1. Simane nisura ba Zinunö 18:​46, hezo ifagölösi Yehowa andrö Dawido?

 ITARIA alua khöda gabula dödö si lö mudöna-döna irege basaki zalua ba waʼaurida mazui tebulö lala waʼaurida. Hewaʼae simanö, taʼandrö saohagölö me so Lowalangida Yehowa sanolo yaʼita si tola muʼodaligö. Simane nitutunö ba wamahaʼö silalö, ifasugi ba dödöda wa Yehowa andrö Lowalangi sauri ba lö tebulö itolo ita. Ba ginötö tatema wanolo, daʼö zamaduhuʼö ba dödöda wa ”sauri sa Yehowa”! (Baso Zinunö 18:46.) Hizaʼi, aefa daʼö iwaʼö Dawido wa ’Gowe Saro khögu’ Yehowa. Hana wa ifaedogö Yehowa, Lowalangi sauri ba gowe saro si lö noso?

2. Hadia manö nitutunöda ba artikel daʼa?

² Ba wamahaʼö daʼa, tatutunö hana wa mufotöi khö Yehowa Gowe Saro ba hadia wamahaʼö nihalöda sanandrösa khönia moroi ba duma-duma daʼö. Tatutunö göi hewisa enaʼö tola tabaliʼö ia Gowe Saro khöda. Ba safuria, tatutunö hadia lala si tola tafalua enaʼö tola taʼoʼö mbua-bua Yehowa si no amaedola gowe saro.

HANA WA MUFOTÖI KHÖ YEHOWA GOWE SARO?

3. Hawaʼasese iʼogunaʼö Sura Niʼamoniʼö ngawua wehede ”gowe saro”? (Faigi ba guli majalah.)

³ Ba Zura Niʼamoniʼö, iʼamaedolagö Yehowa andrö ”gowe saro” ba wanolo yaʼita enaʼö taʼila gamuatania. Sasesenia, ba ginötö lasuno Yehowa iraono mbanuania börö gamuatania sahöli-höli dödö, laʼamaedolagö Yehowa andrö ba Zura Niʼamoniʼö hulö gowe saro. Ayati siföföna samotöi Yehowa tobali ”Gowe Saro”, no tesura ia ba 5 Moze 32:4. Ba wangandrö Khana, ifaduhuʼö wa ”lö hadöi gowe saro simane Lowalangima”. (1 Sa. 2:2) Iwaʼö göi Habakuki wa Yehowa andrö ”Gowe Saro” khönia. (Hab. 1:12) Imane göi sanura Sinunö 73 wa Lowalangi andrö ”gowe saro khögu”. (Si. 73:26) Ba Yehowa samösa zangumaʼö wa yaʼia andrö Gowe Saro. (Yes. 44:8) Datatutunö zi  tölu gamuata niforomaʼö Yehowa si no amaedola gowe saro, ba tafahaʼö ita hewisa enaʼö tola tabaliʼö ia ”Gowe Saro khöda.”—5 Mo. 32:31.

4. Hewisa wa tola tobali Yehowa nahia folumöʼö? (Sinunö 94:22)

⁴ Yehowa andrö nahia folumöʼö khöda. Sagötö alua deu toho sabölö-bölö, tola telumöʼö zi samösa niha na iʼagö dögi narö hili. Simane daʼö göi Yehowa, tola ilumöʼö ita sagötö alua khöda gabula dödö. Itolo ita ba wolumöʼö fahuwusada khönia ba ifaduhuʼö wa lö hadöi famakao mazui abula dödö salua khöda iadaʼa si tola mamaʼala faʼaurida sagötö faʼara. (Baso Zinunö 94:22.) Ba ifabuʼu göi, ba zi so miföna hasambalö iheta fefu zangaʼasogö abula dödö, famakao mazui faʼaombö-aombö dödö.—Hez. 34:​25, 26.

5. Hadia zinangea tafalua enaʼö tobali nahia folumöʼöda Yehowa?

⁵ Sambua lala si tola tafalua enaʼö tobali nahia folumöʼöda Yehowa yaʼia daʼö mangandrö ita khönia. Na mangandrö ita, ibeʼe khöda waʼohahau dödö Yehowa sondrorogö tödöda awö gera-erada. (Fil. 4:​6, 7) Nehegö zalua khö zi samösa talifusöda sotöi Artem nibeʼe ba gurunga börö wamatinia. Me so ia ba gurunga asese labeʼe khönia wanofu-nofu, lafakao-kao ba lafetaʼu ia. Imane Artem, ”Abu dödögu ero manofu-nofu ira khögu. . . . Lö uböhöli wangandrö khö Yehowa enaʼö ibeʼe khögu waʼahono dödö ba faʼatua-tua. . . . Hewaʼae lafakao-kao ndraʼo, lö tebulö urasoi waʼahono dödö. . . . Börö wanolo Yehowa, hulö no mosindro ndraʼo ba gero dowa sokara.”

