1. Hewisa woʼamaedolagö Zura Niʼamoniʼö faʼomasi sindruhu?

 FAʼOMASI andrö ”hulö hola-hola galitö ia, hola-hola galitö Yehowa. He falawu nidanö ba tebai ibunu waʼomasi andrö, tebai göi ihanigö ia ungo nidanö”. b (SS. 8:6, 7) Daʼö niwaʼö Zura Niʼamoniʼö sanandrösa ba waʼomasi sindruhu. Fehede omasiö andrö tola möi fangaro zi sambua fongambatö: Tola miʼokhögö waʼomasi sindruhu!

2. Hadia zinangea lafalua foʼomo ira matua hegöi ira alawe enaʼö lö alö waʼomasi ba gotaluara?

² Hadia tola laʼokhögö waʼomasi sindruhu sandrohu faʼauri zi sambua fongambatö? Mangawuli daʼö ba wamorege nifaluara. Duma-dumania, enaʼö lö tebulö mohola galitö ba ndrundrunga mbaho geu, moguna munönö geu khönia. Na löʼö, itugu ara mate galitö andrö. Hulö simane daʼö göi, enaʼö lö taya waʼomasi ba zi sambua fongambatö, moguna laʼaroʼö gamakhaitara khö nawöra zamösana. Itaria, foʼomo ira matua hegöi ira alawe, larasoi wa no alö waʼomasira khö nawöra zamösana. Mendrua manö na lataögö gabula dödö ba zoguna, fökhö mboto, mazui abula dödö ba wangebuaʼö iraono. Börö daʼö, na no mangowalu ndraʼugö, hewisa wondrorogömö ”hola-hola galitö Yehowa” enaʼö lö tebulö mohola ia ba wongambatömö? Ba artikel daʼa, tatutunö tölu ngawalö lala si tola öfalua ba wondrorogö fongambatömö enaʼö lö tebulö aro ba ösöndra waʼowua-wua dödö. c

3. Hana wa tola aro waʼomasi ba zi sambua fongambatö na aro wahuwusara khö Yehowa? (Sangombakha 4:12) (Faigi göi gambara.)

³ Ba wondrorogö ”hola-hola galitö Yehowa” enaʼö lö tebulö mohola, moguna laʼokhögö wahuwusa saro khö Yehowa si sambua fongambatö. Hadia mbörö? Na laʼameʼegö tödö wahuwusara khö Yehowa, daʼö zamarou yaʼira ba woloʼö mene-menenia. Buania, tola latimbagö mazui laʼasiwai gabula dödö si tola mangalösi faʼomasira. (Baso Zangombakha 4:12.) Baero daʼö, laforege sibai ira niha samati ba woloʼö Yehowa hegöi amuatania, simane faʼasökhi dödö, faʼebolo dödö, ba omasi wangefaʼö sala. (Ef. 4:32–5:1) Na laʼokhögö gamuata simane daʼö si sambua fongambatö, itugu aro waʼomasira khö nawöra zamösana. Imane talifusöda ira alawe sotöi Lena, si no 25 fakhe no mongambatö, ”Aoha ba wangomasiʼö hegöi ba wamosumange niha samati.”

4. Hana wa Yosefo hegöi Maria nifili Yehowa si tobali satua Mesia?

⁴ Nehegö sambua duma-duma ba Zura Niʼamoniʼö. Me ifili zi sambua fongambatö Yehowa tobali satua Mesia, ifili Yosefo hegöi Maria ba gotalua ngaʼötö Dawido. Hadia mbörö? Börö me fahuwu sibai Yosefo hegöi Maria khö Yehowa, ba aboto ba dödö Yehowa wa laʼofönaiʼö ia ba wongambatöra. Yaʼami si no mongambatö, hadia wamahaʼö nihalömi khö Yosefo hegöi Maria?

