ARTIKEL WAMAHAʼÖ 43
SINUNÖ 90 Faoma Tafarou Dödö Nawöda
Lala ba Wolawa Faʼaombö Dödö
”Haogö fareso fefu hadia ia.”—1 TE. 5:21.
NITUTUNÖ
Si tola öfalua na örasoi waʼaombö-aombö dödö si tola molua-lua ba wamosumangemö Yehowa.
1-2. (a) Hadia manö waʼaombö-aombö dödö nirasoi nono mbanua Yehowa? (b) Hadia nitutunöda ba artikel daʼa?
FEFU ita, sawuyu-wuyu mazui si no alawa döfi, tarasoi waʼaombö-aombö dödö. a Duma-dumania, samösa zi bohou ebua tola manö aombö dödönia hadia sindruhu-ndruhu iʼameʼegö tödö ia Yehowa, irege lö nasa ilulu waʼaurinia ba ibayagö ia idanö. Duma-duma tanö böʼö, samösa dalifusöda sangofönaiʼö wamalua halöwö khö Yehowa me awuyu-wuyu ia, ba lö igohi waʼakayo. Iadaʼa, me no atua ia, fangaluinia ha ibönö soguna ba nösi nomonia bongi maʼökhö. Tola manö tumbu ba dödönia waʼaombö dödö, hadia atulö gangetula nihalönia me awuyu-wuyu ia. Mazui so dalifusöda ira alawe si no atua ba si tebai boto. Tola manö irasoi waʼide-ide dödö börö me tebai saʼae ifalua zimane nifaluania mböröta me abölö ia. Te no irai tumbu göi ba dödöu wanofu-nofu daʼa: ’Hadia sindruhu-ndruhu iʼameʼegö tödö ndraʼo Yehowa? Hadia no angetula satulö nihalögu me ululu waʼaurigu ba wamalua somasi Yehowa? Hadia moguna nasa ndraʼodo andre föna Yehowa?’
2 Na lö tabeʼe wanema li moroi ba wanofu-nofu daʼö, tola manö taya wamatida khö Yehowa ba taröi wamosumange yaʼia. Börö daʼö, ba artikel daʼa dania tatutunö goi-goi Zura Niʼamoniʼö sanolo yaʼita ba wolawa fangera-ngera wa lö iʼameʼegö tödö ita Yehowa, fasala gangetula nihalöda ba zilalö, mazui lö saʼae moguna ita föna Yehowa.
LALA BA WOLAWA FAʼAOMBÖ-AOMBÖ DÖDÖ
3. Hadia zinangea tafalua na tumbu ba dödöda waʼaombö dödö?
3 Na so wanofu sangaʼasogö khöda faʼaombö-aombö dödö, moguna taʼalui wanema linia ba Zura Niʼamoniʼö. Na tafalua daʼö, tola itugu aro wamatida hegöi fahuwusa khö Yehowa.—1 Ko. 16:13.
4. Hewisa ’wamaresoda fefu hadia ia’? (1 Tesalonika 5:21)
4 Baso 1 Tesalonika 5:21. Ifarou ita Sura Niʼamoniʼö enaʼö ’tahaogö wamareso fefu hadia ia’. Hewisa wamalua daʼö? Na aombö dödöda ba zi sambua ngawalö, moguna taʼalui hadia zindruhunia niwaʼö Zura Niʼamoniʼö sanandrösa ba daʼö. Duma-dumania, na so zi bohou ebua saombö tödö hadia sindruhu-ndruhu iʼameʼegö tödö ia Lowalangi, moguna ihaogö ifareso hadia niwaʼö Zura Niʼamoniʼö. Na ifalua daʼö, aboto ba dödönia hewisa wamaigi Yehowa yaʼia.
5. Hewisa enaʼö tola taʼila wanema li nibeʼe Yehowa ba wanofu-nofuda?
5 Na tabaso Zura Niʼamoniʼö, no amaedola fahuhuo khöda Yehowa. Hizaʼi, enaʼö taʼila wanema li nibeʼe Yehowa ba wanofu-nofuda, so nasa zinangea tafalua. Moguna taʼalui ba tafahaʼö ita ba ayati Zura Niʼamoniʼö sanolo yaʼita ba wameʼe fanema li ba wanofuda andrö. Tola tafalua riset ba taʼogunaʼö publikasi nihenaigö organisasi Yehowa. (Amd. 2:3-6) Moguna göi mangandrö ita khö Yehowa ba taʼandrö khönia enaʼö itolo ita wanöndra fanema li nibeʼenia ba wanofu-nofuda. Taʼalui göi goi-goi Zura Niʼamoniʼö hegöi fanuturu lala sanolo yaʼita ba zalua khöda andrö. Sökhi na tabaso waö-waö niha si lö faröi nitutunö ba Zura Niʼamoniʼö sanaögö faʼaombö dödö simane nirasoida.
