Fanofu Zombaso
Hadia ha mana hegöi fofo puyuh niʼa ndraono Gizaraʼeli sagötö feʼasora ba danö si mate?
Sagötö zi 40 fakhe weʼaso ndraono Gizaraʼeli ba danö si mate, mana zi tobali tuho göra. (2 Mo. 16:35) Dua kali göi ihenaigö göra fofo puyuh Yehowa. (2 Mo. 16:12, 13; 4 Mo. 11:31) Hizaʼi, so göra tanö böʼö hewaʼae na lö oya.
Itaria iʼohe nono mbanuania Yehowa ba ”naha wolombase”, ba lasöndra zoguna khöra ba daʼö. (4 Mo. 10:33) Duma-dumania, no irai möi ira ba gumbu nidanö ba Gelima. ”So ba daʼö 12 gumbu nidanö ba 70 ngaʼeu döla geu khorema.” (2 Mo. 15:27) Imane buku Plants of the Bible wa töla geu khorema ”tumbu ia gofu hezo so manö, ba asese labaliʼö ia balazo ba danö si mate. . . . Tola göi iʼasogö wanikha, ö, ba tobali lumö ba niha solombase si zuta faʼato.”
No göi irai möi ndraono Gizaraʼeli ba gumbu nidanö sebua, nifotöi iadaʼa Feiran. Umbu nidanö andre so ia ba zi sambua daso nifotöi Daso Feiran. a Moloʼö buku Discovering the World of the Bible, faʼanau ndraso daʼa ”mato [130 kilometer], sambua daso sanau sibai, si sökhi famaigi ba si tehöngö ba Zinaʼi”. Imane nasa buku andrö, ”Ba ndraso daʼö, mato [45 kilometer] iʼotarai luaha, ba daʼö so Gumbu Nidanö Feiran ba oya sibai döla geu khorema ba daʼö. Faʼanau gumbu nidanö andre [4,8 kilometer] ba so ia mato [610 meter] yawa ba dete nasi. Umbu nidanö andre hulö Kabu Edena ba Zinaʼi. Iʼotarai me föna, ato sibai niha si möi ba daʼö börö me ribu döla geu khorema si tumbu ba nahia andrö.”
Eu Khorema si so ba Feiran
Me aheta ndraono Gizaraʼeli ba danö Miserai, laʼohe hamo darigu, karawa naha wamaruka tarigu, bua zinanö awö wanikha, hizaʼi te lö oya laʼohe börö me alio obou. Laʼohe göi ”nambi, biri-biri awö zawi”. (2 Mo. 12:34-39) Te oya moroi ba gurifö andrö zi mate börö waʼaukhu danö si mate. Te so göi ösa niʼa ndraono Gizaraʼeli, labeʼe sumange nitunu khö Yehowa mazui khö lowalangi faya. b (Hal. 7:39-43) Hizaʼi, sagötö feʼasora ba daʼö, so nasa gurifö ndraono Gizaraʼeli. Oroma daʼa ba wehede Yehowa me lö laʼoʼö niwaʼönia, ”Tobali dania kubalo ndraonomi matua ba danö si mate sagötö zi 40 fakhe.” (4 Mo. 14:33) Börö daʼö, moroi ba gurifö andrö tola labadu susu mazui itaria laʼa nagolenia. Hizaʼi, te lö ibönö daʼö ba wombönökhi soguna ba niha si tölu zuta faʼato sagötö zi 40 fakhe. c
Hezo lasöndra nidanö hegöi balazo gurifö andrö? d Me götö föna, te asese moteu ba danö si mate irege oya ngawalö zinanö si tumbu ba daʼö. Imane ba mbuku Pemahaman Alkitab ba duho ”Arab” wa 3.500 fakhe silalö, ”oya nasa tesöndra nidanö ba soi daʼö moroi iadaʼa. Oya nungo nidanö si no oköli si tobali daso sabakha sangoromaʼö wa asese moteu ba mbanua daʼö.” Hewaʼae simanö, lö tebulö danö si mate andrö tobali nahia soköli ba sataʼu niha. (5 Mo. 8:14-16) Na lö ifalua dandra sahöli-höli dödö Yehowa ba wangaʼasogö idanö, hasambalö si mate ndraono Gizaraʼeli hegöi uriföra.—2 Mo. 15:22-25; 17:1-6; 4 Mo. 20:2, 11.
Moze zamatunö ba ndraono Gizaraʼeli wa ihenaigö mana Yehowa ’enaʼö aboto ba dödöra wa tenga ha ba gönia auri niha, hizaʼi ba ngawalö li si otarai mbawa Yehowa’.—5 Mo. 8:3.
a Faigi Menara Pengawal 1 Mbaŵa si Lima 1992, ngaʼörö 24-25.
b Itutunö Sura Niʼamoniʼö wa dua kali labeʼe zumange nitunu iraono Gizaraʼeli khö Yehowa ba danö si mate. Si oföna, me mufataro ndra ere, ba si dua me mufalua Gowasa Fasa. Alua daʼö me döfi 1512 SM, dua fakhe me no mangawuli ndraono Gizaraʼeli moroi ba Miserai.—3 Mo. 8:14–9:24; 4 Mo. 9:1-5.
c Me no arakhagö 40 fakhe laʼanöröi dane si mate, ngaotu ribu gurifö nirabu ndraono Gizaraʼeli moroi ba nudu nikalaisira. (4 Mo. 31:32-34) Hizaʼi, lö aetu laʼa mana irege ofeta ira ba Danö Amabuʼula.—Yos. 5:10-12.
d Tola tawaʼö wa lö hadöi urifö si manga mana, börö me ha iraono Gizaraʼeli zi tola mangowuloi mana ndrohu-ndrohu zoguna khöra samösa.—2 Mo. 16:15, 16.
