugö khö Yehowa. Duma-dumania, tola öʼalui hewisa Yehowa wangoromaʼö faʼomasi khö ndra enoninia ba götö föna, ba hadia zangoromaʼö wa iʼomasiʼö göi ndraʼugö iadaʼa. Baero daʼö, tola öfahaʼö ndraʼugö ba goi-goi nitatugöi Yehowa mböröta ba ndraono Gizaraʼeli, hewisa lala wamosumange yaʼia ba faedogö daʼö ba goi-goi nibeʼenia ba mbanua niha Keriso. Mazui alui wamaʼeleʼö sanandrösa khö Mesia, hadia manö zi no alua sagötö faʼaurinia me mangai halöwö ia ba gulidanö.

5. Hadia duho somasiʼö öʼalui?

⁵ So ndra talifusöda sowölö-ölö ba wamahaʼö yaʼira ba Zura Niʼamoniʼö ba no irai lasofu khöra hadia manö duho Zura Niʼamoniʼö somasi laʼila geluahania. Tola öfaigi hadia manö duho niʼaluira andrö ba kotak ” Ngawalö zi Tola Muʼalui Sabölö Abakha”. Tandraigö alui ba ogunaʼö Indeks Publikasi Menara Pengawal mazui Fanuturu Lala ba Wamalua Riset khö Ndra Samaduhuʼö Yehowa. Itugu örasoi waʼomuso dödö na simane daʼö wamahaʼöu yaʼugö ba Zura Niʼamoniʼö. Tola ”ösöndra waʼaboto ba dödö sanandrösa khö Lowalangi” ba öʼokhögö wamati saro. (Amd. 2:4, 5) Iadaʼa, datatutunö hadia manö duho sabölö abakha si tola tafahaʼö yaʼita moroi ba Zura Niʼamoniʼö.

6. (a) Hadia gamaehutania niʼera-era faoma ohitö dödö? (b) Hana wa tola tawaʼö lö tebulö gohitö dödö Yehowa ”götö-götö waʼara”?

⁶ Nehegö hadia niwaʼö Zura Niʼamoniʼö sanandrösa ba gohitö dödö Lowalangi. Si oföna, moguna taʼokhögö waʼaboto ba dödö hadia gamaehutania niʼera-era faoma ohitö dödö. Niʼera-era, amaedola lala si tola mufili ba wogamö si sambua nahia. Hizaʼi, tola manö lö mofozu niʼera-era na so daha-taha. Ohitö dödö, amaedola nahia somasi ita takhamö. Oya lala si tola tatörö enaʼö tarugi nahia andrö. Na so zi tobali taha-taha, tola taʼalui lala tanö böʼö. No izara-zara Yehowa wamatunö, hadia manö ”gohitö dödönia götö-götö waʼara”. (Ef. 3:11) Hasambalö alua gohitö dödö Yehowa hewaʼae so daha-taha. Tola iʼogunaʼö gofu hadia lala ba wamalua ohitö dödönia. Yaʼia ”zamazökhi fefu hadia ia börö gohitö dödönia.” (Amd. 16:4) Buania lö tebulö sagötö faʼara. Fanofunia iadaʼa: Hadia gohitö dödö Yehowa, ba hadia nifaluania enaʼö aʼozu gohitö dödönia andrö?

