Tumbu ndraʼo me 22 mbaŵa si Felendrua 1929 ba Noville, banua side-ide sahatö ba Bastogne, Belgia Ardennes. So siwa ngaʼörö nowi ba mbanuama. Me ide-idedo usöndra waʼomuso dödö na faoga khö ndra satuagu mohalöwö ba nowi. Yaʼo hegöi akhigu ono matua, halöwöma yaʼia daʼö mamera susu zawi ero maʼökhö ba matolo zatuama ba wamasi. Ba mbanuama, falulu fohalöwö fefu niha ba faoma latolo nawöra.

Satuagu, Emile hegöi Alice, yaʼira agama Katolik si lö faröi. Fao ira wamalua Misa ero hari Migu. Hizaʼi, te me döfi 1939, tohare ndra perintis moroi ba Inggris ba mbanuama, ba labeʼe khö bapagu majalah Consolation (mufotöi ia iadaʼa Faoso!). Me no aefa ibaso majalah daʼö bapagu, iʼanemaiʼö aboto ba dödönia wa daʼa zindruhu ba ibörögö ibaso Zura Niʼamoniʼö. Me ibato bapagu weʼamöi ba Misa, laʼuduni ia si faola omo khöma, hewaʼae ba zilalö sökhi sibai lagura khöma. Lafaso bapagu enaʼö lö iröi agama Katolik, ba asese fabuʼa-buʼa ira sanandrösa ba daʼö.

Afökhö sibai dödögu me laʼuduni bapagu. Salua andre zamarou yaʼo ba wangandrö khö Lowalangi, simane nitutunögu ba wamobörö artikel daʼa. Me ibörögö alö wanaisi moroi ba zi faola omo khöma, ahono sibai dödögu. Daʼa zamaduhuʼö ba dödögu wa Yehowa andrö ’Samondrondrongo fangandrö’.

Me 10 mbaŵa si Lima 1940, tohare Nazi Jerman ba wanuwö Belgia. Lua-luania, ato niha soloi. Moloi nösi nomoma tanö raya Prancis. Ba zi sandrohu lala numalö ba daʼö, asese maʼila ndra saradadu Jerman hegöi saradadu Prancis si fasuwö.

Me mafuliga ba nowima, oya gama-gamama si no latagö. Hatö asuma sotöi Bobbie, zombalo-baloi fangawulima. Börö zalua andrö, manofu-nofu  manö ndraʼo, ’Hana wa alua wasuwöta hegöi ngawalö wamakao?’

Me luo daʼö, oya sibai mbua nitemama me ifalukhaisi ndraʼaga talifusöda ira matua sotöi Emile Schrantz, a samösa perintis hegöi penatua. Ifatunö moroi ba Zura Niʼamoniʼö hana wa alua wasuwöta ba ibeʼe göi wanema li moroi ba wanofu-nofugu tanö böʼö sanandrösa ba waʼauri. Buania, itugu aro wahuwusagu khö Yehowa, ba faduhu dödögu wa yaʼia andrö Lowalangi safönu faʼomasi.

Hewaʼae lö si tebato wasuwöta, hizaʼi tola fariawö nösi nomoma khö ndra Samaduhuʼö tanö böʼö. Me baŵa si Walu 1943, möi dalifusöda José-Nicolas Minet ba nowima, ba ifaʼema sambua huhuo. Ba huhuonia, ilau manofu, ”Haniha zomasi tebayagö idanö?” Yaʼo hegöi bapagu mafazawa dangama. Tebayagö idanö ndraʼaga ba nungo nidanö side-ide ba zi tambai nowima.

Me baŵa si Felendrua 1944, ifuli tohare zaradadu Jerman ba wanuwö Eropa tanö ba gaekhula. Daʼa wasuwötara safuria ba daʼö, ba mufotöi ia Fasuwöta Bulge. Toröi ndraʼaga ahatö ba daʼö, börö daʼö mabiniʼö ndraʼaga ba nahia si so barö nomo, te ba zi sara waŵa waʼara. Samuza maʼökhö, me möido mowöli ö guriföma, göna bom nowima, ba no adudu nomoma soroma yawa ba dete danö. So samösa zaradadu Amerika si so ba ngai kandra, muʼao ia, ”Falöguʼö tou!” Ulau fagohi ba ufalögudo ba ngainia. Ihalö helemnia ba ibeʼe folumöʼö högögu.

