1. Hadia manö mbuala nibeʼe Yesu khöda?

 LÖ HADÖI niha soböwö simane Yesu. Me so ia ba gulidanö, asese ifalua dandra sahöli-höli dödö ba wanolo niha. (Luk. 9:​12-17) Buala fondrege zebua nibeʼenia yaʼia daʼö itehegö waʼaurinia. (Yoh. 15:13) Me no tesusugi ia, lö tebulö nasa iforomaʼö waʼoböwö. Simane si no ifabuʼu, no iʼandrö khö Yehowa enaʼö ifaduwa gehehania ba wamahaʼö hegöi ba wondrara tödöda. (Yoh. 14:​16, 17, nisura ba gahe zura; 16:13) Baero daʼö, iʼogunaʼö göi mbanua niha Keriso ba wanolo yaʼita enaʼö tola tafahaʼö fefu niha ba zi sagörö ulidanö ba tabaliʼö ira nifahaʼö.—Mat. 28:​18-20.

2. Haniha manö ’mbuala ba niha’ nitutunö ba Efeso 4:​7, 8?

² Nehegö mbuala tanö böʼö nibeʼe Yesu khöda. Isura sinenge sotöi Faulo wa me no mangawuli Yesu ba zorugo, ibeʼe ’mbuala ba niha’. (Baso Efeso 4:​7, 8.) Itutunö Faulo wa ibeʼe mbuala daʼa Yesu si tobali fanolo ba mbanua niha Keriso. (Ef. 1:​22, 23; 4:​11-13) Iadaʼa, ”buala ba niha” andrö yaʼia daʼö enoni sohalöwö, satua sokubaloi hegöi satua samasui. a Tatu manö, yaʼira andre niha si lö moʼahonoa, ba itaria lafalua zala. (Yak. 3:2) Hizaʼi, lö tebulö iʼogunaʼö ira Soʼaya yaʼita Yesu Keriso ba wameʼe khöda fanolo.

3. Hewisa wotuhinida halöwö nifalua niha si tobali buala? Beʼe duma-duma.

³ Ibeʼe halöwö khöra Yesu ba wangaʼaroʼö banua niha Keriso. (Ef. 4:12) Hizaʼi, fefu ita tola tatolo ira ba wamalua halöwöra. Duma-dumania, na mufazökhi Nahia Gangowuloa, tatu lö fefu ita fao ba halöwö fangotomosi. So ösa ba gotaluada  zotuhini halöwö daʼö ba wangehenaigö soguna, sohenaigö lala ndra talifusöda mazui tanö böʼönia. Simane daʼö göi, fefu ita tola tatuhini ndra enoni, ira satua sokubaloi hegöi satua samasui moroi ba wehede hegöi nifaluada. Iadaʼa, datatutunö hadia mbuania khöda wamorege si no lafalua, ba hewisa wangoromaʼöda fangandrö saohagölö khöra hegöi khö Yesu ba ’mbuala ba niha’ andre.

IRA ENONI SOHALÖWÖ—”BUALA BA WAMEʼE FANOLO”

4. Hadia manö nifalua ndra enoni sohalöwö ba wanolo niha böʼö me abad siföföna?

⁴ Me abad siföföna, so ösa ndra talifusöda nifataro tobali enoni sohalöwö. (1 Ti. 3:8) Te yaʼira andre nitötöi Waulo si tobali ”buala ba wameʼe fanolo”. (1 Ko. 12:28) Tola manö, oya halöwö si tohude nifaluara irege tola laʼosambuaʼö dödöra ira satua sokubaloi ba wamahaʼö hegöi ba wokubaloi. Duma-dumania, te mohalöwö ira ba wanali Buku Niʼamoniʼö mazui ba wowöli gama-gama soguna ba wamalua halöwö andrö.

