1-2. Hewisa moloʼö niha böʼö sanandrösa ba ginötö fakawa?

 INÖTÖ fakawa no inötö si sökhi sibai. Na fakawa ndraʼugö iadaʼa, tatu omasiʼö na omuso dödömö. Daʼö göi nirasoi ndra talifusöda tanö böʼö si fakawa. Imane talifusöda ira alawe sotöi Tsion a si toröi ba Etiopia, ”Inötö si möi fangomuso dödöma daruaga foʼomogu yaʼia daʼö me fakawa ndraʼaga. Matutunö sanandrösa ba gabula dödö mazui salua khöma zamösana, ba faoma malau maʼiki. Omuso sibai dödögu börö me no usöndra niha niʼomasiʼögu ba sangomasiʼö yaʼo.”

² Hizaʼi, imane talifusöda ira matua sotöi Alessio si toröi ba Belanda, ”Omuso sibai dödögu me tola itugu aboto ba dödögu woʼomogu me fakawa ndraʼaga. Hewaʼae simanö, lö tebulö so gabula dödö nitaögöma.” Ba wamahaʼö daʼa, tatutunö hadia manö gabula dödö si tola alua ba hadia goi-goi Zura Niʼamoniʼö sanolo niha si fakawa ba wangai angetula si sökhi. Tatutunö göi hewisa ita si farahu ba mbanua niha Keriso ba wanolo niha si fakawa.

OHITÖ DÖDÖ WA FAKAWA

3. Hadia gohitö dödö na fakawa? (Amaedola 20:25)

³ Hewaʼae möi fangomuso dödö na fakawa, hizaʼi daʼö ginötö sabua ba wangai angetula hadia mangowalu ira. Ba ngaluo wangowalu, lafabuʼu föna Yehowa wa laʼomasiʼö ba lafosumange ngambatöra sandrohu faʼaurira. Fatua lö fawuʼu li ita, moguna sibai tahaogö taʼangeragö, mendrua manö na buʼusa li daʼö buʼusa li ba wangowalu. (Baso Gamaedola 20:25.) Inötö fakawa no inötö si sökhi ba zi darua niha enaʼö itugu laʼila nawöra ba tola lahalö gangetula si sökhi. Itaria angetula nihalöra  yaʼia daʼö mangowalu. Hizaʼi, itaria so zangai angetula ba wangetuʼö fahuwusara. Na daʼö gangetula nihalöra, tenga daʼö geluahania wa no lafalua zala. Sindruhunia, daʼö ginötö ba wotatugöi hadia mangowalu ira mazui löʼö.

4. Hana wa moguna atulö lala wangera-ngerada sanandrösa ba wakawasa?

⁴ Ira talifusöda si lö sangowalu moguna laʼokhögö lala wangera-ngera satulö sanandrösa ba wakawasa. Na atulö lala wangera-ngerara, lö fakawa ira ba niha si lö omasi ira lahalö tobali foʼomora. Hizaʼi, fefu ita moguna göi taʼokhögö lala wangera-ngera satulö sanandrösa ba daʼö. Duma-dumania, so ösa zangumaʼö na no fakawa zi darua niha, hasambalö mangowalu ira. Hadia lua-luania lala wangera-ngera daʼa khö ndra talifusöda si lö sangowalu? Imane Melissa, samösa talifusöda moroi ba Amerika Serikat, ”Na fakawa zi samösa talifusöda ira matua khö dalifusöda ira alawe, latötöna ira talifusöda tanö böʼö wa hasambalö mangowalu ira. Lua-luania, so ösa zi lö mangetuʼö zinali faʼomasi hewaʼae laʼila so waʼafaehu lala wangera-ngerara. So göi dalifusöda si lö omasi fakawa ha börö-börö daʼö. No sambua faʼaombö dödö sebua daʼa.”