6. Na möi ita ba gangowuloa, hewisa wa möi fanoloda daʼö ba wolawa faʼaombö-aombö dödö?
6 Ba gangowuloa, fahuhuo göi Yehowa khöda. Na lö taböhöli weʼamöi ba gangowuloa, tola manö tarongo zi sambua huhuo mazui bua gera-era ndra talifusöda sanolo yaʼita ba wolawa faʼaombö-aombö dödöda. (Amd. 27:17) Iadaʼa, datatutunö hadia manö waʼaombö-aombö dödö si tola tarasoi, ba hadia zanolo yaʼita ba wolawa daʼö.
HADIA IʼAMEʼEGÖ TÖDÖ NDRAʼO YEHOWA?
7. Hadia wanofu si tola manö tumbu ba dödö niha?
7 Te no irai tumbu ba dödöu wanofu daʼa: ’Hadia sindruhu-ndruhu iʼameʼegö tödö ndraʼo Yehowa?’ Na öwaʼö tödöu wa lö moguna ndraʼugö, tola manö so ba wangera-ngeramö wa tebai fahuwu ndraʼugö khö Zomböi banua si yawa awö danö. No irai irasoi daʼö Dawido. Lö ikhamö fangera-ngerania hewisa wa tola iʼameʼegö tödö niha gulidanö Lowalangi Yehowa sebua kuaso. Manofu ia, ”He Yehowa, hadia sibai niha andrö irege önehegö ia, hadia sibai niha andrö irege öʼameʼegö tödö ia?” (Si. 144:3) Hewisa wolawamö faʼaombö dödö andrö?
8. Moloʼö 1 Samueli 16:6, 7, 10-12, hadia nifaigi Yehowa ba niha ero zamösana?
8 Ifahaʼö ita Sura Niʼamoniʼö wa ninehegö Yehowa ba waʼauri niha yaʼia daʼö sambö moguna ba wamaigi niha böʼö. Duma-dumania, ifatenge Zamueli Yehowa ba nomo Gizaʼi enaʼö ibayoini samösa moroi ba gotalua ndraononia tobali razo dania ba ndraono Gizaraʼeli. Ikaoni nononia si dafitu Izaʼi ba wamalukhaisi Samueli, hizaʼi lö ikaoni nononia siakhi sotöi Dawido. b Sindruhunia, Dawido nifili Yehowa. (Baso 1 Samueli 16:6, 7, 10-12.) Nifaigi Yehowa yaʼia daʼö ösi dödö Dawido. Iʼila wa sindruhu-ndruhu iʼomasiʼö ia ono matua sawuyu-wuyu andre.
9. Hana wa faduhu dödöda wa iʼameʼegö tödö ita Yehowa? (Faigi göi gambara.)
9 Angeragö hadia nifalua Yehowa ba wangoromaʼö wa iʼameʼegö tödö ndraʼugö. Duma-dumania, ibeʼe khöu wanuturu lala si tefaudu ba gabula dödö salua khöu. (Si. 32:8) Tatu manö tola ifalua daʼö börö me sindruhu-ndruhu iʼila sanandrösa khömö. (Si. 139:1) Na öfalua mene-mene Yehowa ba örasoi samösa mbuania, tatu itugu aro waʼafaduhu dödöu wa iʼameʼegö tödö ndraʼugö Yehowa. (1 Ng. 28:9; Hal. 17:26, 27) Iʼila Yehowa fefu nifaluamö ba wamosumange hegöi ba woloʼö niwaʼönia. Inehegö gamuata si sökhi niʼokhögömö ba omasi ia tobali si fahuwu khömö. (Yer. 17:10) Itötöna enaʼö omasi göi ndraʼugö tobali si fahuwu khönia.—1 Yo. 4:19.
”Na öʼalui [Yehowa], itehegö ösöndra ia.”—1 Ng. 28:9 (Faigi ngenoli si 9) c
HADIA ATULÖ GANGETULA NIHALÖGU BA ZILALÖ?
10. Na tafuli taʼangeragö gangetula nihalöda ba zilalö, hadia wanofu-nofu si tumbu ba dödöda?
10 Itaria, so ösa ba gotaluada zoʼangeragö angetula nihalöra ba zilalö, ba aombö dödöra hadia tefaudu gangetula daʼö. Tola manö no laröi halöwöra si sökhi mazui dadaoma salawa enaʼö itugu oya ginötöra ba wamosumange Yehowa. Hizaʼi iadaʼa, me no ngafulu fakhe numalö ginötö, te so niha si faʼila khöra si no mofozu ba wangokhögö kefe sebua ba ohahau dödöra ba waʼaurira börö me faböʼö gangetula nihalöra. Lua-luania, tumbu ba dödöra wanofu-nofu daʼa: ’Hadia no angetula si tefaudu nihalögu ba wamosumange Yehowa? Hadia tenga menaʼö abölö sökhi na uforege wohalöwö me mböröta enaʼö ohahau dödögu iadaʼa?’
