1-2. Hadia zalua khö zi darua nifahaʼö Yesu me numalö ira ba Gemaʼusa?

 ME LUO daʼö 16 Nisana 33 M. Lö nasa si taya waʼabu dödö ba faʼataʼu ndra nifahaʼö Yesu. So darua moroi ba gotaluara zofanö moroi ba Yeruzalema numalö ba Gemaʼusa, sambua banua mato 11 kilometer moroi ba Yeruzalema. Afatö sibai dödö ndra matua si darua andre börö me awena sibai mubunu zondröniaʼö yaʼira. Ba zilalö, ladöna-döna wa tohare Mesia ba wangefaʼö ira niha Yahudi. Hizaʼi iadaʼa, taya wanötönara andrö. Hewaʼae simanö, so zalua sahöli-höli dödö ba zi lö ladöna-döna.

² So samösa ndra matua si lö laʼila, ihatöʼö ia ba fao ia khöra ba lala. Latutunö khönia ira nifahaʼö si darua andrö hadia zalua khö Yesu. Daʼö duho huhuora si oföna sibai si lö irai laʼolifugö. Moroi ba ”nisura Moze hegöi Nisura Ndra Samaʼeleʼö” itutunö ira matua daʼö hadia mbörö wa tefakao ba mate Mesia. Me larugi Gemaʼusa, ifatunö khöra ira matua daʼö wa yaʼia andrö Yesu si no tesusugi. Tatu omuso sibai dödö ndra nifahaʼö si darua andre börö me laʼila wa no ifuli auri Mesia!—Luk. 24:​13-35.

3-4. (a) Hadia nifalua Yesu ba wanolo ira nifahaʼönia, ba hadia mbuania? (b) Hadia nitutunöda ba artikel daʼa? (Halöwö Zinenge 1:3)

³ Me no aefa tesusugi Yesu, iʼogunaʼö 40 hari ginötönia fatua lö mangawuli ia ba zorugo. (Baso Halöwö Zinenge 1:3.) Sagötö zi 40 hari andrö, no hauga kali ifalukhaisi ba ifarou dödö ndra nifahaʼönia sabu tödö ba sataʼu me luo daʼö. Buania, tola larasoi waʼomuso dödö ba itugu barani ira ba wanuriaigö hegöi  ba wamahaʼö turia somuso dödö sanandrösa ba Wamatörö Lowalangi. a

⁴ Tola tahalö khöda wamahaʼö moroi ba nifalua Yesu sagötö zi 40 hari andrö. Ba artikel daʼa dania tatutunö hewisa wangogunaʼö Yesu gafuriata ngaluonia ba gulidanö ba (1) wamarou tödö ndra nifahaʼönia, (2) wanolo yaʼira enaʼö itugu aboto ba dödöra nösi Zura Niʼamoniʼö, hegöi (3) ba wamahaʼö yaʼira ba wamalua halöwö sabölö ebua. Tatutunö göi hewisa woloʼöda duma-duma nibeʼe Yesu.

MAMAROU TÖDÖ NIHA BÖʼÖ

5. Hana wa moguna mubeʼe wamarou dödö khö ndra nifahaʼö Yesu?

⁵ Moguna wamarou dödö khö ndra nifahaʼö Yesu. Hadia mbörö? So ösa zi no mondröi omora, ösi nomora, mazui halöwöra enaʼö tola laʼoʼö Yesu. (Mat. 19:27) So göi ba gotaluara nitiboʼö mbanua. (Yoh. 9:22) Latehegö fefu daʼö börö me faduhu dödöra wa Yesu andrö Mesia si no mufabuʼu. (Mat. 16:16) Hizaʼi, me labunu Yesu, taya fefu nidöna-dönara ba afatö sibai dödöra.