Me no awai Wasuwöta Gulidanö II, maʼalui lala enaʼö asese fariawö ndraʼaga ba zi sambua banua niha Keriso si so ba Liège, mato 90 kilometer moroi ba mbanuama tanö yöu. Me luo daʼö, mafasindro sambua gangowuloa side-ide ba Bastogne. Ibörögö mohalöwödo ba gödo pajak ba tebeʼe khögu ginötö ba wamahaʼö yaʼo sanandrösa ba undang-undang. Aefa daʼö, mohalöwödo tobali asisten notaris. Me 1951, mafalua gangowuloa ba zi sambua wilayah ba Bastogne. So mato 100 niha zangondrasi, farahu ba daʼö samösa perintis sowölö-ölö sotöi Elly Reuter. Itörö lala 50 kilometer waʼaröu ba wangondrasi angowuloa andrö. Lö ara aefa daʼö, faoma omasiga khö  nawöma ba famatua ndraʼaga. Me luo daʼö, itema wogaoni Elly weʼamöi ba Sekolah Gilead nifalua ba Amerika Serikat. Börö daʼö, ifaʼoheʼö zura ba gödo sebua ba wanutunö hadia mbörö wa tebai itemaʼö wogaoni andrö. Talifusöda Knorr zondröniaʼö ono mbanua Yehowa me luo daʼö. Ibeʼe wanema li ba zura nifaʼoheʼö Elly, iwaʼö wa samuza inötö dania tola manö ifuli mukaoni Elly hegöi foʼomonia wefao ba Sekolah Gilead. Mangowalu ndraʼaga me baŵa si Dua 1953.

Ba ndröfi daʼö göi, yaʼo hegöi Elly maʼondrasi Kebaktian Masyarakat Dunia Baru nifalua ba Stadium Yankee, New York. Ba daʼö, falukhado khö zi samösa talifusöda sameʼe khögu halöwö si sökhi ba iwaʼö khögu enaʼö toröi ndraʼaga ba Amerika Serikat. Me no aefa uʼohe daʼö ba wangandrö, mahalö gangetula wa lö mahalö halöwö daʼö ba mangawuliga ba Belgia ba wanolo ira talifusöda sanuriaigö si ha dafulu niha ba Bastogne. Döfi aefa daʼö, tumbu khöma nono matua, ba mabeʼe töinia Serge. Hizaʼi, fitu waŵa aefa daʼö, mofökhö Serge ba mate ia. Matutunö khö Yehowa waʼabu dödöma ba wangandrö ba ifuli teʼabölöʼö ndraʼaga börö dötönafö fanusugi.

Me baŵa si Fulu 1961, usöndra halöwö si tola manuhini yaʼo tobali perintis. Ba ngaluo daʼö göi, utema telefo moroi khö hamba cabang Belgia. Isofu khögu hadia tola tobali ndraʼo hamba wilayah (iadaʼa mufotöi satua samasui). Hizaʼi, umane khönia, ”Hadia tola mangai halöwö ndraʼaga tobali perintis fatua lö matemaʼö halöwö andre?” Fao dödönia ba niʼandröma andrö. Me no aefa mangai halöwö ndraʼaga tobali perintis ba zi walu waŵa, ibörögö tobali ndraʼaga satua samasui me baŵa si Siwa 1962.

Dua fakhe aefa daʼö, me baŵa si Fulu 1964 lakaoni ndraʼaga wohalöwö ba Mbetieli Brussels. Oya sibai howu-howu nitemama ba halöwöma si bohou andre. Lö ara me no aefa möi dalifusöda Knorr ba Mbetieli me döfi 1965, tokeado me lafataro ndraʼo tobali hamba cabang. Aefa daʼö, yaʼo hegöi Elly lakaoni ndraʼaga wefao ba Sekolah Gilead kelas 41. Sindruhu-ndruhu alua wehede dalifusöda Knorr me 13 fakhe silalö! Me no aefa sekola, mangawuli ndraʼaga ba Mbetieli Belgia.

