ARTIKEL WAMAHAʼÖ 21
SINUNÖ 107 Duma-Duma Waʼomasi Niforomaʼö Lowalangi
Hewisa Lala ba Wanöndra Foʼomo si Sökhi?
”Haniha zanöndra foʼomo ira alawe si sökhi, abölö ebua mbölinia moroi ba gara sebua böli.”—AMD. 31:10.
NITUTUNÖ
Goi-goi Zura Niʼamoniʼö si möi fanolo khö zi samösa niha ba wangalui foʼomo si sökhi. So göi goi-goi sinangea latörö tödöra ira talifusöda ba mbanua niha Keriso ba wotuhini ira talifusöda somasi mangowalu.
1-2. (a) Hadia zinangea laʼangeragö ira niha Keriso fatua lö fakawa ira? (b) Hadia geluahania ”fakawa”? (Faigi ”Geluaha Ngawua Wehede”.)
HADIA omasiʼö mangowalu? Fangowalu andrö, tenga daʼö zotatugöi faʼomuso dödö. Hizaʼi ato ndra talifusöda si lö sangowalu, he si no alawa döfi ba sawuyu-wuyu, latötöna samuza inötö wa lasöndra ngambatöra. Tatu manö fatua lö fakawa, sökhi na no öhenaigö öbeʼe yawa gefemö, aro wahuwusamö khö Yehowa ba no tefaʼanö ndraʼugö ba wongambatö. a (1 Ko. 7:36) Na öfalua daʼö, tola ösöndra waʼohahau dödö ba wongambatö.
2 Hizaʼi, tenga saoha ba wanöndra foʼomo si sökhi ba si tefaudu. (Amd. 31:10) Hewaʼae no ösöndra zomasi dödöu, tola manö abua khömö ba wamaehagö ösi dödöu. Ba artikel daʼa, tatutunö dania hadia zi tola manolo ira talifusöda si lö sangowalu ba wanöndra foʼomo si sökhi ba labörögö fakawa. b Tatutunö göi hadia zinangea lafalua ira talifusöda ba mbanua niha Keriso ba wotuhini niha somasi mangowalu.
HADIA ZANOLO YAʼUGÖ BA WANÖNDRA FOʼOMO SI SÖKHI?
3. Hadia manö zinangea laʼangeragö ira niha Keriso si lö sangowalu ba ginötö laʼalui ngambatöra?
3 Na omasiʼö mangowalu, moguna öʼila hadia gamuata somasiʼö moroi ba niha sedöna tobali ngambatömö, fatua lö fakawa ami. c Na lö öfalua daʼö, tola manö öʼositengagö niha si sökhi amuata si tola mena tobali ngambatöu mazui fakawa ndraʼugö ba niha si lö baga amuata. Tatu manö, niha niʼaluimö lö tola löʼö no tebayagö ia idanö. (1 Ko. 7:39) Hizaʼi, lö fefu niha si no tebayagö idanö tola tobali foʼomo si sökhi khöu. Börö daʼö, sökhi na ösofu khöu samösa: ’Hadia gohitö dödögu? Hadia gamuata somasido iʼokhögö niha si tobali ngambatögu? Hadia tefaudu nitötönagu andrö?’