5. Hadia wamahaʼö nihalö woʼomo ira matua khö Yosefo?

⁵ Lö tebulö iʼoʼö Yosefo wanuturu lala nibeʼe Yehowa, andrö wa tobali ia foʼomo si sökhi. Si löʼö-löʼönia so tölu kali itema wanuturu lala moroi khö Lowalangi sanandrösa hadia zinangea ifalua ba nösi nomonia. Ero itema wanuturu lala andrö, iʼanemaiʼö ifalua daʼö hewaʼae na lö aoha wamalua yaʼia. (Mat. 1:20, 24; 2:13-15, 19-21) Börö me iʼoʼö wanuturu lala moroi khö Lowalangi, andrö wa tola ilumöʼö Maria ba ibönökhi zoguna khönia. Daʼö mbörö wa itugu iʼomasiʼö ia Maria ba ifosumange. Yaʼami foʼomo ira matua, tola miʼoʼö duma-duma Yosefo na miʼalui mene-mene Zura Niʼamoniʼö hewisa enaʼö tobali ami högö si sökhi yomo ba nomo. d Na lö tebulö miʼoʼö mene-mene Zura Niʼamoniʼö hewaʼae na lö aoha wamalua yaʼia, no miforomaʼö wa miʼomasiʼö woʼomomi ira alawe ba itugu aro wongambatömi. Imane si samösa dalifusöda ira alawe ba Vanuatu, si no töra 20 fakhe no mongambatö, ”Börö me lö tebulö iʼalui ba iʼoʼö wanuturu lala Yehowa foʼomogu, itugu ufosumange ia. So khögu waʼahono dödö ba faduhu dödögu ba gangetula nihalönia.”

6. Hadia wamahaʼö nihalö woʼomo ira alawe khö Maria?

⁶ Fahuwu sibai Maria khö Yehowa, ba lö teʼodaligö wamatinia khö Yosefo. Oya zaboto ba dödönia sanandrösa ba Mbuku Niʼamoniʼö. (Faigi keterangan tambahan untuk  Lukas 1:46.) Ibeʼe ginötönia ba woʼangerönusi hadia zi no ifahaʼö yaʼia. (Luk. 2:19, 51) Börö wamati Maria wa tobali ia foʼomo si sökhi. Ba götöda andre, ato ndra alawe zamorege ba woloʼö duma-duma Maria. Duma-dumania, samösa dalifusöda ira alawe sotöi Emiko, imane wangumaʼö, ”Fatua lö mangowaludo, lö tebulö ufalua halöwö ba wamati ba ginötö si no utatugöi. Hizaʼi, me no aefa mangowaludo, foʼomogu zondröniaʼö fangandrö hegöi famosumange Lowalangi. Famatigu teʼodaligö khö woʼomogu ira matua. Ba gafuriata, aboto ba dödögu wa yaʼo samösa zoʼonorogö tödö ba wondrorogö gamakhaitagu khö Yehowa. Börö daʼö, ubeʼe ginötögu samösa ba wangandrö, ba wombaso Sura Niʼamoniʼö, hegöi ba woʼangerönusi yaʼia.” (Gal. 6:5) Yaʼami foʼomo ira alawe, na lö tebulö miʼaroʼö wahuwusami khö Yehowa, oya dane-dane khö woʼomomi ira matua ba wanuno hegöi ba wangomasiʼö yaʼami.—Amd. 31:30.

7. Moroi ba duma-duma Yosefo hegöi Maria, hadia wamahaʼö si tola lahalö si sambua fongambatö sanandrösa ba wefao ba wamosumange Yehowa?

⁷ Falulu fohalöwö Yosefo hegöi Maria ba wondrorogö amakhaitara khö Yehowa enaʼö lö tebulö aro. Aboto ba dödöra wa moguna sibai fao ira ba wamosumange Yehowa. (Luk. 2:22-24, 41; 4:16) Te lö aoha wamalua daʼö, mendrua manö na itugu ato ira yomo ba nomo. Hewaʼae simanö, tola mofozu ira. No tobali duma-duma si sökhi ira ba zi no mongambatö. Sindruhu sa, na no so khömi ndraono te abua khömi ba wangondrasi angowuloa, mazui ba wotatugöi wamalua famahaʼö ba zi sambua omo. Baero daʼö, te abua khömi wefao yaʼami si darua ba wamalua famahaʼö hegöi fangandrö. Hizaʼi törö tödömi, na fao ami ba wamosumange Yehowa, itugu ahatö ami khönia hegöi khö nawömi zamösana. Börö daʼö, miʼofönaiʼö wamosumange Yehowa ba nösi nomomi.

