1. Hadia manö daha-taha nitaögöda?

 HADIA no irai ötatugöi gohitö dödöu ba wamati, hizaʼi abua khöu ba wogamö yaʼia? b Na noa, tenga ha yaʼugö zorasoi daʼö. Duma-dumania, omasi Philip enaʼö itugu sökhi wangandrönia ba enaʼö asese ilau mangandrö. Hizaʼi, abua khönia ba wameʼe inötönia ba wangandrö. Omasi Erika na lö ahou waʼatoharenia ba wangondrasi angowuloa wanuriaigö. Hizaʼi, arakhagö ero iʼondrasi nahia gangowuloa wanuriaigö, lö tebulö ahou ia nasa. No hauga kali itandraigö Tomáš ba wombaso fefu nösi Zura Niʼamoniʼö, hizaʼi imane, ”Lö omasido ubaso Zura Niʼamoniʼö. No tölu kali utandraigö wombaso yaʼia iʼotarai ba wamobörö, hizaʼi lö tebulö tebato ba mbuku 3 Moze.”

2. Na lö sofozu ita nasa ba wogamö ohitö dödö ba wamati, hana wa böi ide-ide dödöda?

² Na no ötatugöi gohitö dödö ba wamati, hizai lö sofozu ndraʼugö ba wogamö yaʼia, böi ide-ide dödömö. Hewaʼae na hulö si toʼölö manö gohitö dödö andrö, si toʼölönia moguna ginötö hegöi famorege ba wogamö yaʼia. Sindruhunia, na omasi ndraʼugö ba wogamö ohitö dödömö, daʼö zangoromaʼö wa öʼameʼegö tödö wahuwusamö khö Yehowa ba omasiʼö öbeʼe zabölö sökhi khönia. Iʼameʼegö tödö wamorege nifaluamö Yehowa. Baero daʼö, lö itötöna Yehowa enaʼö öfalua zi tebai öfalua. (Si. 103:14; Mi. 6:8) Börö daʼö, tatugöi gohitö dödömö ba zalua khömö. Na no ötatugöi sambua gohitö dödö, hadia zi tola öfalua ba wogamö yaʼia? Datatutunö ösa wanuturu lalania.

3. Hana wa moguna sibai wamarou dödö?

³ Moguna sibai wamarou dödö na omasi ita ba wogamö ohitö dödöda. Na tefarou dödö zi samösa niha, tola itugu omasi ia ba iforege ba wogamö ohitö dödönia. Famarou dödö andrö tola mufagölösi ia simane angi solulugö köfa. Na lö tebulö so nangi, tola irugi ba nahia zi möi ia köfa andrö. Ba na abölö-bölö nangi, hasambalö alio irugi köfa andrö. Simane daʼö göi, na asese lafarou dödöda, itugu aoha khöda ba wogamö ohitö dödöda. Samösa dalifusöda ira matua sotöi David moroi ba El Savador, imane wangumaʼö, ”Na tefarou dödöda, tatu itugu taforomaʼö wamorege. Lö tatehegö gofu hadia manö zi tola manaisi yaʼita ba wogamö ohitö dödöda.” Börö daʼö, hadia zi tola öfalua enaʼö tefarou dödöu ba wogamö ohitö dödömö?

4. Hadia zi tola taʼangandröi? (Filifi 2:13) (Faigi göi gambara.)

⁴ Angandrö enaʼö so khöu waʼaterou dödö. Iʼogunaʼö gehehania Yehowa ba wameʼe khöu famarou dödö ba wogamö ohitö dödömö. (Baso Filifi 2:13.) Itaria, tatatugöi zi sambua ohitö dödö börö me taʼila wa moguna tafalua ia, sökhi sibai daʼö. Hizaʼi, hewisa na lö hadöi khöda faʼaterou dödö ba wogamö ohitö dödöda andrö? Nehegö zi no irai alua khö dalifusöda ira alawe moroi ba Uganda sotöi Norina. No itatugöi sambua gohitö dödö ba wondröniaʼö famahaʼö ba Zura Niʼamoniʼö. Hizaʼi, lö khönia faʼaterou dödö ba wamalua daʼö börö me irasoi wa tenga samahaʼö sonekhe ia. Hadia zanolo yaʼia? Itutunö, ”Ero maʼökhö uʼandrö khö Yehowa enaʼö ibeʼe khögu waʼaterou dödö ba wondröniaʼö famahaʼö ba Zura Niʼamoniʼö. Ba ufaudugö nifaluagu simane fangandrögu, uforege ba wondrouʼö faʼonekhegu ba wamahaʼö. Me no aefa ba zi hauga waŵa, itugu terou dödögu ba wondröniaʼö famahaʼö ba Zura Niʼamoniʼö. Ba ndröfi daʼö göi, so darua nifahaʼögu ba Zura Niʼamoniʼö.”