ENAʼÖ ITUGU ABOTO BA DÖDÖMI NAWÖMI

5-6. Na fakawa zi darua niha, hadia manö zinangea lafahaʼö ira sanandrösa khö nawöra? (1 Fetero 3:4)

⁵ Na fakawa ndraʼugö, hadia zanolo yaʼugö wangai angetula hadia mangowalu ami mazui löʼö? Alui lala enaʼö itugu aboto ba dödömi nawömi. Te so zi no öfahaʼö yaʼugö sanandrösa khönia fatua lö ibörögö fakawa ami. Hizaʼi iadaʼa, moguna öʼila hewisa ”waʼasökhi si tobini bakha ba dödö”. (Baso 1 Fetero 3:4.) Ba ginötö fakawa, tola öfahaʼö ndraʼugö hewisa gamuata niha si fakawa khömö, lala wangera-ngerania mazui amakhaitania khö Yehowa. Tola ösofu khöu samösa, ’Hadia tola tobali ia foʼomo si sökhi khögu?’ (Amd. 31:​26, 27, 30; Ef. 5:33; 1 Ti. 5:8) ’Hadia tola faoma maʼomasiʼö ba maʼameʼegö tödö nawöma zamösana? Hadia aoha khögu wanemaʼö zoʼamböta ia?’ b (Rom. 3:23) Ba ginötö mifahaʼö ami sanandrösa khö nawömi, törö tödöu wa sabölö moguna yaʼia daʼö hadia tola mitemaʼö gamaehuta salua ba gotaluami, tenga hadia manö waʼafagölömi.

⁶ Hadia nasa zi tola mifahaʼö ami sagötö  fakawa? Fatua lö itugu ebua waʼomasimi, tola mitutunö ngawalö zabölö tohude, duma-dumania sanandrösa ba gohitö dödömi zamösana. Hizaʼi, hewisa sanandrösa ba wökhö, foʼömö mazui ngawalö zi lö sökhi si no alua si tebai öʼolifugö? Lö fefu moguna mitutunö na awena fakawa ami. (Faigi göi Yohane 16:12.) Na ba wamaigimö tenga inötönia nasa ba wameʼe fanema li ba wanofu-nofu daʼö, fatunö khönia. Hizaʼi, na no ara numalö ginötö, moguna iʼila kawamö wanema li nibeʼemö enaʼö tola ihalö gangetula si sökhi. Tobali, haogö wamatunö khönia ba böi biniʼö.

7. Hewisa niha si fakawa enaʼö aboto ba dödöra nawöra? (Faigi göi kotak ” Na Fandröndröu Nahia Waʼatoröimi” hegöi gambara.)

⁷ Hewisa niha si fakawa enaʼö aboto ba dödöra nawöra? Sambua lala yaʼia daʼö na faoma fahuhuo ba mitörö zindruhu khö nawömi. Anofu khönia ba haogö wamondrondrongo fanema linia. (Amd. 20:5; Yak. 1:19) Te tola fao ami wamalua si sambua halöwö enaʼö aoha khömi fahuhuo. Duma-dumania, fao ami manuriaigö, fao ami manga, mazui mitörö tanö ba nahia sato niha. Tola göi miʼogunaʼö ginötö wefao khö ndra awö-awömi mazui ösi nomomi. Baero daʼö, angeragö göi wamalua halöwö sanolo yaʼugö ba wangila hewisa gamuatania ba niha böʼö mazui na tebulö zalua. Daʼö nifalua Aschwin, moroi ba Belanda. Imane sanandrösa ba wakawasara Alicia, ”Maʼalui halöwö sanolo yaʼaga enaʼö itugu aboto ba dödöma nawöma. Sasesenia, halöwö si öna-öna manö, simane fao mondrino mazui halöwö yomo tanö böʼö. Sagötö mafalua daʼö, tola maʼila hadia mbua-bua si sökhi hegöi falömoʼahonoa niʼokhögö nawöma zamösana.”