4. Hadia manö zi tola laʼohe ba wangandrö ira talifusöda somasi mangowalu?
4 Na omasiʼö mangowalu, tola öʼohe daʼö ba wangandrö khö Yehowa. (Fil. 4:6) Hizaʼi, lö nifabuʼu Yehowa wa hasambalö ösöndra niha si tobali ngambatöu. Hewaʼae simanö, iʼameʼegö tödö hadia zoguna khöu hegöi nirasoimö, ba itolo ndraʼugö sagötö öʼalui niha si tobali ngambatömö. Börö daʼö, böi tebulö ötutunö khö Yehowa hadia nirasoimö hegöi somasi dödömö. (Si. 62:8) Andrö khönia enaʼö ibeʼe khöu waʼebolo dödö ba faʼatua-tua. (Yak. 1:5) Samösa dalifusöda ira matua sotöi John, d moroi ba Amerika Serikat, itutunö hadia niʼohenia ba wangandrö, ”Ututunö khö Yehowa hadia gamuata somasido uʼalui moroi ba niha sedöna tobali ngambatögu. Uʼandrö enaʼö tola falukha ndraʼo ba niha si tefaudu. Uʼandrö göi enaʼö itolo ndraʼo ba wondrouʼö bua-bua sanolo yaʼo enaʼö tobali foʼomo si sökhi.” Imane samösa talifusöda ira alawe sotöi Tania moroi ba Sri Lanka, ”Ba ginötö uʼalui niha si tefaudu tobali ngambatögu, uʼandrö khö Yehowa enaʼö itolo ndraʼo wondrorogö faʼalöfaröigu, ba wangokhögö fangera-ngera si sökhi hegöi faʼomuso dödö.” Hewaʼae na lö iʼanemaiʼö ösöndra niha si tefaudu, ifabuʼu Yehowa wa lö tebulö iʼomasiʼö ba iʼameʼegö tödö ndraʼugö.—Si. 55:22.
5. Hezo manö tola falukha ndra talifusöda si lö sangowalu sangomasiʼö Yehowa? (1 Korindro 15:58) (Faigi göi gambara.)
5 Ifarou ita Sura Niʼamoniʼö enaʼö ”owölö-ölö ita ba wangai halöwö Lowalangi”. (Baso 1 Korindro 15:58.) Na owölö-ölö ndraʼugö ba wangai halöwö khö Yehowa ba oya ginötö niʼogunaʼöu ba wariawösa khö ndra talifusöda, tola örasoi waʼomuso dödö ba wariawösa si möi famarou dödö. Tola göi falukha ndraʼugö khö ndra talifusö si lö sangowalu sangosambuaʼö tödöra ba wangai halöwö khö Yehowa. Ba na öfalua wondrege zi sökhi ba wangomusoiʼö tödö Yehowa hasambalö öʼokhögö waʼomuso dödö sindruhu.
Na öʼoyaʼö ginötömö ba wangai halöwö khö Yehowa ba fariawö ndraʼugö khö ndra talifusöda fefu, tola manö falukha ndraʼugö ba niha sadöni tödö khöu ba somasi mangowalu (Faigi ngenoli si 5)
6. Ba ginötö laʼalui ngambatöra ira niha Keriso si lö sangowalu, hadia zinangea latörö tödöra?
6 Hizaʼi, moguna mangelama ndraʼugö enaʼö niʼofönaiʼöu ba waʼaurimö tenga ba wangalui foʼomo. (Fil. 1:10) Faʼomuso dödö sindruhu teʼodaligö ia ba wahuwusau khö Yehowa, tenga me no mangowalu ndraʼugö mazui löʼö. (Mat. 5:3) Gasa-gasa lö sangowalu ndraʼugö, tola öʼoyaʼö ginötöu ba wangai halöwö khö Yehowa. (1 Ko. 7:32, 33) Haogö wangogunaʼö inötö. Imane samösa talifusöda ira alawe sotöi Jessica moroi ba Amerika Serikat, sangowalu me no arakhagö 40 fakhe ndröfinia, ”Sindruhunia omasido möi nihalö, hizaʼi fatua lö mangowalu ndraʼo, uʼoyaʼö ginötögu ba wamalua halöwö fanuriaigö. Daʼö zanolo yaʼo ba wangokhögö faʼahono dödö.”
BEʼE GINÖTÖU BA WONEHEGÖ AMUATA ZI SAMÖSA NIHA
7. Hadia mbörö wa moguna önehegö zi samösa niha fatua lö öfaehagö nösi dödöu khönia? (Amaedola 13:16)
7 Hewisa na so ba wangera-ngerau wa tefaudu zi samösa niha andrö tobali foʼomou? Hadia moguna öʼanemaiʼö öfaehagö khönia nösi dödöu? Iwaʼö Sura Niʼamoniʼö wa niha satua-tua iʼodaligö waʼaboto ba dödö na so nifaluania. (Baso Gamaedola 13:16.) Börö daʼö, sökhi na önehegö gamuatania fatua lö öfaʼema nösi dödöu khönia. Imane Aschwin moroi ba Belanda, ”Tola manö alio tumbu ba dödöda waʼomasi, hizaʼi tola göi alio taya. Börö daʼö moguna öbeʼe ginötömö ba wonehegö si samösa niha enaʼö lö öbörögö fakawa khönia ha börö waʼomasi si sabata.” Baero daʼö, me no öbeʼe ginötöu ba wonehegö zi samösa niha, tola manö aboto ba dödöu wa lö tefaudu ia tobali foʼomou.