5. Hadia zinangea taʼangerönusi enaʼö itugu terou dödöda?

⁵ Angerönusi hadia manö zi no ifalua khöu Yehowa. (Si. 143:5) Iʼangerönusi Waulo hewisa Yehowa ba wangoromaʼö faʼomasi si tohude khönia. Daʼö zamarou yaʼia enaʼö itugu iforege wangai halöwö khö Yehowa. (1 Ko. 15:9, 10; 1 Ti. 1:12-14) Simane daʼö göi, na itugu asese öʼangerönusi hadia zi no ifalua khöu Yehowa, itugu tefarou dödömö ba wogamö ohitö dödömö. (Si. 116:12) Nehegö hadia zanolo talifusöda ira alawe ba Honduras ba wogamö ohitö dödönia tobali perintis biasa. Itutunö, ”Aboto ba dödögu wa iʼomasiʼö sibai ndraʼo Yehowa. Itolo ndraʼo enaʼö tobali ono mbanuania. Ilumöʼö ndraʼo ba ibönökhi zoguna khögu. Me uʼangerönusi fefu daʼö, itugu uʼomasiʼö ia, ba itugu terou dödögu wamosumange yaʼia tobali perintis biasa.”

6. Hadia nasa zanolo yaʼita enaʼö itugu terou dödöda ba wogamö ohitö dödöda?

⁶ Angeragö hadia manö mbuania na ökhamö gohitö dödömö. Nehegö hadia zanolo Erika  si no mutötöi moroi yawa ba wogamö ohitö dödönia enaʼö lö ahou waʼatoharenia ba wangondrasi angowuloa wanuriaigö. Imane, ”Oya ngawalö zi no ulalöi na ahou weʼasogu wangondrasi angowuloa wanuriaigö. Hizaʼi na alio toharedo, tola fahuhuo ndraʼo khö ndra talifusöda. Utema wanuturu lala si möi fanologu enaʼö itugu onekhedo manuriaigö ba itugu omuso dödögu wamalua yaʼia.” Börö me iʼangeragö Erika hadia mbuania na lö ahou waʼatoharenia, tola mofozu ia wogamö ohitö dödönia. Hewisa göi ndraʼugö? Hadia manö mbua si tola öʼangeragö? Na ohitö dödömö soʼamakhaita ba wombaso Sura Niʼamoniʼö mazui fangandrö, angeragö hewisa enaʼö tola möi fangaroʼö wahuwusamö daʼö khö Yehowa. (Si. 145:18, 19) Mazui na ohitö dödömö ba wondrouʼö mbua-bua niha Keriso, angeragö hewisa enaʼö tola möi fanolomö daʼö irege öʼokhögö gamakhaita si sökhi ba niha böʼö. (Kol. 3:14) Tandraigö sura hadia manö dane-dane wa tola omasiʼö ba wogamö ohitö dödömö, ba baso daʼö ero inötö. Imane Tomáš si no mutötöi moroi yawa, ”Na oya dane-dane khögu ba wogamö si sambua ohitö dödö, itugu terou dödögu ba wogamö yaʼia ba lö alio awuwu ndraʼo.”

7. Hadia zanolo Julio hegöi foʼomonia ira alawe ba wogamö ohitö dödöra?

⁷ Fariawö ba niha si tola mameʼe khöu famarou dödö. (Amd. 13:20) Nehegö hadia zanolo Julio hegöi foʼomonia ira alawe ba wogamö ohitö dödöra ba wamati enaʼö findra ira ba mbanua si lö ato sanuriaigö. Imane Julio, ”Mafili nawöma fariawö si tola mamarou tödöma ba wogamö ohitö dödöma, ba asese matutunö gohitö dödöma khöra. Ato ba gotaluara zi no mofozu ba wogamö ohitö dödö si fagölö, andrö wa tola labeʼe khöma wanuturu lala si sökhi. Itaria, lasofu khöma hadia manö wamaʼanö si no mafalua, ba labeʼe khöma wamarou dödö ba ginötö moguna khöma.”

