So ösa niʼebuaʼö ba mbanua sangokhögö lala wangera-ngera wa tohude waʼabölö ndra matua moroi khö ndra alawe. Duma-dumania, imane Hans, samösa satua samasui ba Bolivia, ”So ösa ndra matua niʼebuaʼö ba mbanua sabölö mohöni-höni ira matua. Daʼö mbörö wa so ba dödöra wa tohude ira moroi ba ndra alawe, irege asese laʼaohasi ba dödö ndra alawe.” Imane samösa satua sokubaloi moroi ba Taiwan sotöi Shengxian, ”Ba mbanua si toröi yaʼo, tebai labeʼe mbua gera-erara ira alawe khö ndra matua. Na so ndra matua samondrondrongo bua gera-era ndra alawe, lua-luania laʼaohasi ba dödö ia.” So göi lala tanö böʼö nifaluara ba wangoromaʼö faʼafatuwura ba ndra alawe. Duma-dumania lawaʼö mbude-bude si möi fangailasi ndra alawe.

Hizaʼi, gofu hezo teʼebuaʼö zi samösa ira matua, tola iʼokhögö lala wangera-ngera satulö wa fagölö wetaro ndra alawe khö ndra matua. (Ef. 4:​22-24) Tola ifalua daʼö na iʼoʼö Yehowa. Ba artikel daʼa, tatutunö dania hewisa wetaro ndra alawe ba wamaigi Yehowa, hewisa ndra talifusöda ira matua woloʼöra Yehowa ba woʼameʼegö tödö ndra talifusöda ira alawe, ba hewisa ndra satua sokubaloi enaʼö tobali ira duma-duma ba wamosumange ndra talifusöda ira alawe.

HEWISA WETARO NDRA ALAWE BA WAMAIGI YEHOWA?

No ibeʼe duma-duma soʼahonoa Yehowa hewisa ba woʼameʼegö tödö ira alawe. Börö me Ama sebua faʼomasi ia, andrö wa iʼomasiʼö fefu nononia si so ba gulidanö. (Yoh. 3:16) Ba wamaiginia, ira talifusöda ira alawe si lö faröi hulö nononia alawe sebua böli. Nehegö duma-duma andre sangoromaʼö wa iʼomasiʼö ba iʼameʼegö tödö ndra alawe.

Ifagölö-gölösi dödönia. Ifazökhi niha Yehowa, ira alawe hegöi ira matua si fakhili-khili khönia.  (1 Mo. 1:27) Lö abölö atua-tua mazui tohude wamazökhinia ira matua moroi khö ndra alawe; lö abölö iʼomasiʼö ndra matua moroi ba ndra alawe. (2 Ng. 19:7) Faoma ibeʼe waʼatua-tua khö ndra matua hegöi ira alawe enaʼö faoma aboto ba dödöra zindruhu moroi ba Zura Niʼamoniʼö, simanö göi ba wangokhögö amuata si sökhi simane niʼokhögö Yehowa. Iʼameʼegö tödö göi wamati ndra matua hegöi ira alawe. Ibeʼe khö ndra matua hegöi ira alawe dötönafö ba wanöndra faʼauri si lö aetu ba gulidanö mazui tötönafö tobali razo hegöi ere ba zorugo. (2 Fe. 1:1) Ba daʼa taʼila wa iʼameʼegö tödö ndra alawe Lowalangi Yehowa.

Ifondrondrongo niwaʼöra. Iʼameʼegö tödö Yehowa hadia nirasoi ndra alawe hegöi abula dödöra. Duma-dumania, ifondrondrongo ba ibeʼe wanema li ba wangandrö Rakhela hegöi Khana. (1 Mo. 30:22; 1 Sa. 1:​10, 11, 19, 20) Ibeʼe göi gehehania Yehowa khö ndra sanura Sura Niʼamoniʼö enaʼö lasura waö-waö ndra matua samondrondrongo bua gera-era nifaʼema ndra alawe. Duma-dumania, iʼoʼö Aberahamo wehede Yehowa enaʼö ifondrondrongo li woʼomonia sotöi Sara. (1 Mo. 21:​12-14) Razo Dawido göi ifondrondrongo niwaʼö Abigaila. Imane tödönia wa Yehowa zamatenge Abigaila ba wahuhuosa khönia. (1 Sa. 25:​32-35) Yesu, soʼahonoa ba woloʼö amuata Namania, ifondrondrongo niwaʼö ninania sotöi Maria. (Yoh. 2:​3-10) Daʼa zangoromaʼö wa ifondrondrongo ba iʼameʼegö tödö ndra alawe Lowalangi Yehowa.

