1-2. Hadia wanofu si tola tumbu ba wangera-ngerada sanandrösa ba wangandrö?

 HADIA no irai so khöu waʼaombö dödö alai na lö ibeʼe wanema li ba wangandrömö Yehowa? Na noa, tenga ha yaʼugö zorasoi daʼö. Ato ndra talifusöda zorasoi simane daʼö, mendrua manö na so gabula dödö. Na so gabula dödöda, abua khöda ba wangiʼila hewisa wameʼe Yehowa fanema li ba wangandröda.

² Tatutunö dania hana wa faduhu dödöda wa ibeʼe wanema li ba wangandrö genoninia Yehowa. (1 Yo. 5:15) Aefa daʼö, tatutunö göi wanofu-nofu andre: Hana wa itaria hulö lö ibeʼe wanema li ba wangandröda Yehowa? Ba hadia manö lala niʼogunaʼö Yehowa ba wameʼe fanema li ba wangandröda?

3. Hana wa omasi Yehowa na mangandrö ita khönia?

³ Ifaduhuʼö khöda Sura Niʼamoniʼö wa iʼomasiʼö sibai ita Yehowa, ba ebua sibai mbölida khönia. (Hag. 2:7; 1 Yo. 4:10) Daʼö mbörö wa ikaoni ita enaʼö mangandrö khönia ba taʼodaligö ia. (1 Fe. 5:6, 7) Omasi ia wanolo yaʼita enaʼö lö tebulö ahatö khönia ba anau gölöda ba wanaögö faʼabasaki.

4. Hadia itema li wangandrö genoninia Yehowa? Beʼe duma-duma. (Faigi göi gambara.)

⁴ Asese itutunö Sura Niʼamoniʼö hewisa wameʼe Yehowa fanema li ba wangandrö genoninia. Samösa ba gotaluania yaʼia daʼö Razo Dawido. Sagötö faʼaurinia, oya sibai nudunia si tola mamaʼala faʼaurinia, ba asese mangandrö ia khö Yehowa ba wangandrö fanolo. Samuza inötö, no irai imane, ”He Yehowa,  fondrondrongo wangandrögu; fondrondrongo weʼaogu ba wangandrö fanolo. Tema ligu moloʼö faʼalöfaröi ba faʼatulömö.” (Si. 143:1) Itema li wangandrö Dawido Yehowa ba iʼefaʼö ia. (1 Sa. 19:10, 18-20; 2 Sa. 5:17-25) Si fao faʼafaduhu dödö imane Dawido, ”Ahatö Yehowa ba niha soʼangaröfili yaʼia.” Ba faduhu göi dödöda ba daʼö.—Si. 145:18.

5. Hadia lö tebulö simane nitötöna genoninia ba wameʼe Yehowa fanema li ba wangandröra? Beʼe duma-duma. (Faigi göi gambara.)

⁵ Itaria lö tefaudu ba nitötönada wanema li nibeʼe Yehowa. Daʼö nirasoi zinenge sotöi Faulo. No irai iʼandrö khö Lowalangi ba wangeheta abula dödönia sabua si no amaedola ’ndroi bakha ba mbotonia’. Tölu kali no iʼohe ba wangandrönia daʼö Faulo. Hadia ibeʼe wanema li Yehowa ba wangandrönia andrö? Ibeʼe, hizaʼi tenga simane nitötöna Waulo. Lö iheta gabula dödönia andrö Yehowa, hizaʼi ibeʼe khönia waʼabölö soguna khönia enaʼö lö tebulö ifosumange Yehowa si fao faʼalöfaröi.—2 Ko. 12:7-10.

6. Hana wa itaria hulö lö ibeʼe wanema li ba wangandröda Yehowa?

⁶ Itaria, fanema li ba wangandröda lö tefaudu ba zi no tatötöna. Hizaʼi, faduhu dödöda wa abölö iʼila Yehowa lala sabölö sökhi ba wanolo yaʼita. Ba ”oya zi tola ifalua moroi ba niʼandröda hegöi si tola takhalaigö”. (Ef. 3:20) Börö daʼö, fanema li ba wangandröda te alua ia ba zi lö tadöna-döna mazui ba lala si lö niʼera-erada.

