Fanofu Zombaso
Hadia ngawua wehede ”yaʼugö . . . zondrorogö yaʼira”, si tesura ba Zinunö 12:7, manandrösa ia ba ’niha nifakao’ (ayati 5) mazui ba ’wehede Yehowa’ (ayati 6)?
Fehede nisura ba zura zinunö andre manandrösa ia ba niha.
Ba Zinunö 12:1-4, ba daʼö tabaso wa ”no taya fefu niha si tola mufaduhusi tödö ba gulidanö”. Iadaʼa nehegö ngawua wehede ba Zinunö 12:5-7:
”Imane Yehowa, ’Börö me lafakao niha si göna abula dödö,
Börö wangarö-ngarö niha si numana,
Hasambalö ufazawa ndraʼo.
Uʼefaʼö ira ba danga niha samakao yaʼira.’
Fehede Yehowa andrö ohau-hau,
Hulö wirö nitunu ba galitö nifedadao bowoa tanö, mewitu kali mukhozi.
Yaʼugö Yehowa zondrorogö yaʼira;
Ölumöʼö ira zamösana moroi ba ngaʼötö si lö sökhi andre irugi zi lö aetu.”
Ba ayati 5 iwaʼö wa hasambalö iʼefaʼö Lowalangi niha nifakao.
Aefa daʼö iwaʼö ba ayati 6 wa ”fehede Yehowa andrö ohau-hau, hulö wirö nitunu ba galitö”. Tatu manö fefu ndra niha Keriso fao dödöra ba wehede daʼa.—Si. 18:30; 119:140.
Iadaʼa nehegö ayati aefa daʼö, Sinunö 12:7, ”Yaʼugö Yehowa zondrorogö yaʼira; ölumöʼö ira zamösana moroi ba ngaʼötö si lö sökhi andre irugi zi lö aetu.” Hezo taʼila wa nirorogö mazui nilumöʼö yaʼia daʼö ’niha nifakao’ tenga ”fehede Yehowa”?
So ösa zangumaʼö wa nirorogö andrö ”fehede Yehowa” börö me awena itötöi sanandrösa ba daʼö ba ayati 6. Sindruhu no irorogö ba ilumöʼö Daromalinia Yehowa hewaʼae na ato zanaisi ba sedöna mangohori Taromalinia.—Yes. 40:8; 1 Fe. 1:25.
Hewaʼae simanö, simane niwaʼö ba ayati 5 lö iböhöli Yehowa wanolo hegöi ba wolumöʼö ’niha nifakao’ ba ”si göna abula dödö”.—Yob. 36:15; Si. 6:4; 31:1, 2; 54:7; 145:20.
Na simanö, hadia zindruhunia nilumöʼö Yehowa, ’niha nifakao’ mazui ’fehedenia’ simane nisura ba ayati 7?
Na tahaogö tanehegö fefu wehede nisura ba Zinunö 12, aboto ba dödöda wa nilumöʼö yaʼia daʼö ’niha nifakao’.
Ba ayati 1 hegöi 2 itutunö wa ato niha si no faröi ba falimo irege tefakao nono mbanua Yehowa. Ba ayati 3 iwaʼö wa so nifalua Yehowa ba niha si lö manaha lelania ba zi lö atulö. Aefa daʼö, iwaʼö ba zinunö andre wa no ohau-hau wehede Yehowa irege faduhu dödöda wa so nifalua Yehowa ba wolumöʼö ono mbanuania.
Börö daʼö tola tawaʼö nirorogö hegöi nilumöʼö Yehowa simane nisura ba ayati 7 yaʼia daʼö niha nifakao. Börö daʼö ngawua wehede ”yaʼira” tefaudu ba ayati daʼö.
Teks Masoret (Buku Niʼamoniʼö Heberaiʼo nisali si tola mufaduhusi tödö) iʼogunaʼö göi ngawua wehede ”yaʼira”. Baero daʼö Septuaginta (famoʼeluaha siföföna Buku Niʼamoniʼö Heberaiʼo ba li Yunani) dua kali iʼogunaʼö ngawua wehede ”yaʼita” ba ayati 7, fehede daʼö manandrösa ia khö ndra niha si lö faröi nifakao-kao. Baero daʼö, ngawua wehede ”ira zamösana” ba ayati 7 yaʼia daʼö telumöʼö niha si lö faröi moroi ba ”ngaʼötö si lö sökhi” hegöi moroi ba waʼalösökhi niha gulidanö. (Si. 12:7, 8) Ba wamoʼeluaha ba li Targum Aramo (famoʼeluaha Mbuku Niʼamoniʼö Heberaiʼo ba li Garamo), imane ba ayati 7: ”Yaʼugö SOʼAYA zolumöʼö niha satulö, yaʼugö zondrorogö yaʼira moroi ba ngaʼötö si lö sökhi irugi zi lö aetu. Mangörö-ngörö niha si lö sökhi, simane lita sanisiö do niha.” Famoʼeluaha daʼa zamaduhuʼö wa fehede nisura ba Zinunö 12:7 manandrösa ia ba niha tenga ba wehede Lowalangi.
Börö daʼö, fehede daʼa zameʼe fanötöna ba ’niha si lö faröi’ wa iʼefaʼö ira Lowalangi.
