1. Hana wa itaria tarasoi waʼataʼu?

 FEFU ita no irai tarasoi waʼataʼu. Tatu manö, börö me no tafahaʼö ita ba Zura Niʼamoniʼö, lö khöda faʼataʼu ba niha si no mate, khö ndra malaʼika si lö sökhi, mazui salua ba zi so miföna. Hizaʼi, no so ita ba mbaŵa sabua fanaögö, andrö wa tola manö taʼila ngawalö zalua si möi fametaʼuda, simane fasuwöta, faʼalösökhi hegöi fökhö sabölö-bölö. (Luk. 21:11) Baero daʼö, te ataʼu ita ba niha, duma-dumania khö ndra samatörö samakao yaʼita mazui ösi nomoda sanaisi yaʼita ba wamalua famosumange satulö. So ösa zaombö tödö alai dania na lö anau gölöra ba wanaögö abula dödö salua khöra iadaʼa mazui salua khöra ba zi so miföna.

2. Tutunö hadia zalua khö Dawido sagötö so ia ba mbanua Gata.

² No irai ataʼu Dawido. Samuza maʼökhö, me edöna Razo Saulo ba wamunu yaʼia, moloi Dawido ba Gata, banua niha Wilisiti. Ba gafuriata, iʼila razo Gata sotöi Akhisi wa Dawido andrö saradadu sabölö, samunu ”ngafulu ribu” niha Wilisiti. Börö daʼö, ”ataʼu sibai” Dawido. Ataʼu ia ba nifalua Gakhisi khönia. (1 Sa. 21:​10-12) Hadia zanolo Dawido ba wolawa faʼataʼunia?

3. Moloʼö Sinunö 56:​1-3, 11, hewisa Dawido ba wolawa faʼataʼunia?

³ Itutunö Dawido ba Zinunö 56 hadia nirasoinia sagötö so ia ba mbanua Gata. Itutunö hadia mbörö wa ataʼu ia, ba hadia zanolo yaʼia enaʼö ifuli barani. Ifaduhusi tödö Yehowa ba ginötö  irasoi waʼataʼu, ba so dane-dane waʼafaduhu dödönia andrö. (Baso Zinunö 56:​1-3, 11.) Börö wanolo moroi khö Yehowa, ihalö gangetula Dawido ba wamalua si lö toʼölö lafalua niha yaʼia daʼö iʼosowöhö ia! Mofozu daʼö. Ifofanö Dawido andrö Akhisi, moroi na ibunu. Börö daʼö, tola ilau moloi Dawido.—1 Sa. 21:13–22:1.

4. Hewisa lala enaʼö aro waʼafaduhu dödöda khö Yehowa? Beʼe duma-duma.

⁴ Na tafaduhusi tödö Yehowa, tola talawa waʼataʼu. Hizaʼi, hewisa enaʼö itugu aro waʼafaduhu dödöda khö Yehowa, töra-töra ba ginötö tarasoi waʼataʼu? Nehegö duma-duma andre. Ba ginötö öʼila wa göna ndraʼugö fökhö sabölö-bölö, tatu ba wamobörö örasoi waʼataʼu. Hizaʼi, tola alö waʼataʼumö börö me faduhu dödöu khö doto sameʼe dalu-dalu. Te no ato zi no itolo sanaögö fökhö simane nitaögömö. Ifondrondrongo ba ginötö ötutunö hadia nirasoimö ba örasoi wa iʼameʼegö tödö göi ndraʼugö. Te ifatunö khömö lala wamadöhö fökhö si no mofozu nifaluania ba niha böʼö. Simane daʼö göi, tola taʼaroʼö waʼafaduhu dödöda khö Yehowa na tanehegö hadia zi no ifalua, hadia nifaluania iadaʼa, ba hadia nifaluania khöda ba zi so miföna. Daʼö nifalua Dawido. Sagötö tanehegö dania ngawua wehede niʼehehaini nisura ba Zinunö 56, angeragö hewisa wangaʼaroʼömö faʼafaduhu dödömö khö Yehowa ba ölawa waʼataʼu nirasoimö.

HADIA ZI NO IFALUA YEHOWA?