7. Hana wa itaria moguna tafaböʼöni nösi wangandröda? Beʼe duma-duma.

⁷ Itaria, moguna tafaböʼöni nösi wangandröda na taʼila hadia niʼandrö Yehowa khöda. Nehegö zi no irai alua khö dalifusöda Martin Poetzinger. Lö ara me no aefa mangowalu ia, lataha ia ba kamp konsentrasi Nazi. Ba wamobörö iʼandrö khö Yehowa ba wangefaʼö yaʼia enaʼö ifuli fao ira woʼomonia ira alawe ba latohugö halöwö fanuriaigö. Hizaʼi me no aefa dua migu faʼara, lö hadöi dandra-tandra niʼilania wa iʼefaʼö ia Yehowa. Börö daʼö ilau mangandrö, ”Yehowa, foromaʼö khögu hadia zomasiʼö ufalua.” Aefa daʼö, ibörögö iʼangeragö ndra talifusöda tanö böʼö si so ba kamp daʼö. Ato ba gotaluara laʼera-era woʼomora hegöi iraonora. Andrö, ilau mangandrö dalifusöda Poetzinger, ”Saohagölö Yehowa, ba halöwö si bohou nibeʼemö khögu. Tolo ndraʼo enaʼö uʼabölöʼö ndra talifusögu.” Daʼö nifaluania ba kamp andrö sagötö zi siwa fakhe faʼara!

8. Hadia zinangea itörö tödöda na mangandrö ita?

 ⁸ Moguna itörö tödöda wa no itatugöi Yehowa hawaʼara ifalua gohitö dödönia. Ba ginötö daʼö dania, iʼogunaʼö Wamatörönia ba wangeheta fefu abula dödöda sagötö faʼara. Lö hadöi saʼae si tola mangaʼasogö abula dödöda simane bencana alam, fökhö, hegöi faʼamate. (Dan. 2:44; Fam. 21:3, 4) Hizaʼi gasa-gasa wa alua daʼö, itehegö khö Zatana Yehowa ba wamatörö ulidanö andre. b (Yoh. 12:31; Fam. 12:9) Na iheta iadaʼa gabula dödöda Yehowa, hulö abölö sökhi dania wamatörö Zatana. Börö daʼö, moguna tabaloi irege ifalua fefu mbuʼusa linia Yehowa. Lö iröi ita Yehowa ba wanaögö abula dödöda. Datatutunö ösa hewisa lalania ba wanolo yaʼita.

9. Hewisa wanolo Yehowa yaʼita ba wangai angetula si fao faʼatua-tua? Beʼe duma-duma.

⁹ Ibeʼe khöda waʼatua-tua Yehowa. Ifabuʼu khöda Yehowa wa hasambalö ibeʼe khöda waʼatua-tua enaʼö tola tahalö gangetula si sökhi. Moguna sibai khöda waʼatua-tua moroi khö Lowalangi, mendrua manö na tahalö gangetula soʼamakhaita ba waʼaurida, duma-dumania omasi ita mangowalu mazui löʼö. (Yak. 1:5) Nehegö zi no irai alua khö dalifusöda ira alawe si lö sangowalu sotöi Maria. c Ihalö halöwö tobali perintis biasa, ba owua-wua sibai dödönia ba halöwönia andrö. Aefa daʼö, falukha ia khö zi samösa dalifusöda ira matua. Imane wangumaʼö, ”Itugu fahuwu ndraʼaga, ba faoma adöni dödöma khö nawöma zamösana. Aboto ba dödögu wa moguna uhalö gangetula, börö daʼö ulau mangandrö khö Yehowa. Uʼila wa moguna khögu wanuturu lala moroi khö Yehowa, hizaʼi uʼila göi wa tenga yaʼia zangai angetula ba waʼaurigu.” Iʼandrö waʼatua-tua Maria, ba irasoi wa ibeʼe wanema li ba wangandrönia Yehowa. Hewisa lalania? Me ifalua riset Maria ba publikasida, isöndra artikel si tefaudu ba zoguna khönia. Ifondrondrongo göi mene-mene nibeʼe mamania si no tobali Samaduhuʼö Yehowa, daʼö zanolo yaʼia ba wangiʼila hadia nirasoinia sindruhunia. Ba gafuriata, tola ihalö gangetula si sökhi.

10. Simane nisura ba Wilifi 4:13, hadia nifalua Yehowa ba wanolo genoninia? Beʼe duma-duma. (Faigi göi gambara.)

¹⁰ Ibeʼe khöda waʼabölö Yehowa enaʼö anau gölöda. Simane sinenge sotöi Faulo, tola tasöndra waʼabölö moroi khö Yehowa enaʼö anau gölöda ba wanaögö faʼabasaki. (Baso Wilifi 4:13.) Samösa dalifusöda ira matua sotöi Benjamin, irasoi wanolo moroi khö Yehowa me alua khönia waʼabasaki. Me awuyu-wuyu ia, Benjamin hegöi ösi nomonia toröi ira ba kamp konsentrasi ba Afrika. Imane Benjamin, ”Lö aetu ulau mangandrö khö Yehowa.  Uʼandrö khönia enaʼö ibeʼe khögu waʼabölö ba wamalua somasi ia. Ibeʼe wanema li ba wangandrögu Yehowa yaʼia daʼö me ibeʼe khögu waʼahono wangera-ngera, faʼabarani ba wanuriaigö, hegöi publikasi si tola manolo yaʼo enaʼö lö tebulö aro ba wamati.” Imane nasa, ”Ubaso göi zi no irai alua khö ndra talifusöda tanö böʼö, ba uʼila hewisa wanolo Yehowa yaʼira enaʼö anau gölöra. Daʼö zangaroʼö angetulagu enaʼö lö faröi khö Yehowa.”