7. Me no mamadaö Gadamo faoma Khawa, hadia nifalua Yehowa enaʼö alua gohitö dödönia? (Mataiʼo 25:34)

⁷ No ifatunö gohitö dödönia Lowalangi khö Gadamo hegöi Khawa. Imane khöra, ”Miʼoʼono ba miʼoyaʼö ami, mifoʼösi gulidanö ba mifatörö . . . gurifö sauri ba dete danö.” (1 Mo. 1:28) Me mamadaö Gadamo faoma Khawa, lua-luania fefu ngaʼötöra ahori aekhu ba horö. Hizaʼi hasambalö ifalua gohitö dödönia Yehowa hewaʼae na iʼogunaʼö lala tanö böʼö. Iʼanemaiʼö ihonogöi ba wamasindro Famatörö ba zorugo samalua ohitö dödönia ba niha hegöi ulidanö. (Baso Mataiʼo 25:34.) Ba ginötö si no itatugöi, ifatenge nononia siaʼa ba gulidanö ba wamahaʼö yaʼita sanandrösa ba Wamatörö andrö, aefa daʼö itehegö nosonia ba wangöhöli yaʼita moroi ba horö hegöi faʼamate. Lö ara, tesusugi Yesu ba manahae ia ba zorugo, mamatörö ia tobali Razo ba Wamatörö Lowalangi andrö. Hadia nasa zi tola tafahaʼö yaʼita sanandrösa ba gohitö dödö Lowalangi?

8. (a) Hadia duho siföföna ba Zura Niʼamoniʼö? (b) Simane nitutunö ba Efeso 1:8-11, hadia nasa zi farahu ba gohitö dödö Yehowa? (Faigi gambara ba guli majalah.)

⁸ Tuho siföföna Zura Niʼamoniʼö yaʼia daʼö fangamoniʼö töi Yehowa ba ginötö ifalua gohitö dödönia ba gulidanö barö Wamatörö nidöniaʼö Keriso. Tebai tebulö gohitö dödö Yehowa. No ifabuʼu wa hasambalö ifalua. (Yes. 46:10, 11, nisura ba gahe zura; Heb. 6:17, 18) Samuza inötö dania, tobali Faradaiso gulidanö andre ba awena dania moʼahonoa fefu ngaʼötö Gadamo ba ’lasöndra waʼauri sagötö faʼara’. (Si. 22:26) Hizaʼi tenga ha daʼö gohitö dödö Yehowa. Omasi ia na teʼosambuaʼö fefu genoninia si so ba zorugo hegöi ba gulidanö. Aefa daʼö, mangalulu ira fefu khö Yehowa me daʼö zamatörö yaʼira ba lö faröi ira ba wamosumange yaʼia. (Baso Efeso 1:8-11.) Tatu adöni dödöu me no öʼila zahöli-höli dödö nifalua Yehowa ba wamalua ohitö dödönia.

9. Na tabaso Zura Niʼamoniʼö, hadia manö niʼilada salua ba zi so miföna?

⁹ Nehegö wamaʼeleʼö nifabuʼu Yehowa ba Kabu Edena simane si no tesura ba 1 Moze 3:15. b No ifaʼeleʼö ba daʼö hadia manö dania ngawalö zalua enaʼö alua gohitö dödönia, hizaʼi mato hauga ribu fakhe aefa daʼö awena alua nifaʼeleʼö andrö. Hadia manö zalua andrö? Si oföna, so samösa moroi ba ngaʼötö Gaberahamo zi tobali Mesia mazui Keriso. (1 Mo. 22:15-18) Aefa daʼö, me döfi 33 M, simane si no tefaʼeleʼö ifesokho mbörö sisi Yesu Satana. Ba safuria, lafufu högö Zatana, ba awena alua dania daʼö  töra 1.000 fakhe tö. (Fam. 20:7-10) Ifatunö göi khöda Sura Niʼamoniʼö hadia manö zalua fatua lö teʼasiwai waʼudusa ba gotalua gulidanö Zatana faoma organisasi Yehowa.

10. (a) Hadia manö zalua ba zi lö ara tö? (b) Hewisa ita wamaʼanö tödöda hegöi fangera-ngerada iadaʼa? (Faigi nisura ba gahe zura.)