6. Hadia nifalua Yesu me no tesusugi ia?

⁶ Aboto ba dödö Yesu wa no sinangea na abu dödö ndra nifahaʼönia. Lö ibaliʼö ira niha sambö famati. Börö daʼö, me tesusugi ia, iʼanemaiʼö möi ia ba wamarou tödöra. Duma-dumania, ifalukhaisi Maria Magadala sege-ege baero ba zinga lewatö. (Yoh. 20:​11, 16) Ifalukhaisi göi ndra nifahaʼö si darua simane nitutunö moroi yawa. Ifalukhaisi göi Wetero. (Luk. 24:34) Hadia wamahaʼö si tola tahalö moroi ba duma-duma Yesu andre? Datatutunö zalua siföföna.

7. Moloʼö Yohane 20:​11-16, hadia ninehegö Yesu khö Maria, ba hadia nifaluania? (Faigi göi gambara.)

⁷ Baso Yohane 20:​11-16. Me sihulö wongi sibai me 16 Nisana, so ösa ndra alawe si möi ba lewatö Yesu. (Luk. 24:​1, 10) Samösa ba gotaluania yaʼia daʼö Maria Magadala. Me irugi nahia daʼö Maria, iʼila wa lö hadöi boto Yesu bakha ba lewatö. Fagohi ia ba wangombakha khö Wetero hegöi Yohane, ba fao ia khöra  weʼamöi ba lewatö. Me no laʼila ira Fetero hegöi Yohane wa lö hadöi boto Yesu bakha ba lewatö, mangawuli ira yomo. Hizaʼi, lö iröi Maria nahia daʼö. Ilau mege-ege ba zinga lewatö. Ba zi lö iʼila, sindruhunia inehe-nehegö ia Yesu. Börö me iʼila Yesu waʼabu dödö Maria, andrö wa ibeʼe wondrara dödö khönia. Ifalukhaisi Maria ba ibeʼe khönia halöwö ba wamalukhaisi ira nifahaʼö tanö böʼö hegöi ba wamatunö khöra wa no tesusugi Yesu. Möi fondrara dödö Maria halöwö daʼa.—Yoh. 20:​17, 18.

8. Hewisa woloʼöda duma-duma Yesu?

⁸ Hewisa woloʼöda duma-duma Yesu? Moguna tafarou dödö ndra talifusöda enaʼö lö laböhöli wamosumange Yehowa. Simane Yesu, moguna tanehegö gabula dödö salua khöra, ba tafarou dödöra moroi ba wehededa. Nehegö duma-duma moroi khö dalifusöda ira alawe sotöi Jocelyn. Mate nakhinia ono alawe. Imane Jocelyn, ”Mato hauga waŵa aefa daʼö, lö nasa taya waʼabu dödögu.” Hizaʼi, so samösa dalifusöda ira matua hegöi foʼomonia zokaoni yaʼia weʼamöi ba nomora, lafondrondrongo nösi dödönia ba lafaduhuʼö khönia wa ebua sibai mbölinia föna Lowalangi. Imane Jocelyn, ”Ba wamobörö, urasoi wa arakhagö ahöndrö ndraʼo ba nasi sobade. Hizaʼi, iʼogunaʼö ira Yehowa ba wanolo yaʼo. Börö wanolo nibeʼera, ifuli tefarou dödögu ba wamosumange Yehowa.” Tola göi tafarou dödö ndra talifusöda na tahaogö wamondrondrongo ba ginötö latutunö khöda nösi dödöra. Na tafalua daʼö, tola tarara dödöra ba tafarou dödöra enaʼö anau gölöra.—Rom. 12:15.

MANOLO NIHA BÖʼÖ ENAʼÖ ABOTO BA DÖDÖRA ZURA NIʼAMONIʼÖ

9. Hadia daha-taha salua khö ndra nifahaʼö Yesu, ba hewisa wanolonia yaʼira?

⁹ Mamati ndra nifahaʼö Yesu ba Daromali Lowalangi ba laforege wamalua daʼö ba waʼaurira. (Yoh. 17:6) Hizaʼi, lö aboto ba dödöra hadia mbörö wa labunu Yesu simane niha si lö sökhi. Iʼila Yesu wa sindruhunia laʼokhögö dödö satulö ba moguna mutolo ira enaʼö laʼokhögö waʼaboto ba dödö si tefaudu. (Luk. 9:​44, 45; Yoh. 20:9) Börö daʼö, itolo ira Yesu enaʼö abölö aboto ba dödöra nösi Zura Niʼamoniʼö. Datatutunö hewisa wamalua Yesu daʼö me ifalukhaisi ndra nifahaʼö si darua si numalö ba Gemaʼusa.

