ARTIKEL WAMAHAʼÖ 18
SINUNÖ 1 Amuata Yehowa
Faduhusi Tödö ’Zanguhuku Ösi Gulidanö’ Safönu Faʼahakhö Dödö!
”Hewisa wa ifalua zi lö atulö Sanguhuku ösi gulidanö?”—1 MO. 18:25.
NITUTUNÖ
Enaʼö itugu tedou waʼaboto ba dödöda sanandrösa ba waʼahakhö dödö hegöi faʼatulö Yehowa ba ginötö isusugi niha si lö atulö.
1. Hadia wamahaʼö nibeʼe Yehowa khö Gaberahamo?
NGAOTU fakhe silalö, iʼogunaʼö malaʼikania Yehowa ba wamatunö khö Gaberahamo wa hasambalö ihori niha Zodoma hegöi Gomora. So waʼaombö dödö khö Gaberahamo, hewaʼae aro wamatinia khö Lowalangi. Andrö wa manofu ia, ”Hadia sindruhu öfarahugö wangohori niha satulö ba niha si lö sökhi? . . . Hewisa wa ifalua zi lö atulö Sanguhuku ösi gulidanö?” (1 Mo. 18:23-33) Si fao faʼebolo dödö, ibeʼe wanema li Yehowa khö zi fahuwu khönia andrö. Moroi ba wahuhuosara si tebai muʼolifugö, ifahaʼö ia Aberahamo wa lö irai ihori niha satulö tödö Lowalangi. Tatu, moguna khöda wamahaʼö daʼö iadaʼa, ba tola möi fondrara dödöda.
2. Hadia zamaduhuʼö ba dödöda wa fanguhuku Yehowa andrö atulö ba si fao faʼahakhö dödö?
2 Hadia mbörö wa faduhu dödöda wa fanguhuku Yehowa andrö atulö ba si fao faʼahakhö dödö? Börö me aboto ba dödöda wa ”tödö nifaigi Yehowa”. (1 Sa. 16:7) Sindruhunia, iʼila ’nösi dödö niha zamösana’. (1 Ra. 8:39; 1 Ng. 28:9) No sahöli-höli dödöda daʼö. Abölö atua-tua Yehowa moroi ba zi tola takhalaigö irege lö aboto ba dödöda fefu gangetula nihalönia. Imane Faulo sanandrösa khö Lowalangi Yehowa, ”Lö aboto sibai ba dödöda gangetulania!”—Rom. 11:33.
3-4. Hadia manö wanofu-nofu si tumbu ba dödöda, ba hadia nitutunöda ba wamahaʼö daʼa? (Yohane 5:28, 29)
3 Hewaʼae aboto ba dödöda wa lö tebulö ifalua zatulö Yehowa, hizaʼi tola manö tumbu ba dödöda wanofu simane nisofu Gaberahamo. Duma-dumania, ’Hadia so dötönafö fanusugi ba niha si no ihori Yehowa, simane niha Zodoma hegöi Gomora? Hadia so ösa ba gotaluara zi farahu ba ”wanusugi niha . . . si lö atulö”?’—Hal. 24:15.
4 Datatutunö waʼaboto ba dödö niʼokhögöda sanandrösa ba wanusugi. Barö-barö daʼa, so waʼaboto ba dödö si no mubohouni nitemada sanandrösa ba geluaha ’wanusugi ba wanöndra faʼauri si lö aetu’ hegöi ’fanusugi enaʼö tehuku’. a (Baso Yohane 5:28, 29.) Börö wamohouni andrö, so ösa wamohouni tanö böʼö sinangea muhalö. Tatutunö ia ba wamahaʼö daʼa hegöi ba wamahaʼö migu fönada. Iadaʼa, datatutunö hadia zi lö aboto ba dödöda hegöi si no aboto ba dödöda sanandrösa ba wanguhuku nifalua Yehowa.
SI LÖ ABOTO BA DÖDÖDA
5. Hadia waʼaboto ba dödö niʼokhögöda ba zilalö sanandrösa ba niha Zodoma hegöi Gomora nihori Yehowa?
5 Ba zilalö, itutunö ba publikasida hadia zalua ba niha si lö atulö. Niha si no ihori Yehowa, simane salua ba niha Zodoma hegöi Gomora, lö khöra tötönafö fanusugi. Hizaʼi, me no itugu muʼalui zindruhunia ba muʼohe daʼö ba wangandrö, awena aboto ba dödöda wa tebai tawaʼö zimane daʼö. Hadia mbörö?