11-12. Hewisa wangogunaʼö Yehowa ndra talifusöda ba wameʼe fanema li ba wangandröda? (Faigi göi gambara.)

¹¹ Iʼogunaʼö ndra talifusöda Yehowa. Ba mbongi fatua lö mate Yesu, ilau mangandrö soroi ba dödö. Iʼandrö khö Yehowa enaʼö lö lahuku mate ia börö me no laböbögö khönia wa no iʼoʼaya Lowalangi. Lö ibeʼe Yehowa hadia niʼandrö Yesu. Hizaʼi, itolo ia Yehowa yaʼia daʼö me ifatenge malaʼika ba wangabölöʼö Yesu. (Luk. 22:42, 43) Iadaʼa, iʼogunaʼö ndra talifusöda Yehowa ba wanolo yaʼita. Ifarou dödöra ba wotelefo hegöi ba wangondrasi yaʼita. Tola göi taʼabölöʼö ndra talifusöda na taʼalui ginötö ba wamaʼema ”fehede si sökhi” khöra.—Amd. 12:25.

¹² Nehegö zi no irai alua khö dalifusöda ira alawe sotöi Miriam. Hauga migu me no aefa mate woʼomonia ira matua, atö Miriam zi toröi ba nomonia ba irasoi waʼabu dödö ba fawuka gera-erania. Lö aetu ilau meʼe ba moguna khönia zi fahuwu si tola mamondrondrongo yaʼia na itutunö nösi dödönia. Imane wangumaʼö, ”Tebai utelefo gofu haniha manö, daʼö mbörö wa ulau mangandrö khö Yehowa. Tefatalu wangandrögu si fao feʼe, moli HP-gu. So telefo yaʼo yaʼia daʼö samösa zatua sokubaloi, si fahuwu khögu.” Satua sokubaloi andrö hegöi foʼomonia, larara dödö Miriam. Faduhu dödö Miriam wa Yehowa zamarou tödö zatua sokubaloi andrö ba wotelefo yaʼia.

13. Tutunö duma-duma sangoromaʼö wa tola iʼogunaʼö Yehowa niha si tenga samosumange yaʼia ba wameʼe fanema li ba wangandröda.

¹³ Tola iʼogunaʼö niha si tenga samosumange yaʼia Yehowa. (Amd. 21:1) Itaria, iʼogunaʼö niha si tenga samosumange yaʼia Yehowa ba wameʼe fanema li ba wangandrö genoninia. Tola ifarou dödöra ba wanolo ono mbanuania. Me föna, no irai iʼandrö Nehemia khö Razo Aretazasa enaʼö mutehegö khönia  weʼamöi ba Yeruzalema ba wangehaogö mangawuli mbanua andrö. Ba ifarou dödö Razo andrö Yehowa enaʼö itehegö khö Nehemia gangandröwa dödönia andrö. (Neh. 2:3-6) Simanö göi iadaʼa, tola ifarou dödö niha si tenga samosumange yaʼia Yehowa ba wanolo yaʼita ba ginötö moguna khöda.

14. Hadia wamahaʼö nihalömö ba zi no irai alua khö Soo Hing? (Faigi göi gambara.)

¹⁴ Samösa dalifusöda ira alawe sotöi Soo Hing, no irasoi wanolo moroi khö Yehowa me iʼogunaʼö ndra doto. So ösa wökhö nono Soo Hing soʼamakhaita ba guto. Samuza inötö, aekhu si tou nononia moroi ba nahia salawa, ba ebua zokhonia. Ba wondrorogö onora, lö tola löʼö labato wohalöwö Soo Hing hegöi foʼomonia. Lua-luania, moʼamböta ira ba zoguna. Iwaʼö Soo Hing wa hulö gitö nidöni sarakhagö aetu ia ba zalua khönia andrö. Itutunö nösi dödönia khö Yehowa ba iʼandrö khö Yehowa ba wanolo yaʼia. Aefa daʼö, doto sondrorogö ononia no mege, ihalö gangetula ba wanolo yaʼira. Buania, tola latema wanolo moroi khö ndra famareta hegöi nahia waʼatoröi si tola ikhamö kefera wangokosi. Ba gafuriata imane Soo Hing, ”Tola maʼila hewisa wanolo Yehowa yaʼaga. Sindruhu-ndruhu wa yaʼia andrö ’Samondrondrongo fangandrö.’”—Si. 65:2.