5. Hadia niʼangerönusi Dawido ba wolawa faʼataʼu nirasoinia? (Sinunö 56:​12, 13)

⁵ Hewaʼae alua gabula dödö si möi famaʼala waʼauri Dawido, lö tebulö iʼosambuaʼö dödönia ba ngawalö zi sökhi si no ifalua Yehowa ba zilalö. (Baso Zinunö 56:​12, 13.) Asese ifalua daʼö Dawido sagötö faʼaurinia. Duma-dumania, itaria inehegö niwöwöi Yehowa. Daʼa zanolo yaʼia ba woʼangeragö faʼabölö Yehowa hegöi faʼomasinia sebua sibai ba niha gulidanö. (Si. 65:​6-9) Iʼangerönusi göi hadia zi no ifalua Yehowa ba niha böʼö. (Si. 31:19; 37:​25, 26) Sabölö tohude, iʼangerönusi hadia zi no ifalua Yehowa ba waʼaurinia samösa. No itolo ba ilumöʼö ia Yehowa iʼotarai me ono sawuyu ia. (Si. 22:​9, 10) Fefu daʼö möi fanolonia ba wangaʼaroʼö faʼafaduhu dödönia khö Yehowa!

6. Na so khöda waʼataʼu, hadia zanolo yaʼita ba wamaduhusi tödö Yehowa?

 ⁶ Ba ginötö örasoi waʼataʼu, sofu khöu samösa, ’Hadia zi no ifalua khögu Yehowa?’ Tandraigö angerönusi niwöwöinia. Duma-dumania, ”haogö wamaigi” hewisa woʼameʼegö tödö Yehowa wofo ba dalu mbanua hegöi ngawalö mbunga, hewaʼae tenga si fakhili-khili khönia daʼö ba tebai lafosumange ia. Tatu abölö iʼameʼegö tödö ita Yehowa! Na taʼangerönusi fefu daʼö, itugu aro waʼafaduhu dödöda khönia. (Mat. 6:​25-32) Angeragö göi hadia zi no ifalua Yehowa ba niha samosumange yaʼia. Tola öfahaʼö ndraʼugö ba duma-duma niha si so ba Zura Niʼamoniʼö sangoromaʼö famati saro, mazui öbaso duma-duma salua khö ndra Samaduhuʼö Yehowa iadaʼa. a Baero daʼö, angerönusi hadia zi no ifalua Yehowa ba wondrorogö yaʼugö. Duma-dumania: Hewisa wanolonia yaʼugö enaʼö aboto ba dödöu zindruhu? (Yoh. 6:44) Hewisa wameʼenia fanema li ba wangandrömö? (1 Yo. 5:14) Hadia manö mbua nitemamö ero maʼökhö börö höli nibeʼe Nono niʼomasiʼönia?—Ef. 1:7; Heb. 4:​14-16.

7. Hewisa zalua khö Danieli samaʼeleʼö tobali fanolo khö Vanessa ba wolawa faʼataʼu?

⁷ Samösa dalifusöda ira alawe sotöi Vanessa b moroi ba Haiti, alua khönia gabula dödö si möi fametaʼunia. So samösa ndra matua ba mbanua daʼö sasese manelefo ba so-SMS yaʼia ero maʼökhö. Ifaso ia ira matua andrö ba wamalua faʼorudu. Ifatunö khönia Vanessa wa lö omasi ia wamalua daʼö. Hizaʼi, itugu amuʼi ndra matua daʼö ba ifetaʼu Vanessa. Imane Vanessa, ”Ataʼudo sibai.” Hadia nifaluania ba wolawa faʼataʼu? Iforege wangalui lala enaʼö telumöʼö waʼaurinia. So samösa zatua sokubaloi sanolo yaʼia ba wamatunö salua andrö khö ndra folisi. Iʼangerönusi göi hadia nifalua Yehowa ba wolumöʼö ono mbanuania ba götö föna. Imane Vanessa, ”Si oföna itörö tödögu yaʼia daʼö Danieli samaʼeleʼö. Latiboʼö ia ba dögi zingo solofo, hewaʼae lö fasala ia. Hizaʼi, ilumöʼö ia Yehowa, iduhö mbawa zingo. Börö daʼö, uʼandrö khö Yehowa enaʼö ibulöʼö dödö ndra matua daʼö irege olifu ia ndraʼo, ba enaʼö itolo ndraʼo Yehowa ba wangasiwai abula dödö andre. Me no aefa daʼö, lö saʼae khögu faʼataʼu.”—Dan. 6:​12-22.

HADIA NIFALUA YEHOWA IADAʼA?

