Hadia no irai abua khöu wanörö tödö hadia zawena öfahaʼö yaʼugö? Fefu ita alua khöda zimane daʼö. Hadia zi tola öfalua? Na no aefa öfahaʼö ndraʼugö, fuli angeragö duho-tuhonia.

Ba ginötö öfahaʼö ndraʼugö, beʼe ginötöu ba woʼangeragö duho-tuho nisöndramö. No irai itolo niha böʼö Faulo, yaʼia daʼö niha sombaso surania enaʼö lafalua zimane daʼö. Imane ba zurania, ”Daʼa duho siföföna nifatunöma.” (Heb. 8:1) Me ifalua daʼö, tola aboto ba dödö niha sombaso hadia gamakhaita duho-tuhonia ba laʼila lahalö rahu-rahunia.

Beʼe ginötöu mato fulu menit ero na no awai öfahaʼö ndraʼugö ba woʼangerönusi duho-tuho si no öbaso. Na olifuʼö duho-tuhonia, fuli faigi duho side-ide mazui fehede siföföna ero sambua ngenoli. Na so zi bohou sawena öʼila, tandraigö tutunö daʼö faoma fehedeu samösa. Na öfuli öʼangerönusi duho-tuhonia, tola aoha khöu ba wanörö tödö daʼö ba aoha khömö wamalua yaʼia ba waʼaurimö sero maʼökhö.