8. Hewisa zanaögö abula dödö ba wongambatö tola latema mbua moroi ba wamahaʼö ba zi sambua omo?

⁸ Hewisa na so gabula dödö ba wongambatömi? Te daʼö zameʼe abua khömi wefao ba wamalua famahaʼö ba zi sambua omo. Na simane daʼö zalua, mifatunöisi duho-tuho sadogo-dogo ba si möi fangomuso dödö. Mifili duho si fao dödömi yaʼami si darua. Tola möi fangaro gamakhaitami zamösana daʼö ba itugu terou dödömi wefao wamalua halöwö ba wamati.

9. Hana wa laʼogunaʼö ginötö wefao si sambua fongambatö?

⁹ Yaʼami si sambua fongambatö, tola mirorogö waʼomasimi khö nawömi na miʼogunaʼö ginötö wefao. Na mifalua daʼö, tola itugu aboto ba dödömi wangera-ngera hegöi nirasoi nawömi zamösana. (1 Mo. 2:24) Nehegö zi no irai alua khö Lilia hegöi Ruslan, si no töra 15 fakhe no mongambatö. Lö ara me no aefa mangowalu ira, aboto ba dödöra wa tebai laʼogunaʼö ginötö wefao simane si no latötöna. Imane Lilia, ”Oya sibai halöwöma, wangehao omo, hegöi ba wangebuaʼö iraonoma. Aboto ba dödöma, wa na lö mabeʼe ginötöma wefao wamalua halöwö, itugu alö waʼomasima khö nawöma zamösana.”

10. Hewisa zi sambua fongambatö ba woloʼö goi-goi ba Efeso 5:15, 16?

¹⁰ Yaʼami si no mongambatö, hewisa wa tola mitatugöi enaʼö so ginötömi wefao? Te moguna miʼera-era mazui mifazökhi jadwal enaʼö so ginötömi khö nawömi zamösana. (Baso Efeso 5:15, 16.) Samösa dalifusöda ira matua moroi ba Nigeria sotöi Uzondu, imane wangumaʼö, ”Me ufazökhi jadwal, ufarahugö göi ginötö wefao khö woʼomogu ira alawe. Ba lö uʼogunaʼö ginötö daʼö wamalua halöwö tanö  böʼö.” (Fil. 1:10) Nehegö hewisa Anastasia, foʼomo zatua samasui ba Moldova me ihaogö wangogunaʼö inötö. Imane, ”Na so halöwö sinangea ufalua ha yaʼo samösa, uforege wamalua daʼö ba ginötö oya halöwö woʼomogu. Na ufalua daʼö, tola so ginötöma wefao ba wamalua halöwö tanö böʼö.” Hizaʼi, hewisa na oya sibai halöwömi irege abua khömi wotatugöi inötö wefao khö nawömi zamösana?

11. Hadia manö halöwö nifalua Akila hegöi Firisikila na fao ira?

¹¹ Yaʼami si no mongambatö, tola mifahaʼö ami moroi ba duma-duma Akila hegöi Firisikila. Ato niha Keriso me abad siföföna sangomasiʼö yaʼira. (Rom. 16:3, 4) Sindruhu sa, lö nizara-zara Zura Niʼamoniʼö wanutunö sanandrösa ba wongambatöra. Hizaʼi, iforomaʼö Sura Niʼamoniʼö wa fao ira wohalöwö, manuriaigö, hegöi ba wanolo ira talifusöra si sara lala ba wamati. (Hal. 18:2, 3, 24-26) Asese mutötöi döi Firisikila me no aefa mutötöi döi Akila ba Zura Niʼamoniʼö.