5. Hadia manö halöwö nifalua ndra enoni iadaʼa?

⁵ Nehegö hadia manö halöwö si tohude nifalua ndra enoni ba mbanua niha Keriso si farahu yaʼugö. (1 Fe. 4:10) So nibeʼe halöwö ba wamöföʼö kefe, ba wotatugöi daerah dinas, ba wongoroisi lektur, tobali operator audio/video, tobali tata tertib, mazui sanolo ba wondrorogö Nahia Gangowuloa. Oi moguna fefu halöwö nifaluara andrö enaʼö itugu tedou mbanua niha Keriso. (1 Ko. 14:40) Baero daʼö, tebeʼe göi khöra halöwö ba wamaʼema faosatö ba Gangowuloa Faʼauri ba Fanuriaigö hegöi ba wamaʼema huhuo sebua. So göi nituyu tobali asisten pengawas kelompok. Itaria, fao ira göi khö ndra satua sokubaloi ba wamalua halöwö fokubaloi.

6. Hadia mbuania halöwö nifalua ndra enoni ba mbanua niha Keriso?

⁶ Hadia mbuania halöwö nifalua ndra enoni ba mbanua niha Keriso? Imane talifusöda moroi ba Bolivia sotöi Beberly, b ”Uʼandrö sibai saohagölö khö ndra talifusöda enoni sohalöwö börö me urasoi waʼohahau dödö ba gangowuloa. Börö wamorege nifaluara, tola manunödo, ubeʼe mbua gera-eragu, ufondrondrongo huhuo nifaʼema ba tola ufahaʼö ndraʼo moroi ba video hegöi gambara niforomaʼö. Laforege göi enaʼö lö mangoloi dödö zangondrasi, ba latolo niha si tebai mangondrasi enaʼö tola fao ira laʼogunaʼö video-conference. Na no aefa gangowuloa, ladöniaʼö göi ba wangehaogö mangawuli Nahia Gangowuloa, latolo ba wamöföʼö kefe, ba laforege enaʼö matema majalah soguna khöma. Uʼandrö sibai saohagölö khöra!” Imane talifusöda Leslie si toröi ba Kolombia ba satua sokubaloi woʼomonia, ”Moguna sibai khö woʼomogu wanolo moroi khö ndra enoni sohalöwö. Na lö yaʼira, tatu oya sibai halöwönia. Daʼö mbörö wa uʼandrö sibai saohagölö ba waʼowölö-ölö hegöi ba wanolo nibeʼera.” Tatu manö, tarasoi göi zimane daʼö.—1 Ti. 3:13.

7. Hewisa wangoromaʼöda fangandrö saohagölö khö ndra enoni sohalöwö? (Faigi göi gambara.)

⁷ Tatu taʼandrö sibai saohagölö ba nifalua ndra enoni sohalöwö. Hizaʼi, ifarou ita Sura Niʼamoniʼö enaʼö tafatunö mazui taforomaʼö wangandröda saohagölö. (Kol. 3:15) Ifalua daʼö talifusöda Kristofer, samösa satua sokubaloi ba Finlandia. Imane, ”Ufaʼohe zura, SMS, mazui chat khö ndra talifusöda si tobali enoni, ba usura ba daʼö ayati si möi famarou dödöra mazui ufatunö khöra hadia mbörö wa uʼandrö saohagölö.” Pascal hegöi Jael, si  toröi ba Kaledonia Baru, asese göi laʼohe ba wangandrö ndra talifusöda si tobali enoni. Imane Pascal, ”Barö-barö daʼa, asese maʼohe ba wangandrö ndra talifusöda si tobali enoni sohalöwö, maʼandrö saohagölö khö Yehowa börö me no ibeʼe ira khöma ba maʼandrö göi enaʼö lö tebulö fao khöra Yehowa ba itolo ira.” Ifondrondrongo wangandrö simane daʼö Yehowa ba latema mbuania ira talifusöda ba mbanua niha Keriso.—2 Ko. 1:11.

