1. Hadia niʼandrö Yehowa khöda enaʼö tafalua? (Faigi göi gambara.)

 HEZO tola tasöndra wondrara dödö hegöi fanuturu lala soguna khöda? Aboto ba dödöda wa tola tasöndra daʼö moroi khö Lowalangi Yehowa na mangandrö ita khönia. Iʼandrö khöda Yehowa ba wamalua daʼö. Omasi ia na asese mangandrö ita khönia. Imane Sura Niʼamoniʼö, ”Böi miböhöli wangandrö.” (1 Te. 5:17) Tola tafaehagö nösi dödöda khönia, ba taʼandrö khönia wanuturu lala gofu hadia ia zalua khöda. (Amd. 3:5, 6) Yehowa andrö no Lowalangi soböwö, omasi ia na asese mangandrö ita khönia.

2. Hadia nitutunöda ba artikel daʼa?

² Taʼandrö sibai saohagölö börö me no itehegö khöda Yehowa wangandrö. Hizaʼi, hadia abua khöu ba wameʼe inötö ba wangandrö börö halöwö sero maʼökhö? Hadia örasoi wa moguna ödouʼö enaʼö sökhi wangandrömö? Na simane daʼö zalua, tola itoloʼö Sura Niʼamoniʼö. Ba artikel daʼa, tatutunö dania hewisa duma-duma Yesu möi fanoloda enaʼö tola tabeʼe ginötöda ba wangandrö. Tatutunö göi lima ngawalö zabölö moguna sinangea taʼangandröi, enaʼö itugu sökhi wangandröda.

3. Hadia zaboto ba dödö Yesu sanandrösa ba wangandrö?

³ Aboto ba dödö Yesu wa ebua sibai mböli wangandrö andrö khö Yehowa. Fatua lö möi ia ba gulidanö, iʼila samösa hewisa  wameʼe Yehowa fanema li ba wangandrö genoninia si lö faröi, simane Khana, Dawido, Elia, hegöi tanö böʼönia. (1 Sa. 1:10, 11, 20; 1 Ra. 19:4-6; Si. 32:5) Daʼö mbörö wa ifahaʼö ndra nifahaʼönia Yesu enaʼö böi laböhöli wangandrö, ba faduhu dödönia wa hasambalö latema wangandröra.—Mat. 7:7-11.

4. Hadia wamahaʼö nihalöda ba duma-duma Yesu sanandrösa ba wangandrö?

⁴ No tobali duma-duma si sökhi Yesu khö ndra nifahaʼönia sanandrösa ba wangandrö. Sagötö ifalua halöwö fanuriaigö ba gulidanö, asese mangandrö Yesu khö Yehowa. Hewaʼae na oya sibai halöwönia ba asese lahurufai ia niha sato, hizaʼi lö tebulö ibeʼe ginötönia ba wangandrö. (Mrk. 6:31, 45, 46) Ihulö sibai wemaoso sihulö wongi enaʼö lö taha-tahania ba wangandrö. (Mrk. 1:35) Ba no irai mangandrö ia sara wongi faʼara fatua lö ihalö gangetula si tohude. (Luk. 6:12, 13) Baero daʼö, ba mbongi fatua lö mate ia, so mato hauga kali ilau mangandrö börö me lö ara tö iʼasiwai halöwönia sabölö abua ba gulidanö.—Mat. 26:39, 42, 44.