6. Hadia manö duma-duma wanguhuku nifalua Yehowa ba niha si lö atulö, ba hadia zi lö aboto ba dödöda?
6 So duma-duma ba Zura Niʼamoniʼö hewisa wanguhuku Yehowa niha si lö atulö. Duma-dumania, me Anönö Danö Idanö ihori fefu niha gulidanö, ba hatö Noakhi hegöi ösi nomonia zauri. Iʼogunaʼö göi ndraono Gizaraʼeli ba wangohori zi fitu soi si so ba Danö Amabuʼula. Iʼogunaʼö göi samösa malaʼika ba wamunu si 185.000 zaradadu Asiria ha ba zi sara wongi. (1 Mo. 7:23; 5 Mo. 7:1-3; Yes. 37:36, 37) Ba zalua andre, hadia no itutunö khöda Sura Niʼamoniʼö wa ihalö gangetula Yehowa ba wangohori yaʼira sagötö faʼara ba lö saʼae ibeʼe khöra dötönafö fanusugi? Löʼö. Hana wa tawaʼö zimanö?
7. Hadia zi lö aboto ba dödöda sanandrösa ba niha si mate me Anönö Danö Idanö hegöi niha Ganaʼana? (Faigi gambara .)
7 Moroi ba duma-duma no mege, lö aboto ba dödöda hewisa wanguhuku Yehowa zi samö-samösa niha. Lö göi taʼila hadia niha si no mate andrö no tebeʼe khöra ginötö ba wamahaʼö yaʼira sanandrösa khö Yehowa hegöi ba wamalalini era-era. Duma-dumania, fatua lö Anönö Danö Idanö, itutunö Sura Niʼamoniʼö wa Noakhi andrö no ”sanuriaigö sindruhu”. (2 Fe. 2:5) Hizaʼi, lö nitutunö Zura Niʼamoniʼö wa manuriaigö Noakhi ba niha fefu me luo daʼö sagötö ifazökhi nowo sebua sibai. Simanö göi, lö taʼila hadia fefu niha si lö sökhi si toröi ba Ganaʼana no tebeʼe khöra ginötö ba wamahaʼö yaʼira sanandrösa khö Yehowa hegöi ba wamulöʼö amuatara.
Noakhi hegöi ösi nomonia, lafazökhi nowo sebua. Lö taʼila hadia no idöniaʼö Noakhi halöwö fanuriaigö si no muʼorganisasi sagötö lafazökhi nowo andrö, ba manuriaigö ira ba niha fefu fatua lö Anönö Danö Idanö (Faigi ngenoli si 7)
8. Hadia zi lö aboto ba dödöda sanandrösa ba niha Zodoma hegöi Gomora?
8 Hewisa sanandrösa ba niha Zodoma hegöi Gomora? So samösa niha satulö tödö si toröi ba gotaluara, töinia Loti. Hizaʼi, hadia taʼila wa no ifatutu wanuriaigö khöra Loti? Löʼö. Sindruhu sa, yaʼira andrö niha si lö sökhi. Hewaʼae simanö, hadia laʼila wa fasala nifaluara maʼafefu? Törö tödöu me möi fefu ndra matua ba nomo Loti ba wohoröni tomenia. Iwaʼö Sura Niʼamoniʼö wa fao ’ndraono hegöi satua’ ba wamalua daʼö. (1 Mo. 19:4; 2 Fe. 2:7) Hadia sindruhu-ndruhu lö isusugi fazamösa ba gotaluara Lowalangi Yehowa safönu faʼahakhö dödö? Lö taʼila sibai. No iwaʼö Yehowa khö Gaberahamo wa lö irugi dafulu zatulö tödö ba mbanua andrö, ba atulö daʼö. (1 Mo. 18:32) Yaʼira andre niha si lö atulö, ba tefaudu nifalua Yehowa me ihori ira börö gamuatara. Hizaʼi, hadia tola tawaʼö wa fazamösa lö hadöi ba gotaluara zi fao ba ”wanusugi niha . . . si lö atulö”? Löʼö, tebai tawaʼö zimane daʼö!