IRA SATUA SOKUBALOI—”NIHA SEREGE TÖDÖ BA GOTALUAMI”

8. Hana wa iwaʼö Faulo wa no laforege wohalöwö ira satua sokubaloi me abad siföföna? (1 Tesalonika 5:​12, 13)

⁸ Laforege wohalöwö ira satua sokubaloi ba mbanua niha Keriso me abad siföföna. (Baso 1 Tesalonika 5:​12, 13; 1 Ti. 5:17) ’Ladöniaʼö’ wamalua angowuloa ba lahalö gangetula soguna ba mbanua niha Keriso. ’Labeʼe göi mene-mene’ safönu faʼomasi khö ndra talifusö enaʼö lö tebulö aro ira ba wamati. (1 Te. 2:​11, 12; 2 Ti. 4:2) Tatu manö, mohalöwö ira ba wombönökhi soguna ba nösi nomora, ba larorogö göi enaʼö aro wamatira hegöi fahuwusara khö Yehowa.—1 Ti. 3:​2, 4; Tit. 1:​6-9.

9. Hadia noro dödö ndra satua sokubaloi iadaʼa?

⁹ Oya sibai noro dödö ndra satua sokubaloi iadaʼa. Yaʼira andre sanuriaigö. (2 Ti. 4:5) Tobali ira duma-duma si sökhi ba wangoromaʼö faʼowölö-ölö ba wamalua fanuriaigö. Laʼorganisasi halöwö fanuriaigö ba mbanua si toröi yaʼira ba lafahaʼö ita hewisa enaʼö itugu onekhe ba wanuriaigö hegöi ba wamahaʼö. Baero daʼö, na so zamalua horö sebua, tobali ira sanguhuku safönu faʼahakhö dödö ba satulö. Latolo niha samalua horö andrö enaʼö ifuli sökhi gamakhaitania khö Yehowa, ba larorogö göi enaʼö lö raʼiö mbanua niha Keriso. (1 Ko. 5:​12, 13; Gal. 6:1) Hizaʼi, sabölö tohude yaʼira andre kubalo. (1 Fe. 5:​1-3) Lafaʼanö ba lafaʼema huhuo si teʼodane-dane ba Zura Niʼamoniʼö, laforege enaʼö ahori laʼila fefu ndra talifusö ba mbanua niha Keriso, ba lafalua göi halöwö fokubaloi. So ösa göi zanolo ba wamazökhi hegöi ba wondrorogö Nahia Gangowuloa, laʼorganisasi gangowuloa sebua ba zi sambua regional, tobali ira Panitia Penghubung Rumah Sakit hegöi Kelompok Pengunjung Pasien, ba oya nasa noro dödö tanö böʼö. Sindruhu-ndruhu laforege wohalöwö ira satua sokubaloi salahida!

10. Hadia mbörö wa taʼandrö sibai saohagölö khö ndra satua sokubaloi?

¹⁰ No ifaʼeleʼö Yehowa wa so dania ndra kubalo sondrorogö yaʼita irege ’lö saʼae khöda faʼataʼu mazui fanizi-nizi’. (Yer. 23:4) Irasoi samösa hewisa waʼalua wehede daʼö talifusöda Johanna moroi ba Finlandia me abölö-bölö wökhö ninania. Imane, ”Abua khögu wanutunö ösi dödögu ba niha böʼö. Hizaʼi, so samösa zatua sokubaloi si lö ahatö sibai khögu, si fao faʼebolo dödö ihaogö ifondrondrongo nifaʼemagu, fao ia khögu wangandrö ba ifaduhuʼö wa iʼomasiʼö sibai ndraʼo Yehowa. Olifudo hadia wehedenia, hizaʼi si lö irai uʼolifugö yaʼia daʼö faʼahono dödö nirasoigu me luo daʼö. Faduhu dödögu wa nifatenge Yehowa ia ba wanolo yaʼo ba ginötö si tefaudu.” Hadia no irai ötema wanolo moroi khö ndra satua sokubaloi ba mbanua niha Keriso si farahu yaʼugö?

