1. Hadia nirongoda ba gangowuloa ero röfi me 2023?

 BA GANGOWULOA ero röfi me 2023, a so waʼaboto ba dödö si bohou nitemada sanandrösa ba nifaduhusida tödö, ba tarongo göi gangombakhata sadöni dödöda sanandrösa ba halöwö fanuriaigö nifaluada. Duma-dumania, tafahaʼö ita wa tola manö so ösa niha dania tebeʼe khöra ginötö ba wotuhini ono mbanua Yehowa hewaʼae no aefa tedudugö Mbabilona Sebua. Tatema göi gangombakhata me baŵa si Felezara 2023 wa lö saʼae moguna lafatunö ira sanuriaigö hauga za niʼogunaʼöra ba wanuriaigö. Börö me so waʼatebulö andrö, hadia daʼö geluahania wa lö saʼae mangaösö wamaluada halöwö fanuriaigö simane ba zilalö? Tatu manö löʼö!

2. Hadia mbörö wa itugu mangaösö halöwö fanuriaigö nifaluada iadaʼa? (Mareko 13:10)

² Iadaʼa, itugu mangaösö halöwö fanuriaigö nifaluada. Hadia mbörö? Börö me lö ara tö ginötö ba wangohori ulidanö andre. Nehegö hadia nifaʼeleʼö Yesu sanandrösa ba halöwö fanuriaigö nifaluada ba ngaluo safuria. (Baso Mareko 13:10.) Ba mbuku Mataiʼo, ifatunö khöda Yesu wa teturiaigö dania duria somuso dödö andrö ba zi sagörö ulidanö misa fatua lö tohare ”gamozua” götö danö andre. (Mat. 24:14) Ngawua wehede daʼa manandrösa ia ba wangohori ulidanö si lö sökhi nifatörö  Zatana. No itatugöi Yehowa ”baŵa hegöi inötö” ba ngawalö zi lö ara tö alua. (Mat. 24:36; 25:13; Hal 1:7) Itugu numalö ginötö, itugu ahatö ita ba ngaluo andrö. (Rom. 13:11) Gasa-gasa wa lö tohare ngaluo andrö, böi taböhöli ba wamalua halöwö fanuriaigö.

3. Hadia zamarou yaʼita weʼamöi manuriaigö?

³ Ba ginötö taʼangerönusi halöwö fanuriagö nifaluada, moguna taʼangeragö wanofu andre: Hana wa omasi ita tafalua halöwö fanuriaigö turia somuso dödö? Faʼomasi zamarou yaʼita. Ba ginötö manuriaigö ita, daʼö zangoromaʼö wa taʼomasiʼö zindruhu si so ba Zura Niʼamoniʼö, niha böʼö, ba sabölö tohudenia taʼomasiʼö Yehowa hegöi töinia. Datazara-zara wanutunö yaʼia.

MANURIAIGÖ ITA BÖRÖ ME TAʼOMASIʼÖ ZINDRUHU

4. Hewisa dödöda me tarongo duria somuso dödö?

⁴ Khalaigö hewisa dödömö ba ginötö örongo duria somuso dödö. Te tumbu samösa ndraono ba nösi nomomö, mazui so samösa niha sameʼe khöu halöwö ba ginötö si tefaudu. Tatu terou sibai dödömö ba wanutunö turia andrö ba nösi nomou hegöi khö ndra awö-awöu. Hadia simane daʼö göi dödömö me örongo duria sabölö tohude yaʼia daʼö turia somuso dödö sanandrösa ba Wamatörö Lowalangi?

5. Hewisa dödömö me awena sibai öfahaʼö ndraʼugö ba zindruhu si so ba Zura Niʼamoniʼö? (Faigi göi gambara.)

⁵ Fuli angeragö hewisa dödömö me awena sibai öfahaʼö ndraʼugö ba zindruhu si so ba Zura Niʼamoniʼö. Aboto ba dödömö wa iʼomasiʼö sibai ndraʼugö Amada si so ba zorugo, ba omasi ia na tobali ndraʼugö ösi nomonia. Ifabuʼu wa hasambalö iheta gabula dödö hegöi famakao salua khömö. Ibeʼe göi khöu dötönafö wa ba gulidanö si bohou dania tola ifuli falukha ndraʼugö ba niha niʼomasiʼömö si no mate. (Mrk. 10:​29, 30; Yoh. 5:​28, 29; Rom. 8:​38, 39; Fam. 21:​3, 4) Oya nasa zindruhu nifahaʼönia khöu, ba tatu möi fangomuso dödömö zindruhu andre. (Luk. 24:32) Börö  me öʼomasiʼö zindruhu si no öfahaʼö yaʼugö, daʼö zamarou yaʼugö ba wanutunö daʼö ba niha böʼö!—Fareso göi Yeremia 20:9.