9. Hadia zi lö aboto ba dödöda sanandrösa khö Zelomo?
9 Itutunö khöda Sura Niʼamoniʼö sanandrösa ba niha satulö si tobali niha si lö atulö ba gafuriata. Duma-dumania Razo Selomo. Ba wamobörö, sindruhu-ndruhu itörö lala Lowalangi irege itema howu-howu sebua. Hizaʼi ba gafuriata, ifosumange lowalangi faya. Lua-luania, mofönu sibai Yehowa ba tefakao ndraono Gizaraʼeli ba zi hauga wulu fakhe börö horö nifaluania. Sindruhu sa, me mate Zelomo, itutunö Sura Niʼamoniʼö wa ”lafadölö [ia] ba ngai ndra tuania”, farahu ba daʼö niha si lö faröi sotöi Dawido. (1 Ra. 11:5-9, 43, nisura ba gahe zura; 2 Ra. 23:13) Hizaʼi, hadia daʼö geluahania hasambalö tesusugi Zelomo? Lö niwaʼö Zura Niʼamoniʼö daʼö. So ösa zangumaʼö wa tesusugi dania Zelomo börö me so ayati sangumaʼö, ”Na no mate zi samösa niha, no teʼefaʼö ia moroi ba horönia.” (Rom. 6:7) Atulö daʼö, hizaʼi tenga daʼö geluahania wa hasambalö tesusugi fefu niha si no mate. Baero daʼö, na mate zi samösa niha tenga daʼö geluahania wa sinangea ifuli tesusugi ia. Fanusugi andrö no buala moroi khö Lowalangi safönu faʼomasi. Ibeʼe daʼö ha ba niha si no ifili ba wamosumange yaʼia sagötö faʼara. (Yob. 14:13, 14; Yoh. 6:44) Hadia tebeʼe khö Zelomo mbuala andrö? Ha Yehowa zangila. Niʼilada yaʼia daʼö hasambalö ifalua zatulö Yehowa.
SI NO ABOTO BA DÖDÖDA
10. Hewisa dödö Yehowa ba ginötö ifalua wanguhuku ba niha gulidanö? (Hezekieli 33:11) (Faigi göi gambara.)
10 Baso Hezekieli 33:11. Itutunö khöda Yehowa hewisa dödönia ba ginötö ifalua wanguhuku ba niha gulidanö. Simane si no isura Hezekieli, imane sinenge sotöi Fetero, ”Yehowa . . . lö omasi ia na tekiko fazamösa”. (2 Fe. 3:9) Tatu möi fondrara dödöda wehede daʼö. Aboto ba dödöda wa lö ihori zi samösa niha Yehowa sagötö faʼara na lö dane-danenia. Yaʼia andrö Lowalangi safönu faʼahakhö dödö, ba lö tebulö iforomaʼö waʼahakhö dödö na tefaudu daʼö.
Ba wanusugi niha si lö atulö, ato sibai niha moroi ba ngawalö mado, soi, hegöi li, tebeʼe khöra ginötö ba wamahaʼö yaʼira sanandrösa khö Yehowa (Faigi ngenoli si 10)
11. Haniha zi lö tesusugi, ba hezo taʼila daʼö?
11 Hadia so niʼilada niha si lö tesusugi? Ibeʼe ösa khöda duma-duma Sura Niʼamoniʼö. b Duma-dumania, iwaʼö Yesu wa lö tesusugi Yuda Banua Gariota. (Mrk 14:21; faigi göi Yohane 17:12 hegöi onönöta ba nwsty-IN.) Aboto ba dödö Yuda wa nifaluania andrö lö tefaudu ba gohitö dödö Yehowa hegöi Ononia. Hizaʼi, lö tebulö ifalua daʼö. (Faigi Mrk 3:29 hegöi onönöta ba nwsty-IN.) Baero daʼö, iwaʼö Yesu wa so ösa ndra sondröniaʼö ba agama solawa yaʼia, mate ira ba lö tesusugi. (Mat. 23:33; faigi Yohane 19:11 hegöi onönöta ”orang” ba nwsty-IN.) Ibeʼe göi wamangelama Faulo ba niha sondröi sindruhu si lö mamalalini era-erara wa lö tesusugi ira.—Heb. 6:4-8; 10:29.
12. Hadia zaboto ba dödöda sanandrösa ba waʼahakhö dödö Yehowa? Beʼe duma-duma.
12 Hadia zaboto ba dödöda sanandrösa ba waʼahakhö dödö Yehowa? Hezo oroma wa ”lö omasi [ia] na tekiko fazamösa” niha gulidanö? Nehegö hewisa wangoromaʼönia faʼahakhö dödö ba niha samalua horö sebua. Duma-dumania Razo Dawido. Ifalua wohorö ba ibunu niha. Hizaʼi, ifalalini gera-erania irege si fao faʼahakhö dödö iʼefaʼö horönia Yehowa. (2 Sa. 12:1-13) Oya sibai göi zi lö sökhi nifalua Razo Manase sagötö faʼaurinia. Hewaʼae simane, iforomaʼö khönia Yehowa waʼahakhö dödö ba iʼefaʼö horönia börö me ifalalini gera-erania. (2 Ng. 33:9-16) Duma-duma daʼa zamasugi ba dödöda wa hasambalö iforomaʼö waʼahakhö dödönia Yehowa na so dane-dane ba wamalua daʼö. Isusugi ira na aboto ba dödöra wa no lafalua horö sebua ba lafalalini gera-erara.