8. Hewisa ndra talifusöda si lö sangowalu wonehe-nehegö zi samösa niha moroi ba zaröu? (Faigi göi gambara.)
8 Hewisa wonehe-nehegömö niha böʼö moroi ba zaröu? Tola öfalua daʼö na möiʼö ba gangowuloa mazui ba ginötö fariawö ndraʼugö khö ndra talifusöda sato. Nehegö hewisa wamaluania goi-goi Zura Niʼamoniʼö, fehedenia, hegöi amuatania. Haniha manö zi fahuwu khönia ba hadia zasese idunö-dunö? (Luk. 6:45) Hadia fagölö gohitö dödömi? Te tola manofu ndraʼugö khö ndra satua sokubaloi ba mbanua niha Keriso si farahu yaʼia mazui ba niha saro ba wamati sangila hewisa gosilöwania. (Amd. 20:18) Tola ösofu hewisa duriania hegöi amuatania. (Rut. 2:11) Ba ginötö önehe-nehegö ia, böi falua zi möi börö wa lö ahono dödönia. Ameʼegö tödö hadia nirasoinia, ba böi hatö-hatöʼögö manö khönia mazui özofu-zofu manö fefu zoʼamakhaita khönia irege alangu dödönia.
Fatua lö öfaehagö nösi dödöu khö zi samösa niha, beʼe ginötöu ba wonehe-nehegö yaʼia (Faigi ngenoli si 7-8)
9. Fatua lö öfaʼema nösi dödömö khö zi samösa niha, hadia zinangea öfaduhuʼö ba dödöu?
9 Hawaʼara ginötö niʼogunaʼömö ba wonehe-nehegö si samösa niha fatua lö öfaehagö khönia nösi dödöu? Na iʼanemaiʼö ötutunö nösi dödöu, tola manö iwaʼö tödönia wa no öhalö gangetula fatua lö öhaogö woʼangeragö. (Amd. 29:20) Hizaʼi, na talafo ara öfaehagö nösi dödömö, tola manö iwaʼö tödönia wa yaʼugö niha sataʼu ba wangai angetula mendrua manö na iʼila wa omasiʼö khönia. (Sango. 11:4) Fatua lö öfaehagö nösi dödöu khö zi samösa niha, böi öwaʼö wa niha daʼö dania zi tobali ngambatöu. Hizaʼi, moguna öfaduhuʼö ba dödöu wa no öfaʼanö ndraʼugö tobali foʼomo si sökhi ba tefaudu ia tobali foʼomou.
10. Hadia nifaluamö na so niha somasi khöu, hizaʼi lö omasiʼö khönia?
10 Hadia nifaluamö na so niha somasi khöu? Na sindruhu lö omasi ndraʼugö khönia, foromaʼö daʼö ba nifaluamö. Böi fabalo-baloiʼö khönia, börö me tenga faʼomasi daʼö.—1 Ko. 10:24; Ef. 4:25.
11. Hadia zinangea öʼangeragö na laʼandrö khöu ba wangalui tambali zi samösa niha?
11 Ba zi hauga soi, te latötöna khö ndra satua mazui si fahatö enaʼö yaʼira zangalui tambali ba nösi nomora si lö sangowalu. Ba soi tanö böʼö göi, si fahuwu mazui ösi nomo zangalui ngambatö ba niha somasi mangowalu, aefa daʼö laʼalui lala enaʼö faoma falukha zi darua niha andrö enaʼö laʼila hadia fakawa ira mazui löʼö. Na laʼandrö khöu wamalua daʼö, angeragö göi hadia zomasi ba soguna khö ndra si darua niha nitolomö andrö. Na no ösöndra niha si tefaudu khö zi fahuwu khömö mazui ösi nomomö, haogö nehegö hewisa ia zindruhunia, hewisa gamuatania, ba sabölö tohude hadia aro gamakhaitania khö Yehowa mazui löʼö. Fahuwusa saro khö Yehowa, abölö ebua mböli daʼö moroi ba gefe, sekola salawa mazui faka. Hizaʼi böi olifuʼö wa ira talifusöda si lö sangowalu andrö zangai angetula ba gafuriata hadia mangowalu ira mazui löʼö.—Gal. 6:5.