6. Hadia wamahaʼö si tola öhalö moroi khö Ernest hegöi khö Rose?

⁶ Nehegö zalua khö dalifusöda ira matua sotöi Ernest. b Awena fulu fakhe ndröfinia me mate bapania. Imane Ernest, ”Manofu-nofu dödögu: ’Hadia ba zorugo möi bapagu? Mazui lö hadöi yaʼia saʼae sagötö faʼara?’ Afökhö dödögu ba nawögu iraono na so nasa bapania.” Asese möi Ernest ba lewatö bapania, ituhi danö ba ilau mangandrö, ”He Lowalangi, omasido uʼila hezoso so bapagu.” Te mato 17 fakhe me no aefa mate bapania, ifahaʼö ia Ernest ba Zura Niʼamoniʼö. Omuso sibai dödönia me iʼila wa lö laʼila hadia ia niha si no mate, amaedola niha si no mörö, ba no ifabuʼu Sura Niʼamoniʼö wa so wanusugi niha si no mate ba zi so miföna. (Sango. 9:​5, 10; Hal. 24:15) Ba gafuriata, isöndra wanema li moroi ba wanofu-nofunia si no hauga fakhe! Omuso dödö Ernest sanandrösa ba zindruhu moroi ba Zura Niʼamoniʼö si no ifahaʼö yaʼia. Foʼomonia sotöi Rose, ifahaʼö göi ia ba Zura Niʼamoniʼö, ba iʼomasiʼö hadia zi no ifahaʼö yaʼia. Me döfi 1978, tebayagö ira idanö. Terou sibai dödöra wanutunö ba nösi nomora, khö ndra awö-awöra, hegöi ba niha böʼö sanandrösa ba zindruhu sebua böli si no lafahaʼö yaʼira. Buania, töra 70 niha nitolora irege tebayagö idanö.

7. Hadia zalua na no mowaʼa ba dödöda waʼomasi ba zindruhu si so ba Zura Niʼamoniʼö? (Luka 6:45)

⁷ Ba ginötö taʼomasiʼö hadia zi no tafahaʼö yaʼita moroi ba Zura Niʼamoniʼö, tarasoi wa moguna tafatunö daʼö ba niha böʼö. (Baso Luka 6:45.) Tarasoi simane niwaʼö ndra nifahaʼö Yesu me abad siföföna, lamane, ”Tebai mabato wangombakha sanandrösa ba zi no maʼila hegöi si no marongo.” (Hal. 4:20) Börö me taʼomasiʼö sibai zindruhu, daʼö zamarou yaʼita ba wanutunö daʼö ba niha sato.

MANURIAIGÖ ITA BÖRÖ ME TAʼOMASIʼÖ NIHA BÖʼÖ

8. Hadia zamarou yaʼita ba wangombakha turia somuso dödö ba niha böʼö? (Faigi kotak ” Faʼomasi ba Niha—Mubaliʼö Nifahaʼö”.) (Faigi göi gambara.)

⁸ Taʼomasiʼö niha böʼö simane Yehowa hegöi Ononia. (Amd. 8:31; Yoh. 3:16) Ahakhö dödöda ba niha ’si lö faʼaboto ba dödö sanandrösa khö Lowalangi’ hegöi ba niha si ’lö hadöi tötönafö’. (Ef. 2:12) Alömö ira ba waʼoya gabula dödö nitaögöra, ba so khöda zi tobali fanolora yaʼia daʼö turia somuso dödö sanandrösa ba Wamatörö Lowalangi. Börö waʼomasi  hegöi faʼahakhö dödö, daʼö zamarou yaʼita ba wanutunö khöra turia somuso dödö. Na lafahaʼö ira, tola laʼokhögö dötönafö, faʼohahau dödö iadaʼa, ba tebeʼe khöra ginötö ba wogamö ’faʼauri sindruhu’ yaʼia daʼö faʼauri si lö aetu ba gulidanö si bohou khö Lowalangi.—1 Ti. 6:19.