8. Hadia mbuania na fao niha si fakawa ba wamalua famahaʼö ba Zura Niʼamoniʼö?

⁸ Tola göi itugu aboto ba dödömi nawömi na fao ami wamalua famahaʼö ba Zura Niʼamoniʼö. Na no mangowalu, moguna öbeʼe ginötömö ba wamalua famahaʼö ba zi sambua omo enaʼö lö tebulö Yehowa zabölö öʼofönaiʼö ba wongambatömö. (Sango. 4:12) Börö daʼö sagötö fakawa, mibeʼe ginötömi ba wamalua famahaʼö ba Zura Niʼamoniʼö. Sindruhu sa, niha si fakawa lö si tobali ira si sambua ösi nomo, ba talifusöda ira matua andrö lö nasa si tobali ia högö khö dalifusöda ira alawe. Hewaʼae simanö, na fao ami wamalua famahaʼö, tola miʼila hewisa wahuwusami khö Yehowa  zamösana. So göi mbua tanö böʼö nitema Max hegöi Laysa, darua niha si fakawa si toröi ba Amerika Serikat. Imane Max, ”Me awena fakawa ndraʼaga, ibörögö mafahaʼö ndraʼaga ba publikasida sanandrösa ba duho fakawasa, fangowalu mazui fongambatö hegöi faʼauri nösi nomo. Börö me mafalua daʼö, oya ngawalö zi tohude si tola matutunö, sabua ba wofahuhuosi sindruhunia.”

NGAWALÖ DANÖ BÖʼÖ SI TOLA MITUTUNÖ

9. Hadia manö zinangea laʼangeragö ira niha si fakawa ba ginötö lafili haʼökhö lafatunö wa no fakawa ira?

⁹ Haʼökhö mifatunö wa no fakawa ami? Daʼö gangetula sinangea mihalö darua ami. Na awena fakawa ami, te lö omasi ami na ato niha sangila. (Amd. 17:27) Buania, lö oya wanofu-nofu niha sanandrösa ba wahuwusami mazui samaso yaʼami ba wangai angetula. Hewaʼae simanö, na lö öfatunö daʼö ba niha böʼö, tola manö öʼoniagö ndraʼugö börö me lö omasiʼö laʼila daʼö niha böʼö. Hizaʼi, tola möi famaʼalamö daʼö. Andrö, angetula si sökhi si tola mihalö yaʼia na mifatunö gamakhaitami andrö ba niha si tola manolo ba sameʼe khömi mene-mene si sökhi. (Amd. 15:22) Duma-dumania, tola mifatunö daʼö ba nösi nomomi, si fahuwu khömi si no aro ba wamati hegöi ira satua sokubaloi.

10. Hewisa niha si fakawa ba wondrorogöra enaʼö möi fangomuso dödö Yehowa nifaluara? (Amaedola 22:3)

¹⁰ Hewisa niha si fakawa ba wondrorogöra enaʼö möi fangomuso dödö Yehowa nifaluara? Na no itugu ebua waʼomasimi, tatu itugu omasi ami fao-fao manö. Börö daʼö, hadia zanolo yaʼami enaʼö lö mifalua zi möi fangafökhö dödö Yehowa? (1 Ko. 6:18) Böi mifadunö-dunö sanandrösa ba wohorö, böi miʼaeʼe ba nahia si lö niha-niha, ba böi mabu ami. (Ef. 5:3) Fefu daʼö möi fondrönisi dödömi ba wamalua fohorö ba fanaisimi wamalua satulö. Abölö sökhi na lö tebulö mifadunö-dunö hadia zinangea mifalua ba wamosumange nawömi zamösana hegöi ba wamosumange goi-goi Yehowa. (Baso Gamaedola 22:3.) Nehegö hadia zalua khö Dawit hegöi Almaz moroi ba Etiopia. Lamane, ”Na fao ndraʼaga, mafaigi nahia sato niha mazui faoga khö ndra awö-awöma. Lö irai ha daru-darua ndraʼaga ba moto mazui ba nomo. Maʼalui lala enaʼö lö tedönisi dödöma.”

