1. Hana wa tohude sibai ngaluo Wanörö Tödö ero röfi? (Luka 22:​19, 20)

 TOHUDE sibai ba wamaigi ndra Samaduhuʼö Yehowa ngaluo Wanörö Tödö faʼamate Yesu nifalua ero röfi. Ha daʼa ngaluo niwaʼö Yesu enaʼö latörö tödö ira nifahaʼönia. (Baso Luka 22:​19, 20.) Datatutunö hadia mbörö wa tohude sibai ngaluo Wanörö Tödö andrö.

2. Hadia mbörö wa tohude sibai ba wamaigida ngaluo Wanörö Tödö?

² Ngaluo Wanörö Tödö andre zanolo yaʼita ba woʼangerönusi hawaʼamoguna höli ba hadia howu-howu niʼasogönia. Daʼö göi zamasugi ba dödöda hewisa wangoromaʼöda fangandrö saohagölö ba höli nibeʼe Yesu. (2 Ko. 5:​14, 15) Ba daʼö, tola ”tafarou dödö” ndra talifusöda. (Rom. 1:12) Ero röfi, ato ndra talifusöda si no mamöhöli halöwö ba wamati, möi ira ba gangowuloa nifalua ba mbongi Wanörö Tödö. So ösa zangawuli khö Yehowa, börö me latemaʼö ira soroi ba dödö. Ato zangondrasi somasi mamahaʼö yaʼira ba Zura Niʼamoniʼö, börö me adöni dödöra ba zi no laʼila mazui si no larongo. Daʼö mbörö wa tohude sibai ba dödöda ngaluo Wanörö Tödö andre!

3. Hewisa ngaluo Wanörö Tödö möi fangosambuaʼöda khö ndra talifusöda ba zi sagörö ulidanö? (Faigi göi gambara.)

³ Tabalo-baloi ngaluo Wanörö Tödö börö me taʼila wa ba ngaluo daʼö teʼosambuaʼö ita khö ndra talifusöda ba zi sagörö  ulidanö. Owulo fefu ndra Samaduhuʼö Yehowa ba mbanuara me no aekhu luo ba wamalua angowuloa si tohude. Tafondrondrongo huhuo sanutunö hadia mbörö wa tohude sibai höli nibeʼe Yesu. Dua kali manunö ita ba wanuno Lowalangi, tafaʼema roti hegöi agu, ba öfa kali tawaʼö ”yaduhu” soroi ba dödöda ba wangandrö nifaʼema. Sagötö zi 24 za, fefu mbanua niha Keriso ba zi sagörö ulidanö lafalua zimane daʼö. Hadia tola ökhalaigö hawaʼomuso dödö Yehowa hegöi Yesu me laʼila teʼosambuaʼö ita ba wangoromaʼö fangandrö saohagölö ba ngaluo daʼö?

4. Hadia nitutunöda ba artikel daʼa?

⁴ Ba artikel daʼa, tatutunö dania wanofu-nofu andre: Hewisa wamaʼanöda tödöda ba ngaluo Wanörö Tödö? Hewisa lalada wanolo niha böʼö enaʼö so mbuania khöra? Ba hewisa wanoloda niha si no ara mamöhöli halöwö ba wamati? Fanema li moroi ba wanofu-nofu andrö möi fanoloda enaʼö tefaʼanö ita ba wangondrasi ngaluo si tohude andre.

HEWISA WAMAʼANÖDA TÖDÖDA BA NGALUO WANÖRÖ TÖDÖ?

5. (a) Hana wa moguna taʼangerönusi hawaʼebua mböli höli? (Sinunö 49:​7, 8) (b) Hadia wamahaʼö si tola öhalö moroi ba video Hana Wa Itörö Waʼamate Yesu?

⁵ Sambua lala si tohude ba wamaʼanöda tödöda ba ngaluo wanörö tödö yaʼia daʼö na taʼangerönusi hawaʼebua mböli höli nibeʼe Yesu Keriso. Na taʼodaligö waʼabölöda samösa, tebai tahöli ita moroi ba horö hegöi faʼamate. (Baso Zinunö 49:​7, 8; faigi göi video Hana Wa Itörö Waʼamate Yesu?) a Börö daʼö, itehegö Nono niʼomasiʼönia Yehowa ba wameʼe nosonia ba wangöhöli yaʼita. Daʼö mbuala fondrege zebua nibeʼe Yehowa hegöi Yesu. (Rom. 6:23) Na lö tebulö taʼangerönusi daʼö, tatu itugu tedou wangandröda saohagölö ba höli si no labeʼe. Tatutunö dania hadia manö mbuania höli nibeʼe Yehowa hegöi Yesu. Si oföna ua, datatutunö hadia nifotöi höli andrö?