9. Hadia wamangelama nifaʼemada sanandrösa ba zi so miföna, ba hadia mbörö? (Hezekieli 33:​7, 8)

⁹ Faʼomasida ba niha göi zamarou yaʼita ba wangombakha khöra wa no ahatö gamozua gulidanö si lö sökhi andre. (Baso Hezekieli 33:​7, 8.) Taforomaʼö waʼahakhö dödö ba niha fefu, tefarahu ba daʼö nösi nomoda si tenga samosumange Yehowa. Ato zi lö mangila wa lö ara tö ”so wamakao sabölö-bölö si lö irai alua, iʼotarai me tewöwöi gulidanö irugi iadaʼa, ba lö göi saʼae alua dania”. (Mat. 24:21) Omasi ita enaʼö laʼila hadia zalua sagötö ngaluo wanguhuku. Si oföna, tehori agama sofaya ba awena dania tedudugö gulidanö nifatörö Zatana andre ba Hamagedo. (Fam. 16:​14, 16; 17:​16, 17; 19:​11, 19, 20) Mangandrö ita enaʼö itugu ato niha soʼameʼegö tödö wamangelama nifaʼemada ba lahalö gangetula wefao khöda ba wamosumange Yehowa iadaʼa. Hizaʼi, hadia zalua ba niha si lö moʼameʼegö tödö wamangelama nifaʼemada, farahu ba daʼö nösi nomoda?

10. Hana wa moguna sibai tafangelama niha sanandrösa ba zi lö ara tö alua?

¹⁰ Simane nitutunöda ba wamobörö wamahaʼö andre, tola manö omasi Yehowa ba wangefaʼö niha samulöʼö era-erania ba ginötö laʼila me tedudugö Mbabilona Sebua. Na simanö, itugu mangaösö dödöda iadaʼa ba wameʼe khöra famangelama. Angeragö daʼa: Hadia nifatunöda khöra iadaʼa, tola manö tefasugi ba dödöra daʼö ba zi so miföna. (Fareso göi Hezekieli 33:33.) Te ifuli itörö tödöra wamangelama nifaʼemada khöra ba tefarou dödöra wefao khöda ba wamosumange Yehowa fatua lö ahori ginötö. Me föna so samösa zanaro kurunga wa Wilifi, awena ibörögö mamati ia me no ”alua ndruru danö sabölö-bölö”. Simanö göi, te so ösa zi lö moʼameʼegö tödö wamangelama nibeʼeda iadaʼa, awena labulöʼö gera-erara na no tedudugö Mbabilona Sebua.—Hal. 16:​25-34.

MANURIAIGÖ ITA BÖRÖ ME TAʼOMASIʼÖ YEHOWA HEGÖI TÖINIA

11. Hewisa wameʼeda khö Yehowa sumange, lakhömi ba faʼabölö? (Famaʼeleʼö 4:11) (Faigi göi gambara.)

¹¹ Dane-dane sabölö ebua wa tafalua wanuriaigö yaʼia daʼö börö me taʼomasiʼö Lowalangi Yehowa hegöi töinia niʼamoniʼö. Ba wamaigida, halöwö fanuriaigö andrö no sambua lala ba wanuno Lowalangi niʼomasiʼöda.  (Baso Wamaʼeleʼö 4:11.) Tatu fao sibai dödöda ba wehede daʼa, ”No sinangea ötema zumange, lakhömi, faʼabölö, yaʼugö Yehowa Lowalangima.” No tabeʼe khö Yehowa zumange hegöi lakhömi ba ginötö tatutunö ba niha ngawalö zamaduhuʼö wa yaʼia ”zamazökhi fefu hadia ia” ba sameʼe khöda faʼauri. No göi tabeʼe khönia waʼabölöda na taʼogunaʼö ginötö hegöi okhötada ba wanuriaigö turia somuso dödö ndrege zi sagu khöda. (Mat. 6:33; Luk. 13:24; Kol. 3:23) Eluahania, omasi ita tatutunö sanandrösa khö Lowalangi niʼomasiʼöda. Tefarou göi dödöda wanutunö ba niha böʼö sanandrösa ba döinia hegöi bua-buania. Hadia mbörö?