11. Hadia gabula dödö salua khö zanura Sinunö 73?
11 Na tumbu ba dödöu wanofu-nofu simane daʼö, angeragö hadia nirasoi zanura Sinunö 73. Iʼila wa niha si lö mamosumange Yehowa, lö fökhö-fökhöra, kayo ira ba hulö zi lö abula dödö. (Si. 73:3-5, 12) Me inehegö daʼö fefu, iwaʼö tödönia wa lö eluaha wamosumangenia Yehowa. ’Ero maʼökhö itaögö waʼatosasa’ ba woʼangera-ngeragö daʼö fefu. (Si. 73:13, 14) Hadia nifaluania ba wolawa fangera-ngera si lö sökhi andrö?
12. Moloʼö Sinunö 73:16-18, hadia zanolo sanura Zinunö andrö ba wolawa fangera-ngerania si lö sökhi?
12 Baso Zinunö 73:16-18. Hadia zanolo sanura zinunö andrö? Möi ia ba naha niʼamoniʼö khö Yehowa. Ba daʼö, ifuli teʼasogö khönia wangera-ngera si sökhi. Aboto ba dödönia wa hewaʼae lasöndra waʼomuso dödö ba waʼaurira iadaʼa, hizaʼi lö tötönaföra ba zi so miföna. Börö daʼö, lö saʼae afatö dödönia ba aro waʼafaduhu dödönia wa no angetula fondrege zi sökhi ba wamosumange Yehowa. Buania, ihalö gangetula wa lö iböhöli wamosumange Yehowa.—Si. 73:23-28.
13. Hadia nifaluamö na maniasa ndraʼugö ba gangetula nihalömö ba zilalö? (Faigi göi gambara.)
13 Tola göi ölawa wangera-ngera si lö sökhi simane nifalua zanura sinunö. Hewisa lalania? Törö tödöu fefu zi sökhi niʼokhögömö, farahu ba daʼö girö-girömö ba zorugo, ba böi olifuʼö wa lö latema zimane daʼö niha si lö mamosumange Yehowa. Ato niha si lö mamosumange Yehowa samorege ba wolohi faʼohahau dödö ba waʼaurira iadaʼa, börö me lö tötönaföra ba zi so miföna. Hizaʼi, tenga simane daʼö ndraʼugö. Tola öʼokhögö iadaʼa ngawalö zi sökhi moroi khö Yehowa, ba no ifabuʼu wa ibeʼe nasa khöu ngawalö zahöli-höli dödö ba zi so miföna. (Si. 145:16) Angeragö göi daʼa: Hadia öʼila hewisa waʼaurimö iadaʼa na faböʼö gangetula nihalömö ba zilalö? Löʼö. Hizaʼi so sambua zi no tatu: Niha sangai angetula si teʼodane-dane ba waʼomasinia khö Lowalangi hegöi faʼomasinia nawönia niha, lö irai ambö ia ngawalö zi sökhi.
Angeragö howu-howu nibeʼe Yehowa khöu ba zi so miföna (Faigi ngenoli si 13) d
HADIA MOGUNA NASA NDRAʼO KHÖ YEHOWA?
14. Hadia manö zalua ba nono mbanua Yehowa, ba hadia wanofu si tumbu ba dödöra?
14 So ösa nono mbanua Yehowa si tebai mamalua somasi dödöra börö me no alawa ndröfira, mofökhö mazui göna ira faʼatebai mboto. Börö daʼö, so ba dödöra wa lö saʼae moguna ira khö Yehowa. Tola manö manofu ira, ’Hadia moguna nasa ndraʼodo andre khö Yehowa?’
15. Hadia zi faduhu dödö zanura Sinunö 71?
15 No irai irasoi daʼö sanura Zinunö 71. Mangandrö ia, ”Böi röi ndraʼo na no ahori waʼabölögu.” (Si. 71:9, 18) Hewaʼae simanö, lö tebulö faduhu dödö zanura sinunö wa hasambalö itolo ia Yehowa ba ibeʼe khönia wanuturu lala na lö faröi ia ba wamosumange Yehowa. Aboto ba dödö zanura sinunö andrö wa omuso dödö Yehowa ba niha samalua fondrege zi sökhi ba wamosumange yaʼia hewaʼae na lö oya zi tola lafalua.—Si. 37:23-25.