10. Hadia nifalua Yesu ba wanolo ira nifahaʼönia enaʼö laʼila wa yaʼia andrö Mesia? (Luk. 24:​18-27)

¹⁰ Baso Luka 24:​18-27. Nehegö atö wa lö iʼanemaiʼö ifatunö Yesu khö ndra matua si darua andrö haniha ia. Hadia mbörö? Te omasi Yesu na lafaehagö nösi dödöra, ba sindruhu wa daʼö nifaluara. Latutunö wa sindruhunia no ladöna-döna wa Yesu zangefaʼö iraono Gizaraʼeli moroi ba wamakao nifalua niha Romawi. Me no latutunö nösi dödöra, iʼogunaʼö Zura Niʼamoniʼö Yesu ba wanolo yaʼira enaʼö aboto ba dödöra wa fefu zalua khö Yesu andrö no tefaʼeleʼö. b Ba zi bonginia, itutunö göi daʼö Yesu khö ndra nifahaʼönia tanö böʼö. (Luk. 24:​33-48) Hadia wamahaʼö nihalöda moroi ba zalua andre?

11-12. (a) Hewisa woloʼöda duma-duma Yesu ba wamahaʼö sindruhu moroi ba Zura Niʼamoniʼö? (Faigi göi gambara.) (b) Hadia nifalua zamahaʼö Nortey ba Zura Niʼamoniʼö ba wameʼe khönia fanolo?

¹¹ Hewisa woloʼöda duma-duma Yesu? Ba ginötö öfahaʼö niha ba Zura Niʼamoniʼö, moguna si fao faʼatua-tua öbeʼe khönia wanofu enaʼö öʼila nösi dödönia. (Amd. 20:5) Na no öʼila zi so ba dödönia, fatunö khönia hewisa lala ba wangalui ayati sanolo yaʼia. Böi ha asala öfatunö khönia hadia zinangea ifalua, hizaʼi tolo ia enaʼö aboto ba dödönia nösi  Zura Niʼamoniʼö ba hewisa lalania woloʼö goi-goi si so ba ayati daʼö. Nehegö duma-duma dalifusöda ira matua sotöi Nortey moroi ba Ghana.

¹² Me 16 fakhe ndröfi Nortey, ibörögö ifahaʼö ia ba Zura Niʼamoniʼö. Lö ara aefa daʼö, lasaisi ia ira ösi nomonia. Hadia mbörö wa lö awuwu Nortey? Ba zilalö, iʼogunaʼö Mataiʼo faza 10 samahaʼö yaʼia ba Zura Niʼamoniʼö ba wamatunö khönia wa fefu niha Keriso hasambalö göna ira folohi. Imane Nortey, ”Me alua khögu wolohi, itugu faduhu dödögu wa no usöndra zindruhu.” Ifatunö göi khönia samahaʼö yaʼia sanandrösa ba goi-goi si so ba Mataiʼo 10:16 enaʼö mangelama ia ba ihaogö wamatunö famatinia ba nösi nomonia. Me no aefa tebayagö ia idanö, omasi ia tobali perintis. Hizaʼi, omasi namania na itohugö sekola salawa. Lö ifatunö samahaʼö yaʼia ba Zura Niʼamoniʼö hadia zinangea ifalua Nortey. Hizaʼi, iʼogunaʼö wanofu-nofu sanolo Nortey enaʼö aboto ba dödönia goi-goi Zura Niʼamoniʼö. Ba gafuriata, ihalö gangetula Nortey tobali perintis biasa. Börö daʼö, ifofanö ia amania moroi ba nomo. Hewisa dödö Nortey? Imane, ”Faduhu dödögu wa no uhalö gangetula si tefaudu.” Na taforege wanolo niha böʼö enaʼö aboto ba dödöra goi-goi Zura Niʼamoniʼö, no tatolo ira enaʼö tobali ira niha Keriso saro ba wamati.—Ef. 3:​16-19.