6. Hadia nifotöi höli andrö, ba hana wa Yesu zinangea tobali höli ba niha gulidanö?

⁶ Höli andrö eluahania faʼebua mböli ba wosanu mangawuli. Moʼahonoa wamazökhi Yehowa niha siföföna sotöi Adamo. Me ifalua zala Adamo, no itayaigö waʼauri si lö aetu khönia samösa hegöi ba ngaʼötönia. Enaʼö tefangawuli fefu zi no itayaigö Adamo, daʼö mbörö wa itehegö waʼaurinia soʼahonoa Yesu tobali höli. Sagötö faʼauri Yesu ba gulidanö, ”lö nifaluania horö ba lö irai falimo ia”. (1 Fe. 2:22) Me mate Yesu, ibeʼe mbotonia soʼahonoa tobali sumange, fagölö simane faʼauri nitayaigö Gadamo.—1 Ko. 15:45; 1 Ti. 2:6.

7. Hadia manö wanandraigö salua khö Yesu me so ia ba gulidanö?

⁷ Sagötö feʼaso Yesu ba gulidanö, lö tebulö moloʼö ia khö Yehowa ba ngawalö hadia ia hewaʼae na itaria abua khönia wamalua daʼö. Me iraono Yesu, moʼahonoa ia. Hizaʼi, lö tebulö iʼoʼö li ndra satuania hewaʼae na lö moʼahonoa ira. (Luk. 2:51) Me no ebua-bua ia, iforege wolawa fondrönisi dödö moroi ba niha böʼö somasi enaʼö ilawa zatuania mazui enaʼö faröi ia khö Yehowa. Ba me no satua ia, moguna itimbagö wanandraigö moroi khö Gafökha Satana sondrönisi tödönia ba wamalua horö hegöi ba wondröi Lowalangi. (Mat. 4:​1-11) Iforege Satana enaʼö ifalua horö Yesu irege tebai ibuʼa höli.

8. Hadia nasa wanandraigö nitaögö Yesu?

⁸ Sagötö ifalua halöwö fanuriaigö ba gulidanö, so wanandraigö tanö böʼö nitaögö Yesu. Lafakao ia si faʼudu khönia ba latandraigö ba wamunu yaʼia. (Luk. 4:​28, 29; 13:31) Iforege göi wanaögö falömoʼahonoa  ndra nifahaʼönia. (Mrk. 9:​33, 34) Me laʼetuʼö hukumania, lafakao ba laʼoʼaya ia. Aefa daʼö, labunu ia simane na labunu niha si lö sökhi ba sindruhu-ndruhu laʼalaisi ia. (Heb. 12:​1-3) Ba döla geu famakao, iforege enaʼö anau gölönia ba wanaögö faʼafökhö sabölö-bölö ba lö ilumöʼö ia Yehowa. b—Mat. 27:46.

9. Hewisa dödöda ba höli si no ibeʼe Yesu? (1 Fetero 1:8)

⁹ Aboto ba dödöda wa sindruhu-ndruhu oya zinangea itehegö Yesu ba wameʼe höli. Ba ginötö taʼangerönusi höli nibeʼenia khöda, tatu itugu taʼomasiʼö ia.—Baso 1 Fetero 1:8.

10. Hadia nitehegö Yehowa ba wangehenaigö höli?

¹⁰ Hewisa göi Yehowa? Hadia nitehegö Yehowa enaʼö tola ihöli ita Yesu? Yehowa hegöi Yesu no laʼokhögö wahuwusa saro simane si samösa ama khö nononia. (Amd. 8:30) Khalaigö hewisa dödö Yehowa me iʼila oya sibai wamakao nitaögö Yesu me so ia ba gulidanö. Faduhu dödöda wa afökhö sibai dödö Yehowa me lafakao, laʼoʼaya ba lafalua zi lö atulö khö Nononia.

11. Beʼe duma-duma hewisa dödö Yehowa me labunu Nononia.

¹¹ Fefu zatua hasambalö larasoi waʼabu dödö sabölö-bölö na mate nonora. Hewaʼae mamati ita wa so wanusugi, hizaʼi hasambalö abu sibai dödöda na mate niha niʼomasiʼöda. Daʼa duma-duma sanolo yaʼita enaʼö tola takhalaigö hawaʼafökhö dödö Yehowa me iʼila tefakao Nono niʼomasiʼönia ba mate me 14 Nisana döfi 33 M. c—Mat. 3:17.