16. Hadia manö zi tola lafalua ira talifusöda si no alawa döfi irege moguna nasa ira khö Yehowa? (Sinunö 92:12-15)
16 Na no atua ndraʼugö, moguna öʼokhögö lala wangera-ngera Yehowa ba wamaigi yaʼugö samösa. Tola itolo ndraʼugö enaʼö lö faröi ba wamosumange yaʼia hewaʼae tebai mbotomö. (Baso Zinunö 92:12-15.) Moroi na öʼosambuaʼö dödömö ba zi tebai öfalua, abölö sökhi na öʼosambuaʼö dödömö ba zi tola öfalua. Duma-dumania, tola öfarou dödö niha böʼö moroi ba duma-duma waʼalöfaröi niforomaʼömö hegöi na öʼameʼegö tödö ira. Tola ötutunö khöra hewisa wanolo Yehowa yaʼugö ba zilalö ba hadia nifabuʼu Zura Niʼamoniʼö nidöna-dönamö ba zi so miföna. Törö göi tödöu wa mofaʼabölö na mangandrö ndraʼugö salahi niha böʼö. (1 Fe. 3:12) Gofu hewisa zalua khöda, hasambalö so zi tola tafalua khö Yehowa hegöi ba niha böʼö.
17. Hana wa tebai tafaedo-faedogö waʼaurida ba niha böʼö?
17 Na ide-ide dödömö börö me lö oya zi tola öfalua ba wamosumange Yehowa, yafaduhu dödöu wa iʼameʼegö tödö sibai Yehowa gofu hadia zi tola öfalua khönia. Böi faedo-faedogö zi tola öfalua ba nifalua niha böʼö. Hadia mbörö? Börö me lö irai ifaedo-faedogö ita Yehowa. (Gal. 6:4) Duma-dumania, mamuala Maria khö Yesu, ibeʼe wanikha somuhua sebua böli. (Yoh. 12:3-5) Hizaʼi, so göi samösa lakha mbanua si numana sameʼe tolo-tolo ba gosali, ha dombua loga side-ide böli. (Luk. 21:1-4) Hizaʼi, lö ifaedo-faedogö ndra alawe si darua andrö Yesu. Ba wamaiginia, faoma no laforomaʼö wamati. Moʼahonoa Yesu woloʼö Amania. Börö daʼö, yafaduhu dödöu wa inehegö ba iʼameʼegö tödö Yehowa fefu nifaluamö börö wamati ba faʼomasimö khönia, hewaʼae no ide-ide daʼö ba wamaigimö.
18. Hadia zanolo yaʼita ba wolawa faʼaombö-aombö dödö? (Faigi göi kotak ” Tola Itolo Ndraʼugö Fehede Yehowa ba Wolawa Faʼaombö-aombö Dödö”.)
18 Fefu ita itaria tarasoi waʼaombö-aombö dödö. Hizaʼi, simane si no tatutunö moroi yawa, tola itolo ita Sura Niʼamoniʼö ba wolawa daʼö. Börö daʼö, forege ba wolawa faʼaombö-aombö dödö irege tola öʼokhögö wamati saro khö Yehowa. Yafaduhu dödöu wa anehe Yehowa ndraʼugö. Iʼameʼegö tödö fefu zi no öfalua ba wamosumange yaʼia ba no ifabuʼu wa hasambalö ifahowuʼö ndraʼugö. Yafaduhu dödöu wa iʼomasiʼö ba iʼameʼegö tödö Yehowa fefu niha si lö faröi samosumange yaʼia.
SINUNÖ 111 Oya Mbörö Waʼomuso Dödöda
a ELUAHA NGAWUA WEHEDE: Ba artikel daʼa, nitutunöda yaʼia daʼö faʼaombö-aombö dödö si tola mowuwu faʼafaduhu dödöda wa ebua mbölida föna Yehowa mazui faʼaombö dödö wa atulö gangetula nihalöda ba zilalö. Daʼa tenga faʼaombö dödö nitutunö ba Zura Niʼamoniʼö si tobali tandra wa no taya wamatida khö Yehowa hegöi ba mbuʼusa linia.
b Hewaʼae lö mututunö Zura Niʼamoniʼö hawaʼalawa ndröfi Dawido me ifili ia Yehowa, hizaʼi tola tawaʼö wa awuyu-wuyu nasa ia me luo daʼö.—Faigi majalah Menara Pengawal 1 Mbaŵa si Siwa 2011, ngaʼörö 29, ngenoli 2.
c ELUAHA GAMBARA: Samösa Zamaduhuʼö Yehowa sawuyu-wuyu, iʼalui mene-mene moroi ba Zura Niʼamoniʼö enaʼö iʼila hewisa lala wangera-ngera Yehowa ba zalua khönia.
d ELUAHA GAMBARA: Samösa dalifusöda ira matua sohalöwö ba wolosi kaca ba wangalui soguna ba nösi nomonia, ikhalaigö hewisa waʼaurinia dania ba Waradaiso.