5. Hewisa woloʼöda duma-duma Yesu?

⁵ Duma-duma Yesu zangoromaʼö wa moguna tabeʼe ginötöda ba wangandrö hewaʼae na oya sibai halöwöda. Duma-dumania, te tahulö wemaoso ba zihulö wongi mazui taʼalawaʼö mbongi wemörö enaʼö tola talau mangandrö. Na tafalua daʼö, no taforomaʼö khö Yehowa wa taʼameʼegö tödö sibai nifotöi fangandrö. Samösa dalifusöda ira alawe sotöi Lynne, itörö tödönia me awena ifahaʼö ia ba wangandrö. Imane, ”Me uʼila wa tola fahuhuo ndraʼo khö Yehowa gofu hawaʼara manö, imane tödögu wa tola tobali ia si fahuwu khögu. Ba omasido na itugu sökhi wangandrögu.” Ato ba gotaluada zorasoi simane daʼö. Iadaʼa, datatutunö lima ngawalö zabölö moguna sinangea taʼangandröi enaʼö itugu sökhi wangandröda.

6. Hana wa lasuno Yehowa ira satua sokubaloi si 24 andrö nitötöi ba Wamaʼeleʼö 4:10, 11?

⁶ Suno Yehowa. Ba gangilata sahöli-höli dödö niʼila zinenge sotöi Yohane, so 24 zatua sokubaloi ba zorugo no latuhi danö ba wanuno Yehowa. Lasuno Lowalangi börö me lafaduhuʼö ’waʼabölönia, ba no sinangea itema lakhömi hegöi sumange’. (Baso Wamaʼeleʼö 4:10, 11.) Oya göi dane-dane khö ndra malaʼika  si lö faröi ba wanuno Yehowa. Fao ira khö Yehowa ba zorugo ba no aboto ba dödöra sanandrösa khönia. Tola laʼila gamuata si sökhi niʼokhögö Yehowa me lanehegö hadia ia nifaluania. Buania, tefarou dödöra ba wanuno yaʼia.—Yob. 38:4-7.

7. Hadia manö zi tola tawaʼö ba wanuno Yehowa?

⁷ Moguna tasuno Yehowa ba wangandröda. Tola tatutunö khönia hadia mbörö wa taʼomasiʼö ia ba taʼameʼegö tödö gamuatania. Ba ginötö öbaso Zura Niʼamoniʼö ba öfahaʼö ndraʼugö, tandraigö nehegö gamuata Yehowa sabölö omasiʼö. (Yob. 37:23; Rom. 11:33) Aefa daʼö, tutunö khö Yehowa hadia nirasoimö sanandrösa ba gamuatania andrö. Tola göi tasuno Yehowa ba zi no ifalua khöda hegöi khö ndra talifusöda. Lö tebulö ilumöʼö ba ibönökhi zoguna khöda.—1 Sa. 1:27; 2:1, 2.

8. Hadia manö niʼandröda saohagölö ba ginötö mangandrö ita? (1 Tesalonika 5:18)

⁸ Andrö saohagölö khö Yehowa. Ba ginötö mangandrö ita, oya zinangea taʼandrö saohagölö khö Yehowa. (Baso 1 Tesalonika 5:18.) Tola taʼandrö saohagölö ba ngawalö zi sökhi si no tatema, börö me fefu mbuala si sökhi moroi khönia daʼö. (Yak. 1:17) Duma-dumania, taʼandrö saohagölö khönia börö me no ibeʼe khöda gulidanö si sökhi famaigi hegöi niwöwöinia tanö böʼö sahöli-höli dödö. Taʼandrö göi saohagölö khö Yehowa börö me no ibeʼe khöda waʼauri, ösi nomo, si fahuwu, hegöi tötönafö. Baero daʼö, taʼandrö göi saohagölö khö Yehowa börö me no itehegö khöda tobali si fahuwu khönia.

9. Hana wa böi taböhöli ba woʼameʼegö tödö fefu nifalua Yehowa khöda?

⁹ Enaʼö tola taʼandrö saohagölö khö Yehowa, moguna tahaogö woʼangeragö hadia manö zi no ifalua khöda zamösana. Hadia mbörö? Börö me toröi ita ba gulidanö si lö mangila mangandrö saohagölö. Ato niha ha somasi-masi dödöra niʼangeragöra, ba lö laʼangeragö ba wangandrö saohagölö ba zi no laʼokhögö. Na ibörögö tedönisi dödöda ba lala wangera-ngera simane daʼö, tola manö olifu ita ba wangandrö saohagölö. Enaʼö lö alua daʼö, böi taböhöli ba woʼameʼegö tödö fefu zi no ifalua Yehowa ba taʼandrö saohagölö khönia.—Luk. 6:45.