8. Hadia lua-luania na ha ba ginötö so khöda waʼaterou dödö awena takhamö gohitö dödöda? (Faigi göi gambara.)

⁸ Sindruhu sa, so ginötönia lö hadöi khöda faʼaterou dödö. Hizaʼi, hadia tola taforege ba wogamö ohitö dödöda? Tola. Angeragö duma-duma andre. Na abölö-bölö nangi, tola ilulugö göfa weʼamöi ba nahiania. Hizaʼi, lö asese so nangi sabölö mazui itaria lö hadöi. Ba ginötö daʼö, hadia so zinangea ifalua solohe köfa enaʼö lö tebulö mofanö göfa andrö? So. So ösa göfa sangogunaʼö mesin mazui eu ba woʼalukhaini, tola iʼogunaʼö daʼö solohe köfa ba wogamö ohitö dödönia. Hadia wamahaʼönia? Famarou dödö, tola muʼamaedolagö ia simane angi. Itaria so khöda waʼaterou dödö, ba itaria löʼö. Na taforege ba wogamö ohitö dödöda ha ba ginötö so khöda waʼaterou dödö, tola manö lö mofozu ita ba wogamö ohitö dödöda andrö. Hizaʼi, simane solohe köfa, iʼogunaʼö lala tanö böʼö ba wogamö ohitö dödönia ba ginötö lö hadöi angi. Moguna göi taforege ba wogamö ohitö  dödöda ba ginötö lö khöda faʼaterou dödö. Sindruhu sa, moguna khöda wanaha tödö wamalua daʼö. Hizaʼi, tenga zaya-zaya gölö wamorege nifaluada. Iadaʼa, fatua lö tatutunö hadia zi tola tafalua, datatutunö sambua fanofu si tola manö tumbu ba wangera-ngerada.

9. Na lö hadöi khöda faʼaterou dödö ba wogamö ohitö dödöda, hadia lö tebulö taforege ba wogamö yaʼia? Tutunö.

⁹ Omasi Yehowa na tafosumange ia soroi ba dödö ba si fao faʼomuso dödö. (Si. 100:2; 2 Ko. 9:7) Börö daʼö, na lö hadöi khöda faʼaterou dödö ba wogamö ohitö dödöda, hadia moguna taforege ba wogamö yaʼia? Moguna. Nehegö duma-duma zinenge sotöi Faulo. Imane, ”Uhuku mbotogu ba uʼosawuyu.” (1 Ko. 9:25-27, nis.) Iforege Faulo ba wamalua somasi Yehowa, hewaʼae na lö khönia faʼaterou dödö wamalua daʼö. Hadia omuso dödö Yehowa ba wamorege nifalua Waulo? Tatu manö. Ba ifahowuʼö ia Yehowa.—2 Ti. 4:7, 8.

10. Hadia mbuania na taforege ba wogamö ohitö dödöda?

¹⁰ Omuso dödö Yehowa na taforege ba wogamö ohitö dödöda, hewaʼae na ambö terou dödöda wamalua yaʼia. Hadia mbörö? Börö me aboto ba dödönia hewaʼae na ambö omasi ita wamalua daʼö, hizaʼi lö tebulö tafalua daʼö börö me taʼomasiʼö ia. Hulö simane famahowuʼö Yehowa Waulo, simane daʼö göi wamahowuʼönia yaʼita. (Si. 126:5) Na tarasoi howu-howu Yehowa, itugu so khöda waʼaterou dödö wamalua ohitö dödöda. Samösa dalifusöda ira alawe moroi ba Polandia sotöi Lucyna, imane wangumaʼö, ”Itaria lö khögu faʼedöna weʼamöi manuriaigö, mendrua manö na no marasedo. Hizaʼi, na no möido manuriaigö, owua-wua sibai dödögu. Hulö simane mbuala si tohude daʼö khögu.” Iadaʼa, datatutunö hadia manö zi tola tafalua ba ginötö lö khöda faʼaterou dödö.