Ifaduhusi tödö ira. Duma-dumania, faduhu dödö Yehowa khö Khawa wa tola ilului ba wondrorogö ulidanö. (1 Mo. 1:28) Daʼa zangoromaʼö wa ba wamaigi Yehowa lö abölö tohude Gadamo moroi khö woʼomonia Khawa. Hizaʼi, ifataro Khawa andrö Yehowa tobali sanolo sebua böli khö Gadamo. Iʼogunaʼö göi Yehowa ndra alawe samaʼeleʼö sotöi Debora hegöi Huleda ba wameʼe mene-mene ba nono mbanuania, simanö göi khö ndra sanguhuku awö razo. (Sangu. 4:​4-9; 2 Ra. 22:​14-20) Iadaʼa, faduhu göi dödö Yehowa khö ndra alawe niha Keriso samalua halöwö ba organisasinia. So zi tobali sanuriaigö, perintis biasa ba utusan injil. Lalului halöwö ba wogambaraini, ba wamazökhi tomosa, ba wondrorogö Nahia Gangowuloa hegöi fasilitas gödo ndraha. So zohalöwö ba Mbetieli hegöi ba RTO. Ira talifusöda ira alawe andrö amaedola zaradadu sato sibai niʼogunaʼö Yehowa ba wamalua ohitö dödönia. (Si. 68:11) Ba daʼa taʼila, wa lö iʼaohasi ba dödö ndra alawe Yehowa mazui iwaʼö wa lö khöra faʼabölö.

HEWISA NDRA TALIFUSÖDA IRA MATUA WOLOʼÖ DUMA-DUMA YEHOWA?

Yaʼami talifusö ira matua, moguna mitörö zindruhu ba wamareso tödömi hadia no miʼoʼö Yehowa ba woʼameʼegö tödö ira alawe. Enaʼö tola tafalua daʼö moguna khöda wanolo. Simane si samösa doto, moguna khönia fakake enaʼö iʼila hadia so wökhö ba dödö zi samösa niha mazui löʼö. Simane daʼö göi, enaʼö taʼila hadia no taʼoʼö Yehowa sanandrösa ba woʼameʼegö tödö ira alawe, moguna khöda wanolo moroi khö ndra si fahuwu si sökhi hegöi Taromali Lowalangi. Hadia zinangea tafalua enaʼö tatema wanolo andrö?

Sofu ba zi fahuwu khöu. (Amd. 18:17) Tola ösofu ba zi fahuwu khömö si tola öfaduhusi tödö ba sameʼe fanuturu lala si sökhi. Duma-dumania sofu khönia: ”Moloʼö yaʼugö, hadia sökhi gamuatagu khö ndra talifusöda ira alawe? Hadia larasoi wa uʼameʼegö tödö ira? Hadia so zinangea udouʼö ba woʼameʼegö tödö yaʼira?” Böi abao dödöu na ifatunö si fahuwu khöu hadia gamuata sinangea öbulöʼö. Moguna ötemaʼö daʼö ba öfalua soroi ba dödö.

Fahaʼö ndraʼugö ba Zura Niʼamoniʼö. Daʼa lala fondrege zi sökhi ba wamareso hadia no sökhi gamuatada khö ndra talifusöda ira alawe. (Heb. 4:12) Ba ginötö tafahaʼö ita ba Zura Niʼamoniʼö, taʼila wa so ndra matua soʼameʼegö tödö ira alawe ba so göi zi löʼö. Moroi ba duma-dumara, tola taʼila hadia no taʼameʼegö tödö ndra alawe mazui löʼö. Baero daʼö, enaʼö böi taʼogunaʼö zi sambua ayati ba wotuhini lala wangera-ngera si fasala sanandrösa ba ndra alawe, moguna tafareso fefu nösi Zura Niʼamoniʼö hewisa zatulönia. Duma-dumania moloʼö 1 Fetero 3:​7, moguna muʼameʼegö tödö woʼomo ira alawe börö me hulö ”mbowoa tanö salio aboto” ira. a Hadia daʼö geluahania wa ambö atua-tua ira mazui tebai lafalua simane nifalua ndra matua? Tenga daʼö geluahania!  Fatimbaisi niwaʼö Wetero ba Galatia 3:​26-29. Ba daʼö itutunö wa no ifili Yehowa ndra alawe hegöi ira matua tobali samatörö awö Yesu ba zorugo. Ba ginötö tafahaʼö ita ba Daromali Lowalangi ba taʼandrö göi mbua gera-era zi fahuwu khöda sanandrösa ba lala woʼameʼegö tödö ndra alawe, tola tobali famahaʼöda daʼö ba wangoromaʼö famosumange khö ndra talifusöda ira alawe.