10. Tutunö hewisa wa tola anau gölö zi samösa talifusöda ira alawe börö me lö tebulö iʼandrö saohagölö. (Faigi göi gambara.)

¹⁰ Na lö tebulö taʼandrö saohagölö, tola möi fanoloda daʼö ba wanaögö faʼabasaki. Nehegö zi no irai alua khö zi samösa ira alawe sotöi Kyung-sook, si so ba Menara Pengawal 15 Mbaŵa si Sara 2015. Göna ia fökhö kanker paru-paru. Imane wangumaʼö, ”Afatö sibai dödögu börö wökhö daʼa. Hulö taya fefu niʼokhögögu. Ataʼudo sibai.” Hadia zanolo yaʼia enaʼö anau gölönia? Imane wangumaʼö wa fatua lö mörö ia ba zi bongi, möi ia ba lote ba ilau mangandrö. Ba wangandrönia, itötöi lima ngawalö niʼandrönia saohagölö ba zi maʼökhö daʼö. Buania, irasoi wa teʼabölöʼö ia  ba terou göi dödönia ba wangoromaʼö faʼomasinia khö Yehowa. Irasoi samösa hewisa wotuhini Yehowa ono mbanuania si lö faröi ba ginötö si basaki. Imane wangumaʼö wa yaʼita ono mbanua Lowalangi, sindruhunia abölö oya howu-howu nitemada moroi ba waʼabasaki. Simane Kyung-sook, oya zi tola taʼandrö saohagölö hewaʼae ba waʼabasaki so ita. Na taʼandrö saohagölö khö Yehowa ba wangandrö, tola anau gölöda ba lö tebulö so khöda waʼomuso dödö.

11. Hana wa moguna so waʼabarani khö ndra nifahaʼö Yesu me no mangawuli Yesu ba zorugo?

¹¹ Andrö khö Yehowa enaʼö ibeʼe khöu waʼabarani ba wanuriaigö. Fatua lö mangawuli Yesu ba zorugo, ifasugi ba dödö ndra nifahaʼönia sanandrösa ba halöwöra, yaʼia daʼö ba wanuriaigö sanandrösa khönia ”iʼotarai Yeruzalema, Yudea ba Samaria maʼasagörö, irugi wondrege danö”. (Hal. 1:8; Luk. 24:46-48) Lö ara aefa daʼö, ira sondröniaʼö ba agama Yahudi, laraʼu zinenge sotöi Fetero hegöi Yohane ba laʼohe föna Zangetuʼö Huku. Lafetaʼu ira, ba lawaʼö khöra enaʼö laböhöli wanuriaigö. (Hal. 4:18, 21) Hadia nifalua Wetero hegöi Yohane?

12. Moloʼö Halöwö Zinenge 4:29, 31, hadia nifalua ndra nifahaʼö?

¹² Me lafetaʼu ira, ira sondröniaʼö ba agama Yahudi, imane Fetero hegöi Yohane, ”Yaʼami zangai angetula hezo zatulö ba wamaigi Lowalangi: Khömi niʼoʼö mazui khö Lowalangi. Na yaʼaga, tebai mabato wangombakha sanandrösa ba zi no maʼila hegöi si no marongo.” (Hal. 4:19, 20) Me no laʼefasi Wetero hegöi Yohane, yaʼira si darua andre hegöi ira sinenge tanö böʼö, lalau mangandrö enaʼö lö aetu lafalua hadia zomasi Yehowa. Lamane wangandrö: ”Yaʼaga sawuyumö andre, beʼe khöma waʼabarani ba wamaʼema taromalimö.” Ba ibeʼe wanema li Yehowa ba wangandröra soroi ba dödö.—Baso Halöwö Zinenge 4:29, 31.