11. Hadia zinangea laʼangeragö ira niha si fakawa ba ginötö laforomaʼö waʼomasira khö nawöra?

¹¹ Hadia tola laforomaʼö waʼomasi ira niha si fakawa? Börö me itugu tedou waʼomasimi khö nawömi, te omasi ami miforomaʼö waʼomasimi. Hizaʼi, na tedönisi dödömi ba wamalua faʼorudu, tola manö abua khömi ba wangai angetula si sökhi. (SS. 1:2; 2:6) Baero daʼö, ba ginötö miforomaʼö waʼomasimi, tola manö taya khömi wanaha tödö ba mifalua zi lö tefaudu ba zomasi Yehowa. (Amd. 6:27) Tobali ba wamobörö, sökhi na mifatunö hadia zi tola awö zi tebai mifalua ba ginötö miforomaʼö waʼomasi. c (1 Te. 4:​3-7) Yaʼami si darua, misofu khömi samösa: ’Hewisa wamaigi niha sato ba ginötö maforomaʼö waʼomasi khö nawöma? Hadia möi fondrönisi dödöma daʼa ba wamalua horö?’

12. Hadia zinangea laʼangeragö ira niha si fakawa na so waʼafaehu lala wangera-ngerara?

¹² Hadia nifaluami na so waʼafaehu lala wangera-ngerami? Hewisa na asese faehu lala wangera-ngerami? Hadia daʼö geluahania wa sökhi na miʼetuʼö zinali waʼomasimi? Löʼö. Fefu zi fakawa hegöi si no mongambatö itaria göi faehu lala wangera-ngerara khö nawöra. Tola  aro wongambatö börö me falulu fohalöwö zi darua niha andrö ba wangasiwai faʼafaehu lala wangera-ngera salua, tenga börö me lö tebulö hasara dödöra. Lalami ba wangasiwai abula dödö iadaʼa, daʼö zangoromaʼö hadia mofozu wongambatömi dania. Misofu khömi daʼa: ’Hadia tola mafatunö gabula dödöma si fao faʼahono dödö ba safönu famosumange? Hadia faoma mafaduhuʼö wa so zoʼamböta ndraʼaga ba maforege enaʼö itugu sökhi gamuatama khö nawöma? Hadia alio khöma ba wangandrö faʼebolo dödö, ba wangefaʼö sala, ba lö fatandro?’ (Ef. 4:​31, 32) Hizaʼi, na asese fatimba li ami mazui fabuʼa-buʼa sagötö fakawa, daʼö dandra wa tenga itugu sökhi zalua na no mangowalu ami. Na aboto ba dödöu wa lö hadöi khömi fahasara dödö, angetula si sökhi yaʼia daʼö miʼetuʼö zinali faʼomasimi. d

13. Hadia zanolo niha si fakawa ba wangai angetula hawaʼoya ginötö niʼogunaʼöra fakawa?

¹³ Hawaʼoya ginötö niʼogunaʼömi fakawa? Lö sökhi gangetula nihalö ba waʼaösö. (Amd. 21:5) Börö daʼö sökhi na oya miʼogunaʼö ginötö enaʼö faoma aboto ba dödömi nawömi. Hizaʼi, lö sökhi göi na talafo ara fakawa. Imane Sura Niʼamoniʼö, ”Fanötöna si no tetaha ba möi fangafökhö dödö.” (Amd. 13:12) Baero daʼö, na oya ginötö niʼogunaʼömi fakawa, itugu abua khömi ba wanimbagö fondrönisi dödö ba wamalua horö. (1 Ko. 7:9) Moroi na öʼosambuaʼö dödöu hawaʼoya ginötö niʼogunaʼömi fakawa, sökhi na ösofu khömö samösa, ’Hadia nasa zinangea uʼila sanandrösa khönia fatua lö uhalö gangetula?’

HEWISA NIHA BÖʼÖ BA WOTUHINI NIHA SI FAKAWA?