12. Hewisa zi sambua fongambatö wangogunaʼöra ginötö wefao? (Faigi göi gambara.)

¹² Hewisa zi no mongambatö ba woloʼö duma-duma Akila hegöi Firisikila? Angeragö hadia manö zinangea miʼohalöwögöi. Hadia tola fao ami ba wamalua ösa lala halöwö? Duma-dumania, Akila hegöi Firisikila fao ira wanuriaigö. Hadia tola göi mitatugöi ginötö enaʼö fao ami khö woʼomomi ba wanuriaigö? Akila hegöi Firisikila fao ira wohalöwö. Hewisa göi ami? Tola manö faböʼö lala halöwö nifaluami. Hizaʼi, hadia tola fao ami ba wamalua halöwö yomo ba nomo? (Sango. 4:9) Na fao ami wamalua si sambua lala halöwö, tola mirasoi wa hulö zi sambua tim ami, ba so ginötömi wahuhuosa khö nawömi zamösana. Nehegö zi no irai alua khö Robert hegöi Linda, si no mongambatö töra ba zi 50 fakhe faʼara. Imane Robert, ”Sindruhu sa, lö inötöma wefao weʼamöi manörö-nörö. Hizaʼi, itaria na usasai wiga, foʼomogu ira alawe zolosi. Ba na uhaogö taman, möi ia itolo ndraʼo. Daʼö zameʼe omuso dödögu. Itugu fahuwu ndraʼaga ba maʼomasiʼö nawöma börö me fao ndraʼaga ba wamalua halöwö.”

13. Enaʼö sindruhu-ndruhu fahuwu zi no mongambatö hadia zinangea lafalua?

¹³ Törö tödöu, wa tenga na faoma so ba zi sambua nahia zi no mongambatö wa tola itugu fahuwu ira. Imane si samösa foʼomo ira alawe ba Brasil, ”Ba götöda andre, oya ngawalö zi tola mondrönisi fangera-ngerada. Tola manö tamane wangumaʼö wa no tahorigö ginötö wefao khö ngambatöda ha börö me toröi ita ba zi sambua omo. Sindruhunia sa, lö obönö daʼö. Moguna göi uʼameʼegö tödö hadia zoguna khö woʼomogu.” Sambua fongambatö sotöi Bruno hegöi Tays, latatugöi enaʼö laʼameʼegö tödö zoguna khö nawöra zamösana. Imane Bruno, ”Na so ginötöma wefao, maʼiröʼö HP ba lö maʼogunaʼö ia, irege omuso dödöma wangogunaʼö ginötö wefaoma andrö.”

14. Na tebai fao zi sambua fongambatö wangogunaʼö inötö, hadia zinangea lafalua?

 ¹⁴ Hizaʼi, hewisa na lö omasi ami wangogunaʼö ginötö wefao? Te faböʼö zomasi-masi dödömi, mazui no faoma abao dödömi khö nawömi. Na simane daʼö, hadia zi tola mifalua? Tandraigö fuli angeragö duma-duma sanandrösa ba ndrundrunga mbaho geu si no mututunö moroi yawa. Me awena muʼewuaʼö galitö andrö, ide-ide sibai hola-holania. Enaʼö itugu ebua hola-holania, moguna munönö geu khönia. Hulö simane daʼö, tola mibörögö iʼotarai ba zide-ide. Duma-dumania, miʼogunaʼö he ha maʼifu ginötö wefao wamalua halöwö ero maʼökhö. Mifili halöwö si faoma omasi ami, tenga si möi famaʼudumi. (Yak. 3:18) Na mifalua daʼö, itugu tedou waʼomasimi khö nawömi.

15. Hana wa moguna sibai muforomaʼö wamosumange ba wongambatö?

¹⁵ Moguna sibai muforomaʼö wamosumange ba wongambatö. Fagölö daʼö simane oksigen si tola mangorifi alitö. Na lö hadöi oksigen, iʼanemaiʼö mate galitö andrö. Simane daʼö göi, na lö hadöi famosumange, tola taya waʼomasi ba gotalua zi sambua fongambatö. Hizaʼi, na faoma lafosumange ngambatöra, itugu tedou waʼomasira khö nawöra zamösana. Törö tödöu, sabölö moguna tenga ha asala no tarasoi wa no taforomaʼö wamosumange, hizaʼi hadia no irasoi ngambatöda wa tafosumange ia. Sambua fongambatö sotöi Penny hegöi Aret, si no töra 25 fakhe no mongambatö. Imane Penny, ”Börö me mafosumange nawöma zamösana, itugu sökhi zalua ba nösi nomoma. Lö alawö ndraʼaga ba wamaʼema mbua gera-erama, börö me maʼila wa muʼameʼegö tödö daʼö.” Yaʼami si no mongambatö, hadia zinangea mifalua enaʼö irasoi ngambatömi wa mifosumange ia? Datatutunö duma-duma Gaberahamo hegöi Sara.