MAMAHAʼÖ IRA TALIFUSÖDA IRA MATUA BA MBANUA NIHA KERISO

13. Hadia nifalua Yesu ba wotatugöi wa lö tebulö mufalua halöwö moroi khö Namania? (Efeso 4:8)

¹³ Me so Yesu ba gulidanö, moʼahonoa wamaluania fefu halöwö nibeʼe Namania. (Yoh. 17:4) Hizaʼi, lö irai iwaʼö tödönia wa ha yaʼia zi tola mamalua halöwö daʼö. Sagötö zi tölu fakhe amatonga wamaluania halöwönia ba gulidanö, ifahaʼö niha böʼö ba wamalua halöwö daʼö. Fatua lö mangawuli ia ba zorugo, ifaduhusi tödö halöwö sebua khö ndra nifahaʼönia, ba tola manö so ba gotaluara me luo daʼö zawena töra 20 fakhe. Ibeʼe khöra halöwö ba wanuriaigö, ba wamahaʼö hegöi ba wondrorogö biri-biri Yehowa. (Baso Efeso 4:8.) No laforege ira nifahaʼö Yesu falulu fohalöwö khönia ba lö faröi ira. Hizaʼi, fatua lö mangawuli ia ba zorugo, abölö oya nasa wamahaʼö nibeʼenia khöra enaʼö tola tobali ira ”buala ba niha”. Hewisa wamahaʼö Yesu yaʼira?

14. Hadia mene-mene nibeʼe Yesu khö ndra nifahaʼönia fatua lö mangawuli ia ba zorugo? (Faigi göi gambara.)

 ¹⁴ Si fao faʼasökhi dödö, ihaogö Yesu wameʼe mene-mene khö ndra nifahaʼönia, hizaʼi lö ibiniʼö wangumaʼö khöra. Duma-dumania, iʼamenesi ira börö me so ba gotaluara zaombö tödö wa lö tola löʼö tefakao Mesia ba mate. (Luk. 24:​25-27; Yoh. 20:27) Ifatunö göi wa moguna lakubaloi mbiri-biri Yehowa ba lö laʼosambuaʼö dödöra ba wolohi harato. (Yoh. 21:15) Ifasugi ba dödöra enaʼö lö talafo laʼabusi tödö döi sebua nitema niha böʼö ba wangai halöwö khö Yehowa. (Yoh. 21:​20-22) Iʼatulöʼö göi lala wangera-ngerara si fasala sanandrösa ba Wamatörö Lowalangi, ba itolo ira enaʼö laʼosambuaʼö dödöra ba halöwö fanuriaigö. (Hal. 1:​6-8) Hewisa woloʼö ndra satua sokubaloi duma-duma Yesu?

15-16. (a) Hadia manö zi tola lafalua ira satua sokubaloi ba woloʼö Yesu? (b) Hadia nifalua Patrick irege itema mbua moroi ba mene-mene nibeʼe khönia?

¹⁵ Hewisa woloʼö ndra satua sokubaloi duma-duma Yesu? Yaʼami ira satua sokubaloi, moguna mifahaʼö ba mitolo ndra talifusöda ira matua, farahu ba daʼö zawuyu-wuyu nasa, enaʼö itugu oya halöwö si tola lafalua ba mbanua niha Keriso. c Böi tötöna wa moʼahonoa nifaluara. Hizaʼi, beʼe khöra mene-mene si fao faʼomasi enaʼö so khöra wangide-ngideʼö, tola muʼodaligö ba so khöra waʼaoha gölö ba wanolo niha böʼö.—1 Ti. 3:1; 2 Ti. 2:2; 1 Fe. 5:5.