11. Hewisa wangoromaʼöda fangandrö saohagölö khö ndra satua sokubaloi? (Faigi göi gambara.)

¹¹ Omasi Yehowa na taforomaʼö wangandrö saohagölö khö ndra satua sokubaloi ”börö halöwö nifaluara”. (1 Te. 5:​12, 13) Imane Henrietta si toröi ba Finlandia, ”Sindruhu-ndruhu so waʼaoha gölö khö ndra satua sokubaloi, hizaʼi tenga daʼö geluahania wa töra ginötö hegöi faʼabölöra moroi ba niha böʼö, mazui lö abula dödöra ba waʼauri. Itaria, omasido  umane khöra, ’Omasido ufatunö khöu Talifusö, yaʼugö andrö satua sokubaloi si sökhi.’” Imane talifusöda Sera moroi ba Turkiye, c ”Moguna mubeʼe wamarou dödö khö ndra satua sokubaloi enaʼö lö tebulö lafalua halöwöra. Börö daʼö, tola tafaʼoheʼö khöra zura, takaoni ira wemanga, mazui fao ita khöra ba wanuriaigö.” Hadia so zatua sokubaloi sinangea göi öʼandrö saohagölö ba waʼerege dödö si no ifalua? Alui lala ba wangoromaʼö khöra fangandrö saohagölö.—1 Ko. 16:18.

IRA SATUA SAMASUI—LAʼAROʼÖ MBANUA NIHA KERISO

12. Haniha nasa nibeʼe Yesu ba wangaʼaroʼö banua niha Keriso me abad siföföna? (1 Tesalonika 2:​7, 8)

¹² So ösa ndra matua nifataro Yesu ba wanolo banua niha Keriso ba lala tanö böʼö. Me abad siföföna, ibeʼe wanuturu lala khö ndra satua sokubaloi ba Yeruzalema enaʼö lafatenge Waulo, Baranaba hegöi niha tanö böʼö ba wamalua halöwö famasui. (Hal. 11:22) Ohitö dödönia fagölö simane me mufataro ndra enoni sohalöwö hegöi ira satua sokubaloi, yaʼia daʼö ba wangaʼaroʼö banua niha Keriso. (Hal. 15:​40, 41) Latehegö waʼohahau dödö awö waʼaurira ba wamahaʼö hegöi ba wamarou tödö niha böʼö.—Baso 1 Tesalonika 2:​7, 8.

13. Hadia manö noro dödö ndra satua samasui?

¹³ Ira satua samasui asese findra ira. So zanörö lala mato hauga ngaotu kilometer weʼamöi ba mbanua niha Keriso. Ero migu, lafaʼema huhuo, lafalua wokubaloi, ladöniaʼö pertemuan perintis, rafe ndra satua sokubaloi hegöi angowuloa weʼamöi manuriaigö. Laʼorganisasi gangowuloa sebua ba zi sambua wilayah mazui regional, ba lafaʼanö huhuo nifaʼema ba gangowuloa andrö. Mamahaʼö göi  ira ba sekolah perintis, ba lafalua rafe khö ndra perintis ba zi sambua wilayah. Itaria, latema göi halöwö moroi ba gödo ndraha ba moguna lafalua daʼö ba waʼalio.

14. Hadia mbörö wa taʼandrö sibai saohagölö ba halöwö nifalua ndra satua samasui?

¹⁴ Hadia mbua nitema mbanua niha Keriso ba wamorege nifalua zatua samasui? Imane talifusöda ira matua moroi ba Turkiye, ”Ero na tohare zatua samasui, tefarou dödögu enaʼö abölö oya uʼogunaʼö ginötögu ba wanolo ira talifusöda. Ato ndra satua samasui si no irai falukha khögu, hizaʼi samösa lö ba gotaluara zangumaʼö khögu wa talafo oya halöwöra ba lö inötöra fahuhuo khögu.” Johanna, nitötöi moroi yawa, no irai falulu fohalöwö ia khö zatua samasui, hizaʼi samösa lö niha si falukha ira ba nomo. Imane Johanna, ”Lö irai uʼolifugö ngaluo daʼö. Awena sibai findra ndra talifusögu si darua, ba itörö-törö manö tödögu ira. Ibeʼe khögu wondrara dödö satua samasui andrö ba itolodo enaʼö uʼila wa otalua mazui fabalisama ba wamosumange Yehowa, no si lö arara daʼö, börö me ba gulidanö si bohou dania tola fao ndraʼaga sagötö faʼara.” Ato ba gotaluada zi no irai morasoi famarou dödö moroi khö ndra satua samasui, ba daʼö mbörö wa itugu taʼomasiʼö ira.—Hal. 20:37–21:1.