¹⁰ Tandraigö angeragö hadia manö zahöli-höli dödö nifaʼeleʼö Zura Niʼamoniʼö. Si oföna, so dania niʼombakhaʼö ngawalö soi andre lamane, ”No atulö, no ahono!” (1 Te. 5:2, 3) Aefa daʼö, ”izumaigö” alua wamakao sabölö-bölö ba ginötö tohare ngawalö soi ba gulidanö andre ba wanuwö agama sofaya. (Fam. 17:16) Te taʼila dania dandra sahöli-höli dödö na ’tohare Nono niha ba dete lawuo si fao faʼabölö ba lakhömi sebua’. (Mat. 24:30) Ibörögö wanguhuku ulidanö andre Yesu ba ifasambua ira simane na ifabali mbiri-biri moroi ba nambi. (Mat. 25:31-33, 46) Lö ihono-honogö manö ia Satana. Börö waʼafatuwunia, ifarou ngawalö soi ba gulidanö andre ba wanuwö ono mbanua Yehowa. Ifotöi ira Sura Niʼamoniʼö Gogi moroi ba danö Magogi. (Hez. 38:2, 10, 11) Sagötö faʼalua wamakao sabölö-bölö, so dania ginötönia teʼowuloi niha nibayoini ba gulidanö andre numalö ira ba zorugo. Teʼowuloi ira khö Keriso awö ndra saradadunia ba fasuwö ira ba Hamagedo. Alua daʼö ba gangohorita wamakao sabölö-bölö. c (Mat. 24:31; Fam. 16:14, 16) Aefa daʼö, ibörögö mamatörö Keriso ba gulidanö andre sagötö zi saribu fakhe.—Fam. 20:6.

11. Hewisa dania waʼaurimö na no örugi waʼauri si lö aetu? (Faigi göi gambara.)

¹¹ Khalaigö nasa hadia dania zalua na no aefa zi saribu fakhe. Ifatunö khöda Sura Niʼamoniʼö wa Somböi yaʼita ”no ibeʼe ba [dödöda] zi lö aetu”. (Sango. 3:11) Khalaigö göi hewisa waʼaurimö hegöi amakhaitamö khö Yehowa na no örugi waʼauri si lö aetu dania. So ngawua wehede sadöni dödöda ba mbuku Mendekatlah kepada Yehuwa, ngaʼörö 319, imane: ”Na no dania auri ita ba zi hauga ngaotu fakhe, ribu, zuta mazui miliaran fakhe, abölö  oya waʼaboto ba dödö niʼokhögöda sanandrösa khö Yehowa moroi iadaʼa. Hewaʼae simanö, oya nasa zinangea tafahaʼö ita sahöli-höli dödö. . . . Sindruhunia lö taʼila sibai takhalaigö hewisa waʼaurida na no tarugi dania waʼauri si lö aetu.” Sabölö tohude niʼokhögöda yaʼia daʼö itugu fahuwu ita khö Yehowa. Iadaʼa, hadia nasa zi tola taʼalui ba ginötö tafahaʼö ita ba Daromali Lowalangi?

12. Hezo tola tasöndra gambara sanandrösa ba zorugo? Beʼe duma-duma.

¹² Ifatunö khöda ösa Taromali Lowalangi sanandrösa ba lakhömi Yehowa si toröi ”ba nahia salawa”. (Yes. 33:5) Ifatunö khöda Sura Niʼamoniʼö ngawalö zahöli-höli dödö sanandrösa khö Yehowa hegöi faosatö organisasinia si so ba zorugo. (Yes. 6:1-4; Dan. 7:9, 10; Fam. 4:1-6) Duma-dumania, tola tabaso ngawalö zahöli-höli dödö niʼila Hezekieli me ’teboka mbanua si yawa ba itema gangilata moroi khö Lowalangi’.—Hez. 1:1.