6. Hadia mbörö wa lö tebulö tola taʼodaligö Yehowa? (Yesaya 26:​3, 4)

⁶ Tola muʼodaligö Yehowa. Simane gowe saro mazui hili si tebai awuʼa, aboto ba dödöda wa lö tebulö itolo ita Yehowa. Tola tafaduhusi tödö Yehowa börö me ”Gowe Saro si lö tebulö” ia. (Baso Yesaya 26:​3, 4.) Lö tebulö so ia sagötö faʼara ba wamalua si no ifabuʼu, ba wamondrondrongo fangandröda, hegöi ba wanolo yaʼita. Tola göi taʼodaligö Yehowa börö me lö faröi ia ba niha samosumange yaʼia. (2 Sa. 22:26) Lö irai olifu ia hadia zi no tafalua, ba lö tebulö ifahowuʼö ita.—Heb. 6:10; 11:6.

7. Hadia mbuania na taʼodaligö Yehowa? (Faigi göi gambara.)

⁷ No tabaliʼö Gowe Saro khöda Yehowa na sindruhu-ndruhu taʼodaligö ia. Faduhu dödöda wa hasambalö tatema mbuania na lö tebulö taʼoʼö niwaʼönia hewaʼae na alua khöda gabula dödö. (Yes. 48:​17, 18) Ba ginötö tarasoi wanolo moroi khönia, itugu tedou waʼafaduhu dödöda khönia. Faduhu dödöda wa tola anau gölöda ba wanaögö abula dödö börö wanolo moroi khö Yehowa. Sasesenia, ba ginötö ha yaʼi-yaʼita ba lö niha sanolo, ba daʼö tola aboto ba dödöda wa sindruhu-ndruhu tola taʼodaligö Yehowa. Imane Vladimir, ”Urasoi wa itugu ahatö ndraʼo khö Yehowa me so ndraʼo ba gurunga. Ufahaʼö ndraʼo enaʼö itugu ufaduhusi tödö Yehowa börö me ha yaʼo-yaʼo, ba ha yaʼia zi tola manolo yaʼo ba wanaögö salua khögu.”

8. (a) Hadia mbörö wa tola tawaʼö lö irai tebulö Yehowa? (b) Hadia mbuania na tabaliʼö Gowe Saro khöda Yehowa? (Sinunö 62:​6, 7)

 ⁸ Lö irai tebulö Yehowa. Simane gowe saro mazui hili sebua, lö irai tewuʼa Yehowa. Lö tebulö gamuatania hegöi ohitö dödönia. (Mal. 3:6) Lö ibulöʼö gohitö dödönia Yehowa me mamadaö Gadamo faoma Khawa. Simane niwaʼö Waulo, Yehowa andrö ”tebai isawö zi no iwaʼö”. (2 Ti. 2:13) Eluahania, gofu hadia zalua mazui gofu hadia nifalua nudu, lö irai tebulö gamuata Yehowa, ohitö dödönia mazui goi-goinia. Börö me lö irai tebulö Yehowa, faduhu dödöda wa hasambalö itolo ita na göna ita abula dödö ba ifalua zi no ifabuʼu ba zi so miföna.—Baso Zinunö 62:​6, 7.

9. Hadia wamahaʼö si tola öhalö moroi ba zalua khö Tatyana?

⁹ Na taʼangerönusi gohitö dödö Yehowa ba gulidanö hegöi ba niha, daʼö zanolo yaʼita irege tafaduhusi tödö ia ba tabaliʼö ia Gowe Saro khöda. Daʼö göi zanolo yaʼita enaʼö lö tebulö tarasoi waʼahono dödö ba lö faröi ita khönia na göna ita abula dödö. (Si. 16:8) Daʼö nirasoi dalifusöda ira alawe sotöi Tatyana si no mukuru ba nomo börö wamatinia. Imane, ”Urasoi wa ha yaʼo-yaʼo. Ba wamobörö abua sibai khögu wanaögö daʼö ba asese urasoi waʼide-ide dödö.” Hizaʼi, aboto ba dödönia wa famakao salua khönia moʼamakhaita daʼö khö Yehowa hegöi ohitö dödönia ba niha gulidanö. Daʼö mbörö wa anau gölönia ba ifuli teʼabölöʼö ia. Imane, ”Alua khögu gabula dödö daʼa börö me uʼomasiʼö Yehowa ba omasido uʼomusoiʼö dödönia. Möi fanologu daʼa irege lö talafo uʼangeragö sibai zalua khögu.”