NA ÖBÖRÖGÖ FAKAWA
12. Hadia zinangea öfalua na omasiʼö fakawa khö zi samösa niha?
12 Na omasi ndraʼugö fakawa khö zi samösa niha, hewisa wamaehagöu ösi dödömö? e Tola fahuhuo ndraʼugö khönia ba nahia sato niha mazui ba telefo. Haogö wanutunö khönia ösi dödömö. (1 Ko. 14:9) Na tola, beʼe khönia ginötö ba wameʼe fanema li. (Amd. 15:28) Ba na lö omasi ia khömö, böi faso ia.
13. Hadia nifaluamö na itutunö nösi dödönia khömö si samösa niha? (Kolose 4:6)
13 Hewisa na so niha samaehagö ösi dödönia khömö? Te no iforege enaʼö barani ia wamaehagö ösi dödönia khöu, börö daʼö haogö wanema linia ba foromaʼö waʼasökhi dödö. (Baso Kolose 4:6.) Fatunö khönia na moguna khöu ginötö ba wameʼe fanema li. Hizaʼi, böi talafo ara ba wangombakha khönia ösi dödömö. (Amd. 13:12) Na lö omasiʼö khönia, haogö wangumaʼö ba böi biniʼö zi so ba dödöu. Nehegö hewisa dalifusöda Hans moroi ba Austria, me so dalifusöda ira alawe samaehagö ösi dödönia: ”Uhaogö wamatunö khönia angetula nihalögu ba lö ubiniʼö nösi dödögu. Lö utaha-taha wamalua daʼö enaʼö lö manötöna ia. Baero daʼö, uzago göi gamuatagu me no aefa uwaʼö khönia daʼö.” Hizaʼi, na omasiʼö itugu aboto ba dödömö sanandrösa khönia, ombakhaʼö khönia ba mihaogö wamatunö hadia nitötönami sagötö milau fakawa. Tola manö faböʼö lala wangera-ngerami börö zi toʼölö mufalua ba mbanuami mazui tanö böʼönia.
HEWISA ITA BA WANOLO IRA TALIFUSÖDA SI LÖ SANGOWALU?
14. Moroi ba wehededa, hewisa wameʼeda famarou dödö khö ndra talifusöda si lö sangowalu?
14 Hewisa wameʼeda famarou dödö khö ndra talifusöda somasi mangowalu? Sambua zi tola tafalua yaʼia na tazago wehededa. (Ef. 4:29) Tola tasofu khöda samösa: ’Moroi ba wehedegu, hadia ufawude-wudeʼö dalifusöda enaʼö mangowalu ia? Na uʼila fahuo-huo zi darua talifusöda si lö sangowalu, hadia uwaʼö tödögu wa moʼeluaha daʼö?’ (1 Ti. 5:13) Baero daʼö, moguna mangelama ita faböi so ba dödö ndra talifusöda si lö sangowalu wa lö eluaha waʼaurira me lö sangowalu ira. Imane Hans nitötöi moroi yawa, ”So ösa ndra talifusöda sangumaʼö, ’He le, hana wa lö mangowaluʼö? No numalö ndröfimö saʼae.’ Möi fangailasi niha si lö sangowalu wehede simane daʼö ba hulö tafaso ira enaʼö laʼaliokö wangowalu.” Abölö sökhi na taʼalui lala ba wanuno ira talifusöda si lö sangowalu!—1 Te. 5:11.
15. (a) Fatua lö tatolo zi samösa niha ba wangalui ngambatönia, hadia zinangea taʼangeragö? (Roma 15:2) (Faigi göi gambara.) (b) Hadia wamahaʼö si tola öhalö moroi ba video daʼö? (Faigi nisura ba gahe zura.)