HEWISA NDRA SATUA SOKUBALOI BA WAMOSUMANGE IRA TALIFUSÖDA IRA ALAWE?

Ira talifusöda ira matua ba mbanua niha Keriso, tola lafahaʼö ira moroi khö ndra satua sokubaloi hewisa lala wangoromaʼö famosumange khö ndra talifusöda ira alawe. Hewisa ndra satua sokubaloi wameʼe duma-duma ba wamosumange ira talifusöda ira alawe? Nehegö wanuturu lala andre.

Lasuno ndra talifusöda ira alawe. No tobali duma-duma si sökhi Waulo khö ndra satua sokubaloi. Lö ibiniʼö wameʼe fanuno khö ndra talifusöda ira alawe ba zura nifaʼoheʼönia ba mbanua niha Keriso si so ba Roma. (Rom. 16:12) Khalaigö hawaʼomuso dödö ndra talifusöda ira alawe me labaso zura Waulo andrö ba mbanua niha Keriso. Simanö göi ndra satua sokubaloi iadaʼa, lasuno ndra talifusöda ira alawe börö gamuatara si sökhi hegöi famorege si no lafalua ba wangai halöwö Yehowa. Na lafalua daʼö, laʼila ira talifusöda ira alawe wa laʼameʼegö tödö ba lafosumange ira. Fehede famarou dödö nifaʼema zatua sokubaloi, ebua sibai lua-luania. Itaria, daʼö zoguna khö ndra talifusöda enaʼö lö faröi ira ba wamosumange Yehowa.—Amd. 15:23.

Na lasuno ndra talifusöda ira alawe, moguna lafalua daʼö ira satua sokubaloi soroi ba dödö ba latatugöi hadia nisunora. Hadia mbörö? Imane samösa talifusöda ira alawe sotöi Jessica, ”Omuso dödöma na laʼandrö saohagölö ira talifusöda ira matua ba wamorege si no mafalua. Hizaʼi, abölö sökhi nasa na lafatunö hadia nisunora, duma-dumania börö me agahono ndraonoma wedadao ba gangowuloa, mazui famorege nifaluama ba wamaondragö  niha nifahaʼöma ba Zura Niʼamoniʼö weʼamöi ba gangowuloa.” Na lafalua daʼö ira satua sokubaloi, larasoi ira talifusöda ira alawe wa moguna ba laʼameʼegö tödö ira ba mbanua niha Keriso.

Lafondrondrongo niwaʼöra. Satua sokubaloi si so fangide-ngideʼö, aboto ba dödönia wa moguna ifondrondrongo mbua gera-era si sökhi nifaʼema ndra talifusöda ira alawe. Tola laʼandrö mbua gera-erara ba lahaogö wamondrondrongo na so nifaʼemara. Na lafalua daʼö, teʼaroʼö ndra talifusöda ira alawe ba latema mbua si sökhi ira satua sokubaloi. Imane satua sokubaloi sohalöwö ba Mbetieli sotöi Gerardo, ”Börö me uʼandrö mbua gera-era ndra talifusöda ira alawe, tobali fanologu daʼö ba wamalua halöwögu. Ato ba gotaluara zi no ara mangai halöwö moroi khö ndra talifusöda ira matua.” Ba mbanua niha Keriso, ato ndra talifusöda ira alawe si tobali perintis irege ahori laʼila sanandrösa ba niha ba mbanua si toröi yaʼira. Imane satua sokubaloi sotöi Bryan, ”Ato ndra talifusöda ira alawe sangokhögö amuata si sökhi ba faʼatua-tua soguna ba organisasi. Omasi ita taʼoʼö duma-dumara!”