Ba zi hauga fakhe aefa daʼö, tebeʼe khögu ginötö ba wangogunaʼö faʼatua-tua niʼokhögögu ba zilalö ba wangoʼawögö ono mbanua Yehowa enaʼö lö taha-tahara ba wamosumange Yehowa, he ba Eropa hegöi ba soi böʼö. (Fil. 1:7) Buania, tola falukha ndraʼo khö ndra samatörö ba zi töra 55 soi si lö manehegö halöwö nifaluada. Moroi na uhöni-höni halöwögu ba zilalö ba bidang huku, ufatunö wa yaʼodo ”enoni Lowalangi” ero na uʼombakhaʼö ba niha sanandrösa khögu. Uʼalui wanuturu lala moroi khö Yehowa, faduhu dödögu wa ”amaedola gelea nidanö dödö razo [mazui sanguhuku] ba danga Yehowa. Ifatörö gofu hezo manö zomasi ia”.—Amd. 21:1.

 So sambua zi no irai alua si lö olifudo, yaʼia me fahuhuo ndraʼo khö zi samösa anggota Parlemen Eropa. No hauga kali uʼandrö enaʼö tola fahuhuodo khönia, ba awena sakali daʼa omasi ia. Imane khögu, ”Ubeʼe khöu ginötö fahuhuo lima menit, tebai töra.” Iʼanemaiʼö ufaköu ndraʼo ba ulau mangandrö. Moʼugu dödönia ba imane khögu, ”Hadia nifaluamö?” Ufazawa högögu ba umane khönia, ”Uʼandrö saohagölö khö Lowalangi börö me yaʼugö andre Pa samösa enoninia.” Manofu ia, ”Hadia geluaha wehedemö?” Uforomaʼö khönia nisura ba Roma 13:4. Börö me yaʼia andre samösa Protestan ba iʼameʼegö tödö sibai Zura Niʼamoniʼö, andrö wa adöni dödönia ba ayati daʼö. Buania, tola fahuo-huo ndraʼaga matonga za waʼara, ba mangele manö wahuhuosama lö taha-taha. Ifaduhuʼö wa iʼameʼegö tödö sibai halöwö nifalua ndra Samaduhuʼö Yehowa.

Ba zi hauga fakhe, oya sibai gamadöniwa ba huku niʼohe nono mbanua Yehowa si so ba Eropa föna zanguhuku, duma-dumania börö me lö fao ira fasuwö, fondrorogö iraono, pajak, ba tanö böʼönia. Tebeʼe khögu ginötö ba wanolo yaʼira hegöi ba wangila samösa hewisa danga Yehowa ba wanolo yaʼo irege möna ita föna ndra sanguhuku. No möna ndra Samaduhuʼö Yehowa ba zi töra 140 gamadöniwa niʼohe föna Mahkamah Eropa untuk Hak Asasi Manusia!

Sagötö ndröfi 1990-an, falulu fohalöwö ndraʼo khö dalifusöda Philip Brumley moroi ba gödo sebua hegöi talifusöda Valter Farneti moroi ba Italia, ba wanolo ira talifusöda ba Kuba enaʼö lö taha-tahara ba wamosumange Yehowa, börö me lö latehegö halöwö ba wamati nifaluada ba soi daʼö. Ufaʼoheʼö zura ba kedutaan Kuba si so ba Belgia, ba falukhado khö zi samösa sohalöwö ba daʼö. Hizaʼi, sagötö wahuhuosama ba zi hauga kali, lö maʼila maʼasiwai hadia mbörö wa lö latehegö ira samatörö na tafalua halöwö wamati ba soi daʼö.

Me no aefa maʼandrö wanuturu lala moroi khö Yehowa, masofu khöra hadia tola mafaʼoheʼö 5.000 ngawua Zura Niʼamoniʼö ba Kuba. Latehegö khöma, ba mufazaewe misa daʼö khö ndra talifusöda. Salua andre zamaduhuʼö ba dödöma wa ifahowuʼö Yehowa wamorege nifaluama. Aefa daʼö, ifuli zui maʼandrö khöra enaʼö latehegö khöma ba wamaʼoheʼö 27.500 ngawua Zura Niʼamoniʼö ba soi daʼö. Ifuli zui latehegö khöma. Omuso sibai dödögu börö me tola utolo ndra talifusöda ba Kuba enaʼö laʼokhögö Zura Niʼamoniʼö.