12. Hewisa wangamoniʼöda töi Yehowa ba wanuriaigö nifaluada?

¹² Faʼomasida khö Yehowa zamarou yaʼita ba wangamoniʼö töinia. (Mat. 6:9) Omasi ita tatutunö ba niha böʼö wa fasala fefu niböbögö Zatana sanandrösa khö Yehowa. (1 Mo. 3:​1-5; Yob. 2:4; Yoh. 8:44) Na manuriaigö, tatu omasi ita taʼoʼawögö Lowalangida, tafatunö zindruhu sanandrösa khönia ba niha sadöni tödö. Omasi ita laʼila niha wa faʼomasi no bua-buania fondrege zebua, famatörönia teʼodane-dane ba waʼatulö hegöi sindruhu, ba lö ara tö iʼogunaʼö Wamatörönia ba wangohori faʼalösökhi irege so waʼahono dödö hegöi faʼomuso dödö ba niha gulidanö. (Si. 37:​10, 11, 29; 1 Yo. 4:8) Na tatutunö fefu zoʼamakhaita khö Yehowa, no taʼamoniʼö döinia. Omuso göi dödöda börö me no tafalua halöwö nitemada tobali Samaduhuʼö khönia. Hana wa tola tawaʼö zimanö?

13. Hana wa no töi sebua me tola taʼotöi Samaduhuʼö Yehowa? (Yesaya 43:​10-12)

¹³ Yehowa zogaoni yaʼita tobali ’samaduhuʼö’ khönia. (Baso Yesaya 43:​10-12.) Ba zi hauga fakhe silalö, so ngawua wehede daʼa  ba zura nifaʼoheʼö ndra Boto Solohe, ”Töi fondrege zebua niʼokhögöda yaʼia me tebeʼe khöda döi Samaduhuʼö Yehowa.” c Hadia mbörö? Khalaigö duma-duma daʼa: Laböbögö khöu zi lö duhu wa no öfalua zala. Tatu moguna so zamatunö ba niha böʼö wa fasala daʼö ba lö irai öfalua niböbögöra andrö. Haniha niha nifilimö ba wamatunö daʼö? Tatu manö niha si no öʼila, nifaduhusimö tödö, ba sangokhögö töi si sökhi irege tola faduhu dödö niha khönia. Ba ginötö ifili ita Yehowa tobali Samaduhuʼö khönia, daʼö zangoromaʼö wa aboto ba dödönia ba ifaduhusi tödö ita ba wanutunö ba niha böʼö wa ha yaʼia Lowalangi satulö. Tatu omuso sibai dödöda me tola tobali ita Samaduhuʼö khönia irege taforege wangogunaʼö inötö ba wangombakha töinia hegöi ba wamaduhuʼö wa lö atulö fefu niböbögö khönia. Daʼa sambua lala ba wangoromaʼö wa omuso dödöda tobali Samaduhuʼö Yehowa!—Si. 83:18; Rom. 10:​13-15.

LÖ TABÖHÖLI WANURIAIGÖ IRUGI TEʼASIWAI

14. Hadia manö zahöli-höli dödöda si lö ara tö alua?

¹⁴ Tabalo-baloi hadia dania zalua ba zi so miföna! Si fao howu-howu Yehowa, tatötöna enaʼö itugu ato niha si fao khöda fatua lö tebörögö wamakao sabölö-bölö. Baero daʼö, sagötö alua wamakao sabölö-bölö mazui inötö fondrege waʼabasaki si lö irai alua, ato niha si lö saʼae faʼawö ba gulidanö nifatörö Zatana ba fao ira khöda ba wamosumange Yehowa. Tatu tabalo-baloi waʼalua daʼa!—Hal. 13:48.

15-16. Hadia zi lö taböhöli wamalua, ba irugi hawaʼara tafalua ia?

¹⁵ Gasa-gasa wombaloida daʼö, so halöwö sinangea tafalua, si lö irai saʼae tafalua dania. Tebeʼe khöda döi sebua ba wanuriaigö turia somuso dödö sanandrösa ba Wamatörö Lowalangi ba zi sagörö ulidanö. Baero daʼö, tafangelama göi niha böʼö sanandrösa ba zi lö ara tö alua. Moguna laʼila niha wa lö ara tö tehori gulidanö si lö sökhi andre. Na no tohare ngaluo wanguhuku, awena aboto ba dödöra wa moroi khö Lowalangi Yehowa duria nifaʼemada.—Hez. 38:23.

¹⁶ Tobali, hadia zinangea tafalua? Börö me taʼomasiʼö zindruhu, taʼomasiʼö niha böʼö, ba töra-töra taʼomasiʼö Yehowa, daʼö zamarou yaʼita ba wamalua fanuriaigö si fao faʼowölö-ölö irugi iwaʼö Yehowa, ”No awai!”