8. Hadia zi faduhu dödö Dawido? (Sinunö 56:8)

⁸ Hewaʼae arakhagö teʼala waʼauri Dawido me so ia ba Gata, lö iʼosambuaʼö dödönia ba zi möi fametaʼunia. Ifili ba woʼangerönusi hadia nifalua Yehowa khönia ba ginötö daʼö. Faduhu göi dödö Dawido wa hasambalö ibeʼe khönia wanuturu lala Yehowa, ilumöʼö ba aboto ba dödönia nirasoi Dawido. (Baso Zinunö 56:8.) So göi zi fahuwu niʼokhögö Dawido, simane Yonata hegöi Ere Sebua Ahimelekhi, si lö faröi ba wotuhini hegöi ba wanolo yaʼia. (1 Sa. 20:​41, 42; 21:​6, 8, 9) Hewaʼae omasi Razo Saulo ba wamunu yaʼia, hizaʼi teʼefaʼö waʼauri Dawido. Faduhu dödönia wa iʼila Yehowa hadia zalua khönia hegöi nirasoinia.

9. Hadia zaboto ba dödö Yehowa sanandrösa khöda ero zamösana?

⁹ Na göna ndraʼugö abula dödö si möi fametaʼumö, törö tödöu wa iʼila zalua khömö andrö Yehowa ba aboto ba dödönia hadia nirasoimö. Duma-dumania, iʼila Yehowa walöʼatulö nifalua ba ndraono Gizaraʼeli me so ira ba Miserai, ba irasoi ”wamakao si göna khöra”. (2 Mo. 3:7) Ba zinunönia, ifaduhuʼö Dawido wa iʼila Yehowa ”wamakao” ba ’faʼatosasa dödönia’. (Si. 31:7) Iwaʼö Sura Niʼamoniʼö wa ’tosasa’ Lowalangi na iʼila tosasa nono mbanuania, hewaʼae na alua daʼö börö gangetula si fasala  nihalöra. (Yes. 63:9) Ba ginötö örasoi waʼataʼu, aboto ba dödö Yehowa hadia nirasoimö ba omasi ia itolo ndraʼugö ba wolawa faʼataʼu andrö.

10. Hana wa faduhu dödöu wa iʼameʼegö tödö ndraʼugö Yehowa ba itoloʼö wanaögö ngawalö gabula dödö?

¹⁰ Na alua gabula dödö si möi fametaʼumö, te öwaʼö tödöu wa lö itolo ndraʼugö Yehowa. Börö daʼö, hadia zinangea öfalua? Andrö khönia enaʼö tola öʼila hewisa wanolonia yaʼugö. (2 Ra. 6:​15-17) Aefa daʼö, angerönusi daʼa: Hadia teʼabölöʼö ndraʼugö ba zi sambua huhuo mazui bua gera-era nifaʼema ba gangowuloa? Hadia so publikasi, video mazui sinunö ba JW Broadcasting^® si möi fondrara dödömö? Hadia so dalifusöda samatunö khömö sambua ayati mazui bua gera-era si möi famarou dödömö? Tola manö olifu ita hawaʼebua waʼomasi ndra talifusöda niforomaʼöra khöda hegöi famarou dödö nitemada moroi ba Daromali Lowalangi si möi fanoloda. Daʼö fefu no buala sebua böli moroi khö Yehowa. (Yes. 65:13; Mrk. 10:​29, 30) Daʼö zangoromaʼö wa sindruhu-ndruhu tola mufaduhusi tödö ia ba iʼameʼegö tödö ndraʼugö.—Yes. 49:​14-16.