12. Hadia nifaluada ba migu fatua lö tafalua Wanörö Tödö?

¹² Iʼotarai iadaʼa ofeta dania ba ginötö wamalua Fanörö Tödö, tandraigö falua wamahaʼö samösa mazui famahaʼö ba zi sambua omo sanandrösa ba höli. Ogunaʼö Wanuturu Lala ba Wamalua Riset khö Ndra Samaduhuʼö Yehowa mazui publikasi tanö böʼö sanutunö sanandrösa ba höli. d Tola göi öfalua wombaso Sura Niʼamoniʼö sagötö Fanörö Tödö nifaʼanö ba Waʼauri Niha Keriso ba Fanuriaigö—Waö-Waö Halöwö. Böi olifuʼö göi wamaigi video Ibadah Pagi si tohude ba ngaluo Wanörö Tödö. Na no tafaʼanö dödöda, tola tatolo niha böʼö enaʼö so mbuania khöra.—Esr. 7:10.

 TOLO NIHA BÖʼÖ ENAʼÖ SO MBUANIA KHÖRA

13. Hadia lala si oföna nifaluada ba wanolo niha böʼö enaʼö so mbua nitemara ba ngaluo Wanörö Tödö?

¹³ Hewisa wanoloda niha böʼö enaʼö so mbua nitemara na tafalua Wanörö Tödö? Si oföna tafalua yaʼia daʼö takaoni ira. Takaoni niha nifalukhaisida ba wanuriaigö. Tasura göi döi-töi niha tanö böʼö si tola takaoni, simane si fahuwu khöda, ösi nomoda, awöda wohalöwö, awöda sekola, hegöi niha si faʼila khöda. Hewaʼae na no ahori zura undranga si no mu-cetak, tola tabeʼe khöra link zura undranga elektronik. Ma tohare ira!—Sango. 11:6.

14. Beʼe duma-duma hadia mbörö wa moguna sibai tabeʼe zura undranga ba niha si faʼila khöda.

¹⁴ Ebua sibai lua-luania na tabeʼe zura undranga ba niha faʼila khöda. Samuza inötö, tokea dalifusöda ira alawe me iwaʼö khönia foʼomonia ira matua si tenga Samaduhuʼö wa omasi ia möi ba ngaluo Wanörö Tödö. Hadia mbörö wa tokea ia? Ba zilalö, no hauga kali iwaʼö khö woʼomonia enaʼö möi ira ba ngaluo Wanörö Tödö, hizaʼi lö irai omasi ia. Hadia mbörö wa tebulö dödönia ba zi sakali daʼa? No itema foʼomonia zura undranga moroi khö zatua sokubaloi si faʼila khönia. Möi woʼomonia andrö ba wangondrasi ero na mufalua Wanörö Tödö iʼotarai ba ndröfi daʼö.

15. Hadia zi tebai taʼolifugö na takaoni niha ba ngaluo Wanörö Tödö?

¹⁵ Tola manö so wanofu-nofu niha nikaonida sanandrösa ba wamalua Fanörö Tödö andrö, mendrua manö na lö irai möi ira ba gangowuloada. Börö daʼö, moguna taʼangeragö hadia manö zi tola tobali fanofu-nofura, ba hadia wanema li nibeʼeda. (Kol. 4:6) Duma-dumania, te so zanofu: Hadia dania nifalua ba ngaluo daʼö? Hauga za mufalua daʼö? Hadia no mutatugöi mbaru sinangea mufake? Hadia laʼandrö gefe weʼamöi ba daʼö? Hadia so gameʼela? Na so niha nikaonida, tola tasofu khönia hadia so wanofunia, ba beʼe khönia wanema li. Tola göi tafuta khönia video Fanörö Tödö Faʼamate Yesu hegöi video Hadia Manö Nifalua ba Nahia Gorahua Mbanua Lowalangi?  ba wanolo yaʼia enaʼö aboto ba dödönia hewisa na tafalua gangowuloa. Ba wamahaʼö 28 ba mbuku Lala ba Wanöndra Faʼohahau Dödö Sagötö Faʼara! so ba daʼö duho si tola tafatunö khöra.