13. (a) Hana wa iforomaʼö waʼahakhö dödönia Yehowa ba niha Niniwe? (b) Hadia niwaʼö Yesu sanandrösa ba niha Niniwe?
13 Aboto göi ba dödöda hewisa waʼahakhö dödö Yehowa ba niha Niniwe. Imane Lowalangi khö Yona, ”No ofeta khögu duria si lö sökhi nifaluara.” Hizaʼi, me lafalalini gera-erara, si fao faʼahakhö dödö iʼefaʼö zalara Yehowa. Abölö ebua waʼahakhö dödö Yehowa moroi ba waʼahakhö dödö Yona. Me luo daʼö, mofönu sibai Yona. Hizaʼi, ifangelama ia Yehowa wa niha Niniwe andrö ’lö laʼila hezo zatulö ba hezo zi sala’. (Yon. 1:1, 2; 3:10; 4:9-11) Iʼogunaʼö duma-duma daʼa Yesu ba wamahaʼö niha sanandrösa ba waʼatulö hegöi faʼahakhö dödö Yehowa. Iwaʼö Yesu ”na Luo Wanguhuku, ifuli tesusugi niha Niniwe” si no mamalalini era-era andrö.—Mat. 12:41.
14. Hadia ginötö niʼokhögö niha Niniwe na ”tesusugi [ira] enaʼö tehuku”?
14 Hadia geluahania ’ifuli tesusugi niha Niniwe na Luo Wanguhuku’? Iwaʼö Yesu wa so ösa niha dania ”tesusugi [ira] enaʼö tehuku”. (Yoh. 5:29) Alua daʼa ba Wamatörö si Saribu Fakhe, ba ginötö tesusugi ’niha satulö hegöi si lö atulö’. (Hal. 24:15) Ba niha si lö atulö, daʼa ’fanusugi enaʼö tehuku’. Eluahania, na no tesusugi zi samösa niha, Yehowa hegöi Yesu lafaigi-faigi hadia sindruhu-ndruhu moloʼö ia ba ifalua hadia zi no ifahaʼö yaʼia. Na so niha Niniwe si no tesusugi sanimbagö ba wamosumange Yehowa, hasambalö mate ia. (Yes. 65:20) Hizaʼi, niha si lö faröi ba wamosumange Yehowa, tebeʼe khöra ginötö ba wangokhögö faʼauri si lö aetu sagötö faʼara!—Dan. 12:2.
15. (a) Hana wa tebai tawaʼö wa lö tesusugi fefu niha Zodoma hegöi Gomora nihori me luo daʼö? (b) Hadia geluaha wehede nisura ba Yuda 7? (Faigi kotak ” Hadia Geluaha Niwaʼö Yuda?”)
15 Me itutunö Yesu sanandrösa ba niha Zodoma hegöi Gomora, iwaʼö wa abölö sökhi ira ”na Luo Wanguhuku” moroi ba niha sanimbagö yaʼia ba famahaʼönia. (Mat. 10:14, 15; 11:23, 24; Luk. 10:12) Hadia geluahania daʼö? Te so ba wangera-ngerada wa abölö ihude-hudeʼö wanutunö daʼö Yesu. Hizaʼi, törö tödöu me itutunö Yesu sanandrösa ba niha Niniwe ’nisusugi enaʼö tehuku’, maʼifu lö ihudeʼö wanutunö. Tobali, tola tawaʼö me itutunö Yesu sanandrösa ba niha Zodoma hegöi Gomora, sindruhu-ndruhu tefaudu daʼö ba geluaha sindruhunia. ”Luo Wanguhuku” salua ba niha Zodoma hegöi Gomora fagölö simane salua ba niha Niniwe. Simane niha Niniwe, lafalua goi gamuata si lö sökhi ira niha Zodoma hegöi Gomora. Hizaʼi, tebeʼe ginötö ba niha Niniwe ba wamalalini era-erara. Börö daʼö, törö tödömö wehede Yesu me iwaʼö sanandrösa ba ’wanusugi enaʼö tehuku’. Tefarahu ba daʼö niha ”samalua si lö sökhi”. (Yoh. 5:29) Tobali, tola tawaʼö wa so ösa moroi ba gotalua niha Zodoma hegöi Gomora sangokhögö tötönafö fanusugi ba tebeʼe khöra ginötö wamalalini era-era. Ba luo daʼö, tebeʼe khöda ginötö ba wamahaʼö yaʼira sanandrösa khö Yehowa hegöi Yesu Keriso.