11. Hadia zanolo Aida ba wolawa faʼataʼu?

¹¹ Aida, si toröi ba Senegal, inehegö hewisa wameʼe Yehowa khönia fanolo me alua wanandraigö. Börö me ono siaʼa ia, latötöna ira satuania enaʼö iʼalui gefe sebua ba wombönökhi soguna khöra maʼafefu. Hizaʼi, börö me iʼöna-önaiʼö waʼaurinia enaʼö tobali ia perintis, no ide-ide tö gefe nisöndrania. Mofönu nösi nomonia ba latahigö ia. Imane Aida, ”Ataʼudo na tebai utolo ndra satuagu ba lö hadöi niha somasi fahuwu khögu. Utahigö göi Yehowa börö me itehegö alua khögu daʼa.” Aefa daʼö, so sambua huhuo nifaʼema ba gangowuloa. ”Ifatunö samaʼema huhuo andrö wa hasambalö aboto ba dödö Yehowa gofu hadia mbörö wa tarasoi waʼaombö dödö mazui faʼataʼu. Arara manö, ifuli ufaduhusi tödö waʼomasi Yehowa börö mene-mene moroi khö ndra satua sokubaloi hegöi ira talifusöda tanö böʼö. Me mangandrö ndraʼo khö Yehowa, ibörögö faduhu dödögu wa hasambalö itolo ndraʼo, ba urasoi waʼahono dödö börö me uʼila wa ibeʼe wanema li ba wangandrögu.” Lö ara aefa daʼö, isöndra halöwönia Aida  sanolo yaʼia ba wombönökhi soguna khönia tobali perintis, ba tola itolo ba wombönökhi soguna khö ndra satuania. Imane Aida, ”Ufahaʼö ndraʼo ba wamaduhusi tödö Yehowa soroi ba dödö. Iadaʼa, na no aefa ulau mangandrö, sasesenia taya waʼataʼugu.”

HADIA NIFALUA YEHOWA BA ZI SO MIFÖNA?

12. Ba Zinunö 56:​9, hadia zi faduhu dödö Dawido?

¹² Baso Zinunö 56:9. Ayati daʼa zamatunö khöda hadia nasa zanolo Dawido ba wolawa faʼataʼunia hewaʼae ba mbawa deʼala so waʼaurinia: Iʼangerönusi hadia dania nifalua Yehowa khönia ba zi so miföna. Iʼila wa hasambalö iʼefaʼö ia Yehowa ba ginötö si tefaudu. Aefa daʼö, no ifabuʼu Yehowa wa Dawido dania zi tobali razo ba ndraono Gizaraʼeli. (1 Sa. 16:​1, 13) Ba wamaigi Dawido, gofu hadia nifabuʼu Yehowa hasambalö alua daʼö.

13. Hadia zi faduhu dödöda si lö ara tö ifalua Yehowa?

¹³ Hadia nifabuʼu Yehowa khömö? Böi so ba wangera-ngerada wa ilumöʼö ita Yehowa enaʼö lö göna ita ngawalö gabula dödö. c Hizaʼi, törö tödöu wa gofu hadia gabula dödö salua khöu ba gulidanö andre, hasambalö iheta daʼö Yehowa ba gulidanö si bohou dania. (Yes. 25:​7-9) So waʼabölö sebua khö Zomböi yaʼita ba wanusugi niha si no mate, ba wamadöhö fökhöda mazui sokho dödöda hegöi ba wangohori ududa.—1 Yo. 4:4.

14. Hadia manö zi tola taʼangerönusi?

¹⁴ Ba ginötö örasoi waʼataʼu, angerönusi hadia dania nifalua Yehowa ba zi so miföna. Angeragö hadia nirasoimö na no muhori Zatana hegöi niha si lö sökhi, ba hatö niha satulö tödö zauri, hegöi na tezara-zara waʼaheta falömoʼahonoada. So sambua wamadumaisi ba gangowuloa sebua ba zi sambua regional me 2014, sangoromaʼö hewisa woʼangerönusida dötönaföda. So samösa nama sanutunö ba nösi nomonia hewisa na mufaböʼöni ngawua wehede nisura ba 2 Timoteo 3:​1-5, sangoromaʼö hewisa waʼauri ba gulidanö Faradaiso. Imane, ”So dania mbaŵa si sökhi ba gulidanö si bohou. Amuata niha ba daʼö tenga ha tana khöra laʼalui, laʼomasiʼö zindruhu, lö lasuno ira samösa, lö mangosebua, sanuno Lowalangi, samondrondrongo li zatua, sangila mangandrö saohagölö, si lö faröi, sangomasiʼö awöra, sondrorogö fahasara dödö, lö laböbögö khö nawöra zi lö duhu, so wanaha tödö, si sökhi amuata, sangomasiʼö si sökhi, tola mufaduhusi tödö, moloʼö-loʼö, lö fayawa, sangomasiʼö Lowalangi moroi ba gisö-isö dödöra, soloʼö khö Lowalangi soroi ba dödö. Hatöʼögö ba niha simane daʼö.” Hadia mifadunö-dunö ba nösi nomomi mazui khö ndra talifusö ba wamati hewisa dania waʼauri nitötönami ba gulidanö si bohou?