No hauga kali möido ba Kuba ba wanolo ira talifusöda enaʼö tola tafalua halöwö ba wamati ba soi daʼö. Sagötö wamaluagu daʼö, uforege enaʼö sökhi gamakhaitagu khö ndra samatörö si so ba daʼö.

Me 1994 töra 1.000.000 niha nibunu börö me alua genosida ba wolawa soi Tutsi ba Rwanda. Ba gotaluara, so ndra talifusöda si mate. Lö ara aefa daʼö, so sambua ngawawa ndra talifusöda nifatenge ba wanolo ira talifusöda ba daʼö.

Me marugi Kigali, ibu kota Rwanda, maʼila dowa gödo wamoʼeluaha hegöi depot lektur si no agatöla ba nono wana. Marongo wa ato ndra talifusöda si mate ba mbawa ziʼöli. Hizaʼi, marongo göi hewisa waʼomasi niforomaʼö ndra talifusö si so ba daʼö. Duma-dumania, falukhaga khö zi samösa talifusöda moroi ba soi Tutsi saminiʼö yaʼia sagötö zi 28 hari ba nahia si so barö nomo. Lazago nahia daʼö ira talifusöda si sambua omo moroi ba soi Hutu. Me mafalua gangowuloa ba Kigali, maforege ba wamarou hegöi ba wondrara tödö ndra talifusöda si töra 900 niha si so ba daʼö.

Aefa daʼö, matörö nola mbanua numalö ba Zaire (iadaʼa mufotöi ia Republik Demokratik Kongo) ba wangalui ira Samaduhuʼö Yehowa moroi ba Rwanda soloi ba nahia niha si fatewu ba Goma. Lö masöndra ira, börö daʼö malau mangandrö enaʼö ibeʼe khöma wanuturu lala Yehowa. Me maʼila samösa niha sangondrasi yaʼaga, masofu khönia hadia so niʼilania ira Samaduhuʼö Yehowa ba daʼa. Imane, ”Yaʼodo samösa Samaduhuʼö Yehowa. Aine, akha uʼohe ami khö dalifusöda panitia penanggulangan bencana.” Me no aefa mafalua rafe khö panitia penanggulangan bencana, mafalukhaisi zi 1.600 niha si fatewu ba wameʼe khöra famarou dödö hegöi fondrara dödö moroi ba Zura Niʼamoniʼö. Mabaso göi khöra zura nifaʼoheʼö ndra Boto Solohe. Terara sibai dödö ndra talifusöda me larongo wehede daʼa, ”Lö tebulö mangandrö ndraʼaga salahimi. Faduhu dödöma wa lö iröi ami Yehowa.” Sindruhu-ndruhu no alua wehede nifaʼema ndra Boto Solohe andrö. Iadaʼa töra 30.000 ndra Samaduhuʼö Yehowa ba Rwanda, sangai halöwö khönia si faʼo faʼomuso dödö!

Me no aefa mangowalu ndraʼaga ba zi 58 fakhe, mate woʼomo niʼomasiʼögu, Elly, me döfi 2011. Ututunö khö Yehowa hewisa waʼafatö dödö nirasoigu, ba ibeʼe khögu wondrara dödö. Usöndra göi wondrara dödö me uturiaigö duria somuso dödö ba zi faola omo khögu.

Iadaʼa, no töra 90 fakhe ndröfigu, ba lö tebulö ulau manuriaigö ero migu. Omuso sibai dödögu me tola utolo Departemen Hukum ba gödo ndraha Belgia, tola ututunö ba niha böʼö zi no irai alua khögu, ba tola ubeʼe wamarou dödö ba nösi nomo Mbetieli sagawuyu-wuyu.

Te me 84 fakhe silalö, ba daʼö zi oföna sibai mangandrödo khö Yehowa. Daʼö mböröta wahuwusagu khö Yehowa si lö tebulö aro ero maʼökhö. Uʼandrö sibai saohagölö börö me sandrohu faʼaurigu, lö tebulö ibeʼe wanema li Yehowa ba wangandrögu.—Si. 66:19. b