16. Hadia wamahaʼö nihalö woʼomo ira matua khö Gaberahamo? (1 Fetero 3:7) (Faigi göi gambara.)

¹⁶ Ifosumange Zara Aberahamo. Iʼameʼegö tödö mbua gera-era hegöi nirasoi Zara. Samuza inötö abao sibai dödö Zara, ba itutunö nirasoinia andrö khö Gaberahamo ba fatahi ia. Hadia mofönu Gaberahamo ba ifaʼema wehede safökhö? Löʼö. Aboto ba dödö Gaberahamo wa Sara andrö no foʼomo soloʼö ba sotuhini yaʼia. Ifondrondrongo Aberahamo nitutunö Zara andrö ba iforege ba wangasiwai abula dödöra. (1 Mo. 16:5, 6) Hadia wamahaʼönia? Yaʼami foʼomo ira matua, so khömi kuaso ba wangai angetula ba nösi nomomi. (1 Ko. 11:3) Hizaʼi, na miʼomasiʼö woʼomomi ira alawe, tatu miʼameʼegö tödö mbua gera-era nifaʼema woʼomomi fatua lö mihalö gangetula, mendrua manö na moʼamakhaita daʼö ba waʼaurinia. (1 Ko. 13:4, 5) Itaria, fawuka wangera-ngera woʼomomi ira alawe ba tola manö omasi ia itutunö nösi dödönia. Hadia  miforomaʼö wa mifosumange ia na mihaogö mifondrondrongo nösi dödönia? (Baso 1 Fetero 3:7.) Angela hegöi Dmitry, no mangowalu ira arakhagö 30 fakhe waʼara. Irasoi Angela wa ifosumange ia foʼomonia. Imane, ”Lö tebulö omasi Dmitry ba wamondrondrongo yaʼo na inötö abao dödögu mazui na omasido ututunö nirasoigu. So khönia waʼebolo dödö hewaʼae na mofönu ndraʼo.”

17. Hadia wamahaʼö nihalö woʼomo ira alawe khö Zara? (1 Fetero 3:5, 6)

¹⁷ Ifosumange Gaberahamo Sara ba ituhini gangetula nihalönia. (1 Mo. 12:5) Samuza inötö, ihalö gangetula Aberahamo ba wanemaʼö tome si lö mudöna-döna. Iʼandrö khö Zara enaʼö oya ifazökhi roti. Ba wamalua daʼö, tola manö iröi halöwönia Sara. (1 Mo. 18:6) Hewaʼae simanö, ituhini gangetula Gaberahamo andrö ba iʼanemaiʼö ifalua. Yaʼami foʼomo ira alawe, tola miʼoʼö Zara na mituhini gangetula woʼomomi ira matua. Na mifalua daʼö, itugu aro wongambatömi. (Baso 1 Fetero 3:5, 6.) Dmitry, si no mutötöi moroi yawa, irasoi wa ifosumange ia foʼomonia ira alawe. Imane wangumaʼö, ”Uʼameʼegö tödö wamorege nifalua Angela ba wotuhini angetulagu, hewaʼae na ambö fao dödönia ba daʼö. Ba na ambö sökhi lua-lua gangetulagu andrö, lö fatahi-tahi ia khögu.” Itugu iʼomasiʼö ami ngambatömi na faoma miforomaʼö wamosumange!

18. Hadia mbuania ba zi sambua fongambatö na laforege ba wondrorogö faʼomasi?

¹⁸ Omasi Zatana ba wanayaigö faʼomasi ba gotalua ngambatö niha Keriso. Aboto ba dödönia wa na lö faoma laʼomasiʼö nawöra zi sambua fongambatö, itugu fandröndröu ira khö Yehowa. Hizaʼi, tebai mutayaigö waʼomasi sindruhu andrö. Börö daʼö, yalötebulö miʼokhögö waʼomasi sindruhu simane niʼamaedolagö ba mbuku Zinunö Sebua. Mihalö gangetula ba wangofönaiʼö Yehowa ba wongambatömi, mibeʼe ginötö wefao khö ngambatömi, ba miforomaʼö wamosumange na miʼameʼegö tödö nirasoi hegöi soguna khö nawömi zamösana. Na mifalua daʼö, tola tefolakhömi Yehowa ba wongambatömi, Umbu waʼomasi sindruhu. Simane alitö nirorogö enaʼö lö tebulö mohola, faʼomasi ba gotaluami itugu tedou irugi zi lö aetu.