15. Hewaʼae irasoi waʼataʼu Tanja, hadia zanolo yaʼia ba wolawa faʼataʼunia andrö?

¹⁵ Angeragö zalua khö dalifusöda ira alawe ba Makedonia Utara sotöi Tanja. Laʼuduni ia ira satuania me ibörögö ifahaʼö ia ba Zura Niʼamoniʼö. Hizaʼi, iʼangerönusi howu-howu nitemania ba zi so miföna irege lö faröi ia ba tola ilawa waʼataʼunia. Imane, ”So ösa niʼataʼufigu, sindruhu-ndruhu alua ia. Iböbözido mamagu ero mangawulido ba gangowuloa. Lafetaʼu ndraʼo ira satuagu wa hasambalö labunudo na tobali ndraʼo Samaduhuʼö Yehowa.” Ba gafuriata, lafofanö ia moroi ba nomo. Hadia nifaluania? Imane, ”Uʼosambuaʼö dödögu ba waʼomuso dödö nirasoigu sagötö faʼara börö me ufili ba wondrorogö faʼalöfaröigu. Uʼangeragö hewisa wamahowuʼö Yehowa ndraʼo ba gulidanö si bohou dania börö zi no uröi ba gulidanö andre, ba tola uʼolifugö fefu zi lö sökhi si no alua.” Sindruhu-ndruhu irorogö waʼalöfaröinia Tanja. Ba börö wanolo moroi khö Yehowa,  tola isöndra nahia waʼatoröi. Iadaʼa, no mangowalu Tanja khö dalifusöda ira matua si lö faröi ba mangai halöwö safönu inötö ira si fao faʼomuso dödö.

AROʼÖ WAʼAFADUHU DÖDÖU KHÖ YEHOWA IʼOTARAI IADAʼA

16. Hana wa lö ataʼu ita ba ginötö taʼila waʼalua nisura ba Luka 21:​26-28?

¹⁶ Sagötö alua wamakao sabölö-bölö, ato niha gulidanö ’satata töla börö waʼataʼu’. Hizaʼi, lö tebulö mosindro nono mbanua Lowalangi ba lö khöra faʼataʼu. (Baso Luka 21:​26-28.) Hana wa lö ataʼu ita? Börö me no tafahaʼö ita ba wamaduhusi tödö Yehowa. Iwaʼö Tanja, si no mutötöi moroi yawa, wa möi fanolonia zalua khönia ba zilalö ba wanaögö abula dödö tanö böʼö ba zi so miföna. Imane, ”Ufahaʼö ndraʼo wa lö tebulö itolo ita Yehowa gofu hadia gabula dödö salua ba ifahowuʼö göi ita. Itaria ba wamaigida hulö niha böʼö zamatörö fefu hadia ia, hizaʼi sindruhunia Yehowa zamatörö fefu hadia ia, tenga niha gulidanö. Hewaʼae abua sibai gabula dödö salua, hasambalö teʼasiwai daʼö ba gafuriata.”

17. Hewisa ayati ba ndröfi 2024 möi fanoloda? (Faigi gambara ba guli majalah.)

¹⁷ Iadaʼa, oya sibai zi möi börö wametaʼuda. Hizaʼi simane Dawido, böi tatehegö ifatörö ita faʼataʼu andrö. Ayati ba ndröfi 2024, daʼö wangandrö Dawido khö Yehowa. Imane, ”Ba ginötö waʼataʼu, faduhu dödögu khöu.” (Si. 56:3) Nehegö hadia niwaʼö zi sambua referensi sanandrösa ba ayati daʼa. Imane, ”Lö iʼangera-ngeragö manö Dawido hadia zi möi börö wametaʼunia mazui abula dödö salua. Hizaʼi, iʼodaligö Zangefaʼö yaʼia.” Ba zi hauga waŵa fönada, angeragö sanandrösa ba ayati ba ndröfi daʼa, mendrua manö na alua khömö gabula dödö si möi fametaʼumö. Beʼe ginötöu ba woʼangerönusi hadia nifalua Yehowa me föna, iadaʼa, hegöi ba zi so miföna. Simane Dawido, si fao faʼafaduhu dödö tola ömane, ”Faduhu dödögu khöu, yaʼugö Lowalangi; lö ataʼu ndraʼo.”—Si. 56:4.