15. (a) Simane niwaʼönia ba 3 Yohane 5-8, hewisa wangoromaʼöda fangandrö saohagölö khö ndra satua samasui? (Faigi göi gambara.) (b) Hadia mbörö wa taʼandrö göi saohagölö khö ndra foʼomo dalifusöda sangai halöwö, ba hewisa wamaluada daʼö? (Faigi kotak ” Törö Tödöu Woʼomora”.)

¹⁵ Ifarou dödö Gayo sinenge sotöi Faulo enaʼö itemaʼö ndra talifusö sangondrasi yaʼira ba ’itolo ira simane niʼandrö Lowalangi’. (Baso 3 Yohane 5-8.) Sambua lala si tola tafalua yaʼia daʼö takaoni ndra satua samasui wefao khöda ba wemanga. Lala tanö böʼö  yaʼia daʼö fao ita ba gangowuloa wanuriaigö sagötö wangondrasira banua niha Keriso si farahu yaʼita. Leslie, nitutunö moroi yawa, so göi lala tanö böʼö nifaluania. Imane, ”Mangandrö ndraʼo khö Yehowa enaʼö ibönökhi zoguna khöra. Yaʼo hegöi foʼomogu mafaʼoheʼö khöra zura, ba mafatunö hadia manö wanolo si no matema sagötö wangondrasira yaʼaga.” Törö tödöu wa ira satua samasui andre göna göi ira abula dödö simane salua khöda. Itaria, mofökhö ira, larasoi waʼaombö dödö hegöi faʼafatö dödö. Börö daʼö, fehedemö si sökhi mazui buala si no öna-öna nibeʼemö tola tobali fanema li ba wangandrö ndra satua samasui andrö!—Amd. 12:25.

MOGUNA KHÖDA WANOLO MOROI BA NIHA SI TOBALI BUALA

16. Moloʼö Amaedola 3:​27, hadia manö wanofu-nofu sinangea lasofu khöra samösa ira talifusöda ira matua?

¹⁶ Ba zi sagörö ulidanö, moguna itugu ato ndra talifusöda ira matua sangai halöwö tobali ”buala ba niha”. Na yaʼugö samösa talifusöda ira matua si no tebayagö idanö, hadia tola öfalua daʼa ba wanolo ira talifusöda? (Baso Gamaedola 3:27.) Hadia omasiʼö öforege wogamö ohitö dödö tobali enoni sohalöwö? Hadia omasiʼö öforege wogamö ohitö dödö tobali satua sokubaloi enaʼö oya zi tola öfalua ba wanolo ira talifusöda? d Hadia omasiʼö öbulöʼö waʼaurimö enaʼö tola fao ndraʼugö Sekolah bagi Penginjil Kerajaan? Sekola daʼa zamahaʼö ba sanolo yaʼugö enaʼö abölö iʼogunaʼö ndraʼugö Yesu ba wamalua ohitö dödö Lowalangi. Na örasoi wa tebai öhalö halöwö andrö, angandrö khö Yehowa. Andrö khönia geheha niʼamoniʼö enaʼö mofozu ndraʼugö ba wamalua halöwö nibeʼe khöu.—Luk. 11:13; Hal. 20:28.

17. Moroi ba niha si tobali buala andre, hadia zoroma sanandrösa khö Razoda, Keriso Yesu?

¹⁷ Moroi ba wamorege nifalua ndra talifusöda si no ifataro Yesu tobali ”buala ba niha”, ba daʼö oroma wa Yesu zondröniaʼö yaʼita sagötö ngaluo safuria andre. (Mat. 28:20) Taʼandrö sibai saohagölö börö me so Razoda safönu faʼomasi ba soböwö, aboto ba dödönia hadia zoguna khöda, ba ibeʼe khöda ndra talifusö sanolo yaʼita. Börö daʼö, alui lala ba wangandrö saohagölö khö ndra talifusöda serege tödö andre. Böi irai olifu göi ndraʼugö wangandrö saohagölö khö Yehowa, si no tobali Umbu ”fefu mbuala si sökhi ba soʼahonoa”.—Yak. 1:17.