Satua sokubaloi satua-tua, lö iʼaohasi ba dödö mbua gera-era nibeʼe ndra talifusöda ira alawe. Hadia mbörö? Imane satua sokubaloi sotöi Edward, ”Bua gera-era hegöi si no irai itörö si samösa talifusöda ira alawe, tola möi fanolo khö ndra satua sokubaloi ba wangiʼila hewisa na alua gabula dödö ba laʼila latöfaigö ba dödöra zalua ba niha böʼö.” (Amd. 1:5) Hewaʼae na lö laʼoʼö mbua gera-era nibeʼe dalifusöda ira alawe, hizaʼi moguna laʼandrö saohagölö khönia börö me no ifaʼema nösi dödönia ba no ihaogö iʼangeragö daʼö.

Lafahaʼö ndra talifusöda ira alawe. Satua sokubaloi satua-tua, laʼalui ginötö ba wamahaʼö ira talifusöda ira alawe. Duma-dumania, lafahaʼö hewisa lala ba wondröniaʼö angowuloa wanuriaigö, enaʼö tola lafalua daʼö na lö hadöi talifusöda ira matua si no tebayagö idanö. Lafahaʼö ira ba wolohe mesin irege tola fao ira ba halöwö fangotomosi mazui fangehaogö tomosa ba organisasi. Ba Mbetieli, ira talifusöda sondröniaʼö no lafahaʼö ndra talifusöda ira alawe ba wamalua ngawalö halöwö, duma-dumania ba wondrorogö tomosa, fowöli soguna, fangerai kefe, sonekhe ba program komputer, ba tanö böʼönia. Ba ginötö lafalua daʼö, no laforomaʼö ira satua sokubaloi wa tola mufaduhusi tödö ndra talifusöda ira alawe.

Ato ndra talifusöda ira alawe sangogunaʼö famomaha nitemara moroi khö ndra satua sokubaloi ba wanolo niha böʼö. Duma-dumania, ira talifusöda ira alawe sanema famomaha ba halöwö konstruksi, fao ira ba wamazökhi mangawuli nomo sadudu me alua bencana alam. Ira talifusöda ira alawe sanema famomaha ba wanuriaigö ba nahia sato niha, latolo göi ndra talifusöda tanö böʼö ba wamalua daʼö. Hewisa dödö ndra talifusöda ira alawe khö ndra satua sokubaloi samomaha yaʼira? Imane samösa talifusöda ira alawe sotöi Jennifer, ”Me faodo ba halöwö fangotomosi Nahia Gangowuloa, so samösa dalifusöda sondröniaʼö sameʼe inötönia ba wamomaha yaʼo. Ifaigi-faigi halöwögu ba isuno ndraʼo. Omasido falulu fohalöwö khönia börö me urasoi wa iʼameʼegö tödö ba ifaduhusi tödö ndraʼo.”

BUA NITEMADA NA TAʼAMEʼEGÖ TÖDÖ NDRA TALIFUSÖDA IRA ALAWE HULÖ NÖSI NOMODA

Simane Yehowa, taʼomasiʼö sibai ndra talifusöda ira alawe si lö faröi! Börö daʼö, taʼameʼegö tödö ira hulö nösi nomoda. (1 Ti. 5:​1, 2) No töi sebua ba omuso dödöda börö me tola falulu fohalöwö ita khöra. Omuso göi dödöda börö me larasoi wa taʼomasiʼö ba tatuhini ira. Imane talifusöda ira alawe sotöi Vanessa, ”Tefarou dödögu ba nifalua ndra talifusöda ira matua si so ba organisasi Yehowa. Uʼandrö saohagölö khö Yehowa me tola farahu ndraʼö ba organisasi daʼa.” Imane talifusöda ira alawe si so ba Taiwan, ”Uʼandrö sibai saohagölö khö Yehowa hegöi organisasinia börö me laʼameʼegö tödö ba lafosumange ndra alawe. Möi fangaʼaroʼö wamatigu daʼö ba itugu uʼameʼegö tödö töi sebua niʼokhögögu me tola farahu ndraʼo ba organisasi Yehowa.”

Hawaʼomuso dödö Yehowa me iʼila ndra talifusöda ira matua laʼameʼegö tödö ba lafosumange ndra alawe simane nifaluania! (Amd. 27:11) Imane Benjamin, satua sokubaloi si toröi ba Skotlandia, ”Ba gulidanö andre, lö lafosumange ndra alawe. Börö daʼö, omasi ita na larasoi wa tafosumange ba taʼomasiʼö ira na tohare ira ba Nahia Gangowuloa.” Dataforege ba woloʼö duma-duma Yehowa ba wangomasiʼö hegöi ba wamosumange ira talifusöda ira alawe börö me no sinangea latema daʼö.—Rom. 12:10.