11. Hewisa wanolo Yehowa yaʼita enaʼö tola takhamö gohitö dödöda?

¹¹ Andrö geheha niʼamoniʼö. Tola itolo ita eheha niʼamoniʼö ba wondrouʼö bua-bua samarou yaʼita ba wogamö ohitö dödöda, mendrua manö na abua khöda wamalua daʼö mazui lö khöda faʼaterou dödö. Börö daʼö, andrö khö Yehowa enaʼö ibeʼe khöu gehehania irege tola ödouʼö mbua-bua sanolo yaʼugö ba wogamö ohitö dödöu. (Luk. 11:13; Gal. 5:22, 23) Iwaʼö David si no mutötöi moroi yawa, wa möi fanolonia wangandrö. Omasi ia enaʼö asese ifalua wamahaʼö samösa. Börö daʼö, iʼandrö geheha niʼamoniʼö khö Yehowa enaʼö tola ikhamö gohitö dödönia andrö. Imane, ”Börö wanolo moroi khönia, tola ubörögö wamalua famahaʼö samösa ba ufalua daʼö ero maʼökhö.”

12. Hewisa goi-goi ba Zangombakha 11:4 möi fanoloda ba wogamö ohitö dödöda?

¹² Böi baloi ginötö si sökhi. Ba gulidanö andre, lö irai moʼahonoa zalua khöda. Na tabase-baseʼö manö, tola manö lö takhamö gohitö dödöda. (Baso Zangombakha 11:4.) Imane dalifusöda ira matua sotöi Dayniel, ”Lö hadöi inötö si sökhi. Yaʼita samösa zangaʼasogö ginötö si sökhi yaʼia daʼö na iʼanemaiʼö tabörögö wamalua halöwöda.” Samösa dalifusöda ira matua moroi ba Uganda sotöi Paul, itutunö hadia dane-dane tanö böʼö wa böi so khöda foradö-radö: ”Na tabörögö tafalua halöwöda hewaʼae na lö aoha wamalua yaʼia, hasambalö ifahowuʼö ita Yehowa.”—Mal. 3:10.

13. Hadia mbuania na tabörögö moroi ba wondrege zide-ide?

¹³ Börögö moroi ba wondrege zide-ide. Tola manö lö hadöi khöda faʼaterou dödö börö me tarasoi wa gohitö dödöda andrö abua ba wogamö yaʼia. Börö daʼö, tandraigö börögö moroi ba ngawalö zide-ide. Duma-dumania, na so mbua-bua somasiʼö ödouʼö, tandraigö foromaʼö daʼö ba wondrege zide-ide. Mazui na  omasiʼö enaʼö ahori öbaso Zura Niʼamoniʼö, tatugöi enaʼö adogo-dogo ginötömö wombaso yaʼia. Tomáš, si no mututunö ba wamobörö artikel andre, iʼokhögö gohitö dödö enaʼö ahori ibaso Zura Niʼamoniʼö ba zi döfi. Hizaʼi, abua khönia ba wogamö daʼö. Imane wangumaʼö, ”Aboto ba dödögu wa tebai ubaso Zura Niʼamoniʼö ba waʼalio simane daʼö. Börö daʼö, uhalö gangetula enaʼö utandraigö zui ufalua. Hizaʼi sakali daʼa, ubaso mato hauga ngenoli ba uʼangerönusi daʼö. Buania, ibörögö urasoi waʼomuso dödö ba wombaso yaʼia.” Börö me itugu owua-wua dödö Tomáš’ wamalua fombaso Sura Niʼamoniʼö, idouʼö nasa ginötönia wamalua daʼö. Ba gafuriata, mofozu ia ba wombaso fefu nösi Zura Niʼamoniʼö. c

14. Hana wa lö nasa mofozu ita ba wogamö ohitö dödöda?

¹⁴ Itaria, hewaʼae na no terou dödöda ba taʼokhögö wanaha tödö, tola manö lö sofozu ita ba wogamö ohitö dödöda. Duma-dumania, so ’zalua si lö mudöna-döna’ si tola alua khöda irege lö inötöda ba wogamö ohitö dödöda. (Sango. 9:11) Tola manö göi tataögö faʼabasaki sangohorigö faʼabölöda mazui sangaʼasogö khöda faʼide-ide dödö. (Amd. 24:10) Baero daʼö, tola manö tafalua zala irege abua khöda ba wogamö ohitö dödöda. (Rom. 7:23) Mazui no marase ita. (Mat. 26:43) Na simane daʼö, hadia zi tola manolo yaʼita?