13. Hewisa dödöu me no öʼangerönusi nifalua Yesu ba zorugo, simane nitutunönia ba Heberaiʼo 4:14-16?

¹³ Angeragö göi hadia nifalua Yesu ba zorugo si tobali Razo ba Ere Sebua sangila falömoʼahonoada. Tola mangandrö ita ba döinia gofu hawaʼara manö, amaedola zi no ’taʼondrasi dadaoma Lowalangi sangoromaʼö faʼasökhi dödö sebua’ börö me tola taʼandrö khönia waʼahakhö dödö hegöi fanolo ba ”ginötö si tefaudu”. (Baso Heberaiʼo 4:14-16.) Böi tehegö numalö zi maʼö-maʼökhö na lö taʼangerönusi nifalua Yehowa hegöi Yesu ba hadia nasa nifaluara khöda iadaʼa moroi ba zorugo. Na tafalua daʼö, itugu ebua wangandröda saohagölö ba waʼomasi si no laforomaʼö ba itugu terou dödöda ba wamosumange Yehowa.—2 Ko. 5:14, 15.

14. Hadia zi tola tafalua ba wangoromaʼö fangandrö saohagölö khö Yehowa hegöi khö Yesu? (Faigi gambara.)

¹⁴ Hadia zinangea tafalua ba wangoromaʼö  fangandrö saohagölö khö Lowalangi hegöi khö Nononia? Tola taforege wanolo niha enaʼö tobali ira Samaduhuʼö Yehowa ba tobali ira göi nifahaʼö Yesu. (Mat. 28:19, 20) Daʼö nifalua Waulo ba wangoromaʼö fangandrö saohagölö khö Lowalangi hegöi khö Keriso. Aboto ba dödönia wa omasi Yehowa na ”teʼorifi fefu niha ba lasöndra waʼaboto ba dödö si tefaudu sanandrösa ba zindruhu”. (1 Ti. 2:3, 4) Börö daʼö, iforege wamalua halöwö fanuriaigö enaʼö itugu ato niha nitolonia ba iforege wamalua hadia ia ”enaʼö teʼorifi fefu niha”.—1 Ko. 9:22, 23.

15. Moloʼö Sinunö 1:2, hadia zameʼe khöda faʼohahau dödö?

¹⁵ Itutunö sanura sura Zinunö wa niha somuso tödö ba sofozu yaʼia daʼö niha ”sangomasiʼö oroisa Yehowa” ba ”soʼangerönusi oroisania bongi maʼökhö”. (Si. 1:1-3; nis.) Samösa zamoʼeluaha Sura Niʼamoniʼö sotöi Joseph Rotherham, ibeʼe mbua gera-erania sanandrösa ba ayati daʼö ba isura ba mbuku Studies in the Psalms, ”itutunö hewisa zi samösa niha na sindruhu-ndruhu iʼomasiʼö wanuturu lala moroi khö Lowalangi irege iʼalui, ifahaʼö ia ba oya ihorigö ginötönia ba woʼangeragö daʼö”. Itutunö nasa Rotherham, ”Na itehegö numalö zi maʼö-maʼökhö andrö si samösa niha ba lö nifahaʼönia yaʼia ba Zura Niʼamoniʼö, no ibaliʼö zaya-zaya gölönia ngaluo daʼö.” Sindruhu-ndruhu wa tobali fangomuso dödöda na tafahaʼö ita ero-ero sambua faosatö moroi ba Daromali Lowalangi! Tola örasoi waʼomuso dödö na öfahaʼö ndraʼugö ba Zura Niʼamoniʼö, na öhaogö önehegö geluahania sadöni dödöda ba öʼangeragö hadia gamakhaitania fefu daʼö.

16. Hadia nitutunöda ba artikel aefa daʼa?

¹⁶ Sindruhu sebua böli nifahaʼö Yehowa ba Daromalinia, tenga zi tebai aboto ba dödöda. Ba artikel aefa daʼa, sambua zindruhu sabölö abakha nifahaʼöda yaʼita yaʼia daʼö osali solakhömi khö Yehowa nitötöi Waulo ba zurania khö ndra niha Keriso Heberaiʼo. Yaʼowua-wua dödöu sagötö tatutunö dania wamahaʼö andrö.