15. Hana wa tola aboto ba dödö zi samösa talifusöda ira alawe wa no ibeʼe wanema li Yehowa ba wangandrönia?

¹⁵ Si toʼölönia, tenga ba lala sahöli-höli dödö tatema wanema li ba wangandröda. Hewaʼae simanö, Amada si so ba zorugo lö tebulö ibeʼe wanema li ba wangandröda yaʼia daʼö ibeʼe hadia ia zoguna khöda enaʼö lö faröi ita khönia. Andrö, moguna tahaogö tanehegö hewisa wameʼe Yehowa fanema li ba wangandröda. Samösa dalifusöda ira alawe sotöi Yoko, no irai irasoi wa lö hadöi nibeʼe Yehowa fanema li ba wangandrönia. Aefa daʼö, itandraigö isura hadia manö niʼandrönia khö Yehowa. Ba zi hauga hari aefa daʼö, ifuli ifaigi hadia zi no isura andrö, ba aboto ba dödönia wa no arakhagö fefu ibeʼe wanema li Yehowa ba wangandrönia, farahu ba daʼö gangandröwania solifu ia. Hadia wamahaʼönia? Ero inötö moguna taʼangeragö hewisa wameʼe Yehowa fanema li ba wangandröda.—Si. 66:19, 20.

16. Hewisa wangoromaʼöda wa mamati ita? (Heberaiʼo 11:6)

¹⁶ Taforomaʼö wa mamati ita tenga ha na mangandrö ita khö Yehowa, hizaʼi omasi göi ita wanemaʼö fanema li nibeʼe Yehowa hewaʼae na faböʼö ba nitötönada. (Baso Heberaiʼo 11:6.)  Nehegö zi no irai alua khö Mike hegöi foʼomonia ira alawe sotöi Chrissy. So gohitö dödöra wangai halöwö ba Mbetieli. Imane Mike, ”No mafoʼösi formulir ba zi hauga fakhe, ba no hauga kali maʼohe daʼö ba wangandrö khö Yehowa. Hizaʼi, lö irai matema zura wogaoni ba wangai halöwö ba Mbetieli.” Hewaʼae simanö, faduhu dödö Mike hegöi Chrissy wa abölö iʼila Yehowa hadia zabölö sökhi, ba yaʼia zotatugöi hezo so mangai halöwö ira. Börö daʼö, lö tebulö lafalua hadia zi tola lafalua. Mangai halöwö ira tobali perintis biasa ba mbanua sabölö ato moguna sanuriaigö, ba latuhini halöwö famazökhi domosa nifalua organisasi. Iadaʼa, lahalö halöwö famasui. Imane Mike, ”Tenga ha simane nitötönama ibeʼe wanema li Yehowa ba wangandröma. Hizaʼi, no ibeʼe wanema li ba lala sabölö sökhi moroi ba zi tola makhalaigö.”

17-18. Simane nisura ba Zinunö 86:6, 7, hadia zi tola tafaduhusi tödö?

¹⁷ Baso Zinunö 86:6, 7. Dawido sanura sinunö andre, faduhu dödönia wa ifondrondrongo ba ibeʼe wanema li ba wangandrönia Yehowa. Tola göi öfaduhusi tödö daʼö. Oya zi no irai alua nitutunö ba artikel daʼa zamaduhuʼö ba dödöda, wa tola ibeʼe khöda Yehowa waʼatua-tua hegöi faʼabölö soguna khöda enaʼö anau gölöda. Tola göi iʼogunaʼö ndra talifusöda mazui si tenga samosumange yaʼia ba wanolo yaʼita.

¹⁸ Sindruhu sa, itaria tenga simane nitötönada lala Yehowa ba wameʼe fanema li ba wangandröda. Hewaʼae simanö, hasambalö ibeʼe wanema li. Ihenaigö hadia zoguna khöda Yehowa ba ginötö moguna khöda. Börö daʼö, böi böhöli wangandrö ba yafaduhu dödöu wa ifondrondrongo wangandrömö Yehowa. Böi irai aombö dödöu wa hasambalö ibönökhi Yehowa zoguna khöu iadaʼa ba ’iʼabusoiʼö fefu zauri’ ba gulidanö si bohou dania.—Si. 145:16.