14. Hadia manö zi tola tafalua ba wanolo niha si fakawa? (Faigi göi gambara.)

¹⁴ Na taʼila so niha si fakawa, hadia zi tola tafalua ba wanolo yaʼira? Tola takaoni ira ba nomoda wefao manga, ba wamalua famahaʼö ba zi sambua omo, mazui rekreasi. (Rom. 12:13) Tola manö, daʼö ndrela wa itugu aboto ba dödöra nawöra zamösana. Tola ötolo ira duma-dumania, fao ndraʼugö awöra, öfaogö ira ba motomö, mazui ökaoni ira ba nomomö enaʼö tenga ha daru-darua ira. (Gal. 6:10) Alicia, nitötöi moroi yawa, ifuli itörö tödönia hadia wanolo nitemania hegöi Aschwin. Imane, ”Omuso dödöma me so ndra talifusö sangumaʼö khöma wa tola möiga ba nomora na omasiga fahuhuo khö nawöma ba lö mabiniʼö  ndraʼaga.” Na laʼandrö khöu ba wefao khöra, tola öʼogunaʼö ginötö daʼö ba wanolo yaʼira. Böi röi ira ha daru-darua. Hizaʼi, böi olifuʼö wa itaria moguna göi fahuhuo ira ha darua manö.—Fil. 2:4.

15. Hadia nasa zi tola lafalua ira si fahuwu ba wanolo niha si fakawa? (Amaedola 12:18)

¹⁵ No göi tatolo niha si fakawa na taʼila hadia zinangea tawaʼö ba si tebai tawaʼö. Itaria moguna khöda wanaha tödö. (Baso Gamaedola 12:18.) Duma-dumania, te omasi sibai ita wamatunö ba niha böʼö wa no ibörögö fakawa ira. Hizaʼi tola manö omasi zi fakawa andrö na yaʼira samösa zamatunö daʼö ba niha böʼö. Böi tadunö-dunö sanandrösa khöra mazui taʼobousi döira. (Amd. 20:19; Rom. 14:10; 1 Te. 4:11) Baero daʼö, tahaogö taʼangelamaisi wehededa mazui böi tabeʼe wanofu irege larasoi wa hulö nifaso ira enaʼö alio mangowalu. Itörö tödö dalifusöda ira alawe sotöi Elise hegöi foʼomonia imane, ”Alawö-lawö ndraʼaga na so zanofu khöma hawaʼara mangowaluga börö me lö nasa nifatunöma daʼö.”

16. Hewisa zinangeania ita na tarongo so zi no aetu fakawa?

¹⁶ Hewisa na so zi no aetu fakawa? Böi tasekhegö wanofu khöra mazui faʼawö dambai ita. (1 Fe. 4:15) Imane samösa talifusöda ira alawe sotöi Lea, ”Urongo me lafadunö-dunö ndraʼaga ba manahö-nahö dödöra hadia mbörö wa aetu zinali wahuwusama. Afökhö sibai dödögu.” Simane si no tatutunö moroi yawa, na aetu wahuwusa zi darua niha, böi tawaʼö wa no lahalö gangetula si lö tefaudu. Si toʼölönia, daʼö dandra wa no mofozu gohitö dödöra fakawa yaʼia daʼö ba wotatugöi hadia mangowalu ira mazui löʼö. Sindruhu sa, tola manö larasoi waʼafatö dödö ba hulö zi lö awö-awö ira börö gangetula nihalöra. Börö daʼö dataʼalui lala ba wamarou tödöra.—Amd. 17:17.

17. Hadia zinangea lafalua nasa ira niha si fakawa?

¹⁷ Simane si no tatutunö, tola manö so gabula dödö na fakawa, hizaʼi tola göi tobali fangomuso dödöda daʼö. Itörö tödö Jessica, ”Sindruhu sa wa moguna wamorege na fakawa. Hizaʼi, omuso dödögu me maʼogunaʼö ginötö hegöi faʼabölöma enaʼö itugu aboto ba dödöma nawöma.” Na fakawa ndraʼugö iadaʼa, forege enaʼö aboto ba dödöu kawamö. Na öfalua daʼö, no mofozu gohitö dödöu fakawa, yaʼia daʼö ba wangai angetula si tefaudu sanandrösa ba wahuwusami.