16. Hadia nasa zi tola manö lasofu yaʼira sawena möi ba ngaluo Wanörö Tödö?

¹⁶ Me no aefa laʼondrasi ngaluo daʼö, niha sadöni tödö tola manö manofu-nofu ira nasa. Te lasofu hana wa lö hadöi si manga roti ba samadu agu mazui hewaʼae na so ba hana wa lö atoto zamalua daʼö? Te manofu göi ira hawaʼasese tafalua Wanörö Tödö. Ba te omasi ira laʼila göi hadia fefu gangowuloa ndra Samaduhuʼö Yehowa mufalua ia simane me mufalua Wanörö Tödö. Hewaʼae no muhaogö mututunö daʼö ösa ba huhuo Wanörö Tödö, hizaʼi te so zawena mangondrasi omasi ira na mufuli mututunö khöra. Ba wanolo yaʼira, tola taforomaʼö khöra artikel ba jw.org tuhonia, ”Ba Wamalua Bongi Watomesa Zoʼaya, Hana Wa Faböʼö Nifalua Ndra Samaduhuʼö Yehowa moroi ba Agama Tanö Böʼö?” Tatu taforege wanolo niha fatua lö mubörögö Wanörö Tödö, sagötö mufalua mazui na no awai. Na tafalua daʼö, no tatolo niha ”si sökhi amuata” ba wanöndra bua me no laʼondrasi Wanörö Tödö.—Hal. 13:48.

TOLO ZI NO MAMÖHÖLI HALÖWÖ BA WAMATI

17. Hadia nifalua ndra satua sokubaloi ba wanolo niha si no mamöhöli halöwö ba wamati? (Hezekieli 34:​12, 16)

¹⁷ Sagötö mbaŵa Wanörö Tödö, hadia nifalua ndra satua sokubaloi ba wanolo ira talifusö si no mamöhöli halöwö ba wamati? Ameʼegö tödö ira si fao faʼomasi. (Baso Hezekieli 34:​12, 16.) Fatua lö mufalua Wanörö Tödö, tatugöi enaʼö ato nitelefomö niha si no mamöhöli halöwö ba wamati. Faduhuʼö khöra wa öʼameʼegö tödö ira ba omasiʼö ötolo ira. Kaoni ira ba wangondrasi Fanörö Tödö. Na tohare ira, temaʼö ira soroi ba dödö. Na no aefa Wanörö Tödö, böi böhöli wamalukhaisi yaʼira mangawuli mazui ötelefo ira, ba beʼe wanolo ba wamati enaʼö tefarou dödöra wangawuli khö Yehowa.—1 Fe. 2:25.

18. Hewisa ita fefu ba wanolo ira talifusö si no mamöhöli halöwö ba wamati? (Roma 12:10)

 ¹⁸ Fefu ita ba mbanua niha Keriso, moʼömö ita ba wanolo ira talifusö si no mamöhöli halöwö ba wamati sangondrasi ngaluo Wanörö Tödö. Hewisa wamaluada daʼö? Yaʼia na taforomaʼö waʼomasi, faʼasökhi dödö hegöi famosumange. (Baso Roma 12:10.) Böi olifu ita wa tola manö abua khö ndra talifusö niʼomasiʼöda andre ba wangondrasi angowuloa. Te ataʼu ira ma dania lö latemaʼö ira. e Börö daʼö, böi beʼe wanofu sangailasi yaʼira mazui öfaʼema wehede safökhö ba dödöra. (1 Te. 5:11) Yaʼira andrö talifusöda si sara lala wamati. Tatu omuso dödöda na ifuli fao ita ba wamosumange Lowalangi!—Si. 119:176; Hal. 20:35.

19. Hadia mbuania khöda na tatörö tödö waʼamate Yesu?

¹⁹ Taʼandrö saohagölö me no iʼandrö khöda Yesu enaʼö tatörö tödö waʼamatenia ero röfi ba aboto göi ba dödöda hana wa tohude sibai daʼö. Na taʼondrasi Wanörö Tödö, oya mbua nitemada hegöi niha böʼö. (Yes. 48:​17, 18) Itugu tedou waʼomasida khö Yehowa hegöi Yesu. Tola taforomaʼö hawaʼebua wangandröda saohagölö ba zi no lafalua khöda. Itugu aro wahuwusada khö ndra talifusö si sara lala wamati ba tola tatolo niha böʼö enaʼö lafahaʼö ira lala enaʼö latema mbua moroi ba höli nibeʼe Yesu. Börö daʼö, dataforege wamalua si tola tafalua enaʼö tefaʼanö ita wangondrasi Fanörö Tödö, ngaluo si tohude ba ndröfi andre!