15 Hewisa na tawaʼö tödöda wa sökhi na mangowalu dalifusöda ira matua andre khö dalifusöda ira alawe daʼö? Hadia iʼanemaiʼö taʼalui lala enaʼö falukha ira? Ifarou ita Sura Niʼamoniʼö enaʼö tatöfaigö ba dödöda nirasoi niha böʼö. (Baso Roma 15:2.) Ato ndra talifusöda si lö sangowalu, lö omasi ira na tafalua zimane daʼö, ba moguna taʼameʼegö tödö gangetulara. (2 Te. 3:11) Te so zomasi mangandrö fanolo khöda, hizaʼi böi tafalua daʼö na lö niwaʼöra khöda. f (Amd. 3:27) So ösa ndra talifusöda si lö omasi na muforomaʼö sibai daʼö föna niha sato. Imane talifusöda ono alawe sotöi Lydia si toröi ba Jerman, ”Tola tafaogö ndra talifusöda andrö ba gotalua ndra talifusöda sato. Taʼalui lala enaʼö falukha ba fahuo-huo ira. Tehegö khöra ba wangai angetula samösa.”
Na owulo ndra talifusöda, daʼö ginötö khö ndra talifusö si lö sangowalu enaʼö falukha ira khö nawöra (Faigi ngenoli si 15)
16. Hadia zi tebai laʼolifugö ira talifusöda si lö sangowalu?
16 Fefu ita he si no mangowalu hegöi si löʼö, tola tarasoi waʼomuso dödö ba waʼauri andre! (Si. 128:1) Hizaʼi, na omasiʼö mangowalu ba lö manö nasa si falukha ndraʼugö niha si tefaudu irugi iadaʼa, osambuaʼö dödöu ba wamosumange Yehowa. Imane talifusöda ira alawe sotöi Sin Yi si toröi ba Makau, ”Abölö oya ginötö niʼogunaʼömö dania wefao khö ngambatöu ba Waradaiso moroi ba ginötö nihorigömö iadaʼa me lö sangowalu ndraʼugö. Haogö wangogunaʼö inötömö ba falua zabölö moguna.” Hizaʼi, hewisa göi na no ösöndra niha si tefaudu ba ibörögö fakawa ami? Ba wamahaʼö aefa daʼa, tatutunö dania hewisa enaʼö tola mihalö gangetula si sökhi.
SINUNÖ 137 Ira Alawe si Lö Faröi
a Enaʼö öʼila hadia no tola mangowalu ndraʼugö, faigi artikel ”Pacaran—Bagian 1: Apa Aku Sudah Siap untuk Pacaran?” ba jw.org
b ELUAHA NGAWUA WEHEDE: Ba artikel daʼa hegöi artikel aefa daʼa, ”fakawa” eluahania inötö khö zi samösa ira matua hegöi ira alawe enaʼö itugu aboto ba dödöra nawöra zamösana hadia tola lafasindro zi sambua fongambatö mazui löʼö. Inötö fakawa labörögö ia me faoma latutunö nösi dödöra si darua niha ba faoma omasi ira khö nawöra, irege lahalö gangetula lalau mangowalu mazui laʼetuʼö wahuwusara.
c Ba ngenoli aefa daʼa tefanandrösa ia khö ndra talifusöda ira matua. Tatu manö, moguna göi goi-goi daʼa khö ndra talifusö ira alawe.
d So ösa zi no mufaböʼöni töi.
e Moloʼö sasese mufalua ba zi hauga banua, si toʼölönia talifusöda ira matua zi oföna mamaehagö ösi dödönia khö dalifusöda ira alawe. Hizaʼi, lö fasala göi na talifusöda ono alawe zi oföna mamaehagö ösi dödönia. (Rut. 3:1-13) Enaʼö öʼila nasa danö böʼönia, faigi artikel ”Kaum Muda Bertanya . . . Bagaimana Cara Menyatakan Perasaan Saya Kepadanya?” ba Sedarlah! 22 Mbaŵa si Fulu 2004.
f Faigi video ”Yaʼira Sofozu ba Wondrorogö Famatira—Si Lö Sangowalu” ba jw.org.