¹⁶ Nehegö duma-duma dalifusöda ira matua sotöi Patrick, sanema bua me no mubeʼe khönia mene-mene. Me awuyu-wuyu nasa ia, asese iwaʼö wehede si lö sökhi ba ambö fahuwu ia ba niha böʼö, ifalua göi daʼö khö ndra talifusöda ira alawe. Inehegö daʼö si samösa talifusöda satua sokubaloi ba si fao faʼasökhi dödö lö itaha-taha wameʼe mene-mene. Imane Patrick, ”Uʼandrö sibai saohagölö me no ibeʼe khögu mene-mene. Me mböröta, asese sibai ide-ide dödögu na uʼila so niha böʼö sangai halöwö somasi ndraʼo. Me no utema mene-mene andrö, aboto ba dödögu wa lö moguna uʼosambuaʼö dödögu ba halöwö somasido utema ba  gangowuloa. Moguna abölö uforege ba wangoromaʼö fangide-ngideʼö hegöi faʼaoha gölö ba wanolo ira talifusöda.” Hadia mbuania? Lafataro Patrick tobali satua sokubaloi me 23 fakhe ndröfinia.—Amd. 27:9.

17. Hewisa wangoromaʼö Yesu wa ifaduhusi tödö ndra nifahaʼönia?

¹⁷ Ibeʼe noro dödö khö ndra nifahaʼönia Yesu tenga ha ba wanuriaigö, hizaʼi ba wamahaʼö. (Faigi ”ajarlah mereka” ba gonönöta si so ba Mataiʼo 28:20.) Te lawaʼö tödöra ira nifahaʼö wa lö sagu khöra wamalua halöwö daʼö. Hizaʼi, maʼifu na aombö dödö Yesu khöra, ba ifatunö khöra waʼafaduhu dödönia. Imane khö ndra nifahaʼönia, ”Simane famatenge Nama yaʼo, simanö göi wamatengegu yaʼami.”—Yoh. 20:21.

18. Hewisa woloʼö ndra satua sokubaloi duma-duma Yesu?

¹⁸ Hewisa woloʼö ndra satua sokubaloi duma-duma Yesu? Ira satua sokubaloi saro ba wamati omasi ira lafaduhusi tödö halöwö khö ndra talifusöda tanö böʼö. (Fil. 2:​19-22) Duma-dumania, labeʼe noro dödö khö ndra si bohou ebua ba wangehaogö hegöi ba wondrorogö Nahia Gangowuloa. Na no aefa labeʼe halöwö khö ndra talifusöda, moguna göi lafomaha ba lafaduhusi tödö wa sindruhu-ndruhu tola ifalua halöwönia talifusöda andrö. Matthew, samösa talifusöda sawena mufataro tobali satua sokubaloi, itutunö wa iʼandrö sibai saohagölö khö ndra satua sokubaloi si no ara mangai halöwö börö me lafahaʼö ia ba wamalua ngawalö halöwö ba mbanua niha Keriso, ba faduhu dödöra wa hasambalö sökhi wamaluania halöwö andrö. Imane Matthew, ”Na ufalua zala, latolodo enaʼö ufahaʼö ndraʼo moroi ba zala andrö ba ufalua zabölö sökhi ba zi so miföna.” d

19. Hadia zinangea öfalua iadaʼa?

¹⁹ Iʼogunaʼö Yesu ginötönia si 40 hari safuria ba wamarou tödö, ba wamahaʼö hegöi ba wamomaha niha böʼö. Dataforege göi woloʼö duma-duma nibeʼenia. (1 Fe. 2:21) Hasambalö itolo ita ba wamalua daʼö. No ifabuʼu khöda, ”Fao khömi ndraʼo ero maʼökhö irugi gamozua götö daʼa.”—Mat. 28:20.