13. Hadia wamahaʼö si tola tahalö ba zi no irai alua khö Jin-hyuk?

¹³ Tola taʼoʼö duma-duma ndra nifahaʼö me abad siföföna enaʼö lö aetu tafalua halöwö fanuriaigö hewaʼae lasaisi ita. Nehegö zi no irai alua khö Jin-hyuk, samösa dalifusöda ira matua nikuru börö me lö fao ia ba dinas militer. Ba gurunga, labeʼe halöwönia ba wamasao gö hegöi ngawalö zoguna tanö böʼö ba niha gurunga si no mufasambua. Ha daʼö zi tola ifatunö khöra sanandrösa ba zoguna khöra. Lö latehegö khönia fahuhuo sanandrösa ba Zura Niʼamoniʼö. Hizaʼi, ilau mangandrö enaʼö so khönia waʼabarani hegöi faʼatua-tua ba wanuriaigö ero so ginötö. (Hal. 5:29) Imane, ”Itema li wangandrögu Yehowa, ibeʼe khögu waʼabarani hegöi faʼatua-tua. Ibörögö ato nifahaʼögu ba Zura Niʼamoniʼö föna mbawandruhö gurunga. Ero sambua famahaʼö, faʼarania mato lima menit. Si toʼölönia, ero ba zi bongi usura zura, ba moluo mahemolunia awena ubeʼe ba niha gurunga.” Tola faduhu dödöda wa hasambalö itolo ita Yehowa enaʼö lö taböhöli wanuriaigö. Simane Jin-hyuk, tola taʼandrö waʼabarani hegöi faʼatua-tua.

14. Hadia zi tola tafalua na so gabula dödö? (Sinunö 37:3, 5)

¹⁴ Andrö wanolo khö Yehowa ba wanaögö abula dödö. Ato ba gotaluada zamorege ba wanaögö ngawalö gabula dödö, simane fökhö, faʼalio mofönu, mate niha niʼomasiʼöda, abula dödö yomo ba nomo, folohi, hegöi tanö böʼönia. Baero daʼö, itugu abua gabula dödö andrö börö pandemi hegöi fasuwöta. Hadia zi tola öfalua? Faehagö nösi dödömö khö Yehowa. Tutunö khönia  zalua khömö andrö simane na fahuhuoʼö khö zi fahuwu khöu. Ba yafaduhu dödömö wa Yehowa ”zamaigi lala khöu”.—Baso Zinunö 37:3, 5.

15. Hewisa wa möi fanoloda wangandrö enaʼö tola ’anau gölöda ba wanaögö famakao’? Beʼe duma-duma.

¹⁵ Tola ’anau gölöda ba wanaögö famakao’ na lö taböhöli wangandrö. (Rom. 12:12) Iʼila Yehowa hadia zalua khö genoninia, ba ”Ifondrondrongo na muʼao ira wangandrö fanolo”. (Si. 145:18, 19) No irasoi samösa daʼö Kristie, samösa perintis si 29 fakhe. Ba zi lö mudöna-döna, göna ia fökhö sabölö-bölö. Lua-luania, fawuka gera-erania. Aefa daʼö, lafatunö khönia wa no göna fökhö sabölö-bölö mamania irege tebai mufadöhö. Imane Kristie, ”Me luo daʼö, ulau mangandrö soroi ba dödö khö Yehowa enaʼö usöndra waʼabölö ero maʼökhö. Uforege enaʼö lö tebulö ufalua halöwö ba wamati yaʼia daʼö möido ba gangowuloa ba ufalua wamahaʼö samösa.” Imane nasa, ”Fangandrö zanolo yaʼo ba wanaögö inötö si basaki andrö. Aboto ba dödögu wa lö iröi ndraʼo Yehowa, daʼö mbörö wa so khögu waʼahono dödö. Hewaʼae na lö iʼanemaiʼö döhö ndraʼo, hizaʼi ifondrondrongo wangandrögu Yehowa. Ibeʼe khögu dödö sohau-hau ba faʼatulö dödö.” Yalötebulö itörö tödöda wa ”Iʼila Yehowa hewisa wangefaʼö niha samosumange yaʼia soroi ba dödö moroi ba wamakao”.—2 Fe. 2:9.