15. Na lö mofozu ita sakali, hadia daʼö geluahania wa siʼogötöʼö lö mofozu ita? Tutunö. (Sinunö 145:14)

¹⁵ Törö tödöu wa tenga siʼogötöʼö lö mofozu ita. Imane Sura Niʼamoniʼö wa tola manö asese alabu ita, mazui tataögö gabula dödö. Hizaʼi, Sura Niʼamoniʼö göi zangoromaʼö wa tola ifuli maoso ita börö wanolo Yehowa. (Baso Zinunö 145:14.) Imane Philip si no mutötöi moroi yawa, ”Tenga ba daʼö musuʼa waʼamofozugu ba zi hauga kali alabudo, hizaʼi ba zi hauga kali maoso ndraʼo.” Imane göi David si no mutötöi moroi yawa, ”Na utaögö waʼabasaki  mazui so zi lö mofozu ndraʼo, lö ubaliʼö daʼö taha-tahagu. Hizaʼi, uʼogunaʼö ginötö daʼö ba wangoromaʼö khö Yehowa wa sindruhu-ndruhu uʼomasiʼö ia.” Na lö tebulö öforomaʼö wamorege hewaʼae na lö mofozu nasa ndraʼugö, no öforomaʼö khö Yehowa wa omasiʼö ba wangomusoiʼö tödönia. Tatu omuso dödö Yehowa wamaigi yaʼugö me öforege ba wogamö ohitö dödömö!

16. Hadia zi tola taʼangeragö ba ginötö lö mofozu ita?

¹⁶ Fahaʼö ndraʼugö ba zi lö mofozuʼö andrö. Angeragö hadia mbörö wa lö mofozu ndraʼugö, ba hadia zi tola öfalua enaʼö lö ifuli alua daʼö. (Amd. 27:12) Itaria, faʼalömofozu zangoromaʼö wa ambö tefaudu gohitö dödöda andrö. Na simane daʼö zalua, fatimbaisi hadia gohitö dödömö andrö tefaudu ia khömö. d Lö afatö dödö Yehowa na lö mofozu ndraʼugö ba wogamö ohitö dödömö si töra moroi ba waʼabölömö.—2 Ko. 8:12.

17. Hana wa moguna tatörö tödöda ngawalö zi no mofozu ita?

¹⁷ Törö tödömö ngawalö zi no ökhamö. Imane Sura Niʼamoniʼö wa ’Tenga sa si lö atulö Lowalangi irege olifu ia halöwömö’. (Heb. 6:10) Andrö, moguna itörö tödöu daʼö. Tandraigö angeragö hadia manö zi no ökhamö. Duma-dumania, no örorogö wahuwusamö khö Yehowa, öfatunö ba niha böʼö sanandrösa khönia, mazui no ölulu waʼaurimö ba tebayagö idanö. Irugi iadaʼa, no öforomaʼö waʼatedou ba wogamö ohitö dödö ba wamati. Börö daʼö, tola öforomaʼö nasa waʼatedou ba wamati ba wogamö ohitö dödö si no ötatugöi.—Fil. 3:16.

18. Hadia zinangea itörö tödöda ba ginötö taforege ba wogamö ohitö dödöda? (Faigi göi gambara.)

¹⁸ Börö wanolo Yehowa, tola mofozu ndraʼugö ba wogamö ohitö dödömö, simane solohe köfa sofozu ba wogamö ohitö dödönia. Tatu irasoi waʼomuso dödö. Hizaʼi törö tödöu, ato zolohe köfa somuso tödö ba wofanöra. Simane daʼö göi, ba ginötö öforege ba wogamö ohitö dödömö, omusoiʼö dödömö ba wofanömö. Böi olifu ndraʼugö hewisa Yehowa ba wanolo hegöi ba wamahowuʼö yaʼugö. (2 Ko. 4:7) Na lö awuwu ndraʼugö, hasambalö oya howu-howu nitemamö.—Gal. 6:9.