16. Hadia zaboto ba dödöda ba ginötö ihalö gangetula Yehowa haniha manö zinangea isusugi? (Yeremia 17:10)
16 Baso Yeremia 17:10. Ba ayati daʼa itutunö khöda hadia waʼaboto ba dödö niʼokhögöda sanandrösa ba lala wanguhuku nifalua Yehowa: ”Yehowa zanekhegö tödö, samareso era-era si tobini.” Ba ginötö ihalö gangetula haniha manö zinangea isusugi, ’isulöni ba niha moloʼö nifaluara zamösana’. Hasambalö ifalua gangetulania Yehowa, hizaʼi iforomaʼö göi waʼahakhö dödö na moguna. Börö daʼö, tebai tawaʼö wa lö hadöi tötönafö khö zi samösa niha na lö taʼila sibai daʼö moroi ba Zura Niʼamoniʼö!
HASAMBALÖ IFALUA ZATULÖ SANGUHUKU ÖSI GULIDANÖ
17. Hadia dania zalua ba niha si no mate?
17 Iʼotarai me fao Gadamo hegöi Khawa khö Zatana ba wolawa Lowalangi Yehowa, so miliaran niha gulidanö si no mate. ”Faʼamate” andrö no ”udu” sataʼu ita! (1 Ko. 15:26) Hadia zalua ba niha si no mate andrö? Ngawawa niha si lö atoto si 144.000 zoloʼö khö Yesu, tesusugi ira ba mboto si tebai mate ba auri ira ba zorugo. (Fam. 14:1) Ngawawa sato ndra matua hegöi ira alawe si lö faröi ba sangomasiʼö Yehowa, farahu ira ba ”wanusugi niha . . . satulö”, ba latema dötönafö faʼauri si lö aetu ba gulidanö na lö faröi ira sagötö zi Saribu Fakhe Wamatörö Keriso hegöi fanandraigö safuria. (Dan. 12:13; Heb. 12:1) Ba Wamatörö si Saribu Fakhe andrö dania, ’niha si lö atulö’, duma-dumania niha si lö irai mamosumange Yehowa mazui ”samalua si lö sökhi”, tebeʼe khöra ginötö ba wamalalini era-era hegöi ba wamosumange Yehowa. (Luk. 23:42, 43) Hizaʼi, so ösa niha si lö sökhi sangodödögö ba wolawa Yehowa hegöi ohitö dödönia, ihalö gangetula Yehowa wa lö isusugi ira.—Luk. 12:4, 5.
18-19. (a) Hana wa tola tafaduhusi tödö wa hasambalö atulö fefu wanguhuku nihalö Yehowa? (Yesaya 55:8, 9) (b) Hadia nitutunöda ba wamahaʼö aefa daʼa?
18 Hadia tola sindruhu-ndruhu tafaduhusi tödö wa hasambalö atulö fefu wanguhuku nihalö Yehowa? Tatu manö. Simane Aberahamo, faduhu dödöda wa Yehowa andrö ”Sanguhuku ösi gulidanö” fondrege zatua-tua, soʼahonoa ba safönu faʼahakhö dödö. No ifahaʼö ba ibeʼe fefu ba danga Nononia wamalua fanguhuku. (Yoh. 5:22) Yehowa hegöi Yesu laʼila nösi dödö niha. (Mat. 9:4) Tobali, na lafalua wanguhuku ba niha gulidanö, hasambalö atulö gangetulara!
19 Datafaduhusi tödö Yehowa ba fefu gangetula nihalönia. Tafaduhuʼö wa tebai tobali ita sanguhuku, ha Yehowa zi tola! (Baso Yesaya 55:8, 9.) Daʼö mbörö wa tatouʼö ba danga Yehowa hegöi Yesu ba wamalua fefu wanguhuku. Aboto ba dödöda wa Razoda Yesu Keriso moʼahonoa woloʼönia faʼatulö hegöi faʼahakhö dödö Namania. (Yes. 11:3, 4) Hizaʼi, hewisa wamalua Yehowa hegöi Yesu fanguhuku na alua wamakao sabölö-bölö? Hadia zi lö aboto ba dödöda? Ba hadia zi no aboto ba dödöda? Tatutunö wanema linia ba wamahaʼö aefa daʼa.
SINUNÖ 57 Manuriaigö ba Niha Fefu
b Na omasiʼö öʼila sanandrösa khö Gadamo, Khawa, hegöi Kaʼino, faigi Menara Pengawal, 1 Mbaŵa si Sara 2013, ngaʼörö 12, nis.