16. Hana wa moguna khöda wanolo moroi khö Yehowa ba wanimbagö fondrönisi dödö?

¹⁶ Andrö wanolo khö Yehowa ba wanimbagö fondrönisi dödö. Börö me lö moʼahonoa ita, moguna taforege ba wolawa fondrönisi dödö ba wamalua sala. Iforege sibai Satana enaʼö tola awuwu ita ba wondrönisi dödö. Duma-dumania, iʼogunaʼö hiburan si lö sökhi ba wamakiko fangera-ngerada. Hiburan simane daʼö zamatumbuʼö ba wangera-ngerada ngawalö zi lö tefaudu, si tola manaʼunöisi yaʼita irege ba gafuriata tafalua horö sebua.—Mrk. 7:21-23; Yak. 1:14, 15.

17. Hewisa enaʼö tola tafaudugö nifaluada ba wangandröda? (Faigi göi gambara.)

 ¹⁷ Moguna khöda wanolo moroi khö Yehowa enaʼö mofozu ita ba wolawa fondrönisi dödö. Oroma daʼö moroi ba wangandrö Yesu. Ifahaʼö ita ba wangandrö: ”Böi ohe ndraʼaga ba wanandraigö, efaʼöga moroi ba zi lö sökhi.” (Mat. 6:13) Omasi Yehowa ba wanolo yaʼita, hizaʼi moguna yaʼita samösa zangandrö tolo khönia. Moguna göi tafaudugö nifaluada simane fangandröda. Ba gulidanö nifatörö Zatana andre, oya lala wangera-ngera niha si lö tefaudu ba Zura Niʼamoniʼö. Enaʼö lö tedönisi lala wangera-ngerada, böi tabaso mazui tafondrondrongo daʼö. (Si. 97:10) Hizaʼi, databaso ba tafahaʼö ita ba Zura Niʼamoniʼö enaʼö tefaudu lala wangera-ngerada ba gohitö dödö Lowalangi. Tola göi telumöʼö lala wangera-ngerada na lö taböhöli weʼamöi ba gangowuloa hegöi fanuriaigö. Na tafalua daʼö, ifabuʼu khöda Yehowa wa lö ilulu ita ba wanandraigö si tebai tataha.—1 Ko. 10:12, 13.

18. Hadia manö zinangea tafalua?

¹⁸ Fefu ita, böi taböhöli wangandrö khö Yehowa enaʼö anau gölöda ba ngaluo safuria sabua fanaögö. Beʼe ginötöu ero maʼökhö ba wangandrö soroi ba dödö khönia. Omasi Yehowa na ’tafaehagö khönia nösi dödöda’ ba wangandrö. (Si. 62:8) Suno Yehowa, ba andrö saohagölö ba zi no ifalua. Andrö wanolo moroi khönia enaʼö tola manuriaigö ndraʼugö si fao faʼabarani. Andrö khönia wanolo enaʼö anau gölöu ba wanaögö abula dödö ba ötimbagö wondrönisi dödö. Böi tehegö gofu hadia manö zi tola manaisi yaʼugö irege lö saʼae inötöu ba wangandrö khö Yehowa. Hizaʼi, hewisa wameʼe Yehowa fanema li moroi ba wangandröda? Tatutunö wanofu si tohude andrö ba artikel aefa daʼa.