10. Hewisa enaʼö tobali Gowe Saro khöda Yehowa iadaʼa?

¹⁰ Ba zi lö ara tö, tataögö ginötö sabua fanaögö ba moguna taʼodaligö Yehowa töra moroi ba zilalö. Börö daʼö, moguna sibai iʼotarai iadaʼa taʼaroʼö waʼafaduhu dödöda khö Yehowa ba tafaduhusi tödö wa hasambalö itolo ita enaʼö lö faröi gofu hadia zalua. Hadia zi tola tafalua? Baso waö-waö si so ba Zura Niʼamoniʼö hegöi si no irai alua khö ndra Samaduhuʼö Yehowa ba götöda iadaʼa. Nehegö hadia nifalua Yehowa ba wanolo ono mbanuania. Na öʼangerönusi daʼö, tola tetolo ndraʼugö ba wombaliʼö Yehowa tobali Gowe Saro khöu.

OʼÖ GAMUATA YEHOWA

11. Hadia mbörö wa omasi ita taʼoʼö gamuata Yehowa si hulö gowe saro? (Faigi göi kotak ” Ohitö Dödö khö Ndra Talifusöda Ira Matua si Bohou Ebua”.)

¹¹ No aboto ba dödöda gamuata Yehowa irege tefaudu na tabaliʼö ia Gowe Saro khöda. Iadaʼa, datanehegö hewisa woloʼöda amuatania andrö. Na taforege woloʼö amuata Yehowa, tola itugu sökhi wameʼeda famarou dödö khö ndra talifusöda ba mbanua niha Keriso. Duma-dumania, no irai ibeʼe Yesu gamalalata döi khö Zimoni, yaʼia daʼö Kefa (na mufoʼeluaha ia ”Fetero”), eluahania ”Sambua Kara”. (Yoh. 1:42) Iwaʼö Yesu wa Fetero andrö tobali umbu wondrara dödö ba mbanua niha Keriso ba sangaʼaroʼö famati ndra talifusönia. Muʼamaedolagö  göi ndra satua sokubaloi ba mbanua niha Keriso simane ”lumö hili sokara”. Eluahania, yaʼira zolumöʼö ira talifusö ba mbanua niha Keriso. (Yes. 32:2) Tatu manö so mbuania ba mbanua niha Keriso na fefu ndra talifusö laʼoʼö gamuata Yehowa si hulö gowe saro.—Ef. 5:1.

12. Hewisa enaʼö tobali ita nahia folumöʼö khö ndra talifusöda?

¹² Yatobali ndraʼugö nahia folumöʼö. Ba ginötö tekiko nomo ndra talifusöda mazui laröi nomora börö bencana mazui fasuwöta, tola tatehegö khöra toröi ira ba nomoda. Börö me itugu lö sökhi zalua ba ngaluo safuria andre, itugu oya ginötö khöda ba wameʼe fanolo khö ndra talifusöda. (2 Ti. 3:1) Tola göi tafarou dödöra ba wamati ba tarara dödöra. Duma-dumania, tatemaʼö ira na laʼondrasi Nahia Gangowuloa. Omasi ita na larasoi wa no nahia safönu faʼomasi Nahia Gangowuloada. Ato niha iadaʼa zi taya faʼomasi ba samalua si lö sökhi khö nawöra. Daʼa mbörö wa moguna taforege enaʼö larasoi ira talifusöda wa taʼomasiʼö, talumöʼö ba tafarou dödöra na owulo ita khöra ba gangowuloa.

13. Hewisa enaʼö tobali nahia folumöʼö ndra satua sokubaloi? (Faigi göi gambara.)

¹³ Tola tobali nahia folumöʼö ndra satua sokubaloi khö ndra talifusö ba mbanua niha Keriso si göna abula dödö. Na alua bencana alam mazui fökhö sabölö-bölö, laʼanemaiʼö labeʼe wanolo ira satua sokubaloi khö ndra talifusöda. Labeʼe wanuturu lala hegöi fondrara dödö moroi ba Zura Niʼamoniʼö. Na no ihaogö-haogö wehede si samösa satua sokubaloi, ifondrondrongo hadia nitutunö khönia ba iʼameʼegö tödö nirasoira, lö alawö ndra talifusöda ba wangandrö tolo khönia. Amuata simane daʼö möi fanolo khö ndra talifusöda irege larasoi wa laʼomasiʼö ira, ba itugu aoha khöra wamalua fanuturu lala moroi ba  Zura Niʼamoniʼö nibeʼe ndra satua sokubaloi.—1 Te. 2:​7, 8, 11.

14. Hewisa wangoromaʼöda wa tola muʼodaligö ita?

¹⁴ Yatobali ndraʼugö niha si tola muʼodaligö. Omasi ita na tola laʼodaligö ita ira talifusöda mendrua manö na alua khöra gabula dödö. (Amd. 17:17) Hadia zinangea tafalua irege tola laʼodaligö ita? Ero maʼökhö taforege woloʼö amuata Yehowa. Duma-dumania, tafalua zi no tafabuʼu ba taforege enaʼö lö ahou ita ba ginötö si no mutatugöi. (Mat. 5:37) Baero daʼö, tola tabeʼe wanolo ba ginötö moguna. Taforege göi wangasiwai halöwöda moloʼö fanuturu lala nibeʼe khöda.

15. Hadia mbua nitema ndra talifusöda na tola muʼodaligö ndra satua sokubaloi?

¹⁵ So mbua nitema ndra talifusöda na tola muʼodaligö ndra satua sokubaloi. Duma-dumania, na laʼila ira talifusöda wa tola latelefo ndra satua sokubaloi gofu hawaʼara moguna khöra wanolo, tola möi fanolora daʼö irege lö larasoi waʼaombö-aombö dödö. Larasoi göi wa laʼomasiʼö ira ba ginötö laʼila wa lö abua gölö ndra satua sokubaloi ba wanolo yaʼira. Tola göi lafaduhusi tödö ndra satua sokubaloi börö me labeʼe mene-mene moroi ba Zura Niʼamoniʼö hegöi publikasida, tenga bua gera-erara samösa. Baero daʼö, faduhu  göi dödö ndra talifusöda khö ndra satua sokubaloi börö me lafalua zi no lafabuʼu ba lö ladunö-dunö sanandrösa khöra misa ba niha böʼö.

16. Hadia mbuania khöda hegöi ba niha böʼö na lö tebulö tafalua zatulö moloʼö Yehowa?

¹⁶ Lö tebulö tafalua zatulö moloʼö Yehowa. Na taʼoʼö niwaʼö Yehowa ba ngawalö hadia ia ba tahalö gangetula si teʼodane-dane ba Zura Niʼamoniʼö, no tobali ita duma-duma si sökhi ba niha böʼö. Ba ginötö tafahaʼö ita ba Daromali Lowalangi ba taʼaroʼö wamatida khönia, tola tarorogö waʼalöfaröida khönia hegöi ba woloʼö goi-goinia. Baero daʼö, lö khöda faʼaombö dödö ba lö tedönisi dödöda ba wamahaʼö sofaya hegöi bua gera-era niha si lö tefaudu moloʼö Yehowa. (Ef. 4:14; Yak. 1:​6-8) Famatida khö Yehowa hegöi ba mbuʼusa linia, daʼö zameʼe khöda faʼahono dödö ba ginötö tarongo duria si lö sökhi. (Si. 112:​7, 8) Tola göi tatolo niha sanaögö abula dödö.—1 Te. 3:​2, 3. 

17. Hewisa ndra satua sokubaloi ba wangaʼaroʼö banua niha Keriso?

¹⁷ Ira satua sokubaloi, lö tola löʼö moguna laʼila lafatörö waʼaurira, laʼokhögö wangera-ngera satulö, toföfö ba lö fatandro. Na ’lö faröi ira ba daromali si tola mufaduhusi tödö’, no latolo niha böʼö ba wangokhögö famati saro khö Yehowa ba teʼaroʼö mbanua niha Keriso. (Tit. 1:9; 1 Ti. 3:​1-3) Moroi ba duma-dumara hegöi halöwö fokubaloi nifaluara, tola latolo ndra talifusö enaʼö owölö-ölö ira weʼamöi ba gangowuloa, manuriaigö hegöi ba wamalua famahaʼö samösa. Na göna abula dödö ndra talifusöda, labeʼe wanolo ira satua sokubaloi si möi famarou dödö enaʼö laʼosambuaʼö dödöra khö Yehowa hegöi ba mbuʼusa linia.

18. Hadia mbörö wa omasi ita tasuno Yehowa ba tahatöʼö ita khönia? (Faigi göi kotak ” Lala Enaʼö Ahatö Ita khö Yehowa”.)

¹⁸ Me no tanehegö gamuata Yehowa sahöli-höli dödö, tola tawaʼö simane niwaʼö Razo Dawido, ”Nisuno Yehowa, Gowe Saro andrö khögu.” (Si. 144:1) Lö tebulö tola taʼodaligö Yehowa. Sandrohu faʼaurida, tola tawaʼö si fao faʼafaduhu dödö, ”Yaʼia Gowe Saro khögu.” Lö tebulö itolo ita Yehowa enaʼö aro ba wamati.—Si. 92:​14, 15.